 |
| ວັດຖຸຂອງກາງທີ່ຍຶດມາໄດ້ |
ຫວ່າງມໍ່ໆມານີ້, ບັນດາເປົ້າໝາຍຄ້າເຖື່ອນມັກສວຍໂອກາດໃນຍາມຝົນຕົກລົມແຮງ ເພື່ອຂົນສົ່ງສິນຄ້າເຖື່ອນຜ່ານຊາຍແດນເຂົ້າບໍລິເວນແຂວງດົ່ງທາບ. ໄລ່ສະເພາະເດືອນມິຖຸນາ ປີ 2021, ບັນດາກຸ່ມລາດຕະເວນຂອງປ້ອມປ້ອງກັນຊາຍແດນ ດ່ານຊາຍແດນສາກົນ ເທື່ອງເຟືອກ ກັກການຂົນສົ່ງຢາສູບຕ່າງປະເທດແບບຜິດກົດໝາຍ 29 ຄັ້ງ. ກົມກອງກໍ່ໄດ້ສົມທົບກັບກຸ່ມປະຕິບັດໜ້າທີ່ພິເສດກ່ຽວກັບການປ້ອງກັນ, ຕ້ານຢາເສບຕິດ ແລະ ອາດຊະຍາກຳ (ທະຫານປ້ອງກັນຊາຍແດນແຂວງດົ່ງທາບ) ແລະ ຕຳຫຼວດຕາແສງເທື່ອງເຟືອກ 1 ກັກໄດ້ 2 ຄັ້ງ, ເກັບເອົາຢາສູບຕ່າງປະເທດຊະນິດຕ່າງໆກ່ວາ 4.500 ຊອງ.
ທ່ານພັນຕີ ເຈິ່ນຢຸຍເອ, ຜູ້ຮັບຜິດຊອບດ້ານການເມືອງ ປ້ອມປ້ອງກັນຊາຍແດນ ດ່ານຊາຍແດນສາກົນ ເທື່ອງເຟືອງ ແບ່ງປັນວ່າ: “ກົມກອງໄດ້ລາດຕະເວນ, ຄວບຄຸມກວດກາ ແຕ່ລະພາກພື້ນຢ່າງເຄັ່ງຄັດ, ກວດພົບ ແລະ ສະກັດກັນບັນດາການກະທຳລະເມີດກົດໝາຍຢ່າງທັນການ. ບັນດາກຸ່ມປະຕິບັດງານຂອງກົມກອງ ຍາມໃດກໍ່ຍູ້ແຮງການໂຄສະນາເຜີຍແຜ່ເພື່ອໃຫ້ປະຊາຊົນເຂົ້າໃຈຢ່າງຈະແຈ້ງກ່ຽວກັບການຂົນສົ່ງສິນຄ້າຂ້າມຊາຍແດນຢ່າງຜິດກົດໝາຍ ອາດຈະຕິດເຊື້ອພະຍາດໂຄວິດ - 19. ຂົນຂວາຍປະຊາຊົນຕັ້ງໜ້າສະໜອງຂໍ້ມູນໃຫ້ແກ່ກົມກອງ, ກ່າວໂທດບັນດາການກະທຳຂ້າມຊາຍແດນທີ່ຜິດກົດໝາຍ ແລະ ການເຄື່ອນໄຫວຄ້າເຖື່ອນຂ້າມຊາຍແດນ”.
ຕາມທ່ານພັນໂທ ຫວໍວັນຫວູ, ຮອງຫົວໜ້າຫ້ອງການປ້ອງກັນ, ຕ້ານຢາເສບຕິດ ແລະ ອາດຊະຍາກຳ (ທະຫານປ້ອງກັນຊາຍແດນແຂວງດົ່ງທາບ) ແລ້ວ, ນັບແຕ່ຕົ້ນປີ 2021 ມາຮອດປັດຈຸບັນ ບັນດາກົມກອງທະຫານປ້ອງກັນຊາຍແດນ ກັກການຂົນສົ່ງສິນຄ້າຂ້າມຊາຍແດນແບບຜິດກົດໝາຍໄດ້ 135 ຄັ້ງ ແລະ 11 ເປົ້າໝາຍ. ວັດຖຸຂອງກາງທີ່ຍຶດມາໄດ້ລວມມີ ຢາສູບຕ່າງປະເທດຊະນິດຕ່າງໆກ່ວາ 120.000 ຊອງ, ນ້ຳຕານ 6.050 ກີໂລກຼາມ, ຄຳເກືອບ 3 ກີໂລກຼາມ… ຄາດວ່າຍອດມູນຄ່າສິນຄ້າປະມານ 5,3 ຕື້ດົ່ງ. ທະຫານປ້ອງກັນຊາຍແດນ ໄດ້ສົມທົບກັບກຳລັງພາສີອາກອນ, ຕຳຫຼວດຍຶດຢາສູບຕ່າງປະເທດຊະນິດຕ່າງໆໄດ້ເກືອບ 10.000 ຊອງ, ນ້ຳຕານ 550 ກີໂລກຼາມ, ຢາສະໝູນໄພ 81 ກ່ອງ.
ເຖິງຢ່າງໃດກໍ່ຕາມ, ຍ້ອນການຄວບຄຸມກວດກາບັນດາດ່ານທ້ອງຖິ່ນ ເພື່ອສະກັດກັ້ນໂລກລະບາດໂຄວິດ - 19 ຢ່າງເຄັ່ງຄັດ ໄດ້ເຮັດໃຫ້ລາຄາຂອງສິນຄ້າບາງຊະນິດຢູ່ບາງເຂດຊາຍແດນເພີ່ມຂຶ້ນ. ເພື່ອຜົນປະໂຫຍດ, ບັນດາເປົ້າໝາຍບໍ່ຫົວຊາຕໍ່ຄວາມສ່ຽງແຜ່ລະບາດໂລກລະບາດໂຄວິດ - 19 ແລະ ຂໍ້ກຳນົດຂອງກົດໝາຍ, ນຳໃຊ້ທຸກວິທີການ ເພື່ອຂົນສ່ົງສິນຄ້າເຖື່ອນຜ່ານຊາຍແດນ, ເຮັດໃຫ້ສະພາບການຄ້າເຖື່ອນໃນບໍລິເວນຍັງມີການຜັນແປຢ່າງສັບສົນ.
ບຸນຄົງ
