 |
ທ່ານນາງ ສູນທອນ ໄຊຍະຈັກ ກຳມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງ ສະຫາຍ ຣີ ຢອງ ໂຊ (RI YONG CHOL) ເອກອັກຄະລັດຖະທູດ ເກົາຫລີ ຄົນໃໝ່ ປະຈຳ ສປປ ລາວ.(ພາບ: ຂປລ)
ສະຫາຍ ຣີ ຢອງ ໂຊ ໄດ້ສະແດງຄວາມຂອບໃຈຢ່າງສູງ ຕໍ່ ທ່ານ ນາງ ສູນທອນ ໄຊຍະຈັກ ທີ່ໄດ້ໃຫ້ກຽດຕ້ອນຮັບໃນມື້ນີ້ ແລະ ເປັນກຽດຢ່າງຍິ່ງ ທີ່ໄດ້ຮັບການແຕ່ງຕັ້ງມາປະຕິບັດໜ້າທີ່ ເປັນເອກອັກຄະລັດຖະທູດ ແຫ່ງ ສປປ ເກົາຫລີ ປະຈໍາ ສປປ ລາວ, ເຊິ່ງທ່ານໄດ້ຕີລາຄາສູງ ຕໍ່ສາຍພົວພັນຮ່ວມມື ທີ່ມີມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ສປປ ເກົາຫລີ-ສປປ ລາວ ໃນຕະຫລອດໄລຍະຜ່ານມາ ແລະ ໃຫ້ຄວາມໝັ້ນໝາຍວ່າ ຈະເຮັດສຸດຄວາມສາມາດຂອງຕົນ ເພື່ອຈະປະກອບສ່ວນເຂົ້າໃນການເສີມຂະຫຍາຍ ສາຍພົວພັນມິດຕະພາບ ແລະ ການຮ່ວມມືດັ່ງກ່າວ ທີ່ປະທານ ກິມອິນຊຸງ ແລະ ປະທານ ໄກສອນ ພົມວິຫານ ເປັນຜູ້ກໍ່ຕັ້ງຂຶ້ນນັ້ນ ໃຫ້ນັບມື້ນັບເຕີບໃຫຍ່ຂະຫຍາຍຕົວຍິ່ງໆຂຶ້ນ ເພື່ອຜົນປະໂຫຍດຂອງສອງປະເທດ ກໍ່ຄື ຜົນປະໂຫຍດຂອງ ສັນຕິພາບ, ມິດຕະພາບ ແລະ ການຮ່ວມມື ໃນພາກພື້ນ ແລະ ສາກົນ. ພ້ອມນັ້ນ, ທ່ານ ຣີ ຢອງ ໂຊ ຍັງໄດ້ນຳເອົາໂທລະເລກອວຍພອນ ພ້ອມດ້ວຍກະຕ່າດອກໄມ້ ຂອງທ່ານ ກິມເຈິງອຸນ, ປະທານພັກແຮງງານເກົາຫລີ, ປະທານຄະນະກຳມາທິການກິດ ຈະການແຫ່ງລັດ ແຫ່ງ ສປປ ເກົາຫລີ, ຜູ້ບັນຊາການສູງສຸດຂອງກອງທັບປະຊາຊົນເກົາຫລີ ສົ່ງມາຍັງ ທ່ານ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດແຫ່ງ ສປປ ລາວ ເນື່ອງໃນໂອກາດວັນເກີດຂອງທ່ານ.
ໃນໂອກາດດັ່ງກ່າວ ທ່ານນາງ ສູນທອນ ໄຊຍະຈັກ ໄດ້ສະແດງຄວາມຍິນດີຕ້ອນຮັບ ແລະ ສະແດງຄວາມຊົມເຊີຍ ຕໍ່ທ່ານທູດຄົນໃໝ່ ທີ່ໄດ້ຖືກແຕ່ງຕັ້ງມາດຳລົງຕຳແໜ່ງ ແລະ ປະຕິບັດໜ້າທີ່ການທູດ ຢູ່ ສປປ ລາວ ເຊິ່ງເປັນການປະກອບສ່ວນເສີມຂະຫຍາຍ ແລະ ຮັດແໜ້ນສາຍພົວພັນ ທີ່ມີມູນເຊື້ອອັນດີງາມ ລະຫວ່າງ ສອງປະເທດ ສປປ ລາວ-ສປປ ເກົາຫລີ ທີ່ເຄີຍມີມາແລ້ວນັ້ນ ໃຫ້ນັບມື້ແໜ້ນແຟ້ນຍິ່ງໆຂຶ້ນ.
ພ້ອມນີ້, ທ່ານ ນາງ ສູນທອນ ໄດ້ສະແດງຄວາມຂອບໃຈຢ່າງສູງ ຕໍ່ທ່ານທູດ ທີ່ໄດ້ນຳເອົາໂທລະເລກອວຍພອນ ພ້ອມດ້ວຍກະຕ່າດອກໄມ້ ຂອງການນຳສູງສຸດຂອງ ສປປ ເກົາຫລີ ມາຍັງ ທ່ານ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດແຫ່ງ ສປປ ລາວ ເນື່ອງໃນໂອກາດວັນເກີດ. ຫວັງຢ່າງຍິ່ງວ່າ, ໃນການມາປະຕິບັດໜ້າທີ່ຢູ່ລາວ, ທ່ານທູດ ຣີ ຢອງ ໂຊ ຈະສືບຕໍ່ຮັດແໜ້ນ ສາຍພົວພັນມິດຕະພາບ ແລະ ການຮ່ວມມື ອັນເປັນມູນເຊື້ອທີດີງາມ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ສປປ ເກົາຫລີ ທີ່ມີບັນດາການນໍາຂັ້ນສູງສຸດ ລຸ່ນກ່ອນໄດ້ຮ່ວມກັນສ້າງຂຶ້ນມາໃນຊຸມປີ 70 ນັ້ນ ໃຫ້ໄດ້ຮັບການເສີມຂະຫຍາຍ ແລະ ແໜ້ນແຟ້ນຍິ່ງໆຂຶ້ນ. ທ່ານ ນາງ ສູນທອນ ໄຊຍະຈັກ ໄດ້ອວຍພອນໃຫ້ທ່ານທູດ ຈົ່ງປະສົບຜົນສຳເລັດໃຫຍ່ຫລວງ ໃນເວລາປະຕິບັດໜ້າທີ່ການທູດຂອງຕົນ ຢູ່ ສປປ ລາວ.
（ແຫຼ່ງຂໍ້ມູນ： ຂປລ）
