ກອງປະຊຸມເຜີຍແຜ່ ເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 8 ສະໄຫມທີ X ແລະ ປະຖະກະຖາ ລະນຶກວັນຄ້າຍວັນເກີດປະທານ ສຸພານຸວົງ ຄົບຮອບ 110 ປີ

08:37 | 16/07/2019

ຫວ່າງແລ້ວນີ້, ຢູ່ຫ້ອງວ່າການສູນກາງພັກ ໄດ້ຈັດກອງປະຊຸມ ເຜີຍແຜ່ເຊື່ອມຊຶມມະຕິກອງປະຊຸມຄົບຄະນະ ຄັ້ງທີ 8 ສະໄຫມທີ X ແລະ ປາຖະກະຖາ ລະນຶກວັນຄ້າຍວັນເກີດ ປະທານ ສຸພານຸວົງ ຄົບຮອບ 110 ປີ, ໂດຍການເປັນປະທານຂອງ ສະຫາຍ ຄຳເກີດ ເວີນຄຳ ຮອງເລຂາ, ຜູ້ປະຈຳການຄະນະພັກຫ້ອງວ່າການສູນກາງພັກ, ມີສະຫາຍ ຄຳຜາ ພິມມະສອນ ຄະນະປະຈຳພັກ, ຮອງຫົວໜ້າ ຫ້ອງວ່າການ ສູນກາງພັກ, ພ້ອມດ້ວຍຄະນະພັກ ແລະ ພະນັກງານຫ້ອງວ່າການສູນກາງພັກເຂົ້າຮ່ວມ.

ໃນໂອກາດດັ່ງກ່າວ, ສະຫາຍ ຄຳເກີດ ເວີນຄຳ ກ່າວວ່າ: ການຈັດກອງປະຊຸມໃນຄັ້ງນີ້, ເພື່ອຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມຄົບຄະນະ ຄັ້ງທີ 8 ສະໄຫມທີ X ຂອງຄະນະບໍລິຫານງານສູນກາງພັກໃຫ້ພະນັກງານ-ລັດຖະກອນ ຢູ່ທົ່ວຫ້ອງວ່າການສູນກາງພັກມີຄວາມຮັບຮູ້, ເຂົ້າໃຈກຳໄດ້ແນວທາງນະໂຍບາຍຂອງພັກ-ລັດ ເພື່ອພ້ອມກັນຜັນຂະຫຍາຍເຂົ້າໃນວຽກງານໃຫ້ມີຜົນສຳເລັດຫລາຍຂຶ້ນກວ່າເກົ່າ. ພ້ອມດຽວກັນນີ້, ກໍໄດ້ຫວນຄືນ ຊີວິດການເຄື່ອນໄຫວປະຕິວັດຂອງປະ ທານ ສຸພານຸວົງ ທີ່ມີຜົນງານອັນໂດດເດັ່ນ ແລະ ຄຸນງາມຄວາມດີຂອງທ່ານ ເພື່ອສືບຕໍ່ເພີ່ມພູນຄູນສ້າງ ແລະ ຮໍ່າຮຽນເອົາເປັນແບບຢ່າງ.

ບັນຍາກາດທີ່ກອງປະຊຸມ

ປະທານ ສຸພານຸວົງ ເປັນຜູ້ນໍາທີ່ມີຄວາມຈົງຮັກພັກດີຕໍ່ອຸດົມການປະຕິວັດຢ່າງເດັດຂາດ, ເປັນເຊື້ອເຈົ້າຜູ້ໜຶ່ງທີ່ມີນ້ຳໃຈຮັກຊາດອັນດູດດື່ມ, ມີຈິດໃຈຕໍ່ຜູ້ຢ່າງອາດຫານ, ມີທັດສະນະຫລັກໝັ້ນ ແລະ ມີນ້ຳໃຈເສຍສະຫລະອັນສູງສົ່ງເພື່ອປະເທດຊາດ ແລະ ປະຊາຊົນ, ປະທານ ສຸພານຸວົງ ເປັນນັກປະຕິວັດ, ນັກຮັກຊາດທີ່ແທ້ຈິງ, ໃນຕະຫລອດຊີວິດຂອງເພີ່ນບໍ່ວ່າຢູ່ໃນຕຳແໜ່ງໃດ, ຄວາມຮັບຜິດຊອບອັນໃດເພີ່ນໄດ້ອຸທິດໝົດຈິດໝົດໃຈດວ້ຍຫົວຄິດປະດິດສ້າງຂອງຕົນເອງໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດເພື່ອເອກະລາດອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນລາວ. ທັງນີ້, ກໍເພື່ອເຮັດໃຫ້ພະນັກງານ-ລັດຖະກອນມີຄວາມເຂົ້າໃຈເຫັນໄດ້ເຖິງມູນເຊື້ອອັນພິລະອາດຫານ ຂອງປະທານ ສຸພານຸວົງ ແລະ ສືບຕໍ່ເພີ່ມພູນຄູນສ້າງ ຄົ້ນຄວ້າຮໍ່າຮຽນເອົາແບບຢ່າງຄຸນງາມຄວາມດີ ຂອງປະທານສຸພານຸວົງ.

（ແຫຼ່ງຂໍ້ມູນ： ຂປລ）