ຫ​ວຽດ​ນາມແລະລາວ ເພີ່​ມ​ທະ​ວີ​ການ​ຮ່ວມ​ມື​​ຄ​ວາມ​ໝັ້ນ​ຄົງ
	ມອບທຶນການສຶກສາ 41 ທຶນ ໄປຮຽນຕໍ່ຢູ່ ອາເມລິກາ ໃຫ້ແກ່ນັກຮຽນມັດທະຍົມຕອນປາຍ ແຂວງ ກຽນຢາງ

ຫວ່າງແລ້ວນີ້, ສື່​ມວນ​ຊົນ​ຈີນ ​ລາຍ​ງານ​ວ່າ ຫວຽດນາມ​ໄດ້​ປ່ຽນ​ແທນ​ຈີນ​ ເປັນ​ຜູ້​ຜະລິດ​ເກີບ​ກິລາ​ໃຫຍ່ຂອງ Nike. ໜັງສືພິມ (Yicai) ໄດ້ຂຽນວ່າ "ໃຜກຳລັງຜະລິດເກີບ Nike: ໃນ 10 ປີ, ຫວຽດນາມໄດ້ປ່ຽນແທນຈີນ": ຖ້າຜູ້ບໍລິໂພກຈີນ ເລືອກເກີບກິລາໃນຮ້ານ Nike, ສ່ວນຫຼາຍແລ້ວພວກເຂົາ ຈະເລືອກຜະລິດຕະພັນທີ່ຜະລິດຢູ່ຫວຽດນາມ.

51% ເກີບກິລາ Nike ຜະລິດຢູ່ຫວຽດນາມ. (ພາບ: cafeF)

ກ່ອນ​ປີ 2010, ຈີນ​ແມ່ນ​ປະ​ເທດ​ຜະ​ລິດບັນດາ​ຜະ​ລິດ​ຕະ​ພັນ​ເກີບ Nike ໃຫຍ່​ທີ່​ສຸດ. ​ແຕ່​ປະຈຸ​ບັນ, ​ເກີບ​ຂອງ Nike ຫຼາຍກວ່າ​ເຄິ່ງໜຶ່ງ​ ແມ່ນ​ຜະລິດ​ຢູ່​ຫວຽດນາມ. ກໍເຊັ່ນດຽວກັນ, ປະເທດຜູ້ຜະລິດຕົ້ນຕໍຂອງ Adidas ກໍບໍ່ແມ່ນປະເທດຈີນ.

ກໍາລັງແຮງອັນໃດທີ່ຍູ້ Nike ແລະ Adidas ຈາກ 'Made in China' ກາຍເປັນ 'Made in Vietnam'? ຈີນສູນເສຍຫຍັງໃນການປ່ຽນແປງການຜະລິດຂະຫນາດໃຫຍ່ນີ້?

ຕາມ​ສຳນັກ​ຂ່າວສານ CNA (ໄຕ້​ຫວັນ), ​ບົດລາຍ​ງານ​ການ​ເງິນ​ຂອງ Nike ​ໃຫ້​ຮູ້​ວ່າ: ​ໃນ​ປີ 2021, ​ມີເຖິງ 51% ຈຳນວນ​ເກີບ​ກິລາ​ຂອງ​ບໍລິສັດ​ເກີບ​ທີ່​ມີ​ຊື່​ສຽງ​ໃນ​ໂລກ​ນີ້ ຈະ​ຖືກ​ຜະລິດ​ຢູ່​ຫວຽດນາມ; ອັດ​ຕາ​ການ​ຜະ​ລິດ​ຂອງ​ຈີນ ​ໄດ້​ຫຼຸດ​ລົງ​ 21​% ຈາກ 35​% ໃນ​ປີ 2006​.

ນັບທັງ ​ອິນ​ໂດ​ເນ​ເຊຍ​ ກໍໄດ້​ລື່ນກາຍ​ຈີນ ​ກາຍ​ເປັນ​ປະ​ເທດ​ຜະລິດ​ສິນຄ້າ​ເກີບ​ Nike ​ໃຫຍ່​ອັນ​ດັບ​ສອງ​ໃນ​ປີ 2020, ​ເນື່ອງ​ຈາກ​ອັດຕາສ່ວນ​ຜະລິດ​ຂອງ​ປະ​ເທດອິນ​ໂດ​ເນ​ເຊຍ​ ໄດ້​ເພີ່ມ​ຂຶ້ນ​ຈາກ 21% ເປັນ 26% ​ໃນ​ຮອບ 15 ປີຜ່ານມາ.

ຜູ້ຊ່ຽວຊານຈີນເຊື່ອວ່າ ການຖອນຕົວເທື່ອລະກ້າວຂອງຕ່ອງໂສ້ການຜະລິດເກີບ Nike ແລະ ຍີ່ຫໍ້ສິນຄ້າກິລາສາກົນຈາກຈີນ ຈະສົ່ງຜົນກະທົບທາງລົບຕໍ່ອຸດສາຫະກໍາການຜະລິດຂອງຈີນ. ນີ້ກໍ​ໝາຍ​ຄວາມ​ວ່າ​ ຈີນ​ຈະ​ສູນ​ເສຍ​ກາ​ລະ​ໂອ​ກາດ​ວຽກ​ເຮັດ​ງານ​ທຳ​ຫຼາຍ​ຢ່າງ, ການ​ເສຍ​ພາ​ສີ​ຢ່າງ​ຫຼວງ​ຫຼາຍ ແລະ​ ສະ​ພາບ​ແວດ​ລ້ອມ​ແຫ່ງ​ການ​ແຂ່ງ​ຂັນ​ທີ່​ດີ.