ຫວຽດນາມລົງນາມສັນຍາການຄ້າເສລີກັບ 4 ປະເທດເອີຣົບ

ຝ່າຍ EFTA ທີ່ເຂົ້າຮ່ວມລົງນາມ ປະກອບມີ ທ່ານ Guy Parmelin, ປະທານສະຫະພັນສະວິດເຊີແລນ ແລະ ລັດຖະມົນຕີກະຊວງເສດຖະກິດ, ການສຶກສາ ແລະ ການຄົ້ນຄວ້າ; ທ່ານນາງ Brigitte Haas, ນາຍົກລັດຖະມົນຕີ ຄວບຕຳແໜ່ງລັດຖະມົນຕີຮັບຜິດຊອບວຽກງານລັດຖະບານ ແລະ ການເງິນຂອງລິກເຕນສະໄຕ; ທ່ານນາງ Þorgerður Katrín Gunnarsdóttir, ລັດຖະມົນຕີກະຊວງການຕ່າງປະເທດໄອສແລນ ແລະ ທ່ານນາງ Astrid Bergmål, ລັດຖະມົນຕີຊ່ວຍວ່າການກະຊວງການຕ່າງປະເທດນອກແວ.

ການລົງນາມ VEFTA ເປັນຂີດໝາຍແຫ່ງບາດກ້າວພັດທະນາໃໝ່ໃນສາຍພົວພັນເສດຖະກິດ ແລະ ການຄ້າລະຫວ່າງຫວຽດນາມກັບ 4 ປະເທດສະມາຊິກ EFTA. ປະເທດເຫຼົ່ານີ້ລ້ວນແຕ່ມີຈຸດແຂງດ້ານເຕັກໂນໂລຊີ ແລະ ນະວັດຕະກຳ, ພ້ອມດ້ວຍທ່າແຮງການຮ່ວມມືກັບຫວຽດນາມຢ່າງຫຼວງຫຼາຍ.

ພາຍໃຕ້ການເປັນສັກຂີພິຍານຂອງທ່ານ ໂຕ ເລິມ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ, ທ່ານ ເລ ແມ້ງ ຮຸ່ງ, ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຜູ້ແທນຈາກ 4 ປະເທດສະມາຊິກສະມາຄົມການຄ້າເສລີເອີຣົບ (EFTA) ໄດ້ດຳເນີນພິທີລົງນາມໃນສັນຍາການຄ້າເສລີຫວຽດນາມ - EFTA (VEFTA).

ສັນຍາຍັງສະແດງເຖິງຄຳໝັ້ນສັນຍາຂອງບັນດາຝ່າຍໃນການຊຸກຍູ້ການເປີດເສລີທາງການຄ້າ, ເພີ່ມທະວີການເຊື່ອມໂຍງທາງເສດຖະກິດ ແລະ ສະໜັບສະໜູນລະບົບການຄ້າສາກົນທີ່ອີງໃສ່ກົດລະບຽບ ໃນສະພາບທີ່ເສດຖະກິດໂລກຍັງຄົງປະເຊີນກັບຄວາມຜັນຜວນຫຼາຍດ້ານ.

VEFTA ມີຂອບເຂດຄຳໝັ້ນສັນຍາທີ່ກວ້າງຂວາງ, ກວມເອົາການຄ້າສິນຄ້າ, ການຄ້າບໍລິການ, ການລົງທຶນ, ຊັບສິນທາງປັນຍາ, ການຈັດຊື້ຈັດຈ້າງຂອງລັດຖະບານ, ການແຂ່ງຂັນ, ການຊ່ວຍເຫຼືອວິສາຫະກິດຂະໜາດນ້ອຍ ແລະ ກາງ, ການແກ້ໄຂຂໍ້ຂັດແຍ່ງ, ການຄ້າ ແລະ ການພັດທະນາທີ່ຍືນຍົງ.

ສະເພາະໃນຂົງເຂດການຄ້າສິນຄ້າ, ເນື້ອໃນຄຳໝັ້ນສັນຍາກວມເອົາພາສີສຸລະກາກອນ, ສິ່ງກີດຂວາງທາງເຕັກນິກໃນການຄ້າ, ມາດຕະການສຸຂານາໄມ ແລະ ການກັກກັນພືດ ແລະ ສັດ, ຂັ້ນຕອນສຸລະກາກອນ ແລະ ມາດຕະການປົກປ້ອງທາງການຄ້າ.

ດ້ວຍເນື້ອໃນການຮ່ວມມືທີ່ຮອບດ້ານ, ຄາດວ່າສັນຍາຈະສ້າງເງື່ອນໄຂໃຫ້ບັນດາວິສາຫະກິດຫວຽດນາມສາມາດຫັນຕະຫຼາດສົ່ງອອກ ແລະ ນຳເຂົ້າໃຫ້ມີຄວາມຫຼາກຫຼາຍ, ຍົກສູງຄວາມສາມາດແຂ່ງຂັນ ແລະ ເຂົ້າຮ່ວມໃນຕ່ອງໂສ້ມູນຄ່າໂລກຢ່າງເລິກເຊິ່ງຍິ່ງຂຶ້ນ.

ນອກຈາກການຂະຫຍາຍການຄ້າແລ້ວ, VEFTA ຍັງເປີດໂອກາດໃນການດຶງດູດແຫຼ່ງທຶນລົງທຶນຄຸນນະພາບສູງ, ເຂົ້າເຖິງເຕັກໂນໂລຊີທັນສະໄໝ ແລະ ປະສົບການດ້ານການບໍລິຫານຈັດການຈາກບັນດາເສດຖະກິດທີ່ພັດທະນາແລ້ວໃນເອີຣົບ.

ໃນຊຸມປີຜ່ານມາ, ສາຍພົວພັນເສດຖະກິດ, ການຄ້າ ແລະ ການລົງທຶນລະຫວ່າງຫວຽດນາມກັບບັນດາປະເທດ EFTA ໄດ້ຮັກສາທ່າອ່ຽງການພັດທະນາໃນທາງບວກ. ມູນຄ່າການຄ້າສອງຝ່າຍບັນລຸສະເລ່ຍເກືອບ 2 ຕື້ໂດລາສະຫະລັດຕໍ່ປີ.

ໂຄງປະກອບສິນຄ້າສົ່ງອອກ ແລະ ນຳເຂົ້າລະຫວ່າງສອງຝ່າຍມີລັກສະນະເສີມຈຸດແຂງໃຫ້ແກ່ກັນ, ສອດຄ່ອງກັບຄວາມຕ້ອງການ ແລະ ຂໍ້ໄດ້ປຽບຂອງແຕ່ລະຕະຫຼາດ.

ສິນຄ້າທີ່ຫວຽດນາມສົ່ງອອກໄປຍັງ EFTA ສ່ວນໃຫຍ່ປະກອບມີ ຜະລິດຕະພັນສັດນ້ຳ, ເກີບ, ເຄື່ອງຕັດຫຍິບ, ເຄື່ອງຈັກ, ອຸປະກອນເອເລັກໂຕຣນິກ ແລະ ຊິ້ນສ່ວນປະກອບ. ໃນທາງກັບກັນ, ຫວຽດນາມນຳເຂົ້າເຄື່ອງຈັກ, ອຸປະກອນອຸດສາຫະກຳ, ສານເຄມີ, ຢາປົວພະຍາດ ແລະ ວັດຖຸດິບເພື່ອຮັບໃຊ້ການຜະລິດ.

ໃນຂົງເຂດການລົງທຶນ, ບັນດາວິສາຫະກິດ EFTA ສືບຕໍ່ຂະຫຍາຍການດຳເນີນງານຢູ່ຫວຽດນາມ. ນັບຮອດທ້າຍປີ 2025, ສະວິດເຊີແລນມີ 234 ໂຄງການທີ່ຍັງມີຜົນບັງຄັບໃຊ້, ດ້ວຍຍອດທຶນຈົດທະບຽນລວມຫຼາຍກວ່າ 2,4 ຕື້ໂດລາສະຫະລັດ. ນອກແວມີ 62 ໂຄງການ, ດ້ວຍຍອດທຶນຈົດທະບຽນລວມຫຼາຍກວ່າ 201 ລ້ານໂດລາສະຫະລັດ.

ບັນດາກຸ່ມບໍລິສັດ ແລະ ນັກລົງທຶນລາຍໃຫຍ່ຈາກປະເທດສະມາຊິກ EFTA ຫຼາຍແຫ່ງ ໄດ້ເຂົ້າມາດຳເນີນງານຢູ່ຫວຽດນາມໃນຂົງເຂດຕ່າງໆ ເຊັ່ນ ອຸດສາຫະກຳ, ອາຫານ, ຢາປົວພະຍາດ, ພະລັງງານ ແລະ ເຕັກໂນໂລຊີ.

ນອກຈາກບັນດາຂົງເຂດດັ້ງເດີມແລ້ວ, ວິສາຫະກິດ EFTA ຍັງໃຫ້ຄວາມສົນໃຈຕໍ່ໂອກາດການຮ່ວມມືໃນຂົງເຂດນະວັດຕະກຳ, ເຕັກໂນໂລຊີຂັ້ນສູງ, ໂລຈິສຕິກ ແລະ ກົນຈັກຄວາມແມ່ນຍຳສູງ.

ບົນພື້ນຖານສາຍພົວພັນເສດຖະກິດທີ່ກຳລັງພັດທະນາ, ຄາດວ່າການລົງນາມ VEFTA ຈະສ້າງແຮງຂັບເຄື່ອນເພີ່ມເຕີມໃນການຊຸກຍູ້ການຄ້າ, ການລົງທຶນ ແລະ ການຮ່ວມມືດ້ານເຕັກໂນໂລຊີລະຫວ່າງຫວຽດນາມກັບສະວິດເຊີແລນ, ນອກແວ, ໄອສແລນ ແລະ ລິກເຕນສະໄຕ.

ພ້ອມກັນນັ້ນ, ສັນຍາຍັງປະກອບສ່ວນຂະຫຍາຍໂອກາດໃຫ້ແກ່ວິສາຫະກິດຂອງສອງຝ່າຍ, ຊຸກຍູ້ການເຕີບໂຕທາງເສດຖະກິດ, ນະວັດຕະກຳ ແລະ ການພັດທະນາທີ່ຍືນຍົງ, ມຸ່ງໄປສູ່ການນຳມາຊຶ່ງຜົນປະໂຫຍດອັນແທ້ຈິງໃຫ້ແກ່ປະຊາຊົນຫວຽດນາມ ແລະ ບັນດາປະເທດສະມາຊິກ EFTA.

ນະຄອນໂຮ່ຈີມິນ ເພີ່ມເອກະລັກດຶງດູດກະແສທຶນ FDI ຄຸນນະພາບສູງ ຈາກ ເອີຣົບ ຍສໝ - ກະແສທຶນ ພວມຄ່ອຍໆຂະຫຍາຍຕົວໄປສູ່ ຂະແໜງເຕັກໂນໂລຊີສູງ, ການປະດິດສ້າງໃໝ່ ແລະ ເສດຖະກິດສີຂຽວ.

ເຍົາວະຊົນຫວຽດນາມ ຢູ່ເອີຣົບໂຮມໂຕຢູ່ອິຕາລີ: ຄວາມມຸ່ງມາດປາດຖະໜາສ້າງສາ ແລະ ເສັ້ນທາງກໍ່ສ້າງປະເທດຊາດ ຍສໝ - ເຫດການຈະດຶງດູດນັກຄ້າຍປະມານ 100 ຄົນ ພ້ອມດ້ວຍຕົວແທນອົງການການທູດວັດທະນະທຳ, ບັນດາຜູ້ແທນແຂກເຊີນ.