ຍົກສູງຄວາມຮັບຮູ້ໃນການປ້ອງກັນຕ້ານໄພທຳມະຊາດໃຫ້ແກ່ປະຊາຄົມ

15:17 | 27/11/2021

ຍສໝ - ຫວ່າງແລ້ວນີ້, ຄະນະຊີ້ນຳແຫ່ງຊາດກ່ຽວກັບການປ້ອງກັນຕ້ານໄພທຳມະຊາດ ຫວຽດນາມ ໄດ້ຈັດຕັ້ງການຖະແຫຼງຂ່າວກ່ຽວກັບການເສັງ “ປະຈັນບານປ້ອງກັນ, ຕ້ານໄພທຳມະຊາດ ປີ 2021”. ຜ່ານການສົມທົບກັບບັນດາຄວາມຮູ້, ທັກສະ ພາຍໃຕ້ຮູບແບບ Gameshow ທີ່ໃໝ່ອ່ຽມ, ດຶງດູດໃຈ, ການເສັງ “ປະຈັນບານປ້ອງກັນ, ຕ້ານໄພທຳມະຊາດ” ມຸ່ງໄປເຖິງເປົ້າໝາຍການຍົກສູງຄວາມຮັບຮູ້ປະຊາຄົມກ່ຽວກັບປ້ອງກັນ, ຕ້ານໄພທຳມະຊາດ ແລະ ຮັບມືກັບການປ່ຽນແປງຂອງດິນຟ້າອາກາດ.

	21 ທິມບານເຕະຂອງປະຊາຄົມ ຊາວຫວຽດນາມອາໄສຢູ່ ອັງກິດເຂົ້າຮ່ວມການແຂ່ງຂັນບານເຕະ Nova Cup London 2021
	ປະທານປະເທດຫວຽດນາມ ຍົກອອກ 3 ຂໍ້ສະເໜີ ເຖິງປະຊາຄົມວິສາຫະກິດ APEC

ຍົກສູງຄວາມຮັບຮູ້ໃນການປ້ອງກັນຕ້ານໄພທຳມະຊາດໃຫ້ແກ່ປະຊາຄົມ

ພາບປະກອບ: tuyengiao.vn

ການເສັງໃນປີນີ້ ໄດ້ດຳເນີນຢູ່ ດ່ານັ້ງ, ໂດຍມີການເຂົ້າຮ່ວມຂອງ 12 ທິມທີ່ມາຈາກບັນດາແຂວງ, ນະຄອນໃນທົ່ວປະເທດ. ບັນດາສະມາຊິກເຂົ້າຮ່ວມແມ່ນ ຜູ້ຕາງໜ້າທີ່ດີເດັ່ນຂອງກຳລັງຕະລຸມບອນປ້ອງກັນຕ້ານໄພທຳມະຊາດຂັ້ນຮາກຖານຢູ່ບັນດາທ້ອງຖິ່ນ.

ການເສັງໂດຍຫ້ອງການປະຈຳຄະນະຊີ້ນຳແຫ່ງຊາດກ່ຽວກັບການປ້ອງກັນ, ຕ້ານໄພທຳມະຊາດ - ກົມໃຫຍ່ການປ້ອງກັນ, ຕ້ານໄພທຳມະຊາດ (ກະຊວງກະສິກຳ ແລະ ພັດທະນາຊົນນະບົດ) ພ້ອມກັບສູນໂທລະພາບ ຫວຽດນາມ ຢູ່ເຂດພາກກາງ ແລະ ໄຕງວຽນ ( VTV8 - ສະຖານີໂທລະພາບ ຫວຽດນາມ) ສົມທົບກັນຈັດຕັ້ງ, ໂດຍມີການໜູນຊ່ວຍຂອງໂຄງການສະຫະປະຊາຊາດ ເພື່ອການພັດທະນາ ປະຈຳ ຫວຽດນາມ (UNDP), ອົງການສະຫະປະຊາຊາດກ່ຽວກັບຄວາມສະເໝີພາບ ລະຫວ່າງຍິງຊາຍ ແລະ ການມອບສິດໃຫ້ແກ່ແມ່ຍິງ (UN Women).

ຮອບຊີງຊະນະເລີດທົ່ວໂລກ ໄດ້ດຳເນີນນັບແຕ່ວັນທີ 25 ພະຈິກ ຫາວັນທີ 1 ທັນວາ, ລວມມີ ການແຂ່ງຂັນ 12 ຮອບ, ຮອງຊະນະເລີດ 3 ຮອບ ແລະ ຊີງຊະນະເລີດ 1 ຮອບ, 16 ຮອບແຂ່ງຂັນໄດ້ຖ່າຍທອດ ແລະ ອອກອາກາດໃນຊ່ອງໂທລະພາບດ້ວຍໄລຍະເວລາ 30 ນາທີ/ມ້ວນ, ຄາດວ່າຈະອອກອາກາດທາງໂທລະພາບນັບແຕ່ຕົ້ນປີ 2022.

ຜູ້ຕາງໜ້າຄະນະຈັດຕັ້ງໃຫ້ຮູ້ວ່າ ການແຂ່ງຂັນປີນີ້ ໄດ້ມີການປ່ຽນແປງໃໝ່ຫຼາຍຢ່າງກ່ຽວກັບຮູບແບບ ແລະ ເນື້ອໃນ, ໝັ້ນໝາຍວ່າ ຈະນຳມາເຊິ່ງຄວາມດຶງດູດໃຈ ແລະ ມີຜົນປະໂຫຍດໃຫ້ແກ່ທ່ານຜູ້ຊົມລາຍການ.

ກ່ອນໜ້ານັ້ນ, ການຈັດຕັ້ງຄັ້ງທຳອິດໃນປີ 2020, ການເສັງ ໄດ້ອອກອາກາດທາງໂທລະພາບຊ່ອງ VTV8 ໂດຍມີຜູ້ຊົມຫຼາຍພໍສົມຄວນ. ທ່ານ ເລມິງຊາງ - ຮອງຜູ້ອຳນວຍການ VTV8 ໃຫ້ຮູ້ວ່າ: ເມື່ອທຽບໃສ່ກັບລາຍການອອກອາກາດທາງໂທລະພາບໃນຊົ່ວໂມງດຽວ ການເສັງນີ້ໄດ້ຮັບຄວາມສົນໃຈຈາກຜູ້ຊົມເປັນຈຳນວນຫຼາຍສົມຄວນ. ຜ່ານນັ້ນ, ກໍ່ນຳມາເຊິ່ງຂໍ້ມູນທີ່ມີປະໂຫຍດຫຼາຍຢ່າງໃຫ້ທ່ານຜູ້ຊົມ ກ່ຽວກັບທັກສະໃນການປ້ອງກັນ, ຕ້ານໄພທຳມະຊາດ ເພື່ອປົກປ້ອງພໍ່ແມ່ພີ່ນ້ອງ, ຄອບຄົວ ແລະ ປະຊາຄົມ.

ທ່ານນາງ ດ່ວານທິຕວຽດງາ - ຫົວໜ້າຄະນະຈັດຕັ້ງການແຂ່ງຂັນ, ຜູ້ຕາງໜ້າກົມໃຫຍ່ການປ້ອງກັນ, ຕ້ານໄພທຳມະຊາດ ໃຫ້ຮູ້ຕື່ມອີກວ່າ: ຜ່ານການແຂ່ງຂັນ, ບັນດາສະມາຊິກຂອງທິມທີ່ເຂົ້າຮ່ວມການເສັງ ແມ່ນປັດໄຈພົ້ນເດັ່ນຊ່ວຍຖ່າຍທອດຄວາມຮູ້ອັນລ້ຳຄ່າ ກ່ຽວກັບການປ້ອງກັນ, ຕ້ານໄພທຳມະຊາດ, ສົ່ງເສີມການເຂົ້າຮ່ວມຂອງປະຊາຄົມ, ປະກອບສ່ວນເຂົ້າໃນການຫຼຸດຜ່ອນໄພທຳມະຊາດ. ຜ່ານນັ້ນ ກໍ່ໄດ້ສ້າງບາດກ້າວຫັນປ່ຽນຢ່າງແຮງ ຈາກທ່າຮັບມື ກາຍເປັນທ່າປ້ອງກັນ, ຕ້ານ ຢູ່ແຕ່ລະທ້ອງຖິ່ນບົນຈິດໃຈ “ເພື່ອສັງຄົມທີ່ປອດໄພຕໍ່ໄພທຳມະຊາດ”.

ໂຄງປະກອບຂອງ gameshow “ປະຈັນບານປ້ອງກັນ, ຕ້ານໄພທຳມະຊາດ” ໄດ້ສ້າງຈາກແນວຄິດກົດໝາຍວ່າດ້ວຍ ການປ້ອງກັນ, ຕ້ານໄພທຳມະຊາດ, ກົດໝາຍວ່າດ້ວຍການປັບປຸງເພີ່ມເຕີມບາງມາດຕາຂອງກົດໝາຍວ່າດ້ວຍການປ້ອງກັນຕ້ານໄພທຳມະຊາດທີ່ໄດ້ສະພາແຫ່ງຊາດຮັບຮອງເອົາ ແລະ ເລີ່ມມາຈາກການເຄື່ອນໄຫວຕົວຈິງຂອງກຳລັງປະຈັນບານ ປ້ອງກັນ, ຕ້ານໄພທຳມະຊາດຢູ່ຮາກຖານ. ແຕ່ລະການແຂ່ງຂັນລວມມີ 3 ພາກ: “ຮັບຮູ້”, “ຮັບມື”, “ປະຈັນບານ”.

ບຸນຄົງ