| ຫວຽດນາມກວມເອົາ 87% ຍອດນໍາເຂົ້າເຂົ້າສານທັງໝົດຂອງຟີລິບປິນ | |
| ທ່ານເອກອັກຄະລັດຖະທູດຟີລິບປິນ ປະຈຳຫວຽດນາມ: ປາດຖະໜາຢາກຮ່ວມມືກັບ VUFO ຢ່າງໃກ້ຊິດກ່ວາເກົ່າ |
ເນື່ອງໃນໂອກາດສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດລະຫວ່າງ ສອງປະເທດ, ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ແລະ ສະຖານທູດຟີລິບປິນ ປະຈຳ ຫວຽດນາມ ສົມທົບກັນຈັດຕັ້ງງານວາງສະແດງ “ຫວຽດນາມ - ຟີລິບປິນ: ສີສັນວັດທະນະທຳ”.
ກ່າວຄຳເຫັນທີ່ກອງປະຊຸມ, ທ່ານຮອງລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ຕ້າກ່ວາງໂດງ ໃຫ້ຮູ້ວ່າ: ງານວາງສະແດງແມ່ນໂອກາດເພື່ອໃຫ້ປະຊາຊົນໄດ້ຮັບຮູ້ ແລະ ເຂົ້າໃຈກວ່າກ່ຽວກັບປະເທດ, ປະຊາຊົນ ແລະ ບັນດາຜົນງານຂອງ ຫວຽດນາມ ແລະ ຟີລິບປິນ ໃນຊຸມປີຜ່ານມາ. ບັນດາຜົນງານທີ່ວາງສະແດງໃນຄັ້ງນີ້ ໄດ້ສະແດງໃຫ້ເຫັນຮູບແບບໃໝ່ກ່ຽວກັບຊີວິດ, ປະເທດຊາດ, ປະຊາຊົນ ແລະ ບັນດາຄຸນຄ່າວັດທະນະທຳພົ້ນເດັ່ນທີ່ມີລັກສະນະມູນເຊື້ອ ແລະ ຍຸກປະຈຸບັນຂອງສອງປະເທດ.
 |
| ງານວາງສະແດງ “ສີສັນວັດທະນະທຳ ຫວຽດນາມ ແລະ ຟີລິບປິນ”. (ພາບ: tienphong) |
ເຂດວາງສະແດງໄດ້ສະແດງຮູບພາບຫວນຄືນສີສັນ, ວັດທະນະທຳ, ປະເທດຊາດ, ປະຊາຊົນ ຫວຽດນາມ ແລະ ຟີລິບປິນ ທີ່ຈິງໃຈ. ຜ່ານກ້ອງຖ່າຍຂອງບັນດານັກຖ່າຍຮູບ, ມະຫາຊົນໄດ້ມີໂອກາດຊື່ນຊົມຄວາມສວຍສົດງົດງາມທີ່ເປັນເອກະລັກສະເພາະຂອງຫວຽດນາມ ແລະ ຟີລິບປິນ, ໃນນັ້ນມີທັດສະນີຍະພາບຫຼາຍແຫ່ງທີ່ເປັນມໍລະດົກວັດທະນະທຳ, ມໍລະດົກທຳມະຊາດທີ່ຈົດຊື່ໂດຍອົງການ UNESCO.
ພ້ອມກັບຮູບຖ່າຍ, ງານວາງສະແດງ ໄດ້ສະແດງຜະລິດຕະພັນຕ່ຳແຜ່ນຕັດຫຍິບຫວຽດນາມ, ແຜ່ນແພຫັດຖະກຳ, ເສື້ອຜ້າອາພອນປະຈຳຊາດ ຂອງຫວຽດນາມ - ປະເທດທີ່ມີພື້ນຖານວັດທະນະທຳຕ່ຳແຜ່ນຕັດຫຍິບມາແຕ່ດົນນານ. ການຕ່ຳແຜ່ນຕັດຫຍິບຍັງເປັນຈຸດວັດທະນະທຳອັນຍາວນານຂອງຟີລິບປິນ. ໃນປະເທດຟີລິບປິນ ທີ່ມີຫຼາຍຮ້ອຍຊົນເຜົ່ານີ້, ການຕ່ຳຜ້າແມ່ນຮູບແບບສິລະປະ, ວິທີສະແດງໃຫ້ເຫັນເອກະລັກສະເພາະຂອງແຕ່ລະຄົນ ຫຼື ລຸ້ນຕ່າງໆ.
ມາຮອດງານວາງສະແດງ “ສີສັນວັດທະນະທຳ ຫວຽດນາມ ແລະ ຟີລິບປິນ”, ນັກທ່ອງທ່ຽວ ໄດ້ມີຄວາມຈັບອົກຈັບໃຈຫຼາຍຢ່າງ ກ່ຽວກັບວັດທະນະທຳ, ຮີດຄອງປະເພນີຂອງປະຊາຊົນ 2 ປະເທດ - ປະເທດທີ່ມີວັດທະນະທຳທີ່ຫຼາກຫຼາຍໃນພາກພື້ນອາຊີຕາເວັນອອກສ່ຽງໃຕ້. ນີ້ແມ່ນການເຄື່ອນໄຫວທີ່ມີຄວາມໝາຍ ເພື່ອແນໃສ່ຊຸກຍູ້ການພັດທະນາການພົວພັນຄູ່ຮ່ວມມືຍຸດທະສາດ ຫວຽດນາມ - ຟີລິບປິນ ໃນຂົງເຂດການເມືອງ, ເສດຖະກິດ, ວັດທະນະທຳ ແລະ ການທ່ອງທ່ຽວ.
ຄຳຮຸ່ງ
