 |
| ທ່ານ ຫງວຽນແທັງລອງ ລັດຖະມົນຕີກະຊວງສາທາລະນະສຸກ ຫວຽດນາມ (ພາບ: TTXVN) |
ທີ່ການເຮັດວຽກ, ທ່ານ ຫງວຽນແທັງລອງ ລັດຖະມົນຕີກະຊວງສາທາລະນະສຸກ ສະແດງຄວາມຂອບອົກຂອບໃຈຕໍ່ລັດຖະບານ ແລະ ປະຊາຊົນຈີນ ທີ່ໄດ້ມີບັນດາການສະໜັບສະໜູນອັນລ້ຳຄ່າຕໍ່ລັດຖະບານ, ປະຊາຊົນ ຫວຽດນາມ ໃນວຽກງານປ້ອງກັນ, ຕ້ານໂລກລະບາດໂຄວິດ - 19.
ທ່ານລັດຖະມົນຕີ Ma Xiaowei ຖືວ່າ ນັບແຕ່ເວລາເກີດໂລກລະບາດໂຄວິດ - 19, ສອງຝ່າຍໄດ້ມີບັນດາການແລກປ່ຽນ, ແບ່ງປັນກ່ຽວກັບບັນດາບັນຫາທີ່ກ່ຽວຂ້ອງເຖິງໂລກລະບາດໂຄວິດ - 19. ໃນສະພາບການໂລກລະບາດໂຄວິດ - 19 ພວມມີບັນດາການຜັນແປຢ່າງສັບສົນ, ການແລກປ່ຽນ, ການໂອ້ລົມເຈລະຈາລະຫວ່າງສອງຝ່າຍໃນມື້ນີ້ມີຄວາມໝາຍທີ່ສຸດ, ເພື່ອແນໃສ່ຊຸກຍູ້ການຜັນຂະຫຍາຍວຽກງານປ້ອງກັນ, ຕ້ານໂລກລະບາດໂຄວິດ - 19 ຢ່າງມີປະສິດທິຜົນ.
ສອງຝ່າຍໄດ້ແລກປ່ຽນ, ແບ່ງປັນກ່ຽວກັບບັນດາຍຸດທະສາດປ້ອງກັນ, ຕ້ານໂລກລະບາດໂຄວິດ - 19 ລະຫວ່າງ ຫວຽດນາມ ແລະ ຈີນ, ບັນດາມາດຕະການດ້ານວິຊາການ, ເຕັກນິກ ແລະ ບັນຫາວິໄຈເພື່ອຄວບຄຸມໃນວົງກ້ວາງ.
ຝ່າຍຈີນ ໄດ້ແບ່ງປັນບັນດາບົດຮຽນປະສົບການອັນລ້ຳຄ່າ ກ່ຽວກັບຮູບແບບການຈັດຕັ້ງຜັນຂະຫຍາຍການວິໄຈຫາເຊື້ອໃນວົງກ້ວາງ, ຮັບປະກັນຄຸນນະພາບໃນການວິໄຈຫາເຊື້ອ. ຈີນກໍ່ດຳເນີນການຕິດຕາມກວດກາທີ່ເປັນເຈົ້າການໃນບັນດາເຂດທີ່ມີຄວາມສ່ຽງຕິດເຊື້ອສູງຄືບັນດາຮາກຖານສາທາລະນະສຸກ, ເຂດເຂົ້າອອກເມືອງ ແລະ ເອົາຕົວຢ່າງຫາເຊື້ອໃຫ້ແກ່ຜູ້ທີ່ເຮັດວຽກຢູ່ເຂດດັ່ງກ່າວ.
ສອງຝ່າຍໄດ້ແບ່ງປັນບົດຮຽນປະສົບການ ໃນການຈັດແບ່ງ, ຈັດຕັ້ງການປິ່ນປົວໃຫ້ແກ່ຜູ້ຕິດເຊື້ອພະຍາດໂຄວິດ - 19. ທັງຈີນ ແລະ ຫວຽດນາມ ລ້ວນແຕ່ສຸມໃສ່ປິ່ນປົວໃຫ້ແກ່ຜູ້ຕິດເຊື້ອພະຍາດໂຄວິດ - 19 ທີ່ມີອາການໜັກ, ຈັດສົ່ງນັກຊ່ຽວຊານໄປຍັງບັນດາເຂດທີ່ມີຜູ້ຕິດເຊື້ອມີອາການໜັກເພື່ອສຸມໃສ່ແຫຼ່ງກຳລັງປິ່ນປົວ.
ສອງຝ່າຍໄດ້ເຫັນດີເປັນເອກະພາບສ້າງຕັ້ງບັນດາຊ່ອງທາງແລກປ່ຽນ, ຮ່ຳຮຽນເອົາບົດຮຽນປະສົບການເຊິ່ງກັນແລະກັນໃນໄລຍະຈະມາເຖິງເພື່ອເພີ່ມທະວີການຮ່ວມມືຢ່າງມີປະສິດທິຜົນ.
ບຸນຄົງ
