 |
ພິທີເຊັນສັນຍາໂຄງການ ບໍລິການສຸຂະພາບແມ່ ແລະ ເດັກ ຢູ່ແຂວງ ຜົ້ງສາລີ ໄລຍະ 3.
ລັດຖະບານຍີ່ປຸ່ນ ໄດ້ສືບຕໍ່ໃຫ້ທຶນຊ່ວຍເຫລືອລ້າ ໃນໂຄງການ ບໍລິການສຸຂະພາບແມ່ ແລະ ເດັກ ຢູ່ແຂວງ ຜົ້ງສາລີ ໄລຍະ 3 ມູນຄ່າ 355.775 ໂດລາສະຫະລັດ, ພິທີເຊັນສັນຍາໂຄງການ ດັ່ງກ່າວ, ໄດ້ຈັດຂຶ້ນ ໃນວັນທີ 16 ສິງຫາ 2018 ທີ່ສະຖານທູດຍີ່ປຸ່ນ ປະຈໍາລາວ ລະຫ່ວາງ ທ່ານ ທາເຄຊິ ຮິຄິຮາຣະ ເອກອັກຄະຣາຊະທູດຍີ່ປຸ່ນ ປະຈໍາ ລາວ ແລະ ທ່ານ ນາງ ໂນຣິໂກະ ອັນໂດະຜູ້ຈັດການໂຄງການ ຂອງສະມາຄົມເພື່ອຊ່ວຍເຫລືອ ແລະ ບັນເທົາທຸກ ແຫ່ງ ປະເທດຍີ່ປຸ່ນ (AAR Japan), ໂດຍມີ ທ່ານ ຄຳແຈນ ວົງໂພສີ ເຈົ້າແຂວງຜົ້ງສາລີ ເຂົ້າຮ່ວມເປັນສັກຂີພິຍານ.
ໂຄງການປັບປຸງ ການບໍລິການດ້ານສຸຂະພາບ ແມ່ ແລະ ເດັກ ຢູ່ ແຂວງຜົ້ງສາລີ ແມ່ນໂຄງການ ໄລຍະສຸດທ້າຍ ເຊິ່ງເລີ່ມຈັດຕັ້ງປະຕິບັດມາແຕ່ ປີ 2015, ໂດຍມີເປົ້າໝາຍ ປັບປຸງ ສຸຂະພາບ ແມ່ ແລະ ເດັກ (MCH). ປັດຈຸບັນສະມາຄົມຊ່ວຍເຫລືອ ແລະ ບັນເທົາທຸກ ແຫ່ງ ປະເທດຍີ່ປຸ່ນ ໄດ້ມອບອຸປະກອນການແພດທີ່ຈຳເປັນຈຳນວນໜຶ່ງ ແລະ ສ້າງສະພາບແວດລ້ອມ ດ້ານ ການບໍລິຫານ ໃນສິ່ງອຳນວຍຄວາມສະດວກ ດ້ານສຸ ຂະພາບ ເພື່ອຈັດຕັ້ງການບໍລິການດ້ານສຸຂະພາບ ແມ່ ແລະ ເດັກ, ຈັດຝຶກອົບຮົມ ພັດທະນາຄວາມສາມາດ ໃຫ້ແກ່ຜູ້ບໍລິຫານດ້ານສຸຂະພາບ ແລະ ເຜີຍແຜ່ຄວາມສຳຄັນ ຂອງສຸຂະພາບແມ່ ແລະ ເດັກ ໃຫ້ກັບຊາວບ້ານ.
ສຳລັບໂຄງການ ໄລຍະ 3 ນີ້ ສະມາຄົມຊ່ວຍເຫລືອ ແລະ ບັນເທົາທຸກ ແຫ່ງ ປະເທດຍີ່ປຸ່ນ ຈະໄດ້ມອບອຸປະກອນການແພດ ທີ່ຈຳເປັນເພີ່ມອີກ ເພື່ອປັບປຸງສຸຂະອານາໄມ ອຳນວຍຄວາມ ສະດວກ ທາງການແພດ ໂດຍສະເພາະ ການເຂົ້າໂຮງໝໍ່ຂອງຜູ້ຍິງຕັ້ງຄັນ ແລະ ເດັກນ້ອຍ, ຊ່ວຍ ສ້ອມແປງຫລັງຄາທີ່ຮົ່ວໃນຫ້ອງປະສູດ. ນອກນີ້, ຍັງຈະສືບຕໍ່ຈັດກິດຈະກຳ ເພື່ອເພີ່ມຄຸນນະພາບໃນການບໍລິການດ້ານສາທາລະນະສຸກ ແລະ ຊ່ວຍໃຫ້ຜູ້ໃຫ້ບໍລິການ ດ້ານສາທາລະນະສຸກ ສາມາດພັດທະນາດ້ວຍຕົນເອງໄດ້.
（ແຫຼ່ງຂໍ້ມູນ： ຂປລ）
