 |
ທ່ານ ກິແກ້ວ ໄຂຄຳພິທູນ ຫົວໜ້າຄະນະໂຄສະນາ ອົບຮົມສູນກາງພັກ.
ທ່ານ ກິແກ້ວ ໄຂຄຳພິທູນ ຫົວໜ້າຄະນະໂຄສະນາ ອົບຮົມສູນກາງພັກ ກ່າວໃນກອງປະຊຸມ “ພາກທຸລະກິດ: ບັນຫາໃນປັດຈຸບັນ ແລະ ທາງອອກໃນຕໍ່ໜ້າ” ໃນວັນທີ 4 ຕຸລາ 2018 ນີ້ວ່າ: ພວກເຮົາຕ້ອງມີທັດສະນະທີ່ຖືກຕ້ອງ ແລະ ມີຄວາມຮັບຮູ້ເປັນ ເອກະພາບກັນວ່າ ໃນຕໍ່ໜ້ານີ້ ນະໂຍ ບາຍໃດໆ ແລະ ການກະທຳໃດໆ ກໍຕາມທີ່ວາງອອກນັ້ນ ຖ້າມັນສົ່ງຜົນສະທ້ອນອັນບໍ່ດີ ຫລື ກົດໜ່ວງການຜະລິດ-ທຸລະກິດ, ເຮັດໃຫ້ກຳລັງແຮງສັງລວມ ຂອງຊາດ ບໍ່ໄດ້ຮັບການຍົກສູງຂຶ້ນ ລ້ວນແລ້ວແຕ່ຕ້ອງໄດ້ຮັບ ການແກ້ໄຂຢ່າງເດັດຂາດ ແລະ ເຂັ້ມງວດ.
5 ບັນຫາທີ່ຈະຕ້ອງໄດ້ສຸມໃສ່ໃນການປັບປຸງ ແລະ ແກ້ໄຂໃນຕໍ່ໜ້າປະກອບ ມີ ຫັນພາກທຸລະກິດ, ຜູ້ປະກອບການດ້ານຕ່າງໆ ໃຫ້ເຂົ້າສູ່ ກົດໝາຍ, ພັດທະນາບຸກຄະລາກອນ ແລະ ມີແຜນພັດທະ ນາໃນໄລຍະຍາວ, ລວມທັງສ້າງວັດທະນະທຳທຸລະກິດ, ສ້າງສະພາບແວດລ້ອມ ຫັນປ່ຽນໃໝ່ ດ້ານຈິດຕະສາດ ຂອງຜູ້ປະກອບການ ແລະ ສ້າງຄວາມເຂັ້ມແຂງດ້ວຍຕົນເອງ; ຊຸກຍູ້ສົ່ງເສີມນັກທຸລະກິດພາຍໃນ ໃຫ້ດຳເນີນການຮ່ວມມື ແລະ ສຳພັນກັນ ລະຫວ່າງວິສາຫະກິດ ໃນຂະແໜງການດຽວກັນ, ສ້າງກຳລັງຄວາມສາມາດໃນການແຂ່ງຂັນ ລວມທັງຂະຫຍາຍການຮ່ວມມື ແລະ ສຳພັນກັບ ວິສາຫະກິດ ຂອງຕ່າງປະເທດ ເພື່ອມີທຶນຮອນເພີ່ມຂຶ້ນ, ທັງຍາດແຍ່ງເອົາບົດຮຽນ, ແບບວິທີການຄຸ້ມຄອງທີ່ທັນສະໄໝ, ການນຳໃຊ້ເຕັກໂນໂລຊີໃໝ່ ເພື່ອຍົກມາດຕະຖານ ຄຸນນະພາບຂອງຜະລິດຕະພັນ ແລະ ການບໍລິການຂອງວິສາຫະກິດ ແລະ ສ້າງເຄືອຂ່າຍຕະຫລາດພາຍໃນ ແລະ ຕ່າງປະເທດ ທີ່ໝັ້ນທ່ຽງ ແລະ ກວ້າງອອກຕື່ມ.
ສ້າງ ແລະ ປັບປຸງບັນດານະໂຍບາຍ, ກົນໄກຕ່າງໆຢ່າງເປັນລະບົບ, ຈະແຈ້ງ, ມີຄວາມເຂັ້ມ ແຂງ,ໂປ່ງໃສ ເຮັດໃຫ້ພາກສ່ວນ ເສດຖະກິດຕ່າງໆ ເຄື່ອນໄຫວດຳເນີນທຸລະກິດ ຢ່າງສະເໝີພາບ, ໄດ້ຮັບໂອກາດ ແລະ ການແຂ່ງຂັນທີ່ເປັນທຳ, ພ້ອມທັງເພີ່ມທະວີ ການປະສານສົມທົບ ລະຫວ່າງບັນດາຂະແໜງ ການທີ່ກ່ຽວຂ້ອງຂອງລັດ ເພື່ອຊ່ວຍໃຫ້ການເຄື່ອນໄຫວ ທຸລະກິດຂອງພາກສ່ວນ ເສດຖະກິດຕ່າງໆ ດຳເນີນໄປຢ່າງສະດວກ, ຫລີກເວັ້ນການຊ້ຳຊ້ອນກັນ ແລະ ໂຍນຄວາມຮັບຜິດຊອບໃຫ້ກັນ ເປັນຕົ້ນ ແມ່ນສ້າງສະພາບແວດລ້ອມ ທີ່ເອື້ອອຳນວຍ ໃນການເຂົ້າເຖິງ ແຫລ່ງທຶນດອກເບ້ຍ ຕ່ຳກວ່າປັດຈຸບັນ; ປັບປຸງ ແລະ ກໍ່ສ້າງລະບົບໂຄງລ່າງການຂົນສົ່ງ, ໂທລະຄົມມະນາຄົມ ໃຫ້ສະດວກ ແລະ ທັນສະໄໝ ເພື່ອຫລຸດຜ່ອນຕົ້ນທຶນການຜະລິດ.
ນອກຈາກນັ້ນ, ສືບຕໍ່ບຸກທະລຸທາງ ດ້ານການພັດທະນາຊັບ ພະຍາກອນມະນຸດ ໃຫ້ຖືກຕ້ອງຕາມທິດ ແລະ ສອດຄ່ອງກັບການເຕີບໃຫຍ່ ຂະຫຍາຍຕົວຂອງ ພາກທຸລະກິດ ໂດຍສະເພາະ ແມ່ນການສ້າງນັກບໍລິຫານ,ພະນັກງານວິຊາການ, ນາຍຊ່າງ, ຜູ້ຊຳນານງານ ໃຂຂົງເຂດວິສາຫະກິດ ຕ່າງໆ, ຮັບ ປະກັນໃຫ້ການເຄື່ອນໄຫວ ຂອງພາກທຸລະກິດ ດຳເນີນໄປຖືກຕ້ອງຕາມກົດໝາຍ ແລະ ສ້າງກຳລັງແຮງສັງລວມ ໃຫ້ແກ່ ການພັດທະນາ ເສດຖະກິດຂອງຊາດ.
（ແຫຼ່ງຂໍ້ມູນ： ຂປລ）
