 |
| ບັນຍາກາດທີ່ການເຈລະຈາຍຸດທະສາດແຫ່ງຊາດ ຫວຽດນາມ-WEF ໃນຮູບແບບທາງໄກຢູ່ຮ່າໂນ້ຍ. ພາບ: ສໍານັກຂ່າວສານຫວຽດນາມ. |
ກ່າວຄໍາເຫັນເປີດສາກກອງປະຊຸມ, ທ່ານ ສຈ Klaus Schwab ສະແດງຄວາມປິຕິຊົມຊື່ນ ເມື່ອເຫັນວ່າ ຫວຽດນາມ ໄດ້ຜັນຂະຫຍາຍຍຸດທະສາດການສັກວັກກິນຢ່າງໄວວາ ແລະຂ້ຽວຂາດ; ທ່ານ ເຊື່ອໝັ້ນວ່າ ຫວຽດນາມ ຈະສືບຕໍ່ຮັກສາທ່າພັດທະນາທີ່ໜ້າປະທັບໃຈໃນຊຸມທົດສະວັດຈະມາເຖິງ. ສ່ວນທ່ານນາຍົກລັດຖະມົນຕີ ຟ້າມມິງຈີ໊ງ ໄດ້ມີບົດກ່າວປາໄສສໍາຄັນດ້ວຍສານນະໂຍບາຍທີ່ເຂັ້ມແຂງ, ຢັ້ງຢືນຄວາມມານະພະຍາຍາມ ແລະຄວາມຕັດສິນໃຈຂອງຫວຽດນາມ ກ່ຽວກັບການຟື້ນຟູ, ພັດທະນາເສດຖະກິດ-ສັງຄົມ, ປະຕິບັດວິໄສທັດ, ເປົ້າໝາຍ ແລະຄວາມມຸ່ງຫວັງພັດທະນາປະເທດຊາດ.
ທ່ານ ຟ້າມມິງຈີ໊ງ ເນັ້ນໜັກວ່າ ນີ້ແມ່ນຈຸດເວລາທົດສອບຄຸນນະທາດ, ການປະດິດສ້າງ ແລະຄວາມສາມາດປັບຕົວຂອງທັງລັດຖະບານ ແລະວິສາຫະກິດ; ເປັນຈຸດເວລາທີ່ລັດຖະບານ ແລະວິສາຫະກິດ ຄວນເພີ່ມທະວີການພົວພັນຄູ່ຮ່ວມມືພາກລັດ-ພາກເອກະຊົນ ເພື່ອພ້ອມກັນຜ່ານຜ່າຄວາມຫຍຸ້ງຍາກບົນຈິດໃຈ “ຮ່ວມທຸກຮ່ວມສຸກ”, “ຜົນປະໂຫຍດກົມກຽວກັນ, ແບ່ງປັນຄວາມສ່ຽງນໍາກັນ”.
ທ່ານ ຟ້າມມິງຈີ໊ງ ໄດ້ແບ່ງປັນແຜນການສັງລວມກ່ຽວກັບການຟື້ນຟູ ແລະພັດທະນາເສດຖະກິດ ໄລຍະສະເພາະໜ້າຂອງຫວຽດນາມ, ລວມມີ: ແຜນການສັງລວມກ່ຽວກັບການເປີດປະຕູພື້ນຖານເສດຖະກິດຕິດພັນກັບການປ້ອງກັນ, ຕ້ານພະຍາດໂຄວິດ-19; ໂຄງການກ່ຽວກັບການຮັບປະກັນຊີວິດສັງຄົມ ແລະສ້າງວຽກເຮັດງານທໍາ; ຟື້ນຟູວິສາຫະກິດ, ສະຫະກອນ, ຄອບຄົວດຳເນີນທຸລະກິດ; ພັດທະນາໂຄງປະກອບໂຄງລ່າງ, ຂຸດຄົ້ນແຫຼ່ງກໍາລັງໃນສັງຄົມໃຫ້ແກ່ການພັດທະນາ. ຫວຽດນາມ ຕັດສິນໃຈຍູ້ແຮງການປັບປຸງລະບອບລະບຽບການໃຫ້ສົມບູນແບບ, ຫຼຸດຜ່ອນລະບຽບການບໍລິຫານ, ຕ້ານການສໍ້ລາດບັງຫຼວງ, ປະກົດການຫຍໍ້ທໍ້...
ບົນພື້ນຖານບັນດາກໍານົດທິດພັດທະນາຂອງຫວຽດນາມ, ທ່ານນາຍົກລັດຖະມົນຕີ ຟ້າມມິງຈີ໊ງ ຮຽກຮ້ອງໃຫ້ບັນດານັກລົງທຶນສົມທົບກັນປະຕິບັດແຜນນະໂຍບາຍຟື້ນຟູການຜະລິດຢ່າງປອດໄພຢູ່ເຂດອຸດສາຫະກໍາ, ເຂດເສດຖະກິດ, ເຂດເຕັກໂນໂລຢີສູງ, ເຂດຜະລິດເພື່ອສົ່ງອອກ ເພື່ອຮັບປະກັນໃບສັ່ງສິນຄ້າ, ຮັກສາລະບົບສະໜອງ; ລົງທຶນເຂົ້າໃນຂົງເຂດທີ່ຫວຽດນາມ ພວມບຸລິມະສິດ ແລະມີນະໂຍບາຍພິເສດ, ຄື: ເຕັກໂນໂລຢີສູງ, ເຕັກໂນໂລຢີຂໍ້ມູນຂ່າວສານ, ອຸດສາຫະກໍາສໍາຮອງ, ກະສິກໍາອັດສະລິຍະ, ປົກປ້ອງສິ່ງແວດລ້ອມ, ພະລັງງານທົດແທນ; ກໍ່ສ້າງໂຄງປະກອບໂຄງລ່າງ ແລະບັນດາໂຄງການຮັບໃຊ້ຊີວິດສັງຄົມ, ກໍ່ສ້າງຊັບພະຍາກອນມະນຸດທີ່ມີຄຸນນະພາບສູງ, ຍູ້ແຮງການຄົ້ນຄວ້າ-ພັດທະນາ, ປ່ຽນແປງໃໝ່ປະດິດສ້າງ, ປະກອບສ່ວນນໍາຫວຽດນາມ ກາຍເປັນໃຈກາງໃນລະບົບຄຸນຄ່າຂອງພາກພື້ນ ແລະທົ່ວໂລກ.
ທ່ານນາຍົກລັດຖະມົນຕີ ຢັ້ງຢືນວ່າ ລັດຖະບານຫວຽດນາມ ພ້ອມແລ້ວທີ່ຈະເພີ່ມທະວີການເຈລະຈາ, ສົມທົບກັນໃນຂອບເຂດຄູ່ຮ່ວມມືພາກລັດ-ພາກເອກະຊົນ ເພື່ອສົ່ງເສີມການຕອບສະໜອງ, ການເຂົ້າຮ່ວມຂອງວິສາຫະກິດ ແລະປະຊາຊົນທຸກຄົນ. ທ່ານ ຟ້າມມິງຈີ໊ງ ສະເໜີຫັນການເຈລະຈາຍຸດທະສາດແຫ່ງຊາດຫວຽດນາມ-WEF ເປັນກົນໄກປະຈໍາລະຫວ່າງການນໍາລັດຖະບານຫວຽດນາມ ກັບບັນດາວິສາຫະກິດ ແລະນັກຊ່ຽວຊານຂອງ WEF.
la.qdnd.vn
