ວັນທີ 10 ພຶດສະພາ 2019 ການຂົນສົ່ງເຂົ້າສານຈ້າວ ໝາກຖົ່ວ ແລະ ນ້ຳມັນພືດ ຈາກກະຊວງກະສິກຳສະຫະລັດອາເມຣິກາ ໄດ້ລຳລຽງມາຮອດສາງເກັບອາຫານຂອງອົງການອາຫານໂລກປະຈຳລາວ ທີ່ນະຄອນຫຼວງວຽງຈັນ ຮັບໂດຍທ່ານນາງ ຣີນາ ບິດເຕີ ເອກອັກຄະລັດຖະທູດ ສະຫະລັດອາເມຣິກາປະຈຳລາວ ເຊິ່ງອາຫານທີ່ໄດ້ຮັບຈາກການຊ່ວຍເຫຼືອຂອງລັດຖະບານອາເມຣິກາຄັ້ງນີ້ ປະກອບມີເຂົ້າສານຈ້າວ 2.200 ໂຕນ ໝາກຖົ່ວ 660 ໂຕນ ແລະ ນ້ຳມັນພືດ 260 ໂຕນ ເຊິ່ງເຄື່ອງເຫຼົ່ານີ້ຈະນຳໄປໃຊ້ເຂົ້າໃນການເຮັດອາຫານທ່ຽງກວ່າ 140.000 ຄາບ ໃນໂຄງການແມັກໂກລວັນໂດ ອາຫານເພື່ອໂພຊະນາການຂອງລັດຖະບານສະຫະລັດອາເມຣິກາ ໃຫ້ນັກຮຽນຊັ້ນປະຖົມ ໃນຖິ່ນທຸລະກັນດານໃນປະເທດລາວ.
 |
ລຳລຽງອາຫານມາຮອດສາງເກັບອາຫານຂອງອົງການອາຫານໂລກປະຈຳລາວ. (ພາບ: VientianeMai)
ນັບແຕ່ປີ 2008 ເປັນຕົ້ນມາ ໂຄງການແມັກໂກລວັນໂດ ອາຫານເພື່ອໂພຊະນາການຂອງລັດຖະບານສະຫະລັດອາເມຣິກາ ໄດ້ໃຫ້ການສະໜັບສະໜູນໂຄງການອາຫານທ່ຽງໃນໂຮງຮຽນຢູ່ປະເທດລາວ ລວມມູນຄ່າຫຼາຍກວ່າ 60 ລ້ານໂດລາສະຫະລັດ ຫຼື ປະມານ 480 ຕື້ກີບ ເລີ່ມຕົ້ນໃຫ້ການສະໜັບສະໜູນ ໂດຍຜ່ານອົງການອາຫານໂລກ ໄດ້ເຮັດໃຫ້ນັກຮຽນຫຼາຍກວ່າ 1,5 ລ້ານຄົນ ໄດ້ຮັບຜົນປະໂຫຍດຈາກໂຄງການອາຫານເພື່ອໂພຊະນາການນີ້ໂດຍກົງ.
（ແຫຼ່ງຂໍ້ມູນ： vientianemai.net）
