 |
ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຢ້ຽມຢາມສູນບໍ ລິຈາກເຄື່ອງຊ່ວຍເຫືຼອຜູ້ປະສົບໄພນໍ້າຖ້ວມ 2018.
ລາຍງານ 29 ກໍ ລະກົດ 2018, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຢ້ຽມຢາມສູນບໍລິຈາກເຄື່ອງຊ່ວຍເຫືຼອຜູ້ປະສົບໄພນໍ້າຖ້ວມ 2018 ທີ່ ກະຊວງແຮງງານ ແລະ ສະຫວັດດີການສັງຄົມ, ທ່ານນາຍົກລັດຖະມົນຕີໄດ້ໂອ້ລົມຕໍ່ສື່ມວນຊົນວ່າ: “ໝົດອາທິດທີ່ຜ່ານມາປະຊາຊົນລາວຂອງພວກເຮົາຕົກຢູ່ໃນຄວາມຕື່ນກັງວົນ ຄວາມຫຍຸ້ງຍາກທາງດ້ານຈິດໃຈ ແຕ່ວ່າຜ່ານໄລຍະ 4-5 ມານີ້ສະພາບຈິດໃຈດັ່ງກ່າວນັ້ນໄດ້ກໍ່ເຈືອປົນໄປ ດ້ວຍຄວາມຊາບຊຶື້ງ ເຖິງຄວາມມີນໍ້າໃຈ ຄວາມໂອບເອື້ອອາລີຂອງປະຊາຊົນລາວເຮົາທົ່ວປະເທດ ຂ້າພະເຈົ້າໄດ້ຕິດຕາມຢ່າງໃກ້ຊິດເຖິງການ ບໍລິຈາກຂອງປະຊາຊົນລາວ ແລະ ຕ່າງປະເທດ ທີ່ຊ່ວຍໃຫ້ການຊ່ວຍເຫືຼອທາງດ້ານເງິນຄໍາ-ວັດຖຸ ແລະ ອາຫານການກິນຕາມສູນບໍລິຈາກຕ່າງໆທັງ ໃນນະຄອນຫຼວງວຽງຈັນ, ອັດຕະປື ແລະ ບ່ອນອື່ນໆ ເພື່ອຊ່ວຍເຫືຼອປະຊາຊົນຜູ້ໄດ້ຮັບຜົນກະທົບຢ່າງຮ້າຍແຮງຈາກໄພພິບັດໃນຄັ້ງນີ້ ໂດຍສາເຫດຕົ້ນຕໍແມ່ນ ເຂື່ອນເຊປຽນ-ເຊນໍ້ານ້ອຍແຕກ”.
“ຂ້າພະເຈົ້າຄິດວ່າ ມະຫັນຕະໄພຄັ້ງນີ້ມັນເປັນຜົນກະທົບຢ່າງຮ້າຍແຮງຕໍ່ປະຊາຊົນ ເມືອງສະໜາມໄຊ ເຮັດໃຫ້ບໍ່ມີທີ່ຢູ່ອາໄສ ແລະ ຫາຍສາບສູນໄປເປັນຈໍານວນຫຼວງຫຼາຍ ຍັງໄດ້ກະທົບເຖິງໄຮ່ນາຕາກ້າ, ເຮືອນຊານຂອງປະຊາຊົນຢ່າງຮ້າຍແຮງ, ຂ້າພະເຈົ້າຄິດວ່າເຫດການນີ້ເກີດຂຶ້ນ ໂດຍບໍ່ມີໃຜເພິ່ງປາດຖະໜາ ເມື່ອມັນເກີດແລ້ວພວກເຮົາຕ້ອງຮ່ວມແຮງຮ່ວມໃຈກັນຊ່ວຍເຊິ່ງກັນ ແລະ ກັນ ໂດຍນໍ້າໃຈທີ່ໄດ້ມາຈາກການສະໜັບສະໜູນ ການແບ່ງປັນຂອງປະຊາຊົນລາວທົ່ວປະເທດນັ້ນມີຈໍານວນຫຼວງຫຼາຍທີ່ສຸດ”.
“ໃນຂະນະດຽວກັນນັ້ນພວກເຮົາກໍ່ໄດ້ຮັບການຊ່ວຍເຫືຼອສະໜັບສະໜູນຈາກປະເທດເພື່ອນມິດທີ່ ໄດ້ສົ່ງທັງແຮງໃຈ -ແຮງວັດຖຸສິ່ງຂອງ ແລະ ເງິນຄໍາມາໃຫ້ປະຊາຊົນລາວຂອງພວກເຮົາ ໂດຍສະເພາະປະຊາຊົນທີ່ກໍາລັງຖືກຜົນກະທົບຢູ່ແຂວງອັດຕະປືຢ່າງບໍ່ຂາດສາຍ ແລະ ເປັນຈໍານວນທີ່ໃຫຍ່ຫຼວງທີ່ສຸດ ຂ້າພະເຈົ້າຄິດວ່າການຊ່ວຍເຫືຼອດັ່ງກ່າວ ລວມທັງການໃຫ້ກໍາລັງໃຈຕໍ່ປະຊາຊົນລາວຂອງພວກເຮົາທີ່ ໄດ້ຖືກຜົນກະທົບນັ້ນ ແມ່ນບໍ່ສາມາດປະເມີນຄ່າໄດ້ເພາະມັນມີຄຸນຄ່າທີ່ສູງຊົ່ງທີ່ສຸດ ການຊ່ວຍເຫືຼອອັນນີ້ແມ່ນການຊ່ວຍເຫືຼອຢ່າງທັນການ ແລະ ຖືກກັບຄວາມຕ້ອງການຂອງ ປະຊາຊົນຜູ້ໄດ້ຮັບຜົນກະທົບຢ່າງແທ້ຈິງ”.
“ໃນໂອກາດນີ້, ຂ້າພະເຈົ້າຂໍສະແດງຄວາມຮູ້ບຸນຄຸນອັນໃຫຍ່ຫຼວງຕໍ່ປະຊາຊົນລາວທົ່ວປະເທດ ໃຫ້ການສະໜັບສະໜູນຢ່າງຈິງໃຈດ້ວຍນໍ້າໃສໃຈຈິ່ງ ຂອງທຸກຄົນ ຂ້າພະເຈົ້າເຊື່ອວ່າອັນນີ້ແມ່ນມູນເຊື້ອອັນດີງາມຂອງປະຊາຊົນລາວ ດ້ວຍວັດທະນະທໍາອັນດີງາມຂອງຊາດລາວເຮົາ ແລະ ໃນຂະນະດຽວກັນນັ້ນ ຂ້າພະເຈົ້າກໍ່ຂໍສະແດງຄວາມຂອບອົກຂອບໃຈ ແລະ ຮູ້ບຸນຄຸນຢ່າງຈິງໃຈຕໍ່ປະເທດເພື່ອນມິດ ປະຊາຊົນກໍ່ຄືອົງການຈັດຕັ້ງສາກົນທີ່ຢູ່ໃກ້ ແລະ ໄກໄດ້ອວາຍໜ້າເຂົ້າມາຊ່ວຍເຫືຼອປະຊາຊົນຜູ້ຖືກຜົນກະທົບຈາກໄພພິບັດອັນຮ້າຍແຮງເທື່ອນີ້ ຂ້າພະເຈົ້າເຊື່ອວ່າການ ຊ່ວຍເຫືຼອດັ່ງກ່າວນັ້ນ ຈະໄປສູ່ສະຖານທີ່ - ສູ່ປະຊາຊົນທີ່ໄດ້ຮັບເຄາະຮ້າຍຢ່າງທົ່ວເຖິງ ແລະ ທັນການ”.
“ໃນວຽກງານການກູ້ໄພ, ພວກເຮົາຈະສືບຕໍ່ຊອກຄົ້ນຫາຜູ້ຫາຍສາບສູນໄປນັ້ນ ໃຫ້ໄວທີ່ສຸດເທົ່ າທີ່ ຈະໄວໄດ້ຫາກເຂົາເຈົ ້າຍັງມີຊີວິດຢູ່ ກໍ່ຈະນໍາກັບມາສູ່ບ່ອນທີ່ ປອດໄພ ແລະ ຟື້ນຟູຊີວິດເຂົາເຈົ້າຕໍ່ໄປ ແລະ ຈະໃຊ້ທຸກຄວາມສາມາດເພື່ອຊ່ວຍເຫືຼອປະຊາຊົນ, ພາຍຫັຼງນໍ້າແຫ້ງຈະຊ່ວຍຟື້ນຟູຢ່າງ ເຖິງທີ່ສຸດ ເພື່ອໃຫ້ປະຊາຊົນກັບສູ່ບ້ານເຮືອນໄດ້ຢ່າງເປັນປົກກະຕິເຊິ່ງລັດຖະບານກໍ່ໄດ້ວາງແຜນຟື້ນຟູເມືອງສະໜາມໄຊ ທີ່ໄດ້ຮັບຜົນກະທົບໃນ ຄັ້ງນີ້ຢ່າງມີລະບົບຢ່າງມີຄວາມຮັບຜິດຊອບ. ນອກຈາກນັ້ນ, ລັດຖະບານຈະໄດ້ຈັດຕັ້ງການສືບສວນສອບສວນ ຢ່າງເຂັ ້ມງວດຕໍ່ເຫດການທີ່ ເກີດຂຶ້ນນີ້ ຊອກໃຫ້ເຫັນເຫດຜົນ ຊອກໃຫ້ເຫັນສາເຫດ ແລະ ໄດ້ດໍາເນີນການກວດກາບໍລິສັດອອກແບບ-ບໍລິສັດຮັບເໝົາກໍ່ສ້າງ-ບໍລິສັດທີ່ປຶກສາ ກວດກາເບິ່ງຄວາມຮັບຜິດຊອບຂອງ ເຈົ້າໜ້າທີ່-ທີ່ກ່ຽວຂ້ອງກັບການຈັດສ້າງວ່າມີຄວາມໂປ່ງໃສບໍ່ . ຂະນະດຽວກັນລັດຖະບານໄດ້ສັ່ງການໃຫ້ທຸກໆເຂື່ ອນຕ້ອງມີເຈົ້າໜ້າທີ່ ວິຊາສະເພາະ ເຈົ້າໜ້າທີ່ ປ້ອງກັນປະຈໍາຕະຫຼອດ 24 ຊົ່ວໂມງ ແລະ ຕ້ອງລາຍງານສະພາບການຕໍ່ລັດຖະບານ ແລະ ໜ່ວຍງານທີ່ ກ່ຽວຂ້ອງຢ່າງເປັນປະຈໍາ ແລະ ໃຫ້ທັນການ.
ເຊິ່ງທ່ານນາຍົກລັດຖະມົນຕີ ໃນນາມລັດຖະບານກໍ່ ໄດ້ຮຽກຮ້ອງເຖິງປະຊາຊົນທົ່ວປະເທດ ໂດຍສະເພາະປະຊາຊົນທີ່ ໄດ້ຖືກຜົນກະທົບວ່າ “ຂໍໃຫ້ມີກໍາລັງໃຈຕໍ່ສູ້ກັບສິ່ງທີ່ ມັນເກີດຂຶ້ນມາແລ້ວນັ້ນ ເພື່ອຜ່ານພົ້ນມັນໄປດ້ວຍກັນ ສ່ວນຄອບຄົວທີ່ ໄດ້ສູນເສຍຄົນຮັກຂອງຕົນໄປຈາກເຫດການໃນຄັ້ງນີ້ ພວກເຮົາທຸກຄົນຂໍສະແດງຄວາມເສຍໃຈຢ່າງສຸດຊຶ້ງ, ລັດຖະບານຮັກ ແລະ ຈະຢູ່ຄຽງຂ້າງປະຊາຊົນທີ່ ປະສົບມະຫັນຕະໄພຄັ ້ງນີ້ ແລະ ຈະຊ່ວຍເຫືຼອ ຢ່າງສຸດຄວາມສາມາດເຮັດໃຫ້ສະພາບການກັບເຂົ້າສູ່ຄວາມເປັນປົກກະຕິ”.
（ຫັດທະບູນ）
