| ການເຊື່ອມຕໍ່ທຸລະກິດ ແລະ ການແລກປ່ຽນວັດທະນະທຳ ຫວຽດນາມ ແລະ ໄອແລນ | |
| ການຮ່ວມມື ແລະ ພັດທະນາລະບົບປະກັນສຸຂະພາບຢູ່ຫວຽດນາມໃຫ້ຍືນຍົງ |
 |
| ທ່ານເອກອັກຄະລັດຖະທູດ ຫງວຽນຮວ່າງລອງ ໄດ້ຍື່ນສານຕາຕັ້ງຕໍ່ທ່ານປະທານາທິບໍດີ ໄອແລນ (ພາບ:TTXVN) |
ວັນທີ 24 ພຶດສະພາ, ຢູ່ທຳນຽບປະທານາທິບໍດີ ໄອແລນ ທີ່ນະຄອນ Dublin, ທ່ານເອກອັກຄະລັດຖະທູດ ຫວຽດນາມ ປະຈຳ ລາຊະອານາຈັກ ອັງກິດ ທັງຮັບຜິດຊອບໄອແລນ ຫງວຽນຮວ່າງລອງ ໄດ້ຍື່ນສານຕາຕັ້ງຕໍ່ທ່ານປະທານາທິບໍດີ ໄອແລນ Michael D. Higgins ຕາມພິທີການຂອງລັດ.
ທີ່ການຕ້ອນຮັບສະເພາະ ທ່ານເອກອັກຄະລັດຖະທູດ ພາຍຫຼັງພິທີຍື່ນສານຕາຕັ້ງ, ທ່ານປະທານາທິບໍດີ Michael D. Higgins ຕີລາຄາສູງຕໍ່ການພັດທະນາມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ, ໂດຍສະເພາະແມ່ນໃນຂົງເຂດເສດຖະກິດ, ການຮ່ວມມືພັດທະນາ, ການສຶກສາ ແລະ ວັດທະນະທຳ, ພ້ອມກັນນັ້ນ ກໍ່ສະເໜີໃຫ້ສອງຝ່າຍເພີ່ມທະວີການຮ່ວມມືໃນຂົງເຂດການປ່ຽນແປງຂອງດິນຟ້າອາກາດ ແລະ ການປົກປັກຮັກສາສິ່ງແວດລ້ອມ.
ສ່ວນທ່ານເອກອັກຄະລັດຖະທູດ ຫງວຽນຮ່ວາງລອງ ຢືນຢັນວ່າຈະມານະພະຍາຍາມຈົນສຸດຄວາມສາມາດຂອງຕົນເພື່ອຊຸກຍູ້ການພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດໄດ້ສືບຕໍ່ພັດທະນາຢ່າງເລິກເຊິ່ງກວ້າງຂວາງ, ມີປະສິດທິຜົນ ແລະ ຍືນຍົງ. ທ່ານເອກອັກຄະລັດຖະທູດ ໄດ້ແຈ້ງໃຫ້ທ່ານປະທານາທິບໍດີ Higgins ຊາບກ່ຽວກັບສະພາບການພັດທະນາເສດຖະກິດ - ສັງຄົມ ແລະ ວຽກງານການຕ່າງປະເທດຂອງ ຫວຽດນາມ, ກໍຄືບັນດາຜົນງານໃນການຮ່ວມມືສອງຝ່າຍ ນັບແຕ່ຄັ້ງທ່ານປະທານາທິບໍດີ ໄປຢ້ຽມຢາມ ຫວຽດນາມ ໃນປີ 2016.
ທ່ານເອກອັກຄະລັດຖະທູດ ປາດຖະໜາວ່າ ທ່ານປະທານາທິບໍດີ Higgins ຈະສະໜັບສະໜູນໃຫ້ສອງປະເທດໄດ້ຂະຫຍາຍການຮ່ວມມືໃນບັນດາຂົງເຂດໃໝ່ຄື ປ່ຽນແປງໃໝ່ຫົວຄິດປະດິດສ້າງ ແລະ start up, ພະລັງງານທົດແທນ, ກະສິກຳສີຂຽວ, ການທ່ອງທ່ຽວ, ວັດທະນະທຳ ແລະ ການພົບປະແລກປ່ຽນປະຊາຊົນ.
ຫອມມາລາ
