ເຊີນລາ ແລະ ແທງຮວ໋າ ສະແດງຄວາມຮູ້ບຸນຄຸນຕໍ່ທະຫານອາສາສະໝັກຫວຽດນາມທີ່ຊ່ວຍເຫຼືອລາວ

ເຊີນລາສືບຕໍ່ມູນເຊື້ອຄວາມສາມັກຄີ ແລະ ສາຍໃຍຜູກພັນຫວຽດນາມ - ລາວ

ວັນທີ 25/10, ຄະນະປະສານງານທະຫານອາສາສະໝັກ ແລະ ຊ່ຽວຊານທະຫານຫວຽດນາມທີ່ຊ່ວຍເຫຼືອລາວ ປະຈຳແຂວງເຊີນລາ ໄດ້ຈັດພິທີລະນຶກ 77 ປີແຫ່ງວັນມູນເຊື້ອທະຫານອາສາສະໝັກ ແລະ ຊ່ຽວຊານທະຫານຫວຽດນາມທີ່ຊ່ວຍເຫຼືອການປະຕິວັດລາວ.

ເຂົ້າຮ່ວມມີຜູ້ຕາງໜ້າຄະນະປະສານງານທະຫານອາສາສະໝັກ ແລະ ຊ່ຽວຊານທະຫານຫວຽດນາມທີ່ຊ່ວຍເຫຼືອລາວ ລະດັບທົ່ວປະເທດ, ສະຖານເອກອັກຄະລັດຖະທູດສາທາລະນະລັດປະຊາທິປະໄຕປະຊາຊົນລາວປະຈຳຫວຽດນາມ, ສະມາຄົມມິດຕະພາບຫວຽດນາມ - ລາວ ແຂວງເຊີນລາ ພ້ອມດ້ວຍຜູ້ແທນ 300 ຄົນ ທີ່ເປັນທະຫານອາສາສະໝັກ, ຊ່ຽວຊານທະຫານຫວຽດນາມ ແລະ ພະນັກງານ, ນັກສຶກສາລາວຈາກບັນດາແຂວງພາກເໜືອຂອງລາວທີ່ກຳລັງສຶກສາຢູ່ເຊີນລາ.

ໃນພິທີ, ບັນດາຜູ້ແທນໄດ້ຮ່ວມກັນຫວນຄືນເສັ້ນທາງການຕໍ່ສູ້ ແລະ ຄວາມຜູກພັນລະຫວ່າງທະຫານອາສາສະໝັກ ແລະ ຊ່ຽວຊານທະຫານຫວຽດນາມກັບກອງທັບ ແລະ ປະຊາຊົນລາວ ໃນສອງສົງຄາມຕໍ່ຕ້ານລັດທິລ່າເມືອງຂຶ້ນຝຣັ່ງ ແລະ ຈັກກະພັດອາເມລິກາ. ການປະກອບສ່ວນ ແລະ ການເສຍສະຫຼະຂອງທະຫານອາສາສະໝັກ ແລະ ຊ່ຽວຊານທະຫານຫຼາຍຮຸ່ນຄົນ ໄດ້ປະກອບສ່ວນສຳຄັນເຂົ້າໃນໄຊຊະນະຂອງການປະຕິວັດລາວ, ສ້າງພື້ນຖານໃຫ້ແກ່ສາຍພົວພັນສາມັກຄີພິເສດລະຫວ່າງສອງຊາດ.

ມອບທຶນການສຶກສາໃຫ້ແກ່ບັນດານັກສຶກສາລາວ. (ພາບ: ໜັງສືພິມເຊີນລາ)

ຄະນະປະສານງານທະຫານອາສາສະໝັກ ແລະ ຊ່ຽວຊານທະຫານຫວຽດນາມທີ່ຊ່ວຍເຫຼືອລາວ ແຂວງເຊີນລາ ສ້າງຕັ້ງຂຶ້ນໃນປີ 2014, ປັດຈຸບັນມີສະມາຊິກຫຼາຍກວ່າ 4.000 ຄົນ.

ໃນຊຸມປີຜ່ານມາ, ຄະນະປະສານງານໄດ້ຮັກສາບັນດາກິດຈະກຳຕອບແທນບຸນຄຸນ, ເອົາໃຈໃສ່ຊີວິດການເປັນຢູ່ຂອງສະມາຊິກ, ປະສານສົມທົບໃນການຊອກຫາ ແລະ ເກັບກູ້ອັດຖິຂອງວິລະຊົນຜູ້ເສຍສະຫຼະຊີວິດ. ພ້ອມກັນນັ້ນ, ຄະນະຍັງເຂົ້າຮ່ວມວຽກງານການຕ່າງປະເທດປະຊາຊົນຢ່າງຫ້າວຫັນ, ຈັດກິດຈະກຳແລກປ່ຽນ ແລະ ຊ່ວຍເຫຼືອນັກສຶກສາລາວທີ່ກຳລັງສຶກສາຢູ່ໃນແຂວງ.

ໃນປີ 2026, ຄະນະປະສານງານໄດ້ປະສານສົມທົບຊ່ວຍເຫຼືອສ້ອມແປງເຮືອນ 2 ຫຼັງ ໃຫ້ແກ່ຄອບຄົວທະຫານທີ່ມີສະພາບຫຍຸ້ງຍາກຢູ່ແຂວງຫົວພັນ (ລາວ), ດ້ວຍງົບປະມານລວມ 200 ລ້ານດົ່ງ.

ໃນໄລຍະຕໍ່ໜ້າ, ຄະນະປະສານງານຈະສືບຕໍ່ປັບປຸງອົງການຈັດຕັ້ງໃຫ້ສົມບູນ, ຍົກສູງປະສິດທິຜົນການເຄື່ອນໄຫວຢູ່ຂັ້ນຮາກຖານ, ເພີ່ມທະວີການເອົາໃຈໃສ່ສະມາຊິກ, ປະຕິບັດບັນດາໂຄງການສະແດງນ້ຳໃຈຕໍ່ສະຫາຍຮ່ວມຮົບ ແລະ ສຶກສາມູນເຊື້ອໃຫ້ແກ່ຄົນຮຸ່ນໜຸ່ມ, ປະກອບສ່ວນເສີມສ້າງສາຍພົວພັນມິດຕະພາບຫວຽດນາມ - ລາວ.

ກ່າວຄຳປາໄສໃນພິທີລະນຶກ, ຜູ້ຕາງໜ້າສະຖານເອກອັກຄະລັດຖະທູດລາວປະຈຳຫວຽດນາມ ໄດ້ສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ການເສຍສະຫຼະ ແລະ ການປະກອບສ່ວນຂອງທະຫານອາສາສະໝັກ ແລະ ຊ່ຽວຊານທະຫານຫວຽດນາມ ໃນພາລະກິດຕໍ່ສູ້ປົດປ່ອຍຊາດຂອງປະຊາຊົນລາວ.

ຜູ້ຕາງໜ້າສະຖານທູດໄດ້ຢືນຢັນຄວາມຕັ້ງໃຈທີ່ຈະສືບຕໍ່ຮັກສາ ແລະ ສົ່ງເສີມສາຍພົວພັນມິດຕະພາບອັນຍິ່ງໃຫຍ່ ແລະ ຄວາມສາມັກຄີພິເສດລະຫວ່າງສອງປະເທດ.

ໃນໂອກາດນີ້, ຄະນະປະສານງານໄດ້ມອບຂອງຂວັນ 50 ຊຸດ ໃຫ້ແກ່ນັກສຶກສາລາວທີ່ກຳລັງສຶກສາຢູ່ເຊີນລາ, ເພື່ອໃຫ້ກຳລັງໃຈແກ່ນັກສຶກສາໃນການພະຍາຍາມຮ່ຳຮຽນ ແລະ ສືບຕໍ່ປະກອບສ່ວນປູກຝັງມິດຕະພາບລະຫວ່າງປະຊາຊົນສອງປະເທດ.

ແທງຮວ໋າຮັກສາສາຍໃຍສະຫາຍຮ່ວມຮົບ, ມຸ່ງສູ່ບັນດາຂີດໝາຍມິດຕະພາບ

ໃນວັນທີ 25/10 ດຽວກັນ, ຄະນະປະສານງານທະຫານອາສາສະໝັກ ແລະ ຊ່ຽວຊານທະຫານຫວຽດນາມທີ່ຊ່ວຍເຫຼືອການປະຕິວັດລາວ ແຂວງແທງຮວ໋າ ໄດ້ຈັດການພົບປະລະນຶກ 77 ປີແຫ່ງວັນມູນເຊື້ອ.

ໃນໂຄງການ, ທ່ານ ຫງວຽນ ຍື ຕູ໊, ຮອງປະທານສະມາຄົມມິດຕະພາບຫວຽດນາມ - ລາວ ແຂວງແທງຮວ໋າ, ຫົວໜ້າຄະນະປະສານງານທະຫານອາສາສະໝັກ ແລະ ຊ່ຽວຊານທະຫານຫວຽດນາມທີ່ຊ່ວຍເຫຼືອການປະຕິວັດລາວ ແຂວງແທງຮວ໋າ, ໄດ້ແຈ້ງຜົນການເຄື່ອນໄຫວຂອງຄະນະໃນປີ 2026.

ຕາມທ່ານ ຫງວຽນ ຍື ຕູ໊ ແລ້ວ, ເຖິງວ່າສະມາຊິກສ່ວນໃຫຍ່ຈະມີອາຍຸສູງ ແລະ ສຸຂະພາບຫຼຸດຖອຍລົງ, ແຕ່ບັນດາກິດຈະກຳຂອງຄະນະປະສານງານຍັງຄົງໄດ້ຮັບການຮັກສາຢ່າງສະໝ່ຳສະເໝີ ແລະ ຄ່ອຍໆມີຄວາມໝັ້ນຄົງ.

ປັດຈຸບັນ, ທົ່ວແຂວງມີຄະນະປະສານງານ 22 ຄະນະ ດ້ວຍສະມາຊິກ 2.237 ຄົນ, ປະກອບມີຄະນະປະສານງານລະຫວ່າງບັນດາຕາແສງ 15 ຄະນະ, ຄະນະປະສານງານລະຫວ່າງບັນດາຄຸ້ມ 4 ຄະນະ ແລະ ຄະນະປະສານງານຂອງບັນດາກົມກອງມູນເຊື້ອ 3 ຄະນະ.

ການປັບປຸງອົງການຈັດຕັ້ງ ແລະ ຮັກສາການເຄື່ອນໄຫວພາຍຫຼັງການຈັດລຽງຄືນໃໝ່ບັນດາຫົວໜ່ວຍບໍລິຫານ ໄດ້ປະກອບສ່ວນຮັກສາການເຊື່ອມຕໍ່ລະຫວ່າງອະດີດທະຫານອາສາສະໝັກ ແລະ ຊ່ຽວຊານທະຫານຫວຽດນາມທີ່ເຄີຍປະຕິບັດໜ້າທີ່ຢູ່ລາວ.

ມອບໃບຍ້ອງຍໍໃຫ້ແກ່ບັນດາສະມາຊິກ. (ພາບ: ສະມາຄົມມິດຕະພາບຫວຽດນາມ - ລາວ ແຂວງແທງຮວ໋າ)

ນອກຈາກບັນດາໂຄງການພົບປະໃນຕົ້ນລະດູບານໃໝ່ ແລະ ການລະນຶກວັນມູນເຊື້ອຂອງກົມກອງແລ້ວ, ຄະນະປະສານງານຍັງສືບຕໍ່ເອົາໃຈໃສ່ຢ້ຽມຢາມ, ໃຫ້ກຳລັງໃຈສະມາຊິກ ແລະ ຊ່ວຍເຫຼືອບັນດາຄອບຄົວທີ່ມີສະພາບຫຍຸ້ງຍາກ.

ກິດຈະກຳທີ່ໜ້າສົນໃຈປະການໜຶ່ງໃນປີນີ້ແມ່ນ ການເດີນທາງກັບຄືນໄປຢ້ຽມຢາມສະໜາມຮົບເກົ່າຢູ່ລາວ ແຕ່ວັນທີ 4-13/5/2026, ໂດຍມີພະນັກງານ ແລະ ສະມາຊິກ 34 ຄົນ ທີ່ເປັນຜູ້ຕາງໜ້າບັນດາກົມກອງເຂົ້າຮ່ວມ.

ໃນການເດີນທາງ, ຄະນະໄດ້ພົບປະ ແລະ ແລກປ່ຽນກັບຜູ້ຕາງໜ້າບັນດາທ້ອງຖິ່ນຊຽງຂວາງ, ວຽງຈັນ, ຫຼວງພະບາງ, ສະຖານເອກອັກຄະລັດຖະທູດຫວຽດນາມປະຈຳລາວ ແລະ ສະມາຄົມນັກຮົບເກົ່າແຫ່ງຊາດລາວ.

ບັນດາການພົບປະໄດ້ປະກອບສ່ວນຮັກສາຄວາມຜູກພັນອັນໃກ້ຊິດລະຫວ່າງທະຫານອາສາສະໝັກຫວຽດນາມຫຼາຍຮຸ່ນຄົນກັບປະຊາຊົນລາວ, ພ້ອມທັງສືບຕໍ່ມູນເຊື້ອຄວາມສາມັກຄີທີ່ໄດ້ຮັບການປູກຝັງຜ່ານຫຼາຍໄລຍະປະຫວັດສາດ.

ມຸ່ງສູ່ປີ 2027, ເຊິ່ງສອງປະເທດຈະລະນຶກ 65 ປີແຫ່ງວັນສ້າງຕັ້ງສາຍພົວພັນການທູດ, 50 ປີແຫ່ງວັນລົງນາມສົນທິສັນຍາມິດຕະພາບ ແລະ ການຮ່ວມມືຫວຽດນາມ - ລາວ, ພ້ອມທັງ 60 ປີແຫ່ງການຮ່ວມມືມິດຕະພາບລະຫວ່າງແທງຮວ໋າ ແລະ ຫົວພັນ, ຄະນະປະສານງານແຂວງແທງຮວ໋າ ໄດ້ກຳນົດຈະສືບຕໍ່ຊຸກຍູ້ວຽກງານໂຄສະນາ, ສຶກສາມູນເຊື້ອ, ເອົາໃຈໃສ່ຊີວິດການເປັນຢູ່ຂອງສະມາຊິກ ແລະ ຈັດບັນດາກິດຈະກຳແລກປ່ຽນມິດຕະພາບ.

ຄະນະປະສານງານຍັງຄາດວ່າຈະຈັດບັນດາການເດີນທາງກັບຄືນໄປຢ້ຽມຢາມສະໜາມຮົບເກົ່າຢູ່ເຂດພາກໃຕ້ຂອງລາວ ແລະ ຜາຖີ່ ແຂວງຫົວພັນ, ຜ່ານນັ້ນສືບຕໍ່ຮັກສາຄວາມຊົງຈຳທາງປະຫວັດສາດ, ສາຍໃຍສະຫາຍຮ່ວມຮົບ ແລະ ສາຍພົວພັນອັນໃກ້ຊິດລະຫວ່າງປະຊາຊົນສອງປະເທດຫວຽດນາມ - ລາວ.

ຊຸດເສື້ອຍາວຫວຽດນາມ ເຊື່ອມສານສາຍສຳພັນມິດຕະພາບຫວຽດນາມ - ລາວ ຍສໝ - ຕອນຄ່ຳວັນທີ 20/10, ທີ່ນະຄອນຫຼວງວຽງຈັນ (ລາວ), ສະໂມສອນມໍລະດົກຊຸດເສື້ອຍາວຫວຽດນາມປະຈຳລາວ ໄດ້ຈັດລາຍການພົບປະລະນຶກຄົບຮອບ 96 ປີ ວັນສ້າງຕັ້ງສະຫະພັນແມ່ຍິງຫວຽດນາມ (20/10/1930 - 20/10/2026) ພາຍໃຕ້ຫົວຂໍ້ “ຊຸດເສື້ອຍາວ - ຂົວເຊື່ອມຕໍ່ວັດທະນະທຳຫວຽດນາມ - ລາວ”. ນີ້ຍັງເປັນກິດຈະກຳທຳອິດຂອງຊຸມຊົນຊາວຫວຽດນາມຢູ່ລາວ ເພື່ອຂານຮັບວັນບຸນມະຫາສາມັກຄີທົ່ວປວງຊົນທີ່ແນວໂຮມປິຕຸພູມຫວຽດນາມເປັນຜູ້ລິເລີ່ມ.

ຊາວໜຸ່ມຫວຽດນາມ - ລາວ ເພີ່ມທະວີການຮ່ວມມື, ສົ່ງເສີມມູນເຊື້ອຄວາມສາມັກຄີພິເສດ ຍສໝ - ຕອນບ່າຍວັນທີ 21/10, ທີ່ສຳນັກງານສູນກາງພັກ, ສະຫາຍ ເຈິ່ນ ເກິ໋ມ ຕູ໊, ກຳມະການກົມການເມືອງ, ຜູ້ປະຈຳການຄະນະເລຂາທິການ ໄດ້ຕ້ອນຮັບຄະນະຜູ້ແທນສູນກາງຊາວໜຸ່ມປະຊາຊົນປະຕິວັດລາວ, ໂດຍເນັ້ນໜັກບົດບາດຂອງຄົນຮຸ່ນໜຸ່ມໃນການຮັກສາສາຍພົວພັນພິເສດຫວຽດນາມ - ລາວ, ພ້ອມທັງຊຸກຍູ້ການຮ່ວມມືດ້ານການສຶກສາ, ການຝຶກອົບຮົມ, ວິທະຍາສາດ - ເຕັກໂນໂລຊີ ແລະ ການຫັນປ່ຽນເປັນດິຈິຕອນ.