 |
ທ່ານຮອງນາຍົກລັດຖະມົນຕີ ສອນໄຊ ສີພັນດອນ ເປັນປະທານກອງປະຊຸມ. (ພາບ: ອ່າຍຄຳ)
ກອງປະຊຸມຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ ໄດ້ຈັດຂຶ້ນໃນວັນທີ 8 ສິງຫາ 2018, ທີ່ສຳນັກງານນາຍົກລັດຖະມົນຕີ, ໂດຍການເປັນປະທານ ຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກໍາມະການສະເພາະກິດ ແກ້ໄຂໄພພິບັດລະດັບຊາດ, ມີບັນດາລັດຖະມົນຕີ, ຮອງລັດຖະມົນຕີ ທີ່ກ່ຽວຂ້ອງ ເຂົ້າຮ່ວມ.
ທ່ານ ສອນໄຊ ສີພັນດອນ ກ່າວວ່າ: ລັດຖະບານ ໄດ້ມີຄາດໝາຍເລັ່ງຈັດສັນ ແລະ ຟື້ນຟູທີ່ຢູ່ອາໄສຊົ່ວຄາວ ໃຫ້ຜູ້ປະສົບໄພພິບັດດັ່ງກ່າວໃຫ້ພຽງພໍ ເພາະວ່າປັດຈຸບັນ ປະຊາຊົນແມ່ນອາໄສຢູ່ເຕັ້ນ ທີ່ໄດ້ຮັບຈາກການຊ່ວຍເຫລືອຈາກພາກສ່ວນຕ່າງໆ ແຕ່ມັນກໍຍັງບໍ່ພຽງພໍ ທັງຍັງແອອັດຫລາຍ ແລະ ພົບຄວາມຫຍຸ້ງຍາກໃນເວລາຝົນຕົກ. ສິ່ງທີ່ສຳຄັນ ແລະ ຈຳເປັນໃນຕອນນີ້, ກໍຄື ໂຮງຮຽນ ພວກເຮົາຈຳເປັນຕ້ອງໄດ້ເລັ່ງຟື້ນຟູ, ຂະຫຍາຍໂຮງຮຽນ ແລະ ຈັດຊື້ອຸປະກອນການຮຽນ -ການສອນເປັນຕົ້ນ ໂຕະຕັ່ງ, ປື້ມຂຽນ, ຕຳລາຮຽນ, ເຄື່ອງນັກຮຽນ ແລະ ສິ່ງອຳນວຍຄວາມສະດວກອື່ນໆ ກ່ອນທີ່ຈະເປີດສົກຮຽນໃໝ່. ນອກຈາກນີ້, ວຽກງານສາທາລະນະສຸກ ກໍເປັນສິ່ງສຳຄັນທີ່ລັດຖະບານຕ້ອງໄດ້ສຸມໃສ່ ເປັນຕົ້ນ ເພີ່ມຕຽງນອນ ແລະ ເຊື່ອປູຂອງຄົນເຈັບ, ສຸຂະອະນາໄມ, ສ້າງວິດຖ່າຍ ແລະ ນ້ຳບາດານ (ໃຫ້ມີນ້ຳສະອາດໃຊ້).
ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ຍັງໄດ້ສະເໜີ ໃຫ້ບັນດາຄະນະກໍາມະການດັ່ງກ່າວ ເບິ່ງຄືນກ່ຽວກັບເຄື່ອງຊ່ວຍເຫລືອຕ່າງໆ ອັນທີ່ຍັງຂາດ ແລະ ບໍ່ມີຢູ່ໃນສາງ, ອັນໃດທີ່ປະຊາຊົນ ຍັງມີຄວາມຕ້ອງການສູງ ພ້ອມທັງຈັດຕັ້ງຄະນະຮັບຜິດຊອບ ຄວບຄຸມລາຄາສິນຄ້າຕາມທ້ອງຕະຫລາດ ເພື່ອບໍ່ໃຫ້ບັນດາພໍ່ຄ້າ-ແມ່ຄ້າ ສວຍໂອກາດຂຶ້ນລາຄາສິນ.
（ແຫຼ່ງຂໍ້ມູນ： ຂປລ）
