 |
ພາບປະກອບ
ປັດຈຸບັນ ສປປ ລາວ ມີແຫລ່ງຜະລິດໄຟຟ້າແລ້ວ 54 ແຫ່ງ ລວມກຳລັງການຕິດຕັ້ງ 7.162 ເມກາວັດ ສາມາດຜະລິດພະລັງງານໄຟຟ້າໄດ້ປະມານ 37.086 ລ້ານກິໂລວັດໂມງ/ປີ, ເຊິ່ງມີແຫລ່ງຜະລິດພະລັງງານໄຟຟ້າທີ່ກຳລັງກໍ່ສ້າງ ແລະ ກຳລັງຈະລົງມືກໍ່ສ້າງ 46 ແຫ່ງ ຄາດວ່າຈະສຳເລັດທັງໝົດຮອດປີ 2020-2021 ແລະ ໃນເວລານັ້ນ, ສປປ ລາວ ຈະມີແຫລ່ງຜະລິດພະລັງງານໄຟຟ້າ 100 ແຫ່ງ, ມີກຳລັງຕິດຕັ້ງປະມານ 13.062 ເມກາວັດ ແລະ ມີກຳລັງຜະລິດປະມານ 66.944 ລ້ານ ກິໂລວັດໂມງ/ປີ ໃນນີ້ 85% ຈະສົ່ງອອກໄປຈຳໜ່າຍຢູ່ຕ່າງປະເທດ.
ຜ່ານມາ ສປປ ລາວ ໄດ້ຮັບຜົນສຳເລັດ ໃນການພັດທະນາອຸດສາຫະກຳພະລັງງານໄຟຟ້າ ທີ່ໜັກແໜ້ນ ຕໍ່ເນື່ອງພຽງແຕ່ໄລຍະ 10 ປີ, ສປປ ລາວ ໄດ້ພັດທະນາແຫລ່ງຜະລິດ ພະລັງງານໄຟຟ້າໄດ້ ໃນຈັງຫວະຂອງການຂະຫຍາຍຕົວທີ່ກ້າວກະໂດດ, ເຊິ່ງປີ 2005 ລາວ ມີແຫລ່ງຜະລິດພະລັງງານໄຟຟ້າພຽງແຕ່ 9 ແຫ່ງ ມີກຳລັງຕິດຕັ້ງ 679,5 ເມກາວັດ ສາມາດຜະລິດພະລັງງານໄຟຟ້າໄດ້ພຽງ 3.236,9 ລ້ານ ກິໂລວັດໂມງ/ປີ ເທົ່ານັ້ນ.
ພ້ອມນີ້, ທ່ານ ຄຳມະນີ ອິນທິລາດ ຍັງໃຫ້ຮູ້ວ່າ: ໂຄງການເຂື່ອນໄຟ້ານ້ຳງື່ມ 1 ພາກຂະ ຫຍາຍເບີ 7-8 ເປັນໂຄງການຂອງລັດຖະບານ, ໂດຍຂະຫຍາຍອອກຈາກໂຄງການ ເຂື່ອນໄຟຟ້ານ້ຳງື່ມ 1 ມີຈຸດປະສົງ ເພື່ອເພີ່ມກຳລັງການຜະລິດ ທັງເປັນການຮັບຮອງ ການຊົມໃຊ້ໄຟຟ້າ ຢູ່ພາຍໃນປະເທດໃຫ້ພຽງພໍ, ເຊິ່ງໂຄງການດັ່ງກ່າວ ໄດ້ເລີ່ມການສຶກສາ-ສຳຫລວດ ໃນປີ 2012 ແລະ ລົງມືກໍ່ສ້າງໃນປີ 2015 ດ້ວຍເງິນລົງທຶນທັງໝົດປະມານ 122 ລ້ານກວ່າໂດລາສະຫະລັດ; ໂຄງການດັ່ງກ່າວ, ນອກຈາກຈະສ້າງຜົນປະໂຫຍດທາງກົງ ໃຫ້ລັດຖະບານແລ້ວ ຍັງເປັນໂຄງການທີ່ມີ ປະສິດທິຜົນສູງ, ສ້າງຜົນກະທົບຕໍ່ສິ່ງແວດລ້ອມບໍ່ຫລາຍ ແລະ ຍັງເປັນໂຄງການຄ້ຳປະກັນດ້ານພະລັງງານພາຍໃນປະເທດໃຫ້ພຽງພໍ ໂດຍສະເພາະໃນລະດູແລ້ງ.
 |
ພາບປະກອບ
ການກໍ່ສ້າງເຂື່ອນໄຟຟ້າພະລັງນ້ຳ ນ້ຳອູ 1 ເຊິ່ງຕັ້ງຢູ່ເຂດເມືອງປາກອູ ແຂວງຫລວງພະບາງ ນັບແຕ່ຕົ້ນປີ 2016 ເປັນຕົ້ນມາ ທຸກໜ້າວຽກໄດ້ຮັບການຈັດຕັ້ງປະຕິບັດ ມີຄວາມຄືບໜ້າດີ ເປັນຕົ້ນແມ່ນປະຕູນ້ຳ, ບ່ອນຕິດຕັ້ງເຄື່ອງຈັກ ແລະ ອືນໆ, ສິ່ງສຳຄັນໄດ້ສຳເລັດການອ່ວຍນ້ຳ ເມື່ອກາງປີ 2017, ມາຮອດປັດຈຸບັນ ການກໍ່ສ້າງເຂື່ອນດັ່ງກ່າວສະເລ່ຍສຳເລັດແລ້ວ 60%. ໂດຍການລົງທຶນຂອງກຸ່ມ ບໍລິ ສັດ ພາວເວີ ໄຊນາ ແລະ ຮັບເໝົາກໍ່ສ້າງໂດຍ ບໍລິສັດ ຊີໂນ ໄຮໂດຣ ຈຳກັດ, ເຊິ່ງມີອາຍຸການສໍາປະ ທານ 29 ປີ.
ເຂື່ອນໄຟຟ້ານ້ຳເທີນ 1 ຕັ້ງຢູ່ນ້ຳກະດິງ ມີຄວາມສູງ 177 ແມັດ ຍາວ 771 ແມັດ ສັນເຂື່ອນກວ້າງ 8 ແມັດ ບໍລິມາດໂຕເຂື່ອນ 3,8 ລ້ານແມັດກ້ອນ ບໍລິມາດນ້ຳໃນອ່າງ 3 ຕື້ແມັດກ້ອນ ກຳລັງການຜະລິດ 650 ເມກາວັດ ມູນຄ່າການກໍ່ສ້າງ 1.335 ລ້ານໂດລາສະຫະລັດ ຫຼື ປະມານ 11.533 ຕື້ກີບ ປັດຈຸບັນໂຄງການມີຄວາມຄືບໜ້າ 50% ແລະ ຄາດວ່າຈະສຳເລັດໃນທ້າຍປີ 2021 ໂດຍພະລັງງານຈະຂາຍໃຫ້ການໄຟຟ້າຝ່າຍຜະລິດແຫ່ງປະເທດໄທ 80% ແລະ ລັດວິສະຫະກິດໄຟຟ້າລາວ 20%.
（ໄຊພອນ）
