ຫວຽດນາມ - ສະຫະປະຊາຊາດ: ຈາກການຮັບການຊ່ວຍເຫຼືອ ໄປສູ່ການເປັນເຈົ້າການປະກອບສ່ວນ

ໃນການຢ້ຽມຢາມຫວຽດນາມ ເດືອນ 10/2025 ເນື່ອງໃນໂອກາດເຂົ້າຮ່ວມພິທີເປີດໃຫ້ລົງນາມສົນທິສັນຍາວ່າດ້ວຍການປ້ອງກັນ, ຕ້ານອາດຊະຍາກຳໄຊເບີ, ທ່ານ António Guterres, ເລຂາທິການໃຫຍ່ສະຫະປະຊາຊາດ ໄດ້ສະແດງຄວາມຄາດຫວັງ ວ່າ ຫວຽດນາມຈະສືບຕໍ່ສົ່ງເສີມບົດບາດໃນຂະບວນການສ້າງໂຄງສ້າງສາຍພົວພັນສາກົນໃໝ່.

ຫວຽດນາມພວມຄ່ອຍໆຕອບສະໜອງຄວາມຄາດຫວັງນັ້ນ ດ້ວຍບັນດາການປະກອບສ່ວນທີ່ນັບມື້ນັບເປັນເຈົ້າການ ໃນບັນດາກົນໄກຫຼາຍຝ່າຍ. ການເດີນທາງໄປປະຕິບັດງານທີ່ຈະມາເຖິງຂອງທ່ານ ໂຕເລິມ, ເລຂາທິການໃຫຍ່, ປະທານປະເທດ ແລະ ຄະນະຜູ້ແທນຂັ້ນສູງຫວຽດນາມ ເຂົ້າຮ່ວມວາລະອະພິປາຍຂັ້ນສູງຂອງສະມັດຊາໃຫຍ່ສະຫະປະຊາຊາດ ຄັ້ງທີ 81 ສືບຕໍ່ສະແດງເຖິງຄວາມພະຍາຍາມນີ້.

ການເດີນທາງໄປປະຕິບັດງານດັ່ງກ່າວ ດຳເນີນຂຶ້ນໃນໄລຍະທີ່ຫວຽດນາມ ແລະ ສະຫະປະຊາຊາດ ພວມມຸ່ງໄປສູ່ຂີດໝາຍ 50 ປີແຫ່ງການຮ່ວມເດີນທາງ ໃນປີ 2027.

ວັນທີ 20/9/1977, ຫວຽດນາມໄດ້ກາຍເປັນສະມາຊິກສະຫະປະຊາຊາດຢ່າງເປັນທາງການ. ໃນພາບ: ທ່ານ ຫງວຽນຢຸຍຈິງ, ຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ (ຄົນທີສອງນັບຈາກຂວາ) ເຂົ້າຮ່ວມພິທີຊັກທຸງຊາດຫວຽດນາມ ຢູ່ສຳນັກງານໃຫຍ່ສະຫະປະຊາຊາດ.

ຈາກການຊ່ວຍເຫຼືອຟື້ນຟູ ໄປສູ່ການຮ່ວມເດີນທາງເພື່ອພັດທະນາ

ຫວຽດນາມໄດ້ກາຍເປັນສະມາຊິກສະຫະປະຊາຊາດຢ່າງເປັນທາງການ ໃນວັນທີ 20/9/1977. ໃນຊຸມປີທຳອິດພາຍຫຼັງປະເທດຊາດເປັນເອກະພາບ, ບັນດາອົງການໃນລະບົບສະຫະປະຊາຊາດ ໄດ້ຊ່ວຍເຫຼືອຫວຽດນາມແກ້ໄຂຜົນຕາມມາຈາກສົງຄາມ, ຟື້ນຟູ ແລະ ບູລະນະປະເທດ, ປັບປຸງຊີວິດການເປັນຢູ່ຂອງປະຊາຊົນ.

ເມື່ອຫວນຄືນເບິ່ງເກືອບເຄິ່ງສະຕະວັດ, ການຮ່ວມມືກັບສະຫະປະຊາຊາດ ໄດ້ຮ່ວມເດີນທາງກັບຫວຽດນາມຜ່ານຫຼາຍໄລຍະ: ຈາກການແກ້ໄຂຜົນຕາມມາຈາກສົງຄາມ, ທຳລາຍສະພາບຖືກປິດລ້ອມ, ຂວ້ຳບາດ ໄປສູ່ການຄ່ອຍໆເຊື່ອມໂຍງສາກົນຢ່າງນັບມື້ນັບເລິກເຊິ່ງ. ການຮ່ວມມືນີ້ ທັງຕອບສະໜອງຄວາມຕ້ອງການພັດທະນາຂອງຫວຽດນາມໃນແຕ່ລະໄລຍະ, ທັງປະກອບສ່ວນຍົກສູງບົດບາດ ແລະ ສຽງຂອງຫວຽດນາມຢູ່ສະຫະປະຊາຊາດ.

ກ່ອນໄລຍະປ່ຽນໃໝ່, ຫວຽດນາມໄດ້ຮັບການຊ່ວຍເຫຼືອຫຼາຍກວ່າ 500 ລ້ານ USD ຈາກສະຫະປະຊາຊາດ. ແຫຼ່ງກຳລັງນີ້ ມີຄວາມໝາຍພິເສດ ໃນສະພາບການທີ່ປະເທດຖືກປິດລ້ອມ, ຂວ້ຳບາດ, ຊ່ວຍໜູນຫຼາຍໂຄງການພັດທະນາສັງຄົມ, ໂດຍສະເພາະ ການສຶກສາ, ສາທາລະນະສຸກ, ການເບິ່ງແຍງ ແລະ ປົກປ້ອງແມ່ ແລະ ເດັກ, ປະຊາກອນ ແລະ ການວາງແຜນຄອບຄົວ.

ໃນໄລຍະ 1986-1996, ເມື່ອຫວຽດນາມຜັນຂະຫຍາຍແນວທາງປ່ຽນໃໝ່, ການຮ່ວມມືກັບສະຫະປະຊາຊາດ ສືບຕໍ່ຊ່ວຍໜູນຂະບວນການປະຕິຮູບເສດຖະກິດ - ສັງຄົມ. ການຊ່ວຍເຫຼືອແບບບໍ່ຕ້ອງສົ່ງຄືນຂອງສະຫະປະຊາຊາດ ບັນລຸຫຼາຍກວ່າ 630 ລ້ານ USD; ມີບາງໄລຍະ ແຫຼ່ງການຊ່ວຍເຫຼືອນີ້ ກວມເກືອບ 60% ຂອງການຊ່ວຍເຫຼືອທັງໝົດທີ່ຫວຽດນາມໄດ້ຮັບຈາກຝ່າຍຕາເວັນຕົກ ແລະ ບັນດາແຫຼ່ງນອກກຸ່ມປະເທດສັງຄົມນິຍົມ.

ນັບແຕ່ໄລຍະ 2001-2005, ຕາມຂໍ້ສະເໜີຂອງລັດຖະບານຫວຽດນາມ, ສະຫະປະຊາຊາດ ໄດ້ຫັນແຮງຈາກການຊ່ວຍໜູນດ້ານເຕັກນິກ ໄປສູ່ການຊ່ວຍໜູນການປະຕິຮູບນະໂຍບາຍ ແລະ ສະຖາບັນເສດຖະກິດ, ວິສາຫະກິດລັດ; ພ້ອມທັງເປີດກວ້າງໄປສູ່ບັນດາຂົງເຂດປ້ອງກັນ, ຕ້ານ HIV/AIDS ແລະ ພະຍາດຮ້າຍແຮງ, ປະຕິບັດປະຊາທິປະໄຕຂັ້ນຮາກຖານ, ຄວາມສະເໝີພາບຍິງ - ຊາຍ ແລະ ຈັດກອງປະຊຸມກຸ່ມທີ່ປຶກສາຂອງບັນດາຜູ້ໃຫ້ທຶນປະຈຳປີ.

ບົດບາດຂອງຫວຽດນາມນັບມື້ນັບຈະແຈ້ງ

ຄຽງຄູ່ກັບຂະບວນການປ່ຽນໃໝ່ ແລະ ເຊື່ອມໂຍງ, ຖານະຂອງຫວຽດນາມໃນສາຍພົວພັນກັບສະຫະປະຊາຊາດ ກໍຄ່ອຍໆປ່ຽນແປງ. ແຜນຍຸດທະສາດຮ່ວມ ຫວຽດນາມ - ສະຫະປະຊາຊາດ ໄລຍະ 2017-2021 ມີງົບປະມານລວມ 423 ລ້ານ USD, ໃນຂະນະທີ່ ຂອບການຮ່ວມມືພັດທະນາທີ່ຍືນຍົງ ໄລຍະ 2022-2026 ມີງົບປະມານລວມຫຼາຍກວ່າ 542 ລ້ານ USD.

ຂີດໝາຍໜຶ່ງທີ່ໜ້າສົນໃຈ ແມ່ນຫວຽດນາມໄດ້ກາຍເປັນໜຶ່ງໃນ 8 ປະເທດໃນໂລກ ທີ່ໄດ້ຮັບເລືອກໃຫ້ທົດລອງຂໍ້ລິເລີ່ມ “ຮ່ວມກັນປະຕິບັດ - ໜຶ່ງສະຫະປະຊາຊາດ”. ເຮືອນສີຂຽວຮ່ວມຂອງສະຫະປະຊາຊາດ ຢູ່ຮ່າໂນ້ຍ, ເປີດນຳໃຊ້ໃນປີ 2015, ໄດ້ກາຍເປັນສັນຍາລັກຂອງວິທີເຂົ້າຫາໃໝ່, ໃນນັ້ນ ບັນດາອົງການສະຫະປະຊາຊາດເພີ່ມທະວີການປະສານງານ ເພື່ອຊ່ວຍໜູນບັນດາບຸລິມະສິດການພັດທະນາຂອງຫວຽດນາມ.

ຜ່ານບັນດາຂອບຮ່ວມມື, ບົດບາດຂອງສະຫະປະຊາຊາດ ບໍ່ພຽງແຕ່ຢຸດຢູ່ການສະໜອງແຫຼ່ງກຳລັງ ແຕ່ຍັງເປີດກວ້າງໄປສູ່ການໃຫ້ຄຳປຶກສານະໂຍບາຍ, ແບ່ງປັນຄວາມຮູ້, ປະສົບການ ແລະ ຊ່ວຍໜູນການຍົກສູງຂີດຄວາມສາມາດດ້ານສະຖາບັນ.

ໃນໄລຍະ 2007-2011, ຫວຽດນາມໄດ້ຊຸກຍູ້ແນວທາງການຕ່າງປະເທດແບບຫຼາຍຝ່າຍ ແລະ ຫຼາກຫຼາຍສາຍພົວພັນສາກົນ; ນຳໃຊ້ເວທີສະຫະປະຊາຊາດ ເພື່ອເປີດກວ້າງສາຍພົວພັນກັບບັນດາອົງການສາກົນ, ຊຸກຍູ້ສາຍພົວພັນສອງຝ່າຍ ແລະ ຫຼາຍຝ່າຍ, ພ້ອມທັງປະສານງານກັບບັນດາປະເທດບໍ່ເຂົ້າພັນທະມິດ ແລະ ພວມພັດທະນາ ແນໃສ່ປົກປ້ອງບັນດາຫຼັກການພື້ນຖານຂອງກົດບັດສະຫະປະຊາຊາດ ແລະ ຜົນປະໂຫຍດຂອງບັນດາປະເທດພວມພັດທະນາ.

ຫວຽດນາມແມ່ນໜຶ່ງໃນບັນດາປະເທດທຳອິດທີ່ລົງນາມສົນທິສັນຍາຫ້າມທົດລອງອາວຸດນິວເຄລຍຢ່າງຄົບຖ້ວນ ໃນປີ 1996; ກາຍເປັນສະມາຊິກກອງປະຊຸມປົດອາວຸດໃນປີດຽວກັນ ແລະ ເປັນສະມາຊິກທາງການຂອງສົນທິສັນຍາຫ້າມອາວຸດເຄມີ ໃນປີ 1998. ເດືອນ 6/2014, ຫວຽດນາມໄດ້ສົ່ງກຳລັງເຂົ້າຮ່ວມກິດຈະກຳຮັກສາສັນຕິພາບຂອງສະຫະປະຊາຊາດເປັນຄັ້ງທຳອິດ.

ຫວຽດນາມຍັງໄດ້ຮັບເລືອກເຂົ້າບັນດາອົງການຂອງສະຫະປະຊາຊາດຫຼາຍຄັ້ງ, ໃນນັ້ນ ມີຄະນະມົນຕີຄວາມໝັ້ນຄົງ ອາຍຸການ 2008-2009; ສະພາເສດຖະກິດ - ສັງຄົມ ອາຍຸການ 1998-2000 ແລະ 2016-2018; ສະພາສິດທິມະນຸດ ອາຍຸການ 2014-2016; ຄະນະບໍລິຫານ UNESCO ອາຍຸການ 2015-2019 ແລະ ຄະນະກຳມະການກົດໝາຍສາກົນ ອາຍຸການ 2017-2021.

ທ່ານ ໂຕເລິມ, ເລຂາທິການໃຫຍ່, ປະທານປະເທດ ກ່າວຄຳປາໄສທີ່ວາລະອະພິປາຍລວມຂັ້ນສູງ ຂອງສະມັດຊາໃຫຍ່ສະຫະປະຊາຊາດ ຄັ້ງທີ 79.

ຈາກການເຂົ້າຮ່ວມ ໄປສູ່ການເປັນເຈົ້າການສ້າງສັນ

ສອງຄັ້ງຮັບຕຳແໜ່ງກຳມະການບໍ່ປະຈຳຄະນະມົນຕີຄວາມໝັ້ນຄົງ, 3 ອາຍຸການເປັນສະມາຊິກສະພາສິດທິມະນຸດ, ພ້ອມກັບບັນດາອາຍຸການຢູ່ ECOSOC, ILC ແລະ ຫຼາຍກົນໄກວິຊາສະເພາະອື່ນ ສະແດງເຖິງລະດັບການເຂົ້າຮ່ວມທີ່ນັບມື້ນັບເລິກເຊິ່ງຂອງຫວຽດນາມໃນລະບົບຫຼາຍຝ່າຍ. ຫວຽດນາມບໍ່ພຽງແຕ່ເຂົ້າຮ່ວມ ແຕ່ຍັງນັບມື້ນັບເປັນເຈົ້າການປະກອບສ່ວນ, ຮັບພາລະໜ້າທີ່ສຳຄັນ ແລະ ຍົກອອກບັນດາຂໍ້ລິເລີ່ມ.

ການທີ່ຫວຽດນາມເປັນເຈົ້າພາບພິທີເປີດໃຫ້ລົງນາມສົນທິສັນຍາສະຫະປະຊາຊາດວ່າດ້ວຍການຕ້ານອາດຊະຍາກຳໄຊເບີ ໃນເດືອນ 10/2025 ສືບຕໍ່ສະທ້ອນບົດບາດເປັນເຈົ້າການນັ້ນ. ສົນທິສັນຍາຮ່າໂນ້ຍ ຖືກເບິ່ງວ່າເປັນຂີດໝາຍໜຶ່ງສຳລັບການເຂົ້າຮ່ວມຂອງຫວຽດນາມ ໃນຂະບວນການຮ່ວມກັບປະຊາຄົມສາກົນ ສ້າງຂອບຮ່ວມມືແນໃສ່ຮັບມືກັບບັນດາສິ່ງທ້າທາຍໃໝ່.

ໃນການຢ້ຽມຢາມຫວຽດນາມຢ່າງເປັນທາງການຄັ້ງທີສອງ ໃນປີ 2025, ທ່ານ António Guterres, ເລຂາທິການໃຫຍ່ສະຫະປະຊາຊາດ ຕີລາຄາຫວຽດນາມວ່າເປັນ “ເສົາຄ້ຳສຳຄັນຂອງລະບົບຫຼາຍຝ່າຍ” ແລະ ໄດ້ສະແດງຄວາມປາຖະໜາ ໃຫ້ຫວຽດນາມມີບົດບາດໃຫຍ່ກວ່າເກົ່າ ໃນການປະຕິຮູບລະບົບສາກົນ, ແກ້ໄຂບັນດາສິ່ງທ້າທາຍລະດັບໂລກ.

ການລິເລີ່ມກຸ່ມມິດສະຫາຍສົນທິສັນຍາສະຫະປະຊາຊາດວ່າດ້ວຍກົດໝາຍທະເລ ປີ 1982 ກໍສະແດງເຖິງວິທີທີ່ຫວຽດນາມຊຸກຍູ້ບັນດາຫຼັກການທີ່ຕົນໃຫ້ຄວາມສຳຄັນ ໃນສາຍພົວພັນສາກົນ.

ມາຮອດປັດຈຸບັນ, ຫວຽດນາມໄດ້ສົ່ງນາຍ ແລະ ພະນັກງານ, ນາຍ ແລະ ພົນທະຫານເກືອບ 1.400 ເທື່ອຄົນ ເຂົ້າຮ່ວມບັນດາພາລະກິດຮັກສາສັນຕິພາບຂອງສະຫະປະຊາຊາດ ຢູ່ຊູດັງໃຕ້, ສາທາລະນະລັດອາຟຣິກາກາງ ແລະ ເຂດ Abyei. ປັດຈຸບັນ ຫວຽດນາມຢູ່ອັນດັບ 49/193 ປະເທດ ດ້ານລະດັບການປະກອບສ່ວນງົບປະມານປະຈຳໃຫ້ສະຫະປະຊາຊາດ ແລະ ໄດ້ປະກອບສ່ວນຫຼາຍລ້ານ USD ໃຫ້ແກ່ບັນດາກິດຈະກຳກູ້ໄພມະນຸດສະທຳຂອງບັນດາອົງການສະຫະປະຊາຊາດ.

ທ່າທີໃໝ່ໃນການທູດຫຼາຍຝ່າຍ

ໃນສະພາບການທີ່ປະເທດກ້າວເຂົ້າສູ່ໄລຍະພັດທະນາໃໝ່, ການຕ່າງປະເທດຫຼາຍຝ່າຍ ສືບຕໍ່ຖືກກຳນົດໃຫ້ມີບົດບາດສຳຄັນ.

ທີ່ກອງປະຊຸມເຊື່ອມຊຶມ ແລະ ຜັນຂະຫຍາຍປະຕິບັດມະຕິເລກທີ 06-NQ/TW ກ່ຽວກັບການຜັນຂະຫຍາຍແນວທາງການຕ່າງປະເທດຂອງກອງປະຊຸມໃຫຍ່ ຄັ້ງທີ XIV ຂອງພັກ ວັນທີ 11/6, ທ່ານ ໂຕເລິມ, ເລຂາທິການໃຫຍ່, ປະທານປະເທດ ເນັ້ນໜັກວ່າ ໜຶ່ງໃນບັນດາທິດທາງໃຫຍ່ຂອງວຽກງານຕ່າງປະເທດຫວຽດນາມໃນຍຸກໃໝ່ ແມ່ນສະແດງຄວາມຮັບຜິດຊອບລະດັບໂລກ, ເຂົ້າຮ່ວມປະກອບສ່ວນຕໍ່ບັນດາບັນຫາຮ່ວມຂອງປະຊາຄົມສາກົນ.

ຕາມທ່ານ ໂຕເລິມ, ເລຂາທິການໃຫຍ່, ປະທານປະເທດ, ຫວຽດນາມຈຳເປັນຕ້ອງສົ່ງເສີມສຽງທີ່ຕັ້ງໜ້າ, ປະກອບສ່ວນແນວຄິດ, ປະກອບສ່ວນຟື້ນຟູຄວາມໄວ້ວາງໃຈ ແລະ ຍົກສູງປະສິດທິຜົນຂອງລັດທິຫຼາຍຝ່າຍ; ເຂົ້າຮ່ວມປົກປ້ອງລະບຽບໂລກທີ່ອີງໃສ່ກົດໝາຍສາກົນ ແລະ ກົດບັດສະຫະປະຊາຊາດ, ພ້ອມທັງປະກອບສ່ວນເຂົ້າໃນຂະບວນການປະຕິຮູບລະບົບການບໍລິຫານໂລກ ໃນທິດທາງສະເໝີພາບ, ຍຸຕິທຳຫຼາຍຂຶ້ນ.

ທີ່ພິທີລະນຶກ 81 ປີແຫ່ງວັນຊາດຫວຽດນາມ, ທ່ານ ໂຕເລິມ, ເລຂາທິການໃຫຍ່, ປະທານປະເທດ ຍັງຢືນຢັນວ່າ ຫວຽດນາມສະໜັບສະໜູນລະບົບຫຼາຍຝ່າຍທີ່ສະເໝີພາບ, ຍຸຕິທຳ ໂດຍມີສະຫະປະຊາຊາດເປັນໃຈກາງ; ພ້ອມທັງພ້ອມກາຍເປັນຂົວເຊື່ອມສຳລັບການຮ່ວມມື, ການສົນທະນາ ແລະ ປະກອບສ່ວນຢ່າງເປັນຮູບປະທຳຫຼາຍຂຶ້ນ ໃນການແກ້ໄຂບັນດາສິ່ງທ້າທາຍຮ່ວມ.

ປີ 2026, ຫວຽດນາມຮັບຕຳແໜ່ງປະທານກອງປະຊຸມທົບທວນສົນທິສັນຍາບໍ່ແຜ່ຂະຫຍາຍອາວຸດນິວເຄລຍ ຄັ້ງທີ 11 ແລະ ເປັນຄັ້ງທຳອິດທີ່ຮັບຕຳແໜ່ງປະທານກອງປະຊຸມ ຄັ້ງທີ 35 ຂອງບັນດາລັດພາຄີສົນທິສັນຍາສະຫະປະຊາຊາດວ່າດ້ວຍກົດໝາຍທະເລ.

ບັນດາຕຳແໜ່ງນີ້ ສ້າງເງື່ອນໄຂໃຫ້ຫວຽດນາມເຂົ້າຮ່ວມໂດຍກົງໃນການແກ້ໄຂບັນດາບັນຫາດ້ານຄວາມໝັ້ນຄົງ, ການພັດທະນາ ແລະ ກົດໝາຍສາກົນ, ພ້ອມທັງປົກປ້ອງ, ຊຸກຍູ້ຜົນປະໂຫຍດຂອງປະເທດຊາດ - ຂອງຊາດ ດ້ວຍມາດຕະການສັນຕິ ແລະ ບົນພື້ນຖານກົດໝາຍສາກົນ.

ຮ່ອງຮອຍຂອງຫວຽດນາມ ຍັງຖືກສະແດງອອກຜ່ານຫຼາຍຂໍ້ລິເລີ່ມທີ່ໄດ້ກາຍເປັນມະຕິຂອງສະຫະປະຊາຊາດ, ນັບແຕ່ການຊຸກຍູ້ບົດບາດຂອງແມ່ຍິງໃນສະພາບການຫຼັງຂໍ້ຂັດແຍ່ງ, ປົກປ້ອງໂຄງລ່າງທີ່ຈຳເປັນຕໍ່ປະຊາຊົນໃນຂໍ້ຂັດແຍ່ງ, ໄປຈົນເຖິງວັນສາກົນປ້ອງກັນ, ຕ້ານພະຍາດລະບາດ, ວັນສາກົນແຫ່ງການຫຼິ້ນ ແລະ ທົດສະວັດສາກົນວ່າດ້ວຍວັດທະນະທຳເພື່ອການພັດທະນາທີ່ຍືນຍົງ 2027-2036.

ວັນທີ 18/6, ທີ່ກອງປະຊຸມ ຄັ້ງທີ 36 ຂອງບັນດາລັດພາຄີສົນທິສັນຍາສະຫະປະຊາຊາດວ່າດ້ວຍກົດໝາຍທະເລ ຢູ່ສຳນັກງານໃຫຍ່ສະຫະປະຊາຊາດ, ຮສ.ປອ. ຫງວຽນທິລານແອັງ, ຜູ້ສະໝັກຂອງຫວຽດນາມ, ໄດ້ຮັບເລືອກເປັນຜູ້ພິພາກສາສານສາກົນວ່າດ້ວຍກົດໝາຍທະເລ (ITLOS) ອາຍຸການ 2026-2035 ດ້ວຍຈຳນວນຄະແນນສຽງຢູ່ໃນກຸ່ມສູງສຸດໃນບັນດາຜູ້ສະໝັກ. ນີ້ແມ່ນຄັ້ງທຳອິດທີ່ຊ່ຽວຊານກົດໝາຍສາກົນຂອງຫວຽດນາມ ໄດ້ຮັບເລືອກເປັນຜູ້ພິພາກສາ ITLOS.

ໃນກະແສລວມຂອງວຽກງານຕ່າງປະເທດຫວຽດນາມ, ການທູດຫຼາຍຝ່າຍໂດຍລວມ ແລະ ການທູດຫຼາຍຝ່າຍຢູ່ສະຫະປະຊາຊາດໂດຍສະເພາະ ສືບຕໍ່ປະກອບສ່ວນຢືນຢັນບົດບາດ, ຖານະ ແລະ ສຽງຂອງຫວຽດນາມ, ພ້ອມທັງປະກອບສ່ວນໃຫ້ແກ່ສັນຕິພາບ ແລະ ການພັດທະນາຮ່ວມ.

ພາຍຫຼັງເກືອບ 5 ທົດສະວັດ, ສາຍພົວພັນ ຫວຽດນາມ - ສະຫະປະຊາຊາດ ໄດ້ຜ່ານຂະບວນການຫັນປ່ຽນຢ່າງຈະແຈ້ງ: ຈາກການຊ່ວຍເຫຼືອຟື້ນຟູ ໄປສູ່ການຮ່ວມມືພັດທະນາ; ຈາກການເຂົ້າຮ່ວມບັນດາກິດຈະກຳຫຼາຍຝ່າຍ ໄປສູ່ການເປັນເຈົ້າການສະເໜີຂໍ້ລິເລີ່ມ; ຈາກຖານະຮັບການຊ່ວຍເຫຼືອ ໄປສູ່ການເປັນສະມາຊິກທີ່ຕັ້ງໜ້າ, ມີຄວາມຮັບຜິດຊອບ ແລະ ນັບມື້ນັບມີສຽງໃນບັນດາບັນຫາຮ່ວມຂອງໂລກ.

ຕະຫຼອດຂະບວນການນັ້ນ, ຫວຽດນາມຍຶດໝັ້ນສ້າງພາບພົດປະເທດໜຶ່ງທີ່ເອກະລາດ, ເປັນເຈົ້າການ, ຮັກສັນຕິພາບ, ເປີດກວ້າງກັບໂລກ ແລະ ພ້ອມຮ່ວມເດີນທາງ, ປະກອບສ່ວນໃນບັນດາຄວາມພະຍາຍາມຮ່ວມຂອງປະຊາຄົມສາກົນ.

ຫວຽດນາມ ແມ່ນຄູ່ຮ່ວມມືທີ່ໄວ້ເນື້ອເຊື່ອໃຈ ແລະ ມີຄວາມຮັບຜິດຊອບຂອງ ສະຫະປະຊາຊາດ ຍສໝ - ສືບຕໍ່ບັນດາການເຄື່ອນໄຫວຢູ່ ສາທາລະນະລັດ ອາຟຣິກາກາງ, ໃນຕອນບ່າຍວັນທີ 15 ເມສາ (ຕາມເວລາທ້ອງຖິ່ນ), ຄະນະຜູ້ແທນຂອງກະຊວງປ້ອງກັນຄວາມສະຫງົບ ໂດຍແມ່ນທ່ານພົນໂທ ຟ້າມເຖ໋ຕຸ້ງ, ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນຄວາມສະຫງົບ, ຫົວໜ້າຄະນະຊີ້ນຳໂຄງການ 05 ກໍາລັງປ້ອງກັນຄວາມສະຫງົບປະຊາຊົນ ຫວຽດນາມ ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສະຫະປະຊາຊາດ (GGHB LHQ) ໄດ້ເຂົ້າຢ້ຽມຂໍ່ານັບ ທ່ານນາງ ວາເລນທິນ ຣັກວາບີຊາ (Valentine Rugwabiza), ຜູ້ຕາງໜ້າພິເສດຂອງເລຂາທິການໃຫຍ່ (SRSG), ຫົວໜ້າຄະນະປະຕິບັດງານ MINUSCA.

ອົງການສະຫະປະຊາຊາດ ຍົກຍ້ອງເຊີດຊູ ນັກຮົບ “ໝວກເບເລສີຟ້າ” ຂອງຫວຽດນາມ ເກືອບ 200 ທ່ານ ຍສໝ - ເພື່ອຈົດຈຳ ແລະ ຍົກຍ້ອງບັນດາການປະກອບສ່ວນຂອງກຳລັງຮັກສາສັນຕິພາບ ຫວຽດນາມ, ກອງກຳລັງຮັກສາຄວາມສະຫງົບຊົ່ວຄາວ ຂອງອົງການສະຫະປະຊາຊາດ ປະຈຳເຂດ ອາບີເອ (UNISFA) ໄດ້ມອບຫຼຽນກາ “ເພື່ອພາລະກິດຮັກສາສັນຕິພາບ ຂອງອົງການສະຫະປະຊາຊາດ” ໃຫ້ແກ່ພະນັກງານ ແລະ ລັດຖະກອນ ຈຳນວນ 184 ທ່ານ ຂອງກອງວິສະວະກຳ ສະບັບເລກທີ 4 ພ້ອມດ້ວຍບັນດານາຍທະຫານສ່ວນບຸກຄົນ ທີ່ພວມປະຕິບັດໜ້າທີ່ຢູ່ທີ່ກອງກຳລັງດັ່ງກ່າວ.