ຈາກການສົ່ງອອກສິນຄ້າ ສູ່ການເຂົ້າຮ່ວມຢ່າງເລິກເຊິ່ງໃນຕ່ອງໂສ້ມູນຄ່າຂອງ ອົດສະຕຣາລີ

ອົດສະຕຣາລີ ແມ່ນຕະຫຼາດທີ່ມີກຳລັງຊື້ສູງ, ພ້ອມກັນນັ້ນກໍວາງອອກບັນດາຂໍ້ກຳນົດທີ່ເຂັ້ມງວດກ່ຽວກັບມາດຕະຖານ, ຄຸນນະພາບ, ຄວາມປອດໄພດ້ານອາຫານ, ການສືບຄົ້ນແຫຼ່ງທີ່ມາ, ສິ່ງແວດລ້ອມ ແລະ ຄວາມຮັບຜິດຊອບຕໍ່ສັງຄົມ. ໃນສະພາບການດັ່ງກ່າວ, ການແຂ່ງຂັນດ້ວຍລາຄາຕ່ຳຈະນັບມື້ນັບຫຍຸ້ງຍາກ, ສ່ວນຄຸນນະພາບ, ຍີ່ຫໍ້, ການຮັບຮອງ ແລະ ຄວາມສາມາດໃນການຕອບສະໜອງມາດຕະຖານ ກາຍເປັນບັນດາປັດໄຈທີ່ສຳຄັນຍິ່ງຂຶ້ນສຳລັບວິສາຫະກິດຫວຽດນາມ.

ນອກຈາກການນຳສິນຄ້າເຂົ້າສູ່ອົດສະຕຣາລີແລ້ວ, ວິສາຫະກິດຫວຽດນາມຈຳເປັນຕ້ອງຊອກຫາຕຳແໜ່ງໃນບັນດາຕ່ອງໂສ້ສະໜອງໃໝ່ ທີ່ລັດຖະບານສອງປະເທດພວມຊຸກຍູ້.

ຖະແຫຼງການຮ່ວມກ່ຽວກັບການຍົກສູງຄວາມສາມາດຕ້ານທານ, ປັບຕົວ ແລະ ຟື້ນຟູເສດຖະກິດຫວຽດນາມ - ອົດສະຕຣາລີ ໄດ້ກຳນົດຂ້ອນຂ້າງລະອຽດບັນດາຂົງເຂດ ລວມມີ ແຮ່ທາດທີ່ຈຳເປັນ, ສານເຄິ່ງຕົວນຳ, ພະລັງງານສະອາດ, ກະສິກຳ ແລະ ບັນດາເຕັກໂນໂລຊີເກີດໃໝ່. ບົນພື້ນຖານນີ້, ສາມກຸ່ມຂົງເຂດຖືກຕີລາຄາວ່າມີທ່າແຮງສ້າງມູນຄ່າສູງ.

ພິທີມອບບັນດາບົດບັນທຶກການຮ່ວມມືລະຫວ່າງພະແນກການທ່ອງທ່ຽວນະຄອນໂຮ່ຈີມິນ, Vietnam Airlines, Saigontourist Group ແລະ ບັນດາຄູ່ຮ່ວມມືອົດສະຕຣາລີ ພາຍໃຕ້ການເປັນສັກຂີພິຍານຂອງທ່ານ ໂຕເລິມ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດຫວຽດນາມ.

ເປີດກວ້າງການຮ່ວມມືໃນສາມກຸ່ມຂົງເຂດ

ກ່ອນອື່ນແມ່ນພະລັງງານ ແລະ ແຮ່ທາດທີ່ຈຳເປັນ. ອົດສະຕຣາລີ ມີທ່າແຮງສູງດ້ານຊັບພະຍາກອນ, ເຕັກໂນໂລຊີຂຸດຄົ້ນ ແລະ ການຄຸ້ມຄອງແຮ່ທາດ, ໃນຂະນະທີ່ຫວຽດນາມຕ້ອງການແຫຼ່ງວັດຖຸດິບທີ່ໝັ້ນຄົງ ເພື່ອຮັບໃຊ້ການຜະລິດ, ການຫັນປ່ຽນພະລັງງານ ແລະ ບັນດາຂະແໜງອຸດສາຫະກຳໃໝ່.

ສອງປະເທດເນັ້ນໜັກການສ້າງຕ່ອງໂສ້ສະໜອງແຮ່ທາດທີ່ຈຳເປັນໃຫ້ມີຄວາມຫຼາກຫຼາຍ, ປອດໄພ ແລະ ມີຄວາມສາມາດຕ້ານທານ, ພ້ອມທັງຊຸກຍູ້ການນຳໃຊ້ໄຟຟ້າ, ພະລັງງານທົດແທນ ແລະ ການຫັນປ່ຽນພະລັງງານ.

ຈາກບັນດາທ່າແຮງ ແລະ ຄວາມຕ້ອງການນີ້, ການຮ່ວມມືບໍ່ຄວນຢຸດຢູ່ພຽງແຕ່ການທີ່ຫວຽດນາມນຳເຂົ້າວັດຖຸດິບຈາກອົດສະຕຣາລີ ແຕ່ຄວນມຸ່ງໄປສູ່ການປຸງແຕ່ງເລິກ, ເຕັກໂນໂລຊີວັດສະດຸ, ອຸປະກອນພະລັງງານ ແລະ ການຜະລິດບັນດາຜະລິດຕະພັນທີ່ມີມູນຄ່າເພີ່ມສູງ.

ສຳລັບວິສາຫະກິດຫວຽດນາມ, ການເຂົ້າຮ່ວມຕ່ອງໂສ້ສະໜອງແຮ່ທາດບໍ່ຈຳເປັນຕ້ອງຜ່ານກິດຈະກຳຂຸດຄົ້ນຢູ່ອົດສະຕຣາລີ. ໂອກາດຍັງສາມາດຊອກຫາໄດ້ຢູ່ບັນດາຂັ້ນຕອນປຸງແຕ່ງ, ຜະລິດຊິ້ນສ່ວນ, ວັດສະດຸ ຫຼື ສະໜອງການບໍລິການອຸດສາຫະກຳ. ໃນຂົງເຂດພະລັງງານສະອາດ, ບັນດາຂັ້ນຕອນເຊັ່ນ ຕ່ອງໂສ້ສະໜອງອຸປະກອນໄຟຟ້າ, ລະບົບກັກເກັບພະລັງງານ, ຊິ້ນສ່ວນ ແລະ ການບໍລິການດ້ານເຕັກນິກ ກໍເປີດກວ້າງໂອກາດໃນການເຂົ້າຮ່ວມ.

ກຸ່ມທີສອງແມ່ນເຕັກໂນໂລຊີຂັ້ນສູງ ແລະ ບັນດາຂະແໜງອຸດສາຫະກຳແຫ່ງອະນາຄົດ, ໂດຍສະເພາະ ສານເຄິ່ງຕົວນຳ, ປັນຍາປະດິດ (AI), ເຕັກໂນໂລຊີຄວອນຕຳ, ເຕັກໂນໂລຊີຊີວະພາບ ແລະ ເຕັກໂນໂລຊີດິຈິຕອນ.

ໃນບັນດາຂົງເຂດນີ້, ຫວຽດນາມສາມາດນຳໃຊ້ບໍ່ພຽງແຕ່ແຫຼ່ງທຶນ ແຕ່ສິ່ງທີ່ສຳຄັນກວ່າແມ່ນຄວາມຮູ້, ການຄົ້ນຄວ້າ, ການຝຶກອົບຮົມຊັບພະຍາກອນມະນຸດ ແລະ ການເຊື່ອມຕໍ່ລະຫວ່າງບັນດາມະຫາວິທະຍາໄລ, ວິສາຫະກິດອົດສະຕຣາລີ ກັບລະບົບນິເວດນະວັດຕະກຳພາຍໃນປະເທດ.

ກຸ່ມທີສາມແມ່ນກະສິກຳ ແລະ ອຸດສາຫະກຳປຸງແຕ່ງອາຫານ. ການເສີມໜູນກັນລະຫວ່າງສອງເສດຖະກິດ ສ້າງໂອກາດຮ່ວມມືໃນການປຸງແຕ່ງ, ລະບົບໂລຈິສຕິກຄວາມເຢັນ, ເຕັກໂນໂລຊີກະສິກຳ ແລະ ການສ້າງບັນດາຕ່ອງໂສ້ອາຫານທີ່ສາມາດສືບຄົ້ນແຫຼ່ງທີ່ມາໄດ້.

ສຳລັບຂົງເຂດນີ້, ວິສາຫະກິດຫວຽດນາມຈຳເປັນຕ້ອງມຸ່ງໄປສູ່ຜະລິດຕະພັນປຸງແຕ່ງເລິກ, ມີຍີ່ຫໍ້ ແລະ ສາມາດສືບຄົ້ນແຫຼ່ງທີ່ມາໄດ້ ແທນທີ່ຈະເນັ້ນການສົ່ງອອກຜະລິດຕະພັນປຸງແຕ່ງເບື້ອງຕົ້ນເປັນຫຼັກ.

ທ່ານນາງ ປອ. ຮ່າທິເກີມເວິນ, ຫົວໜ້າອາວຸໂສສາຂາວິຊາເສດຖະສາດ, ມະຫາວິທະຍາໄລ RMIT ຫວຽດນາມ.

ຄ່ອຍໆກ້າວຂຶ້ນສູ່ຂັ້ນຕອນທີ່ມີມູນຄ່າສູງກວ່າ

ຄຽງຄູ່ກັບການຊອກຫາຕຳແໜ່ງໃນບັນດາຕ່ອງໂສ້ສະໜອງໃໝ່, ວິສາຫະກິດຫວຽດນາມຈຳເປັນຕ້ອງນຳໃຊ້ບັນດາສັນຍາການຄ້າເສລີ (FTA) ທີ່ຫວຽດນາມ ແລະ ອົດສະຕຣາລີ ຮ່ວມເຂົ້າຮ່ວມ ເຊັ່ນ CPTPP, RCEP ແລະ AANZFTA ໃຫ້ມີປະສິດທິຜົນຍິ່ງຂຶ້ນ.

ເຖິງຢ່າງໃດກໍຕາມ, ຜົນປະໂຫຍດຈາກບັນດາສັນຍາເຫຼົ່ານີ້ບໍ່ໄດ້ມາເຖິງວິສາຫະກິດໂດຍອັດຕະໂນມັດ. ເພື່ອຂຸດຄົ້ນບັນດາໂອກາດ, ວິສາຫະກິດຈຳເປັນຕ້ອງກຳແໜ້ນກົດລະບຽບວ່າດ້ວຍແຫຼ່ງກຳເນີດ, ມາດຕະຖານດ້ານເຕັກນິກ ກໍຄືບັນດາສິດພິເສດສະເພາະສຳລັບຜະລິດຕະພັນຂອງຕົນ.

ໜຶ່ງໃນທິດທາງທີ່ສາມາດປະຕິບັດໄດ້, ໂດຍສະເພາະສຳລັບວິສາຫະກິດຂະໜາດນ້ອຍ ແລະ ກາງ, ແມ່ນການເປັນເຈົ້າການສ້າງສາຍພົວພັນໂດຍກົງກັບຜູ້ນຳເຂົ້າ, ຜູ້ຈຳໜ່າຍ ແລະ ວິສາຫະກິດຕົ້ນຕ່ອງໂສ້ຂອງອົດສະຕຣາລີ.

ຕາມທິດທາງນີ້, ວິສາຫະກິດຫວຽດນາມບໍ່ຈຳເປັນຕ້ອງຮີບສ້າງເຄືອຂ່າຍຂອງຕົນເອງຢູ່ອົດສະຕຣາລີໃນທັນທີ, ແຕ່ໃນຂັ້ນຕົ້ນສາມາດກາຍເປັນຜູ້ສະໜອງ ຫຼື ຄູ່ຮ່ວມມືດ້ານການຜະລິດໃຫ້ແກ່ວິສາຫະກິດຂອງປະເທດນີ້ກ່ອນ.

ຈາກບັນດາສາຍພົວພັນເຫຼົ່ານັ້ນ, ວິສາຫະກິດຫວຽດນາມສາມາດຄ່ອຍໆເຂົ້າຮ່ວມໃນບັນດາຂັ້ນຕອນທີ່ມີມູນຄ່າສູງກວ່າ, ນັບແຕ່ການປຸງແຕ່ງເລິກ, ການອອກແບບຜະລິດຕະພັນ ຈົນເຖິງເຕັກໂນໂລຊີ ແລະ ການພັດທະນາຍີ່ຫໍ້.

6 ​ເສົາ​ຄ້ຳ​ເພື່ອ​ພັດທະນາ​ການ​ພົວພັນ​ສອງ​ປະ​ເທດ ຫວຽດນາມ - ອົດສະຕຣາລີ ຍສໝ - ຕາມ​ທ່ານ​ເອກ​ອັກຄະ​ລັດຖະທູດ​ຫວຽດນາມ ປະຈຳ ອົດສະຕຣາລີ ຟ້າມຮຸງເຕີມ ແລ້ວ, ລາຍການເຄື່ອນໄຫວ 2024-2027 ລະຫວ່າງ ຫວຽດນາມ ​ແລະ ອົດສະຕຣາລີ ເພື່ອຜັນຂະຫຍາຍຂອບ​ເຂດ​ການ​ພົວພັນ​ຄູ່​ຮ່ວມ​ມື​ຍຸດ​ທະ​ສາດ​ຮອບດ້ານ​ຈະ​ສຸມ​ໃສ່ 6 ຂົງ​ເຂດ.

ໄຂພິທີເຫດການວັດທະນະທຳຊຸມຊົນຂະໜາດໃຫຍ່ທີ່ສຸດຂອງຄົນ ຫວຽດນາມ ຢູ່ ພາກຕາເວັນຕົກຂອງອົດສະຕຣາລີ ຍສໝ - ສະຖານກົງສຸນໃຫຍ່ ຫວຽດນາມ ປະຈຳ Perth, ເຄືອຂ່າຍພອນສະຫວັນ ຫວຽດນາມ - ອົດສະຕຣາລີ (AVTN) ແລະ Global Trade Connection ຫາກໍປະກາດໂຄງການ Vietnamese Culture Day 2026 – ສີສັນບ້ານເກີດເມືອງນອນ, ເຊິ່ງແມ່ນເຫດການວັດທະນະທຳຊຸມຊົນຂະໜາດໃຫຍ່ທີ່ສຸດຂອງຄົນ ຫວຽດນາມ ຢູ່ ພາກຕາເວັນຕົກຂອງອົດສະຕຣາລີ. ໂຄງການຄາດຄະເນວ່າຈະຈັດຂຶ້ນພາຍໃນວັນທີ 7/11/2026 ຢູ່ທີ່ Forrest Place, ໃຈກາງເມືອງ Perth.