ສະຫະປະຊາຊາດ ເພື່ອການພັດທະນາ ຈະສືບຕໍ່ສະໜັບສະໜູນ ສປປ ລາວ

ທ່ານ ສະເຫຼີມໄຊ ກົມມະສິດ ຕ້ອນຮັບ ທ່ານ ນາງ ຣິຄາດ້າ ຣິເຈີ (Ms Ricarda Rieger)

ໃນຂະນະທີ່ຜູ້ຕາງໜ້າ UNDP ສັນຍາວ່າ ຈະສືບຕໍ່ສະໜັບສະໜູນການພັດທະນາເສດຖະກິດ-ສັງຄົມຂອງ ສປປ ລາວ ໂດຍສະເພາະຂະແໜງບຸລິມະສິດຂອງລັດຖະບານ. ໃນໂອກາດນີ້ ທ່ານ ສະ ເຫຼີມໄຊ ກົມມະສິດ ກໍໄດ້ສະ ແດງຄວາມຍິນດີຕ້ອນຮັບມາຍັງຜູ້ຕາງໜ້າອົງການ UNDP ຄົນໃໝ່ປະຈຳ ສປປ ລາວ ພ້ອມທັງສະແດງຄວາມຂອບໃຈ ແລະ ຕີລາຄາສູງຕໍ່ການຮ່ວມມື ທີ່ດີ ແລະ ການຊ່ວຍເຫຼືອຂອງອົງການ UNDP ຕໍ່ສປປລາວໃນໄລຍະຜ່ານມາ, ໃນນັ້ນທ່ານລັດຖະມົນຕີ ຍັງໄດ້ສະແດງຄວາມເຊື່ອໝັ້ນວ່າພາຍໃຕ້ການນຳພາຂອງຜູ້ຕາງໜ້າຄົນໃໝ່, ອົງການ UNDP ຈະເພີ່ມທະວີການຮ່ວມມື ແລະ ສືບຕໍ່ສະໜັບສະໜູນແກ່ສປປລາວໃນການຈັດຕັ້ງປະຕິບັດແຜນຍຸດທະສາດ ໂດຍສະເພາະແມ່ນດ້ານການພັດທະນາລະຫວ່າງສປປລາວ ແລະ ອົງການ UNDP, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ, ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ ແລະ ການປະກອບສ່ວນເຂົ້າໃນການບັນລຸເປົ້າໝາຍການພັດທະນາແບບຍືນຍົງ ເພື່ອໃຫ້ສອດຄ່ອງກັບແຜນຍຸດທະສາດການພັດ ທະນາໃນພາກພື້ນ ແລະ ສາກົນ.

ໃນໂອກາດດຽວກັນນີ້ ທ່ານ ນາງ ຣິຄາດ້າ ຣິເຈີ ໄດ້ ສະແດງຄວາມຂອບອົກຂອບ ໃຈຕໍ່ການຕ້ອນຮັບອັນອົບອຸ່ນຂອງທ່ານ ສະເຫຼີມໄຊ ກົມມະສິດ ແລະ ສະແດງຄວາມຂອບໃຈມາຍັງລັດຖະບານແຫ່ງ ສປປ ລາວ ທີ່ອະນຸມັດໃຫ້ມາປະຕິບັດໜ້າທີ່ ຢູ່ ສປປ ລາວ ແລະ ສັນຍາວ່າ ອົງການ UNDP ຈະສືບຕໍ່ເພີ່ມທະວີການຮ່ວມມືກັບລັດຖະບານລາວໃນການຈັດຕັ້ງປະຕິບັດແຜນງານຕ່າງໆທີ່ເປັນບຸລິມະສິດຂອງ ສປປ ລາວ ໃຫ້ໄດ້ຮັບໝາກຜົນທີ່ດີໃນອະນາຄົດ.

（ແຫຼ່ງ​ຂໍ້​ມູນ​： www.pasaxon.org.la）