 |
| ທ່ານຮອງນາຍົກລັດຖະມົນຕີ ຟ້າມບິງມິງ ແລະທ່ານ ທ່ານ ຫວາງອີ ຄະນະກຳມາທິການສະພາແຫ່ງຊາດ, ລັດຖະມົນຕີກະຊວງການຕ່າງປະເທດ ຈີນ (ພາບ: MOFA.) |
ວັນທີ 10 ກັນຍາ, ທ່ານຮອງນາຍົກລັດຖະມົນຕີ ຟ້າມບິງມິງ ພ້ອມກັບທ່ານ ຫວາງອີ ຄະນະກຳມາທິການສະພາແຫ່ງຊາດ, ລັດຖະມົນຕີກະຊວງການຕ່າງປະເທດ ຈີນ ຮ່ວມເປັນປະທານກອງປະຊຸມຄັ້ງທີ 13 ຂອງຄະນະກຳມະການຊີ້ນຳການຮ່ວມມືສອງຝ່າຍ ຫວຽດນາມ - ຈີນ.
ກ່າວຄຳເຫັນທີ່ກອງປະຊຸມ, ທ່ານລັດຖະມົນຕີກະຊວງການຕ່າງປະເທດຈີນ ຫວາງອີ ໄດ້ປະກາດວ່າ ຈີນ ຈະໜູນຊ່ວຍວັກຊິນເພີ່ມອີກ 3 ລ້ານໂດສ ໃຫ້ແກ່ ຫວຽດນາມ ໃນປີນີ້, ອັນໄດ້ຍົກຍອດຈຳນວນວັກຊິນທີ່ໄດ້ຮັບການໜູນຊ່ວຍຈາກຈີນຂຶ້ນເຖິງ 5,7 ລ້ານໂດສ, ບາງທ້ອງຖິ່ນ ຂອງຈີນ ກໍ່ໜູນຊ່ວຍວັກຊິນ ແລະ ວັດຖຸອຸປະກອນການແພດໃຫ້ແກ່ບັນດາທ້ອງຖິ່ນ ຫວຽດນາມ.
ສອງຝ່າຍໄດ້ເຫັນດີເປັນເອກະພາບເຊື່ອມຕໍ່ບັນດາຖ້ຽວບິນການຄ້າ ເມື່ອມີເງື່ອນໄຂຢ່າງຄົບຖ້ວນ, ສ້າງຄວາມສະດວກໃຫ້ແກ່ການເດີນທາງໄປມາຂອງຄົນ ແລະ ການຈໍລະຈອນສິ້ນຄ້າ, ສືບຕໍ່ນຳໃຊ້ບັນດາມາດຕະການທີ່ມີປະສິດທິຜົນເພື່ອຊຸກຍູ້ການຮ່ວມມືເສດຖະກິດ ການຄ້າ, ການລົງທຶນພັດທະນາຢ່າງມີສະຖຽນລະພາບ, ຍືນຍົງ, ມີຄວາມສະເໝີພາບ, ປອດໄສ.
ສອງຝ່າຍໄດ້ເຫັນດີເປັນເອກະພາບປະຕິບັດລະບຽບການເປີດປະຕູຕະຫຼາດຕໍ່ຜະລິດຕະພັນກະເສດບາງປະເພດຂອງ ຫວຽດນາມ, ຍູ້ໄວການຍົກລະດັບ ຫຼື ເປີດບັນດາດ່ານຊາຍແດນໃໝ່ຄື: ຮ່ວານໂມ - ດົງຈຸງ, ຕາລຸ່ງ - ຖຸຍເຄົາ, ຈ່າລິງ - ລອງບາງ, ມາລູທັ່ງ - ກິມຖຸຍຮ່າ, ລີວັນ - ທາກລອງ… ເພື່ອເພີ່ມທະວີການການພົວພັນການຄ້າຢູ່ເຂດຊາຍແດນ, ສົ່ງເສີມວິສາຫະກິດຈີນ ຍູ້ແຮງການລົງທຶນມາຫວຽດນາມ ນຳໃຊ້ເຕັກໂນໂລຢີທີ່ກ້າວໜ້າ, ເປັນມິດກັບສິ່ງແວດລ້ອມ, ຕັ້ງໜ້າສົມທົບ, ແກ້ໄຂບາງຄວາມຫຍຸ້ງຍາກທີ່ຍັງຄົງຕົວໃນບາງໂຄງການຮ່ວມມືຄື ເສັ້ນທາງລົດໄຟຟ້າ ກາດລິງ - ຮ່າດົງ ແລະ ຍູ້ແຮງຜັນຂະຫຍາຍບັນດາບ້ວງເງິນໜູນຊ່ວຍໜູນຊ່ວຍຂອງ ຈີນ.
ສອງຝ່າຍເຫັນດີເປັນເອກະພາບຍູ້ໄວໂຄງການຮ່ວມມືກ່ຽວກັບວິທະຍາສາດເຕັກໂນໂລຢີ, ສິ່ງແວດລ້ອມ, ຄົມມະນາຄົມ ແລະ ຂົນສົ່ງ, ກະສິກຳ, ການແພດ, ວັດທະນະນຳ, ການສຶກສາ, ການທ່ອງທ່ຽວ ແລະ ການພົວພັນປະຊາຊົນ, ເພີ່ມທະວີການສົມທົບກັນຢູ່ບັນດາເວທີປາໄສຫຼາຍຝ່າຍ.
ສອງຝ່າຍແລກປ່ຽນກັນກ່ຍວກັບບັນຫາຊາຍແດນຜືນແຜ່ນດິນຢ່າງເປີດເຜີຍ, ກົງໄປກົງມາ, ເຫັນດີເປັນເອກະພາບຮ່ວມມືກັນໃນການຄວບຄຸມຊາຍແດນຢູ່ເຂດດິນຕໍ່ແຜ່ນໃຫ້ເປັນຢ່າງດີບົນພື້ນຖານປະຕິບັດຕາມບັນດາສັນຍາ ແລະ ເອກະສານນິຕິກຳວ່າດ້ວຍຊາຍແດນຢ່າງເຂັ້ມງວດ.
ສອງຝ່າຍເຫັນດີເປັນເອກະພາບສືບຕໍ່ປະຕິບັດຄວາມຮັບຮູ້ລວມຂັ້ນສູງຢ່າງເຂັ້ມງວດ, ຄວບຄຸມຄວາມບໍ່ລົງລອຍກັນເປັນຢ່າງດີ, ບໍ່ໃຫ້ມີການກະທຳທີ່ເຮັດໃຫ້ສະພາບການສັບສົນຂຶ້ນຕື່ມ, ເປີດກ້ວາງການຂັດແຍ້ງກັນ, ພ້ອມກັນຮັກສາຄວາມສັນຕິພາບ, ສະຖຽນລະພາບຢູ່ທະເລຕາເວັນອອກ, ຊຸກຍູ້ບັນດາກົນໄກເຈລະຈາ, ຮ່ວມມືກັນບັນລຸໄດ້ຄວາມຄືບໜ້າຢ່າງແທ້ຈິງ, ໃນນັ້ນມີການຮ່ວມມືໃນຂົງເຂດທີ່ມີຄວາມລະອຽດອ່ອນ, ຈຳແນກເຂດທະເລຢູ່ປະຕູທະເລເຂດອ່າວທາງພາກເໜືອ ກໍ່ຄືຍູ້ແຮງການປະຕິບັດສຳເລັດເພື່ອລົງນາມສັນຍາສະບັບໃໝ່ກ່ຽວກັບການຮ່ວມມືໃນການຫາປາຢູ່ອ່າວພາກເໜືອ.
ທ່ານຮອງນາຍົກລັດຖະມົນຕີ ຟ້າມບິງມິງ ໄດ້ເນັ້ນໜັກເຖິງຄວາມສຳຄັນຂອງການເຄົາລົບສິດ ແລະ ຜົນປະໂຫຍດອັນຊອບທຳຂອງກັນ, ສອດຄ່ອງກັບກົດໝາຍສາກົນ, ໃນນັ້ນມີສົນທິສັນຍາ ສປຊ ກ່ຽວກັບກົດໝາຍວ່າດ້ວຍທະເລ ປີ 1982.
ສິ້ນສຸດກອງປະຊຸມ, ທ່ານຮອງນາຍົກລັດຖະມົນຕີ ຟ້າມບິງມິງ ແລະ ທ່ານລັດຖະມົນຕີກະຊວງການຕ່າງປະເທດ ຈີນ ຫວາງອີ ໄດ້ເປັນສັນຂີພິຍານ ພິທີລົງນາມ “ສັນຍາການຮ່ວມມືດ້ານເສດຖະກິດ ເຕັກນິກລະຫວ່າງ ລັດຖະບານ ປະເທດ ສສ.ຫວຽດນາມ ແລະ ລັດຖະບານ ສປ.ຈີນ ກ່ຽວກັບການສະໜອງບ້ວງເງິນຊ່ວຍເຫຼືອລ້າ”, ປະກາດປະຕິບັດສຳເລັດ “ບົດບັນທຶກຊ່ວຍຈຳກ່ຽວກັບແຜນການຮ່ວມມືໄລຍະ 2021 – 2025 ລະຫວ່າງ ກະຊວງອຸດສາຫະກຳການຄ້າ ສສ.ຫວຽດນາມ ແລະ ກະຊວງການຄ້າ ສປ.ຈີນ” “ບົດບັນທຶກຊ່ວຍຈຳລະຫວ່າງກະຊວງອຸດສາຫະກຳ ການຄ້າ ສສ. ຫວຽດນາມ ແລະ ກະຊວງການຄ້າ ສປ.ຈີນ ກ່ຽວກັບການສ້າງຕັ້ງກຸ່ມຮ່ວມມືຫັນການຄ້າ ຫວຽດນາມ - ຈີນເປັນສະດວກ.
ບຸນຄົງ
