| ທ່ານປະທານສະພາແຫ່ງຊາດກຳປູເຈຍ ຕ້ອນຮັບ ທ່ານເອກອັກຄະລັດຖະທູດ ຫງວຽນຮຸຍຕັງ ເຂົ້າຢ້ຽມຂຳ່ນັບຢ່າງສົມກຽດ | |
| ການພົວພັນມິດຕະພາບ ຫວຽດນາມ - ລາວ ພັດທະນາຢ່າງບໍ່ຢຸດຢັ້ງ |
ຫວ່າງມໍ່ໆນີ້, ຢູ່ຮ່າໂນ້ຍ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ໄດ້ມີການພົບປະກັບ ທ່ານນາງປະທານາທິບໍດີປະເທດເກຣັກ Katerina Sakellaropoulou.
ຕ້ອນຮັບທ່ານນາງປະທານາທິບໍດີປະເທດເກຣັກ Katerina Sakellaropoulou ໃນການຢ້ຽມຢາມ ຫວຽດນາມ ຢ່າງເປັນທາງການ, ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ໄດ້ສະແດງຄວາມຊົມເຊີຍ ທ່ານນາງ Katerina Sakellaropoulou ທີ່ໄດ້ກາຍເປັນປະທານາທິບໍດີແມ່ຍິງຜູ້ທຳອິດຂອງ ສາທາລະນະລັດ ເກຣັກ. ທ່ານປະທານສະພາແຫ່ງຊາດ ຫວຽດນາມ ເວືອງດິ່ງເຫວະ ຖືວ່າ: ການຢ້ຽມຢາມແມ່ນບາດກ້າວສຳຄັນ, ຊຸກຍູ້ການພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືຫລາຍດ້ານລະຫວ່າງ ຫວຽດນາມ ແລະ ເກຼັກ.
ທ່ານປະທານສະພາແຫ່ງຊາດຫວຽດນາມ ພູມໃຈທີ່ເຫັນວ່າ ການພົວພັນມິດຕະພາບ ແລະ ການຮ່ວມມືຫຼາຍດ້ານ ລະຫວ່າງສອງປະເທດ ໄດ້ຮັບການຮັດແໜ້ນ ແລະ ພັດທະນາຢ່າງດີງາມໃນໄລຍະຜ່ານມາ, ໄດ້ສະແດງໃຫ້ເຫັນເຖິງການແລກປ່ຽນຄະນະຜູ້ແທນທຸກຂັ້ນ, ພິເສດແມ່ນການນຳຂັ້ນສູງສອງປະເທດ.
ການຮ່ວມມືດ້ານເສດຖະກິດ - ການຄ້າໄດ້ພັດທະນາຢ່າງຕັ້ງໜ້າ, ພິເສດແມ່ນນັບແຕ່ສັນຍາການຄ້າເສລີລະຫວ່າງຫວຽດນາມ ແລະ ສະຫະພາບເອີລົບ (EVFTA) ໄດ້ຮັບການປະຕິບັດ.
 |
| ເພີ່ມທະວີການພົວພັນມິດຕະພາບທີ່ເປັນມູນເຊື້ອລະຫວ່າງຫວຽດນາມ ແລະ ເກຣັກ. (ພາບ: VGP) |
ທ່ານປະທານສະພາແຫ່ງຊາດຫວຽດນາມ ສະເໜີໃຫ້ 2 ປະເທດສືບຕໍ່ຊຸກຍູ້ການຮ່ວມມືໃນບັນດາຂົງເຂດທີ່ປະເທດເກຣັກ ມີກຳລັງແຮງ ແລະ ຫວຽດນາມ ມີຄວາມຕ້ອງການ ຄື: ເສດຖະກິດທາງທະເລ, ສ້າງກຳປັ່ນ, ທ່າກຳປັ່ນ, ການທ່ອງທ່ຽວ...; ແລະໃນຂະນະດຽວກັນ ກໍເຫັນດີເປັນເອກະສັນກັນ ແລະ ລົງນາມໃນສັນຍາຫຼີກລ່ຽງການເກັບພາສີຊ້ອນ ແລະ ສັນຍາການຂົນສົ່ງທາງທະເລ ເພື່ອສ້າງເງື່ອນໄຂສະດວກໃຫ້ແກ່ການແລກປ່ຽນດ້ານເສດຖະກິດການຄ້າ ລະຫວ່າງສອງຝ່າຍ.
ໂດຍສະແດງຄວາມຂອບໃຈທີ່ສະພາແຫ່ງຊາດເກຣັກ ໄດ້ອະນຸມັດສັນຍາ EVFTA ໂດຍໄວ, ທ່ານປະທານສະພາແຫ່ງຊາດ ຫວັງວ່າ ສະພາແຫ່ງຊາດ ເກຣັກ ຈະຊຸກຍູ້ການໃຫ້ສັດຕະຍາບັນສັນຍາອາລັກຂາການລົງທຶນ EU - ຫວຽດນາມ ( EVIPA), ຍົກເລີກບັດເຫຼືອງສຳລັບສິນໃນນ້ຳຫວຽດນາມ.
2 ຝ່າຍສົມທົບກັນຢ່າງແໜ້ນແຟ້ນ, ຍາດແຍ່ງເອົາຜົນປະໂຫຍດທີ່ EVFTA ແລະ EVIPA ນຳມາໃຫ້, ພິເສດແມ່ນປົກປັກຮັກສາສິດຜົນປະໂຫຍດອັນຊອບທຳຂອງວິສາຫະກິດ 2 ປະເທດ ໃນການລົງທຶນ ແລະ ດຳເນີນທຸລະກິດຢູ່ຕະຫຼາດຂອງແຕ່ລະຝ່າຍ ໃນໄລຍະຫຼັງ Covid-19. 2 ຝ່າຍຊຸກຍູ້ການສ້າງການພົວພັນແຮກສ່ຽວ ລະຫວ່າງບັນດາທ້ອງຖິ່ນຂອງ 2 ປະເທດ, ໃນນັ້ນມີການປະຕິບັດບັນດາລະບຽບການແຮກສ່ຽວ ລະຫວ່າງ Sparta ແລະ ນະຄອນເຫວ້ ໃຫ້ສຳເລັດ, ປະກອບສ່ວນຊຸກຍູ້ການພົວພັນແລກປ່ຽນປະຊາຊົນ.
ເນື່ອງໃນໂອກາດນີ້, ທ່ານປະທານສະພາແຫ່ງຊາດ ກໍ່ຂອບອົກຂອບໃຈ ແລະ ຫວັງວ່າ ທ່ານນາງປະທານາທິບໍດີ Katerina Sakellaropoulou ແລະ ລັດຖະບານ ເກຼັກ ຈະສືບຕໍ່ສ້າງເງື່ອນໄຂສະດວກໃຫ້ປະຊາຄົມຊາວ ຫວຽດນາມ ຢູ່ ເກຼັກ ດຳລົງຊີວິດ, ສຶກສາ ແລະ ເຮັດວຽກຢ່າງເປັນປົກກະຕິ.
ທ່ານນາງປະທານາທິບໍດີ ເກຼັກ Katerina Sakellaropoulou ຕີລາຄາສູງການຕ້ອນຮັບອັນອົບອຸ່ນຂອງຫວຽດນາມ. ທ່ານນາງ ກ່າວວ່າ, ເຖິງວ່າສອງປະເທດຢູ່ຫ່າງໄກກັນດ້ານພູມສາດ, ແຕ່ກໍ່ສາມາດຍູ້ແຮງການຮ່ວມມືໃນຂົງເຂດປະຫວັດສາດ, ວັດທະນະທຳ ແລະ ບັນດານະໂຍບາຍລວມ.
ທ່ານປະທານາທິບໍດີໄດ້ເຫັນດີເປັນເອກະພາບກັບຄຳເຫັນຂອງປະທານສະພາແຫ່ງຊາດວ່າ ບົນພື້ນຖານ EVFTA, 2 ປະເທດຕ້ອງອີງໃສ່ຄວາມສາມາດບົ່ມຊ້ອນຂອງແຕ່ລະປະເທດເພື່ອຊຸກຍູ້ການເພີ່ມທະວີວົງເງິນການຄ້າ.
ທ່ານປະທານາທິບໍດີ ເນັ້ນໜັກວ່າ ການຢ້ຽມຢາມ ຫວຽດນາມ ຢ່າງເປັນທາງການຄັ້ງນີ້ ກໍ່ເພື່ອແນໃສ່ຊຸກຍູ້ການພົວພັນຮ່ວມມືລະຫວ່າງ 2 ປະເທດ, ປາດຖະໜາວ່າ ເມື່ອສັນຍາການຂົນສົ່ງທາງທະເລ ແລະ ສັນຍາຫຼີກລ່ຽງການເກັບພາສີຊ້ອນ ໄດ້ຮັບການລົງນາມ ຈະຊຸກຍູ້ການຄ້າ ແລະ ເສດຖະກິດສອງປະເທດ.
ຄຳຮຸ່ງ
