| ເພີ່ມທະວີການຮ່ວມມືພົວພັນແລກປ່ຽນປະຊາຊົນ ກັບ ນະຄອນ St.Petersburg (ລັດເຊຍ) | |
| VUFO, ສະມາຄົມມິດຕະພາບ ຫວຽດນາມ -ກຳປູເຈຍ ອວຍພອນບຸນເຕັດປະຈຳຊາດ Chol Chnam Thmay ກຳປູເຈຍ |
 |
| ຮ້ານວາງສະແດງສິນຄ້າຂອງ ຫວຽດນາມ ຢູ່ ງານວາງສະແດງຂອງ ກຳປູເຈຍ (ພາບ: toquoc.vn) |
ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ໄດ້ສົມທົບກັບກະຊວງວັດທະນະທຳ ແລະ ສິລະປະ, ກະຊວງສຶກສາ, ຊາວໜຸ່ມ ແລະ ກິລາ, ກະຊວງທ່ອງທ່ຽວ ກຳປູເຈຍ, ສະຖານທູດ ຫວຽດນາມ ປະຈຳ ກຳປູເຈຍ ແລະ ບັນດາອົງການທີ່ກ່ຽວຂ້ອງ ໄດ້ຈັດຕັ້ງປະຕິບັດຫຼາຍກິດຈະກຳຮ່ວມມືດ້ານວັດທະນະທຳ, ກິລາ ແລະ ການທ່ອງທ່ຽວ ລະຫວ່າງຫວຽດນາມ ແລະ ກຳປູເຈຍ ບັນລຸໄດ້ບັນດາໝາກຜົນສຳຄັນ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາການພົວພັນມິດຕະພາບຖານບ້ານໃກ້ເຮືອນຄຽງ.
ຕາມທ່ານນາງ ຫງວຽນເຟືອງຮວ່າ, ຫົວໜ້າກົມຮ່ວມມືສາກົນ (ກະຊວງວັດທະນະທໍາ, ກິລາ ແລະ ທ່ອງທ່ຽວ) ແລ້ວ, ການແລກປ່ຽນວັດທະນະທໍາ, ການຮ່ວມມືກິລາ ແລະການທ່ອງທ່ຽວລະຫວ່າງ ຫວຽດນາມ ແລະ ກໍາປູເຈຍ ໄດ້ດໍາເນີນບົນພື້ນຖານບັນດາເອກະສານຮ່ວມມືທີ່ສອງຝ່າຍໄດ້ລົງນາມແລ້ວ. ການພົວພັນແລກປ່ຽນວັດທະນະທຳ ແລະ ສິລະປະ ລະຫວ່າງ ຫວຽດນາມ ແລະ ກຳປູເຈຍ ໄດ້ພັດທະນາເປັນຢ່າງດີບົນພື້ນຖານການພົວພັນສອງຝ່າຍ ແລະ ຫຼາຍຝ່າຍໃນຂອບເຂດອາຊຽນ. ພິເສດ, 2 ຝ່າຍໄດ້ປ່ຽນກັນຈັດຕັ້ງສັບປະດາວັດທະນະທຳບໍ່ພຽງແຕ່ຢູ່ນະຄອນຫຼວງເທົ່ານັ້ນ, ຫາກຍັງຢູ່ທ້ອງຖິ່ນອື່ນໆຂອງ 2 ປະເທດອີກດ້ວຍ, ຈັດສົ່ງກຸ່ມນັກສິລະປິນເຂົ້າຮ່ວມບັນດາງານມະຫາກຳ, ເຫດການວັດທະນະທຳລະດັບຊາດ ແລະ ສາກົນທີ່ໄດ້ຈັດຕັ້ງຢູ່ແຕ່ລະປະເທດ, ສະໜັບສະໜູນໜູນກັນໃນບັນດາກົນໄກຮ່ວມືຫຼາຍຝ່າຍ ຍົກຕົວຢ່າງຄື: ການເຄື່ອນໄຫວວັດທະນະທຳ, ສະແດງສິລະປະເພື່ອສະເຫຼີມສະຫຼອງປີ ປະທານ ອາຊຽນ ເມື່ອທັງຫວຽດນາມ ແລະ ກຳປູເຈຍ ເປັນປະທານ, ກໍ່ຄືກອງປະຊຸມສຸດຍອດອາຊຽນ (ASEM) ກຳປູເຈຍ ເປັນເຈົ້າພາບຈັດຕັ້ງໃນປີ 2021.
ເມື່ອຈັດຕັ້ງສັບປະດາວັດທະນະທຳ ຫວຽດນາມ ຢູ່ ກຳປູເຈຍ, ກະຊວງວັດທະນະທຳ, ກິລາ ແລະ ທ່ອງທ່ຽວ ໄດ້ສົມທົບກັບຝ່າຍ ກຳປູເຈຍ ຈັດຕັ້ງບັນດາການເຄື່ອນໄຫວວັດທະນະທຳ, ສິລະປະເພື່ອຮັບໃຊ້ປະຊາຄົມຊາວ ຫວຽດນາມ ອາໄສ ກຳປູເຈຍ ແລະ ຊາວກຳປູເຈຍເຊື້ອຊາດ ຫວຽດນາມ.
ໃນຂົງເຂດກິລາ-ກາຍຍະກຳ, ໃນຫຼາຍປີມານີ້, ຫວຽດນາມ ໄດ້ໜູນຊ່ວຍ ກຳປູເຈຍ ຢ່າງເປັນປະຈຳ ໃນການຈັດຕັ້ງຝຶກຊ້ອມຢູ່ ຫວຽດນາມ ກ່ອນ SEA Games ແຕ່ລະຄັ້ງ ແລະ ສົ່ງຜູ້ຊ່ຽວຊານຝຶກແອບນັກກິລາທິມຊາດຂອງ ກຳປູເຈຍ ດ້ວຍບັນດາປະເພດກິລາ ຄື: ມວຍປ້ຳ, Vovinam, ກະຕໍ້, ບານເຕະ...
ໃນຂົງເຂດການທ່ອງທ່ຽວ, ສອງປະເທດໄດ້ລົງນາມໃນສັນຍາຮ່ວມມືດ້ານການທ່ອງທ່ຽວສອງຝ່າຍຂັ້ນລັດຖະບານແຕ່ປີ 1995; ກະຊວງວັດທະນະທຳ, ກິລາ ແລະ ທ່ອງທ່ຽວ ຫວຽດນາມ ແລະ ກະຊວງທ່ອງທ່ຽວ ກຳປູເຈຍ ໄດ້ລົງນາມໃນບົດບັນທຶກຊ່ວຍຈຳກ່ຽວກັບການຮ່ວມມືດ້ານການທ່ອງທ່ຽວ ເນື່ອງໃນໂອກາດງານຕະຫຼາດນັດທ່ອງທ່ຽວສາກົນຢູ່ນະຄອນ ໂຮ່ຈີມິນ 2015 (ITE-HCMC), ຈັດຕັ້ງຄະນະເຮັດວຽກກ່ຽວກັບການຮ່ວມມືດ້ານການທ່ອງທ່ຽວລະຫວ່າງ ຫວຽດນາມ ແລະ ກຳປູເຈຍ…
ສອງປະເທດໄດ້ຍົກເວັ້ນວີຊາໃຫ້ພົນລະເມືອງຂອງກັນ ພຽງແຕ່ຖືໜັງສືຜ່ານແດນທຳມະດາເພື່ອໄປທ່ອງທ່ຽວ. ການຂົນສົ່ງຄົມມະນາຄົມທາງອາກາດ, ທາງນ້ຳ ແລະ ທາງບົກທີ່ເຊື່ອມຕໍ່ບັນດາຕົວເມືອງໃຫຍ່ຂອງສອງປະເທດມີຄວາມສະດວກຫຼາຍໃນການເຄື່ອນໄຫວທ່ອງທ່ຽວ.
ບັນດາວິສາຫະກິດທ່ອງທ່ຽວຂອງສອງປະເທດມີການຮ່ວມມືກັນຢ່າງແໜ້ນແຟ້ນໃນການຈັດຕັ້ງການທ່ອງທ່ຽວດ້ວຍລົດຂັບຂີ່ເອງ, ການທ່ອງທ່ຽວທາງນ້ຳ, ການທ່ອງທ່ຽວທາງທະເລ, ການບິນ. ຈຳນວນນັກທ່ອງທ່ຽວຫວຽດນາມໄປກຳປູເຈຍ ຍາມໃດກໍຢືນຢູ່ອັນດັບທີ 2 ໃນບັນດາປະເທດທີ່ໃຫ້ນັກທ່ອງທ່ຽວໄປກຳປູເຈຍ (ບັນລຸ 900.000 ກວ່າເທື່ອຄົນໃນປີ 2019). ປີ 2019 ນັກທ່ອງທ່ຽວກຳປູເຈຍໄປທ່ອງທ່ຽວຫວຽດນາມ ມີການເຕີບໂຕຢ່າງຕັ້ງໜ້າ (ບັນລຸ 228.000 ຄົນໃນປີ 2019).
ຕາມທ່ານຫົວໜ້າກົມໃຫຍ່ການທ່ອງທ່ຽວ ຫວຽດນາມ ຫງວຽນຈຸງແຄ໊ງ ແລ້ວ, 2 ຝ່າຍໄດ້ເຂົ້າຮ່ວມບັນດາງານຕະຫຼາດນັດການທ່ອງທ່ຽວສາກົນໂດຍແຕ່ລະປະເທດຈັດຕັ້ງຄື: ງານຕະຫຼາດນັດທ່ອງທ່ຽວສາກົນ ຫວຽດນາມ (VITM), ງານຕະຫຼາດນັດການທ່ອງທ່ຽວສາກົນນະຄອນ ໂຮ່ຈີມິນ (ITE-HCMC), ງານຕະຫຼາດນັດການທ່ອງທ່ຽວກຳປູເຈຍ (CTM); ໜູນຊ່ວຍເຊິ່ງກັນ ແລະ ກັນ ໃນການຈັດຕັ້ງໂຄງການແນະນຳສະຖານທີ່ນັດພົບ; ສົມທົບກັນຈັດຕັ້ງການໂອ້ລົມສົນທະນາ ແລະ ບັນດາກອງປະຊຸມສຳມະນາ. ພ້ອມກັນນັ້ນ, ກໍສົມທົບກັນຢ່າງແໜ້ນແຟ້ນໃນເວທີປາໄສການທ່ອງທ່ຽວຕ່າງໆໃນພາກພື້ນຄື: ອາຊຽນ, ການຮ່ວມມືເຂດອະນຸພາກພື້ນແມ່ນ້ຳຂອງ (GMS), ຍຸດທະສາດການຮ່ວມມືເສດຖະກິດAyeyarwady - Chao Phraya - ແມ່ນ້ຳຂອງ (ACMECS), ການຮ່ວມມືເຂດສາມຫຼ່ຽມພັດທະນາກຳປູເຈຍ-ລາວ-ຫວຽດນາມ (CLV), ການຮ່ວມມືແມ່ນໍ້າຂອງ-ລ້ານຊ້າງ (MLC)...
ການພົບປະແລກປ່ຽນຄະນະຜູ້ແທນຂອງສອງປະເທດຍັງໄດ້ດຳເນີນໄປຢ່າງຟົດຟື້ນ ແລະ ມີຄວາມໝາຍໃນໄລຍະທີ່ໂລກລະບາດໂຄວິດ-19 ບໍ່ທັນເກີດຂຶ້ນ. ຕັ້ງແຕ່ປີ 2020 ມາຮອດປັດຈຸບັນ, ສ່ວນຫຼາຍກິດຈະກຳຕ່າງໆແມ່ນຈັດຜ່ານຮູບການທາງໄກ. ໃນນັ້ນ, ຫວຽດນາມ ແລະ ກຳປູເຈຍ ໄດ້ພ້ອມກັນເຂົ້າຮ່ວມກອງປະຊຸມລັດຖະມົນຕີທ່ອງທ່ຽວອາຊຽນ ພິເສດກ່ຽວກັບພະຍາດໂຄວິດ-19 ດ້ວຍຮູບແບບທາງໄກ ເພື່ອຜັນຂະຫຍາຍໝາກຜົນຂອງກອງປະຊຸມສຸດຍອດ ອາຊຽນ ກ່ຽວກັບພະຍາດໂຄວິດ-19 ໂດຍທ່ານນາຍົກລັດຖະມົນຕີ ຫວຽດນາມ ເປັນປະທານ.
ໃນປີ 2020, ທີ່ກອງປະຊຸມສຸດຍອດກຳປູເຈຍ - ລາວ - ຫວຽດນາມ ຄັ້ງທີ 11, ນາຍົກລັດຖະມົນຕີ 3 ປະເທດໄດ້ຮັບຮອງເອົາແຜນການພັດທະນາການທ່ອງທ່ຽວເຂດສາມຫຼ່ຽມພັດທະນາ ກຳປູເຈຍ - ລາວ - ຫວຽດນາມ ໄລຍະ 2020-2025, ວິໄສທັດຮອດປີ 2030 ແລະ ປະຈຸບັນບັນດາປະເທດພວມສົມທົບກັນຈັດຕັ້ງປະຕິບັດແຜນການນີ້.
ການຮ່ວມມືໃນຂົງເຂດຝຶກອົບຮົມ, ວັດທະນະທຳ, ການພົບປະແລກປ່ຽນປະຊາຊົນ... ກໍ່ໄດ້ຮັບການຊຸກຍູ້. ຫວຽດນາມໄດ້ໃຫ້ທຶນການສຶກສານັບພັນທຶນແກ່ກຳປູເຈຍໄລຍະຍາວ ແລະ ໄລຍະສັ້ນ. ກຳປູເຈຍ ກໍ່ຊ່ວຍຫວຽດນາມ ບຳລຸງສ້າງປະລິນຍາຕີດ້ານພາສາ ແລະ ວັດທະນະທຳຂະແມ ຕາມຄຳຮຽກຮ້ອງຂອງບັນດາກະຊວງ, ຂະແໜງການ ແລະ ທ້ອງຖິ່ນຂອງຫວຽດນາມ.
ຄຽງຂ້າງການຮ່ວມມືດ້ານເສດຖະກິດ, ການປ້ອງກັນຊາດ ແລະ ປ້ອງກັນຄວາມສະຫງົບ ລະຫວ່າງຫວຽດນາມ ແລະ ກຳປູເຈຍ ຢືນຢັນຈະສືບຕໍ່ຍົກສູງປະສິດທິຜົນການຮ່ວມມືໃນບັນດາຂົງເຂດສຳຄັນຄື: ການສຶກສາ ແລະ ບຳລຸງສ້າງ, ການຖະແຫຼງຂ່າວ ແລະ ສື່ສານ, ວັດທະນະທຳ ແລະ ກິລາ, ການພົບປະແລກປ່ຽນປະຊາຊົນ... 2 ຝ່າຍກໍ່ຊຸກຍູ້ບັນດາແຂວງເຂດຊາຍແດນສືບຕໍ່ຮ່ວມມືໃນຂົງເຂດຕ່າງໆ ຄື: ການສຶກສາ, ວັດທະນະທໍາ, ກິລາ, ການທ່ອງທ່ຽວ, ຍຸຕິທໍາ, ອຸດສາຫະກໍາ, ເຕັກໂນໂລຊີ, ການປ່ຽນແປງໃໝ່ປະດິດຄິດສ້າງ, ການບຳລຸງສ້າງຊັບພະຍາກອນມະນຸດ, ການບຳລຸງສ້າງວິຊາຊີບ, ຂໍ້ມູນຂ່າວສານ, ໄປສະນີ ແລະ ໂທລະຄົມມະນາຄົມ; ຮັກສາການຕິດຕໍ່, ແລກປ່ຽນຂໍ້ມູນຂ່າວສານຢ່າງທັນການ; ສືບຕໍ່ສະໜັບສະໜູນແລະຊ່ວຍເຫຼືອເຊິ່ງກັນແລະກັນ ແລະ ນັບມື້ນັບມີຄວາມສະໜິດສະໜົມກັນ.
ຕາມທ່ານລັດຖະມົນຕີກະຊວງວັດທະນະທຳ, ກິລາ ແລະ ທ່ອງທ່ຽວ ຫງວຽນວັນຮຸ່ງ ແລ້ວ, ໃນໄລຍະຜ່ານມາ, ກະຊວງວັດທະນະທຳ, ກິລາ ແລະ ທ່ອງທ່ຽວ ໄດ້ປະຕິບັດບັນດາການເຄື່ອນໄຫວວັດທະນະທຳ, ກິລາ ແລະ ທ່ອງທ່ຽວກັບ ກຳປູເຈຍ ຢ່າງເປັນປະຈຳ, ພ້ອມທັງກຳນົດຕ້ອງຍົກສູງລະດັບການຮ່ວມມືວັດທະນະທຳ, ກິລາ ແລະ ທ່ອງທ່ຽວລະຫວ່າງຫວຽດນາມ ແລະ ກຳປູເຈຍ, ມຸ່ງໄປເຖິງການຮັບໃຊ້ປະຊາຄົມ ແລະ ຕິດພັນບັນດາທ້ອງຖິ່ນ.
ໃນປີ 2022, ເນື່ອງໃນໂອກາດສະເຫຼີມສະຫຼອງ 55 ປີແຫ່ງວັນສ້າງສາຍພົວພັນທາງການທູດ ຫວຽດນາມ - ກຳປູເຈຍ ແລະ ປີມິດຕະພາບ ຫວຽດນາມ - ກຳປູເຈຍ, ກະຊວງວັດທະນະທຳ, ກິລາ ແລະ ທ່ອງທ່ຽວ ໄດ້ສົມທົບກັບບັນດາອົງການທີ່ກ່ຽວຂ້ອງຂອງກຳປູເຈຍ ຈັດຕັ້ງສັບປະດາວັດທະນະທຳ ຫວຽດນາມ ຢູ່ ກຳປູເຈຍ, ສັບປະດາວັດທະນະທຳກຳປູເຈຍຢູ່ຫວຽດນາມ, ບັນດາໂຄງການແນະນຳ ແລະ ສົ່ງເສີມການທ່ອງທ່ຽວຫວຽດນາມ - ກຳປູເຈຍ. ນັບແຕ່ນີ້ຮອດປີ 2023, ຫວຽດນາມ ໄດ້ເປັນເຈົ້າພາບຈັດຕັ້ງງານມະຫາກຳກິລາອາຊີຕາເວັນອອກສຽງໃຕ້ ຄັ້ງທີ 31 ແລະ ກຳປູເຈຍ ເປັນເຈົ້າພາບຈັດຕັ້ງງານມະຫາກຳກິລາອາຊີຕາເວັນອອກສຽງໃຕ້ ຄັ້ງທີ 32.
ບຸນຄົງ
