 |
ພາບປະກອບ.
ບໍ່ດົນມານີ້ທີ່ແຂວງຫຼວງນ້ຳທາ ຄະນະກວດກາພັກ-ອົງການກວດກາລັດ ແຂວງຫຼວງນໍ້າທາ ໄດ້ຈັດກອງປະຊຸມສະຫຼຸບວຽກງານກວດກາປະຈຳປີ 2018 ວາງທິດທາງແຜນການປີ 2019 ແລະ ຜັນຂະຫຍາຍເນື້ອໃນຈິດໃຈຂອງກອງປະຊຸມວຽກງານກວດກາທົ່ວປະເທດປະຈຳປີ 2018 ໂດຍການເປັນປະທານຂອງທ່ານ ຄໍາຟອງ ອິນມະນີ ກໍາມະການປະຈຳພັກແຂວງປະທານສານປະຊາຊົນແຂວງມີ ທ່ານ ໄຊພອນ ຄຸນສີລິເຮຶອງ ຮອງເລຂາພັກແຂວງປະທານສະພາປະຊາ ຊົນແຂວງ, ມີກຳມະການປະຈຳພັກແຂວງ,ກຳມະການພັກແຂວງ,ຫົວໜ້າພະແນກການອ້ອມຂ້າງແຂວງ,ສອງກອງບັນຊາການ ປກຊ, ປກສ, ອົງການທຽບເທົ່າ, ເຈົ້າເມືອງ 5 ເມືອງ ແລະພະນັກງານວິຊາການເຂົ້າຮ່ວມ.
ທ່ານ ບຸນທອນ ສີສະຫວັນ ຮັກສາການປະທານຄະນະກວດກາພັກ-ລັດ ແຂວງຫຼວງນໍ້າທາໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານວ່າ: ໃນ 1 ປີຜ່າ ນມາຄະນະພັກ, ຄະນະກວດກາແຕ່ລະຂັ້ນໄດ້ເອົາໃຈໃສ່ລົງເຜີຍແຜ່, ຄົ້ນຄວ້າເຊື່ອມຊືມເອກະສານມະຕິ, ຄຳສັ່ງຂໍ້ກຳນົດ, ກົດໝາຍເວົ້າລວມ, ເວົ້າສະເພາະ ແມ່ນກົດໝາຍກວດກາລັດ, ກົດໝາຍຕ້ານການສໍ້ລາດບັງຫຼວງ, ກົດໝາຍວ່າດ້ວຍການແກ້ໄຂຄຳຮ້ອງທຸກ,
ຍຸດທະສາດຕ້ານການສໍ້ລາດບັງຫຼວງ ແລະນິຕິກຳອື່ນໆກ່ຽວກັບວຽກງານກວດກາໃຫ້ແກ່ສະມາຊິກພັກພະນັກງານລັດຖະກອນ, ທະຫານຕຳຫຼວດ ແລະ ປະຊາຊົນບັນດາເຜົ່ານັບແຕ່ຂັ້ນແຂວງລົງຮອດຂັ້ນບ້ານ, ທົ່ວແຂວງໄດ້ຈັດຕັ້ງເຊື່ອມຊືມເອກະສານໄດ້ທັງໝົດ 46 ຄັ້ງ, ມີຜູ້ເຂົ້າຮ່ວມເກືອບ 3 ພັນເທື່ອຄົນ, ຍີງ 431 ເທື່ອຄົນ.
ວຽກງານກວດກາພັກ, ການກໍ່ສ້າງ ແລະຂະຫຍາຍພັກມາຮອດປັດຈຸບັນທົ່ວແຂວງມີ 82 ຄະນະພັກຮາກຖານ, ມີ 623 ໝ່ວຍພັກ, ທຽບໃສ່ປີ 2017 ເພິ້ມຂຶ້ນ 37 ໜ່ວຍພັກ, ມີສະມາຊິກພັກທັງໝົດ 11.097 ສະຫາຍ, ຍິງ 2,918 ສະຫາຍເພິ້ມຂື້ນ 128 ສະຫາຍ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເຫັນວ່າບັນດາໜ່ວຍພັກກໍ່ໄດ້ເອົາໃຈໃສ່ຈັດຕັ້ງປະຕິບັດໂດຍເອົາຄຸນນະພາບເປັນຕົ້ນຕໍ,
ເອົາປະລິມານເປັນສຳຄັນຊຶ່ງສະແດງໃຫ້ເຫັນປີ 2018 ມີໜ່ວຍພັກປອດໃສເຂັ້ມແຂງໜັກແໜ້ນທັງໝົດ 512 ໜ່ວຍ, ທຽບໃສ່ປີ 2017 ເພີ້ມຂຶ້ນ 86 ໜ່ວຍ, ມີສະມາຊິກພັກແຂວງ 9.488 ສະຫາຍ, ຍິງ 2.473 ສະຫາຍ, ກາງ 589 ສະຫາຍ, ຍີງ 183 ສະຫາຍ, ອ່ອນ 10 ສະຫາຍ, ຍີງ 1 ສະຫາຍ, ເສຍທາດ 7 ສະຫາຍ, ບໍ່ໄດ້ຈັດປະເພດ 1.003 ສະຫາຍ, ຍີງ 261 ສະຫາຍ, ໄດ້ຕິດ ຕາມການຮ່ວມຊີວິດພັກ ແລະ ເສຍເງີນສະຕິພັກ 1 ປີ ໄດ້ທັງໝົດ 41,8 ລ້ານກີບ.
ວຽກງານກວດກາການບໍລິຫານລັດໄດ້ສົມທົບຄະນະສະເພາະກິດຂັ້ນແຂວງ ແລະ ຂັ້ນສູນກາງແກ້ໄຂການລັກລອບເຄື່ອນຍ້າຍໄມ້ດູເພື່ອສົ່ງອອກໄປ ສປ ຈີນໂດຍຜ່ານດ່ານພາສີສາກົນບໍ່ເຕັ່ນມີໄມ້ຈຳນວນ 3.214 ທ່ອນ, ບໍລິມາດ 153,48 ແມັດກ້ອນ ແລະ ໄດ້ສົ່ງສຳນວນຄະດີໃຫ້ໄອຍະການສັ່ງຟ້ອງສານ ແລະ ສານໄດ້ຕັດສິນລົງໂທດບຸກຄົນຕາມກໍລະນີພ້ອມທັງຢຶດໄມ້ຈຳນວນດັ່ງກ່າວເປັນຂອງລັດ,ລວມມູນຄ່າປະມູນຂາຍໄມ້ໄດ້ທັງໝົດເປັນເງິນຈຳນວນ 2,130 ,050,098 ກີບ,
ຍຶດໄດ້ການຕັດໄມ້ທີ່ບໍ່ຖຶກຕ້ອງຢູ່ເມືອງວຽງພູຄາປະເພດໄມ້ດູ່ ແລະ ໄມ້ເນື້ອອ່ອນມີ 47 ທ່ອນເທົ່າກັບ 58,95 ແມັດກ້ອນ, ມີຜູ້ກະທຳ ຜິດ 23 ຄົນ, ຕິດຕາມກວດກາໂຄງການກໍ່ສ້າງເສັ້ນທາງລົດໄຟລາວ-ຈີນຊ່ວງຜ່ານແຂວງຫຼວງນໍ້າທາໄດ້ເບີກຈ່າຍຄ່າຊົດເຊີຍໃຫ້ປະຊາຊົນທີ່ໄດ້ຖືກຜົນກະທົບມີ 144 ຄອບຄົວ, ເປັນເງິນຈຳນວນ 76,56 ຕື້ກີບ ແລະໄດ້ຕິດຕາມກວດກາໂຄງການລົງທຶນຂອງລັດເລີ່ມແຕ່ຫົວທີໄດ້ຈັດຕັ້ງປະຕິບັດ 9 ໂຄງການ ແລະ ວຽກງານອື່ນໆກໍ່ໄດ້ຮັບການພັດທະນາເຊັ່ນດຽວກັນ.
ຈາກນັ້ນຜູ້ແທນເຂົ້າຮ່ວມກອງປະຊຸມຍັງໄດ້ແລກປ່ຽນຄໍາຄິດຄໍາເຫັນຮ່ວມກັນເພື່ອຊອກຫາວິທີການແກ້ໄຂ ແລະ ພັດທະນາວຽກງານກວດກາໃຫ້ມີປະສິດທິຜົນ ແລະ ດີຂຶ້ນໄປເລື້ອຍໆ.
（ແຫຼ່ງຂໍ້ມູນ： ນສພ ເສດຖະກິດ-ສັງຄົມ）
