 |
| ພາບປະກອບ |
ພິທີລົງນາມ ແມ່ນນອນໃນໂຄງການຫຼຸດຜ່ອນຜົນກະທົບ ຈາກໂລກລະບາດຕໍ່ກຸ່ມປະຊາກອນທີ່ມີຄວາມສ່ຽງສູງ ໂດຍລັດຖະບານ ຍີ່ປຸ່ນ ອຸປະຖຳ ດ້ວຍການຊ່ວຍເຫຼືອດ້ານເຕັກນິກຈາກ UNFPA ປະຈຳ ຫວຽດນາມ. ຊາວໜຸ່ມໄປອອກແຮງງານຢູ່ຕ່າງປະເທດ ແມ່ນໜຶ່ງໃນບັນດາເປົ້າໝາຍທີ່ຖືກຜົນກະທົບຫຼາຍ ຈາກໂລກລະບາດໂຄວິດ - 19.
ຫຼາຍຄົນຖືກວ່າງງານ, ໃນນັ້ນມີຄົນຈໍານວນໜຶ່ງຕ້ອງແບກຫາບໜີ້ ທີ່ຈະໃຊ້ຈ່າຍໃນການດໍາລົງຊີວິດປະຈໍາວັນຂອງເຂົາເຈົ້າ, ໃນຂະນະທີ່ຄົນອື່ນຕ້ອງກັບຄືນປະເທດ. ແນວໃດກໍ່ຕາມ, ເມື່ອເຂົາເຈົ້າກັບຄືນມາ, ເຂົາເຈົ້າຍັງປະເຊີນກັບບັນຫາໃນການເຊື່ອມໂຍງຄືນເຂົ້າກັບຕະຫຼາດແຮງງານຂອງທ້ອງຖິ່ນ.
ຕໍ່ໜ້າສະພາບການດັ່ງກ່າວ, ສູນກາງຊາວໜຸ່ມ ໄດ້ສົມທົບກັບ ຄະນະຊາວໜຸ່ມ 3 ແຂວງ ເງະອານ, ຮ່າຕິງ ແລະ ກວາງຈິ ຜັນຂະຫຍາຍການໜູນຊ່ວຍຊາວໜຸ່ມທີ່ໄປອອກແຮງງານຢູ່ຕ່າງປະເທດ ຕ້ອງກັບຄືນເມືອປະເທດ ຍ້ອນຖືກຜົນກະທົບຈາກໂລກລະບາດໂຄວິດ - 19.
ຕາມນັ້ນແລ້ວ, ໂຄງການດັ່ງກ່າວ ຈະໃຫ້ການໜູນຊ່ວຍແກ່ 29 ຂໍ້ລິເລີ່ມກ່ຽວກັບການຫັນປ່ຽນວຽກເຮັດງານທຳ ສ້າງລາຍຮັບເພີ່ມ; ສະໜອງຄວາມຮູ້ກ່ຽວກັບສຸຂະພາບຈະເລີນພັນ, ທັກສະດຳລົງຊີວິດໃຫ້ແກ່ຊາວໜຸ່ມ. ໂຄງການມີຍອດມູນຄ່າປະມານ 2 ຕື້ດົ່ງ ເຊິ່ງຈະໄດ້ຜັນຂະຫຍາຍແຕ່ນີ້ຮອດທ້າຍເດືອນ ມີນາ 2022.
ທີ່ພິທີ, ທ່ານນາງ Naomi Kitahara ຫົວໜ້າຄະນະຜູ້ຕາງໜ້າ UNFPA ປະຈຳ ຫວຽດນາມ ໃຫ້ຄຳໝັ້ນສັນຍາວ່າ UNFPA ປະຈຳ ຫວຽດນາມ ຈະສົມທົບກັບສູນກາງຊາວໜຸ່ມຢ່າງແໜ້ນແຟ້ນ ເພື່ອບໍ່ໃຫ້ຊາວໜຸ່ມ ຫວຽດນາມ ຄົນໃດຖືກປະໄວ້ຢູ່ເບື້ອງຫຼັງ ໃນວິວັດການພັດທະນາຂອງປະເທດຊາດ.
ໄຊພອນ
