| ການສົ່ງອອກຜະລິດຕະພັນກະເສດ, ເຄື່ອງປ່າຂອງດົງ ແລະ ສິນໃນນໍ້າຂອງຫວຽດນາມ ສືບຕໍ່ຮັກສາທ່າເຕີບໂຕ | |
| ໝາກມັງກອນ ຫວຽດນາມ ມີກາລະໂອກາດຢ່າງໃຫຍ່ຫຼວງ ໃນການສົ່ງອອກໄປຍັງອົດສະຕາລີ |
ກະຊວງກະສິກຳ ແລະພັດທະນາຊົນນະບົດ ໃຫ້ຮູ້ວ່າ: ວົງເງິນສົ່ງອອກຜະລິດຕະພັນກະເສດ-ເຄື່ອງປ່າຂອງດົງ-ສິນໃນນໍ້າ ບັນລຸກວ່າ 3,4 ຕື້ໂດລາສະຫະລັດ, ຫຼຸດລົງ 15,6% ເມື່ອທຽບໃສ່ເດືອນຕຸລາ 2020 ແຕ່ເພີ່ມຂຶ້ນ 4,2% ເມື່ອທຽບໃສ່ເດືອນກັນຍາ 2021. ໄລ່ລວມ 10 ເດືອນຕົ້ນປີ 2021, ມູນຄ່າການສົ່ງອອກຜະລິດຕະພັນກະເສດ-ເຄື່ອງປ່າຂອງດົງ-ສິນໃນນໍ້າ ບັນລຸເກືອບ 38,8 ຕື້ ໂດລາສະຫະລັດ, ເພີ່ມຂຶ້ນ 13,1% ເມື່ອທຽບໃສ່ໄລຍະດຽວກັນຂອງປີກາຍ.
 |
| ພາບປະກອບ |
ໃນນັ້ນ, ການສົ່ງອອກຜະລິດຕະພັນກະເສດຕົ້ນຕໍ ບັນລຸເກືອບ 17,4 ຕື້ໂດລາສະຫະລັດ, ເພີ່ມຂຶ້ນ 12,7%; ຜະລິດຕະພັນເຄື່ອງປ່າຂອງດົງຕົ້ນຕໍ ບັນລຸປະມານ 12,8 ຕື້ໂດລາສະຫະລັດ, ເພີ່ມຂຶ້ນ 22,3%; ສິນໃນນໍ້າ ບັນລຸເກືອບ 6,9 ຕື້ ໂດລາສະຫະລັດ, ຫຼຸດລົງ 0,8%; ການລ້ຽງສັດ ຄາດວ່າ ບັນລຸ 359 ລ້ານໂດລາສະຫະລັດ, ເພີ່ມຂຶ້ນ 6,1%; ກຸ່ມສົ້ນເຂົ້າຜະລິດ ປະມານ 1,4 ຕື້ໂດລາສະຫະລັດ, ເພີ່ມຂຶ້ນ 22,3%.
ໄລ່ລວມ 10 ເດືອນ, ຜະລິດຕະພັນ ແລະກຸ່ມຜະລິດຕະພັນ ປະເພດຕ່າງໆ ທີ່ມູນຄ່າການສົ່ງອອກເພີ່ມຂຶ້ນ ລວມມີ: ກາເຟ, ຢາງພາລາ, ເຂົ້າສານ, ຜັກ ແລະ ໝາກໄມ້, ໝາກພິກໄທ, ໝາກມ່ວງຫິມະພານ, ມັນຕົ້ນ ແລະຜະລິດ ຕະພັນຈາກມັນຕົ້ນ... ໃນນັ້ນ, ຢາງພາລາ, ໝາກມ່ວງຫິມະພານ, ມັນຕົ້ນ ແລະ ຜະລິດຕະພັນຈາກມັນຕົ້ນເພີ່ມຂຶ້ນທັງດ້ານປະລິມານ ແລະ ມູນຄ່າການ ສົ່ງອອກ.
ກ່ຽວກັບຕະຫຼາດສົ່ງອອກ, ມູນຄ່າສົ່ງອອກຜະລິດຕະພັນກະເສດ-ເຄື່ອງປ່າຂອງດົງ-ສິນໃນນໍ້າ ຂອງຫວຽດນາມ ໃນ 10 ເດືອນຕົ້ນປີ 2021 ໄປຍັງຕະຫຼາດອາຊີ (ກວມເອົາ 42,8% ອັດຕາສ່ວນກວມຂອງຕະຫຼາດ), ທະວີບອາເມລິກາ (30%), ເອີລົບ (11,4%), ອາຟະຣິກາ (1.9%), ທະວີບໂອເຊອານີ (1.5%). ຕະຫຼາດສົ່ງອອກໃຫຍ່ທີ່ສຸດແມ່ນ ອາເມລິກາ, ບັນລຸກວ່າ 10,8 ຕື້ໂດລາສະຫະລັດ; ຈີນ ຢືນອັນດັບທີ 2, ບັນລຸເກືອບ 7,5 ຕື້ໂດລາສະຫະລັດ; ຍີ່ປຸ່ນ ຢືນອັນດັບທີ 3 ດ້ວຍມູນຄ່າການສົ່ງອອກກວ່າ 2,6 ຕື້ໂດລາສະຫະລັດ (ກວມເອົາ 6,8%); ສ.ເກົາຫຼີ ຢືນອັນດັບທີ 4 ດ້ວຍມູນຄ່າສົ່ງອອກປະມານ 1,7 ຕື້ໂດລາສະຫະລັດ (ກວມ 4,3%).
ເພື່ອຍູ້ແຮງຕະຫຼາດສົ່ງອອກຜະລິດຕະພັນກະເສດ, ໃນໄລຍະຈະມາເຖິງ, ກະຊວງກະສິກຳ ແລະພັດທະນາຊົນນະບົດ ຈະສືບຕໍ່ຕິດຕາມ, ກໍາແໜ້ນຂໍ້ມູນຂ່າວສານກ່ຽວກັບລາຄາ, ສະພາບການຜະລິດ ແລະແຫຼ່ງສະໜອງຜະລິດຕະພັນກະເສດຢູ່ທ້ອງຖິ່ນຕ່າງໆໃນທົ່ວປະເທດ ໃນເງື່ອນໄຂໃໝ່ ແລະແຜນການເຊື່ອມຕໍ່ການຜະລິດ ແລະການບໍລິໂພກ ໃນໄລຍະບຸນປີໃໝ່ສາກົນ ແລະບຸນປີໃໝ່ປະຈໍາຊາດ.
ສືບຕໍ່ຊຸກຍູ້ການເປີດປະຕູຕະຫຼາດຜະລິດຕະພັນກະເສດກັບປະເທດຕ່າງໆ; ສະໜອງຂໍ້ມູນຂ່າວສານ, ລະບຽບການຕະຫຼາດ, ຄວບຄຸມການນຳເຂົ້າ-ສົ່ງອອກລະຫວ່າງຫວຽດນາມ ແລະຈີນ ແລະຂໍ້ມູນຂ່າວສານກ່ຽວກັບການກໍານົດໂຄຕາຕໍ່ຜະລິດຕະພັນກະເສດປະຕິບັດສັນຍາ EVFTA ແລະ UKVFTA ໃຫ້ບັນດາທ້ອງຖິ່ນ, ວິສາຫະກິດຢ່າງທັນການ. ຊຸກຍູ້ການປະຕິບັດ “ໂຄສະນາເຄື່ອງໝາຍຜະລິດຕະພັນກະເສດຫວຽດນາມ ຢູ່ ຕະຫຼາດສະຫະພາບ ເອີລົບ (ອີຢູ) ໃນສະພາບທີ່ສັນຍາ EVFTA ມີຜົນສັກສິດ”.
ໄຊພອນ
