| ເລີ່ມລົງມືກໍ່ສ້າງ “ທ່າກ່ຳປັ່ນໃຫຍ່ທີ່ສຸດ” ແຫ່ງທຳອິດ ຂອງເຄືອຂ່າຍ Logistic ອັດສະລິຍະ ອາຊຽນ | |
| ວົງເງິນການຄ້າ ຫວຽດນາມ - ສະຫະພັນ ລັດເຊຍ ເພີ່ມຂຶ້ນ 12,07% |
 |
| ພາບປະກອບ: nld.com.vn |
ທີ່ການຖະແຫຼງຂ່າວ ປະກາດຕົວເລກສະຖິຕິເສດຖະກິດ - ສັງຄົມ ໄຕມາດທີ IV ແລະ ປີ 2021 ໄດ້ດຳເນີນໃນຕອນເຊົ້າວັນທີ 29 ທັນວາ, ທ່ານນາງ ຫງວຽນທິເຮືອງ, ຫົວໜ້າກົມໃຫຍ່ສະຖິຕິໃຫ້ຮູ້ວ່າ ຄາດວ່າ GDP ປີ 2021 ເພີ່ມຂຶ້ນ 2,58%. ໃນນັ້ນ, ໄຕມາດທີ I ເພີ່ມຂຶ້ນ 4,72%, ໄຕມາດທີ II ເພີ່ມຂຶ້ນ 6,73%, ໄຕມາດທີ III ຫຼຸດລົງ 6,02%, ໄຕມາດທີ IV ເພີ່ມຂຶ້ນ 5,22 %
ຕາມທ່ານນາງ ຫງວຽນທິເຮືອງ ແລ້ວ, ນີ້ແມ່ນໝາກຜົນທີ່ເປັນໜ້າຊື່ນຊົມໃນສະພາບການຟື້ນຟູເສດຖະກິດໂລກ ທີ່ມີສັນຍານຊ້າລົງຍ້ອນການປະກົດຂຶ້ນຂອງເຊື້ອໄວຣັດກາຍພັນໃໝ່, ໄພເງິນເຟີ້ເພີ່ມຂຶ້ນສູງ, ໂລກລະບາດໂຄວິດ - 19 ໄດ້ເຮັດໃຫ້ລະບົບມູນຄ່າທົ່ວໂລກ ຖືກຕິດຄັດ, ລາຄາວັດສະດຸໃນການຜະລິດເພີ່ມຂຶ້ນແມ່ນສິ່ງທ້າທາຍບໍ່ແມ່ນນ້ອຍໃຫ້ແກ່ການເຄື່ອນໄຫວຂອງການຜະລິດດຳເນີນທຸລະກິດ ຂອງບັນດາປະເທດ.
ໃນລະດັບການເພີ່ມຂຶ້ນລວມຂອງທົ່ວພື້ນຖານເສດຖະກິດ, ຂົງເຂດ ກະສິກຳ, ປ່າໄມ້ ແລະ ສິນໃນນ້ຳເພີ່ມຂຶ້ນ 2,9%, ປະກອບສ່ວນ 13,97% ໃນອັດຕາເພີ່ມຂຶ້ນຍອດມູນຄ່າເພີ່ມຂອງພື້ນຖານເສດຖະກິດ, ພາກພື້ນອຸດສາຫະກຳ ແລະ ກໍ່ສ້າງເພີ່ມຂຶ້ນ 4,05%, ປະກອບສ່ວນ 63,80%, ຂົງເຂດ ການບໍລິການ ເພີ່ມຂຶ້ນ1,22% ປະກອບສ່ວນ 22,23%.
ການຜະລິດອຸດສາຫະກຳໃນໄຕມາດທີ IV/2021 ດີຂຶ້ນພາຍຫຼັງບັນດາທ້ອງຖິ່ນໃນທົ່ວປະເທດປະຕິບັດມະຕິເລກທີ 128 ທີ່ໄດ້ປະກາດໃນວັນທີ 11 ຕຸລາ 2021 ຂອງລັດຖະບານກ່ຽວກັບການຮັບມືຢ່າງປອດໄພ, ມີໄຫວພິບ, ຄວບຄຸມໂລກລະບາດໂຄວິດ - 19 ຢ່າງມີປະສິດທິຜົນດ້ວຍອັດຕາເພີ່ມຂຶ້ນຂອງມູນຄ່າເພີ່ມບັນລຸ 6,52% ເມື່ອທຽບໃສ່ໄລຍະດຽວກັນຂອງປີກ່ອນ. ຄາດວ່າ ທັງປີ 2021, ມູນຄ່າເພີ່ມຂອງຂະແໜງອຸດສາຫະກຳ ເພີ່ມຂຶ້ນ 4,82% ເມື່ອທຽບໃສ່ປີ 2020, ໃນນັ້ນມີອຸດສາຫະກຳປຸງແຕ່ງ, ປະດິດສ້າງເພີ່ມຂຶ້ນ 6,37%.
ໄລ່ລວມປີ 2021, ທົ່ວປະເທດມີວິສາຫະກິດ 116,8 ພັນແຫ່ງຈົດທະບຽນສ້າງຕັ້ງໃໝ່ ດ້ວຍຍອດເງິນຈົດທະບຽນແມ່ນ 1.611,1 ພັນ ຕື້ດົ່ງ ແລະ ຍອດຈຳນວນແຮງງານຈົດທະບຽນເກືອບ 854.000 ຄົນ, ຫຼຸດລົງ 13,4% ກ່ຽວກັບຈຳນວນວິສາຫະກິດ, ຫຼຸດລົງ 27,9% ກ່ຽວກັບທຶນຈົດທະບຽນ ແລະ ຫຼຸດລົງ 18,1% ກ່ຽວກັບແຮງງານເມື່ອທຽບໃສ່ກັບປີກ່ອນ.
ໄປຄຽງຄູ່ກັນນັ້ນ, ມີວິສາຫະກິດ 43,1 ພັນແຫ່ງກັບຄືນການເຄື່ອນໄຫວ (ຫຼຸດລົງ 2,2% ເມືອທຽບໃສ່ກັບປີ 2020), ຍົກຍອດຈຳນວນວິສາຫະກິດສ້າງຕັ້ງໃໝ່ ແລະ ວິສາຫະກິດກັບຄືນການເຄື່ອນໄຫວໃນປີ 2021 ຂຶ້ນເຖິງ ເກືອບ 160.000 ແຫ່ງ, ຫຼຸດລົງ 10,7% ເມື່ອທຽບໃສ່ປີກ່ອນ. ໄລ່ສະເລ່ຍແຕ່ລະເດືອນ ມີ ວິສາຫະກິດໃໝ່ ແລະ ວິສາຫະກິດກັບຄືນການເຄື່ອນໄຫວ 13,3 ພັນແຫ່ງ.
ປີ 2021, ມີຈຳນວນວິສາຫະກິດຢຸດຕິຊົ່ວຄາວການດຳເນີນທຸລະກິດເກືອບ 55.000 ແຫ່ງ, ເພີ່ມຂຶ້ນ 18% ເມື່ອທຽບໃສ່ກັບປີກ່ອນ, 48,1 ພັນວິສາຫະກິດ ຢຸດຕິການເຄື່ອນໄຫວພວມລໍຖ້າການປະຕິບັດລະບຽບການຍຸບເລີກ, ເພີ່ມຂຶ້ນ 27,8%, ມີວິສາຫະກິດ 16,7 ພັນແຫ່ງ ສຳເລັດການປະຕິບັດລະບຽບການຍຸບເລີກ, ຫຼຸດລົງ 4,1%. ໄລ່ສະເລ່ຍແຕ່ລະເດືອນມີວິສາຫະກິດ 10.000 ແຫ່ງຖອນຕົວອອກຈາກການຕະຫຼາດ.
ເງິນລົງທຶນປະຕິບັດທົ່ວສັງຄົມຕາມລາຄາປັດຈຸບັນປີ 2021 ບັນລຸໄດ້ 2.891,9 ພັນຕື້ດົ່ງ, ເພີ່ມຂຶ້ນ 3,2% ເມື່ອທຽບໃສ່ກັບປີກ່ອນ, ເຖິງຢ່າງໃດກໍຕາມ, ນີ້ແມ່ນລະດັບເພີ່ມຂຶ້ນຕ່ຳສຸດໃນຫຼາຍປີຜ່ານມາ ແຕ່ແມ່ນໝາກຜົນທີ່ເປັນໜ້າຊື່ມຊົມທີ່ສຸດໃນສະພາບການເກີດໂລກລະບາດໂຄວິດ - 19 ທີ່ພວມມີການຜັນແປຢ່າງສັບສົນທັງຢູ່ພາຍໃນປະເທດ ແລະ ໂລກ.
ການດຶງດູດເງິນລົງທຶນໂດຍກົງຈາກຕ່າງປະເທດ (FDI), ບັນລຸ 31,15 ຕື້ USD, ເພີ່ມຂຶ້ນ 9,2% ເມື່ອທຽບໃສ່ກັບ ປີ 2020, ໃນນັ້ນ, ທຶນຈົດທະບຽນໃໝ່ ແລະ ທຶນຈົດທະບຽນເພີ່ມຂຶ້ນຄືນໃໝ່ສະແດງໃຫ້ເຫັນວ່າ ນັກລົງທຶນຕ່າງປະເທດສືບຕໍ່ເຊື່ອໝັ້ນຕໍ່ສະພາບແວດລ້ອມແຫ່ງການລົງທຶນຢູ່ ຫວຽດນາມ.
ການເຄື່ອນໄຫວນຳເຂົ້າ - ສົ່ງອອກສິນຄ້າສືບຕໍ່ແມ່ນຈຸດພົ້ນເດັ່ນຂອງພື້ນຖານເສດຖະກິດດ້ວຍຍອດວົງເງິນການສົ່ງອອກນຳເຂົ້າສິນຄ້າທັງປີ ບັນລຸ 668,5 ຕື້ USD, ເພີ່ມຂຶ້ນ 22,6%ເມື່ອທຽບໃສ່ກັບປີກ່ອນ, ໃນນັ້ນການສົ່ງອອກ ເພີ່ມຂຶ້ນ 19%, ການນຳເຂົ້າເພີ່ມຂຶ້ນ 26,5%.
ບຸນຄົງ
