 |
ສະມາຊິກສະພາແຫ່ງຊາດ(ສສຊ) ປະຈຳເຂດເລືອກປະກອບຄຳຄິດຄຳເຫັນໃສ່ບົດລາຍງານ.
ໃນມື້ທຳອິດຂອງການດຳເນີນກອງປະຊຸມ ສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ຕອນບ່າຍວັນທີ 5 ມິຖຸນາ 2018 ນີ້, ບັນດາສະມາຊິກສະພາແຫ່ງຊາດ(ສສຊ) ປະຈຳເຂດເລືອກຕັ້ງຕ່າງໆ ໄດ້ປະກອບຄຳຄິດຄຳເຫັນໃສ່ບົດລາຍງານ ຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈຳ 4 ເດືອນ, ຄາດຄະເນການປະຕິບັດແຜນ 6 ເດືອນຕົ້ນປີ 2018 ແລະ ທິດທາງວຽກງານຈຸດສຸມ ປະຈຳ 6 ເດືອນທ້າຍປີ 2018.
ການປະກອບຄຳຄິດເຫັນຂອງບັນດາ ສສຊ ໂດຍລວມແມ່ນເຫັນດີເປັນເອກກະພາບ ຕໍ່ບົດລາຍງານດັ່ງກ່າວ ແຕ່ຍັງມີ ສສຊ ຫລາຍເຂດເລືອກຕັ້ງ ໄດ້ສະເໜີໃຫ້ມີການປັບປຸງແກ້ໄຂ ບາງບັນຫາ ທີ່ເຫັນວ່າຍັງບໍ່ສອດຄ່ອງ ຕາມແນວທາງນະໂຍບາຍ ທີ່ພັກ-ລັດ ວາງອອກ ໂດຍສະເພາະ ກ່ຽວກັບການຈັດຕັ້ງປະຕິບັດຄຳສັ່ງເລກທີ 15/ນຍ ເຊິ່ງຜ່ານການກວດກາໄດ້ພົບເຫັນຜູ້ກະທຳຜິດ ເຊິ່ງສ່ວນໃຫຍ່ແມ່ນພະນັກງານລັດ ມີເຖິງ 421 ຄົນ, ຂອງຈຳນວນຜູ້ກະທຳຜິດທັງໝົດ 700 ກວ່າຄົນ ຈຶ່ງໄດ້ສະເໜີ ໃຫ້ ລັດຖະບານ ຮີບຮ້ອນປັບປຸງແກ້ໄຂ ເພື່ອບໍ່ໃຫ້ເປັນແບບຢ່າງໃນທາງທີ່ບໍ່ດີແກ່ສັງຄົມ.
ການຈັດຕັ້ງປະຕິບັດໂຄງການລະດັບຊາດ ກໍເປັນບັນຫາໜຶ່ງ ທີ່ ສສຊ ສຸມໃສ່ປະກອບຄຳຄິດຄຳເຫັນ ເປັນຕົ້ນແມ່ນການຈັດຕັ້ງປະຕິບັດໂຄງການ ກໍ່ສ້າງທາງລົດໄຟ ລາວ-ຈີນ ທີ່ພວມຈັດຕັ້ງປະຕິບັດ ໃນປັດຈຸບັນ ຢູ່ບາງເຂດ, ບາງແຂວງ, ປະຊາຊົນທີ່ໄດ້ຮັບຜົນກະທົບຈາກໂຄງການ ຍັງບໍ່ໄດ້ຮັບຄ່າຊົດເຊີຍ. ພ້ອມດຽວກັນນັ້ນ ສສຊ ຍັງສະເໜີໃຫ້ລັດຖະບານ ເບິ່ງຄືນການອະນຸຍາດໃນການສຳປະທານທີ່ດິນຂຸດຄົ້ນແຮ່ທາດຕ່າງໆ, ບັນຫາລາຄານ້ຳມັນ, ອັດຕາເງິນເຟີ້ ແລະ ອື່ນໆ. ໃນຂະນະດຽວກັນ ສສຊ ຍັງສະເໜີໃຫ້ລັດຖະບານ ຕີລາຄາຄືນກ່ຽວກັບການຊຸກຍູ້ສົ່ງເສີມ ການຜະລິດກະສິກຳເປັນສິນຄ້າ ໃນໄລຍະຜ່ານມາ ເຫັນວ່າເປັນຂະບວນຟົດຟື້ນ ແຕ່ຕ້ອງພົບບັນຫາຫຍຸ້ງຍາກດ້ານຕະຫລາດຈຳໜ່າຍ, ລວມທັງສິນຄ້າໂອດັອບ ທີ່ຄົນລາວສາມາດຜະລິດໄດ້ ແຕ່ກໍບໍ່ມີຕະຫລາດເຊັ່ນກັນ. ສ່ວນການປະຕິບັດ ໂຄງການໃຫຍ່ ດ້ານພື້ນຖານໂຄງລ່າງບາງໂຄງການຢູ່ບາງແຂວງ ດຳເນີນໄປໄດ້ຫລາຍປີ ແຕ່ບໍ່ມີຄວາມຄືບໜ້າ.
ໂອກາດດຽວກັນ, ບັນດາ ສສຊ ຍັງໄດ້ຮຽກຮ້ອງໃຫ້ລັດຖະບານ ສືບຕໍ່ແກ້ໄຂບັນຫາປະກົດການຫຍໍ້ທໍ້ຕ່າງໆ ໃນສັງຄົມ ເປັນຕົ້ນ ການຂີ້ລັກ-ງັດແງະ, ປຸ້ນຊັບພົນລະເມືອງ, ບັນຫາຢາເສບຕິດ ເຊິ່ງປະກົດການດັ່ງກ່າວ ຍັງເຫັນວ່າເກີດຂຶ້ນຢ່າງຫລວງຫລາຍ, ລວມທັງບັນຫາຄວາມປອດໄພທາງຖະໜົນ ແລະ ອື່ນໆ.
（ແຫຼ່ງຂໍ້ມູນ： ຂປລ）
