 |
| ໜູນຊ່ວຍຊາວຕ່າງປະເທດອາໄສຢູ່ ຫວຽດນາມ (ພາບ: TTXVN) |
ໂດຍໄປຕາມສະມາຄົມມິດຕະພາບ ຫວຽດນາມ ລັດເຊຍ ແຂວງແຄ້ງຮ່ວາ ພາໄປພົບປະກັບບັນດາຊາວລັດເຊຍທີ່ພວມດຳລົງຊີວິດຢູ່ນະຄອນ ຍາຈາງ ເພື່ອມອບຂອງຂວັນ, ພວກຂ້າພະເຈົ້າໄດ້ພົບປະກັບຄູສອນພາສາລັດເຊຍ Kontrabayeva Gulzhan, ເອື້ອຍໄດ້ຮູ້ວ່າ ນັບແຕ່ເວລາໂລກລະບາດໂຄວິດ - 19 ເກີດຂຶ້ນຢູ່ແຄ້ງຮ່ວາ ກໍ່ແມ່ນເວລາທີ່ຕ້ອງຢູ່ໃນບ້ານ ເພື່ອປ້ອງກັນ, ຕ້ານໂລກລະບາດໂຄວິດ - 19, ໂດຍບໍ່ມີລາຍຮັບ ດັ່ງນັ້ນ ຈິ່ງປະສົບກັບຄວາມຫຍຸ້ງຍາກໃນການຊື້ເຄື່ອງຂອງທີ່ຈຳເປັນ. ກ່ອນໜ້ານັ້ນ, ເອື້ອຍ Kontrabayeva Gulzhan ໄດ້ເຊົ່າເຮືອນພັກ ເດືອນລະ 4 ລ້ານດົ່ງ ຢູ່ທາງທິດເໜືອຂອງນະຄອນ, ໃນຫຼາຍເດືອນມານີ້ ເອື້ອຍບໍ່ມີເງິນເພື່ອຈ່າຍຄ່າເຊົ່າເຮືອນ ແລະ ຄ່າໄຟຟ້າ, ນ້ຳປະປາ. ໂດຍມີການໜູນຊ່ວຍຈາກສະມາຄົມມິດຕະພາບ ຫວຽດນາມ - ລັດເຊຍ ແຂວງແຄ້ງຮ່ວາ, ເຈົ້າຂອງເຮືອນໄດ້ຫຼຸດຜ່ອນຄ່າເຊົ່າເຮືອນລົງເຫຼືອ 2,5 ລ້ານດົ່ງ/ເດືອນ. ເອື້ອຍ Kontrabayeva Gulzhan ໃຫ້ຮູ້ວ່າ:
“ຍາດຕິພີ່ນ້ອງຢູ່ລັດເຊຍກໍ່ປະສົບກັບຄວາມຫຍຸ້ງຍາກຍ້ອນໂລກລະບາດໂຄວິດ - 19 ດັ່ງນັ້ນ ບໍ່ສາມາດຊ່ວຍເຫຼືອໃນໄລຍະທີ່ຂ້າພະເຈົ້າດຳລົງຊີວິດຢູ່ ແຄ້ງຮ່ວາ ໄດ້. ດ້ວຍການໜູນຊ່ວຍຂອງຊາວແຄ໊ງຮ່ວາ ໃນໄລຍະປັດຈຸບັນ, ຂ້າພະເຈົ້າ ແລະ ເພື່ອນມິດຫຼາຍຄົນກໍ່ສູ້ສຶກຮູ້ບຸນຄຸນຢ່າງຍິ່ງ”.
ຜົວເມຍເອື້ອຍ Larisa ແລະ ອ້າຍ Denis Dugina (ຊາວລັດເຊຍ) ໄດ້ປະສົບກັບຄວາມຫຍຸ້ງຍາກເປັນພິເສດ, ເຂົາເຈົ້າມີລູກຊາຍຄົນໜຶ່ງ ທີ່ມີອາຍຸ 11 ປີ, ເປັນຄົນພິການຂາ ແລະ ໄດ້ດຳລົງຊີວິດຢູ່ຍາຈາງມາເປັນເວລາຫຼາຍປີແລ້ວ. ເອື້ອຍ Larisa ໃຫ້ຮູ້ວ່າ ຄອບຄົວຂອງເອື້ອຍ ໄດ້ມີປະຊາຊົນຢູ່ໃກ້ໆນີ້ ເອົາໃຈໃສ່ໜູນຊ່ວຍຫຼາຍຢ່າງ, ນັບແຕ່ເຂົ້າຈີ່ຕະຫຼອດຮອດເຂົ້າສານ 2 – 3 ກີໂລກຼາມ. “ຂ້າພະເຈົ້າຮູ້ສຶກປະທັບໃຈທີ່ສຸດຕໍ່ວິທີການເຊິ່ງ ອຳນາດການປົກຄອງ ແລະ ປະຊາຊົນ ຫວຽດນາມ ພວມສົມທົບກັນເພື່ອຮັບປະກັນວ່າ “ບໍ່ປະໃຫ້ຜູ້ໃດຖືກຕົກຄ້າງຢູ່ທາງຫຼັງ”, ຂ້າພະເຈົ້າກໍ່ຂໍສະແດງຄວາມຂອບອົກຂອບໃຈຢ່າງຈິງໃຈ ຕໍ່ປະຊາຊົນ ຫວຽດນາມ ດ້ວຍບັນດານ້ຳໃຈອັນດີງາມ ເຊິ່ງເຂົາເຈົ້າໄດ້ສະຫງວນໃຫ້ແກ່ພວກຂ້າພະເຈົ້າ” ເອື້ອຍ Larisa ແບ່ງປັນ.
ທ່ານນາງ ຫງວຽນທິທູແທງ, ປະທານສະມາຄົມມິດຕະພາບ ຫວຽດນາມ - ລັດເຊຍ ແຂວງແຄ້ງຮ່ວາ ໃຫ້ຮູ້ວ່າ ຄະນະຜູ້ແທນໄດ້ລົງບັນດາຕາແສງເປັນຫຼາຍຄັ້ງເພື່ອມອບຂອງຂວັນໜູນຊ່ວຍຊາວຕ່າງປະເທດທີ່ພວມດຳລົງຊີວິດໃນບໍລິເວນທີ່ປະສົບກັບຄວາມຫຍຸ້ງຍາກຈາກໂລກລະບາດໂຄວິດ - 19.
ຕາມທ່ານ ເລຈຸງຮຶງ, ປະທານສະຫະພັນບັນດາອົງການຈັດຕັ້ງມິດຕະພາບ ແຄ໊ງຮ່ວາ ແລ້ວ ນັບແຕ່ເດືອນມິຖຸນາ ປີ 2021 ມາຮອດປັດຈຸບັນ, ສະຫະພັນບັນດາອົງການຈັດຕັ້ງມິດຕະພາບແຂວງແຄ໊ງຮ່ວາ ພ້ອມກັບຫຼາຍໜ່ວຍງານ, ອົງການຈັດຕັ້ງ, ສ່ວນບຸກຄົນ ໄດ້ຂົນຂວາຍ, ປຸກລະດົມຂອງຂວັນນັບພັນພູດ ເຊິ່ງແມ່ນເຄື່ອງຂອງທີ່ຈຳເປັນຊະນິດຕ່າງໆ ແລະ ປະຕິບັດການມອບຂອງຂວັນໃຫ້ແກ່ຊາວຕ່າງປະເທດທີ່ພວມດຳລົງຊີວິດຢູ່ນະຄອນຍາຈາງມາເປັນເວລາ 5 ຄັ້ງແລ້ວ…
ໂດຍໄດ້ຮູ້ວ່າ ແຂວງແຄ້ງຮ່ວາມີຊາວຕ່າງປະເທດກ່ວາ 3000 ຄົນທີ່ພວມດຳລົງຊີວິດ, ຮ່ຳຮຽນ ແລະ ເຮັດວຽກຢູ່ບັນດາຂະແໜງອາຊີບທີ່ແຕກຕ່າງກັນ. ຍ້ອນຜົນກະທົບຈາກໂລກລະບາດໂຄວິດ - 19, ມີຫຼາຍຄົນຕ້ອງພັກຢູ່ບ້ານ ດັ່ງນັ້ນ ຊີວິດການເປັນຢູ່ກໍ່ປະສົບກັບຄວາມຫຍຸ້ງຍາກຫຼາຍຢ່າງ. ແຂວງແຄ້ງຮ່ວາ ໄດ້ມີການເຄື່ອນໄຫວໜູນຊ່ວຍຫຼາຍຢ່າງ. ພະແນກພົວພັນຕ່າງປະເທດ ໄດ້ສ້າງເງື່ອນໄຂດີທີ່ສຸດ ເພື່ອໃຫ້ຊາວຕ່າງປະເທດໝົດທຸກຄົນລ້ວນແຕ່ໄດ້ຮັບປະກັນຄວາມປອດໄພກ່ຽວກັບສຸຂະພາບ, ເອົາຕົວຢ່າງຫາເຊື້ອ ໂຄວິດ - 19 ໃນຊຸມຊົນ… ເລື່ອງສັກວັກຊິນກັນໂຄວິດ - 19 ຈະໄດ້ປະຕິບັດຕາມແຜນການລວມຂອງແຂວງແຄ໊ງຮ່ວາ: ປະຊາຊົນທ້ອງຖິ່ນໝົດທຸກຄົນ, ນັບທັງຊາວຕ່າງປະເທດທີ່ມີອາຍຸແຕ່ 18 ປີຂຶ້ນໄປ ລ້ວນແຕ່ຈະໄດ້ຮັບການສັກວັກຊິນໂດຍບໍ່ເສຍຄ່າ. ມາຮອດປັດຈຸບັນ, ມີຊາວຕ່າງປະເທດກ່ວາ 250 ຄົນຢູ່ແຄ໊ງຮ່ວາໄດ້ສັກວັກຊິນເຂັມທີ 1 ແລ້ວ, ໄລຍະຈະມາເຖິງຈະສືບຕໍ່ສັກວັກຊິນໃຫ້ແກ່ຜູ້ຄົນທີ່ຍັງເຫຼືອ.
ບຸນຄົງ
