ໂດຍປະຕິບັດຕາມແຜນການເຄື່ອນໄຫວກ່ຽວກັບການຜັນຂະຫຍາຍບັນດາສັນຍາການຄ້າເສລີກັບສະຫະພັນເສດຖະກິດ ອາຊີ - ເອີຣົບ ແລະສະຫະພັນ ເອີຣົບ, ແນໃສ່ໜູນຊ່ວຍປະຊາຄົມວິສາຫະກິດ ຫວຽດນາມ ຜ່ານຜ່າຄວາມຫຍຸ້ງຍາກ, ເພີ່ມທະວີການສົ່ງອອກສິນຄ້າ, ເປີດກ້ວາງຕະຫຼາດໃນສະພາບການໂລກລະບາດໂຄວິດ -19, ຕອນບ່າຍວັນທີ 22 ທັນວາ, ຢູ່ ຮ່າໂນ້ຍ, ກົມການຕະຫຼາດ ເອີຣົບ - ອາເມລິກາ (ຂຶ້ນກັບກະຊວງອຸດສາຫະກຳ ແລະການຄ້າຫວຽດນາມ) ໄດ້ຈັດຕັ້ງເວທີປາ ໄສການຮ່ວມມືດ້ານການຄ້າກັບບັນດາຄູ່ຮ່ວມມືໃນພາກພື້ນ ອາຊີ - ເອີຣົບ 2021 ຕາມຮູບການທາງໄກ ແລະ ໂດຍກົງ.
 |
| ພາບປະກອບ: TTXVN |
ທີ່ເວທີປາໄສ, ບັນດານັກບັນລະຍາຍໄດ້ແບ່ງປັນຫຼາຍຂໍ້ມູນກ່ຽວກັບສາຍທາງ ລົດໄຟຂົນສົ່ງສາກົນລະຫວ່າງອາຊີ - ເອີຣົບຄື: ສິນຄ້າ ຫວຽດນາມ ໄດ້ຂົນສົ່ງດ້ວຍທາງລົດໄຟແຕ່ ຫວຽດນາມ, ຜ່ານ 2 ດ່ານ ດົງດັງ ແລະ ລາວກາຍ ແລ້ວເຊື່ອມຕໍ່ກັບສາຍທາງລົດໄຟ ອາຊີ - ເອີຣົບ, ຜ່ານປະເທດ ຈີນ, ຫຼັງຈາກນັ້ນໄປຮອດບັນດາປະເທດ ອາຊີກາງ (ກາຊັກສະຖານ, ຕັດຈີກິດສະຖານ) ລັດເຊຍ ແລະ ບັນດາປະເທດ ເອີລົບ.
ດ້ວຍເວລາໃນການຂົນສົ່ງ, ຄ່າໃຊ້ຈ່າຍເໝາະສົມ, ເປັນປົກກະຕິ ແລະປອດໄພ, ການຂົນສົ່ງສິນຄ້າຜ່ານສາຍທາງລົດໄຟ ອາຊີ - ເອີລົບ ໄດ້ກາຍເປັນໜຶ່ງ ໃນບັນດາການເລືອກເຟັ້ນທີ່ເໝາະສົມໃຫ້ແກ່ບັນດາວິສາຫະກິດທຳການສົ່ງອອກ - ນຳເຂົ້າຂອງ ຫວຽດນາມ ແລະບັນດາປະເທດໃນພາກພື້ນນີ້.
ບູນມີ
