ສະມາຄົມມິດຕະພາບ ຫວຽດນາມ - ໂອຕຣິດ ເຊື່ອມໂຍງປັນຍາຊົນ ແລະ ນັກວິທະຍາສາດ

ໃນຂອບເຂດການເດີນທາງຄັ້ງນີ້, ສະມາຄົມມິດຕະພາບ ຫວຽດນາມ - ໂອຕຣິດ ໄດ້ຈັດການພົບປະ ແລະ ກອງປະຊຸມສຳມະນາ ກັບບັນດາປັນຍາຊົນ, ນັກວິທະຍາສາດ ແລະ ຜູ້ຊ່ຽວຊານໜຸ່ມຊາວຫວຽດນາມ ທີ່ກຳລັງອາໄສ, ສຶກສາ ແລະ ເຮັດວຽກຢູ່ ໂອຕຣິດ.

ເຂົ້າຮ່ວມກອງປະຊຸມສຳມະນາ ມີນັກສຶກສາລະດັບປະລິນຍາເອກ, ນັກສຶກສາຕ່າງປະເທດ ແລະ ຜູ້ຊ່ຽວຊານຊາວຫວຽດນາມ ທີ່ກຳລັງປະຕິບັດວຽກຢູ່ຫຼາຍມະຫາວິທະຍາໄລ, ສະຖາບັນຄົ້ນຄວ້າ ແລະ ວິສາຫະກິດເຕັກໂນໂລຊີຂອງ ໂອຕຣິດ. ບັນດາຜູ້ແທນ ໄດ້ແບ່ງປັນປະສົບການໃນການຮຽນ ແລະ ການຄົ້ນຄວ້າ; ພ້ອມທັງແລກປ່ຽນກ່ຽວກັບທ່າແຮງການຮ່ວມມືລະຫວ່າງບັນດາສະຖາບັນຄົ້ນຄວ້າ, ມະຫາວິທະຍາໄລ ແລະ ວິສາຫະກິດຂອງສອງປະເທດ.

ຄະນະຜູ້ແທນຂອງສະມາຄົມມິດຕະພາບ ຫວຽດນາມ - ໂອຕຣິດ ພົບປະກັບປັນຍາຊົນຊາວຫວຽດນາມໃນ ໂອຕຣິດ.

ເນື້ອໃນການສົນທະນາ ໄດ້ສຸມໃສ່ບາງຂົງເຂດ ເຊັ່ນ: ປັນຍາປະດິດ, ຫຸ່ນຍົນ, ເຕັກໂນໂລຊີສາລະສົນເທດ, ວິສະວະກຳກົນຈັກການຜະລິດ, ເຕັກໂນໂລຊີຄວັນຕຳ ແລະ ເຕັກໂນໂລຊີນິວເຄຼຍ. ນີ້ແມ່ນບັນດາຂົງເຂດທີ່ ໂອຕຣິດ ມີຈຸດແຂງ ແລະ ພ້ອມກັນນັ້ນ ກໍເປັນຂະແໜງທີ່ ຫວຽດນາມ ກຳລັງໃຫ້ຄວາມສົນໃຈໃນການພັດທະນາ.

ກ່າວຄຳປາໄສໃນກອງປະຊຸມສຳມະນາ, ທ່ານ ສຈ.ປອ. ເຈິ່ນຕ໊ວນແອັງ ໄດ້ຕີລາຄາສູງຕໍ່ຜົນງານທີ່ຄະນະປັນຍາຊົນຫວຽດນາມໃນ ໂອຕຣິດ ບັນລຸໄດ້. ທ່ານເຫັນວ່າ ບັນດາຜູ້ຊ່ຽວຊານ ແລະ ນັກວິທະຍາສາດຫວຽດນາມໃນຕ່າງປະເທດ ແມ່ນແຫຼ່ງກຳລັງອັນສຳຄັນ ຕໍ່ການພັດທະນາວິທະຍາສາດ, ເຕັກໂນໂລຊີ ແລະ ຂະບວນການເຊື່ອມໂຍງສາກົນຂອງປະເທດ.

ປະທານສະມາຄົມມິດຕະພາບ ຫວຽດນາມ - ໂອຕຣິດ ໄດ້ສະແດງຄວາມປາຖະໜາວ່າ ບັນດາປັນຍາຊົນ ແລະ ນັກວິທະຍາສາດໜຸ່ມ ຈະສືບຕໍ່ເສີມຂະຫຍາຍບົດບາດຂົວເຊື່ອມ, ເພີ່ມທະວີການແລກປ່ຽນດ້ານວິຊາການ, ການຮ່ວມມືຄົ້ນຄວ້າ ແລະ ການຖ່າຍທອດເຕັກໂນໂລຊີ ລະຫວ່າງ ຫວຽດນາມ ແລະ ໂອຕຣິດ.

ຄະນະຜູ້ແທນ ຍັງໄດ້ເຮັດວຽກກັບ ສະຖານທູດ ຫວຽດນາມ ປະຈຳ ໂອຕຣິດ ເພື່ອແລກປ່ຽນກ່ຽວກັບບັນດາທິດທາງໃນການຊຸກຍູ້ການຮ່ວມມືດ້ານວິທະຍາສາດ - ເຕັກໂນໂລຊີ ແລະ ເພີ່ມທະວີການປະສານງານໃນວຽກງານການຕ່າງປະເທດປະຊາຊົນ.

ໃນກອງປະຊຸມເຮັດວຽກ, ທ່ານ ຫວູເລໄທຮ່ວາງ, ເອກອັກຄະລັດຖະທູດ ຫວຽດນາມ ປະຈຳ ໂອຕຣິດ ໄດ້ແນະນຳບາງກິດຈະກຳການຕ່າງປະເທດຫຼາຍຝ່າຍຂອງ ຫວຽດນາມ ຢູ່ນະຄອນ Vienna ຊຶ່ງເປັນບ່ອນຕັ້ງສຳນັກງານຂອງອົງການສາກົນຫຼາຍແຫ່ງ ເຊັ່ນ: ອົງການພະລັງງານປະລະມານູສາກົນ (IAEA), ຫ້ອງການສະຫະປະຊາຊາດວ່າດ້ວຍຢາເສບຕິດ ແລະ ອາຊະຍາກຳ (UNODC), ອົງການພັດທະນາອຸດສາຫະກຳແຫ່ງສະຫະປະຊາຊາດ (UNIDO) ແລະ ຄະນະກຳມະການສະຫະປະຊາຊາດວ່າດ້ວຍການນຳໃຊ້ອະວະກາດເພື່ອສັນຕິ (COPUOS).

ທ່ານເອກອັກຄະລັດຖະທູດ ຍັງໄດ້ແຈ້ງຂໍ້ມູນກ່ຽວກັບບັນດາກິດຈະກຳທີ່ສະຖານທູດໄດ້ດຳເນີນ ເພື່ອເຊື່ອມໂຍງສະຖາບັນຄົ້ນຄວ້າ, ມະຫາວິທະຍາໄລ ແລະ ວິສາຫະກິດຂອງສອງປະເທດ. ບາງເວທີສົນທະນາກ່ຽວກັບຄວາມປອດໄພທາງໄຊເບີ, ປັນຍາປະດິດ, ຫຸ່ນຍົນຮູບຮ່າງຄົນ ແລະ ການຫັນເປັນດິຈິຕອນ ທີ່ຈັດຂຶ້ນຢູ່ Vienna ໄດ້ດຶງດູດການເຂົ້າຮ່ວມຂອງນັກວິທະຍາສາດ, ຜູ້ຊ່ຽວຊານ ແລະ ວິສາຫະກິດເຕັກໂນໂລຊີ ຈາກ ຫວຽດນາມ ແລະ ໂອຕຣິດ.

ບັນດາຜູ້ແທນ ເຫັນວ່າ ຈຸດແຂງຂອງ ໂອຕຣິດ ດ້ານວິທະຍາສາດ - ເຕັກໂນໂລຊີ, ນະວັດຕະກຳ ແລະ ການຝຶກອົບຮົມບຸກຄະລາກອນຄຸນນະພາບສູງ ໄດ້ສ້າງເງື່ອນໄຂອັນດີ ໃຫ້ສອງຝ່າຍ ເພີ່ມທະວີການຮ່ວມມືດ້ານການຄົ້ນຄວ້າ, ການຖ່າຍທອດເຕັກໂນໂລຊີ, ການພັດທະນາຊັບພະຍາກອນມະນຸດ ແລະ ການເຊື່ອມໂຍງບັນດາສະຖາບັນວິທະຍາສາດ, ມະຫາວິທະຍາໄລ ແລະ ວິສາຫະກິດ.

ທ່ານ ປອ. Alfred Gerstl, ປະທານສະມາຄົມ ໂອຕຣິດ - ຫວຽດນາມ, ເປັນຜູ້ຕາງໜ້າຂອງສະມາຄົມ ຮັບເຄື່ອງອິດທິຍາພອນມິດຕະພາບ ທີ່ມອບໂດຍ ປະທານປະເທດ ຫວຽດນາມ. (ພາບ: ສະມາຄົມມິດຕະພາບ ຫວຽດນາມ - ໂອຕຣິດ)

ໃນໂອກາດການເດີນທາງຄັ້ງນີ້, ສະມາຄົມມິດຕະພາບ ຫວຽດນາມ - ໂອຕຣິດ ໄດ້ປະສານງານກັບ ສະຖານທູດ ຫວຽດນາມ ປະຈຳ ໂອຕຣິດ ຈັດພິທີມອບເຄື່ອງອິດທິຍາພອນມິດຕະພາບ ຂອງ ປະທານປະເທດ ສາທາລະນະລັດສັງຄົມນິຍົມ ຫວຽດນາມ ໃຫ້ແກ່ ທ່ານ ດຣ. Peter Jankowitsch, ອະດີດລັດຖະມົນຕີວ່າການກະຊວງການຕ່າງປະເທດ ໂອຕຣິດ, ປະທານສະມາຄົມ ໂອຕຣິດ - ຫວຽດນາມ ໃນໄລຍະປີ 1998-2022, ປັດຈຸບັນເປັນປະທານກຽດຕິຍົດຂອງສະມາຄົມ; ພ້ອມກັນນັ້ນ ຍັງໄດ້ມອບເຄື່ອງອິດທິຍາພອນມິດຕະພາບ ໃຫ້ແກ່ສະມາຄົມ ໂອຕຣິດ - ຫວຽດນາມ.

ລາງວັນອັນຊົງກຽດນີ້ ເປັນການຍົກຍ້ອງຜົນງານອັນຍາວນານຂອງ ທ່ານ ດຣ. Peter Jankowitsch ແລະ ສະມາຄົມ ໂອຕຣິດ - ຫວຽດນາມ ໃນການສ້າງສາ ແລະ ເສີມສ້າງສາຍພົວພັນມິດຕະພາບລະຫວ່າງປະຊາຊົນສອງປະເທດ.

ໃນໂອກາດນີ້, ຄະນະຜູ້ແທນ ຍັງໄດ້ໄປຢ້ຽມຢາມ ແລະ ເຮັດວຽກກັບ ສະຖາບັນສາກົນເພື່ອການວິເຄາະລະບົບປະຍຸກໃຊ້ (IIASA), ສະພາບັນດິດ ໂອຕຣິດ, ມະຫາວິທະຍາໄລເຕັກໂນໂລຊີ Vienna ແລະ ອົງການພະລັງງານປະລະມານູສາກົນ (IAEA). ໃນການພົບປະເຮັດວຽກ, ສອງຝ່າຍໄດ້ແລກປ່ຽນກ່ຽວກັບກິດຈະກຳການຄົ້ນຄວ້າ, ການຝຶກອົບຮົມ, ການໃຫ້ຄຳປຶກສາດ້ານນະໂຍບາຍ ແລະ ຄວາມສາມາດໃນການສ້າງກົນໄກການຮ່ວມມືເພີ່ມເຕີມ ລະຫວ່າງບັນດາສະຖາບັນວິທະຍາສາດຂອງ ຫວຽດນາມ ກັບບັນດາຄູ່ຮ່ວມມືໃນ ໂອຕຣິດ.

ໂອຕຣິດ (Austria) ພ້ອມແລ້ວທີ່ຈະຮ່ວມມືກັບ ຫວຽດນາມ (VietNam) ເພື່ອຍົກສູງຂີດຄວາມສາມາດໃຫ້ແກ່ກຳລັງຮັກສາສັນຕິພາບ ສປຊ ຍສໝ - ຕາມການລາຍງານຂອງນັກຂ່າວ VNA ປະຈຳເອີຣົບ, ໃນວັນທີ 23 ເມສາ ທີ່ນະຄອນຫຼວງ ວຽນນາ (Vienna) ຂອງປະເທດ ໂອຕຣິດ, ທ່ານເອກອັກຄະລັດຖະທູດ ຫວຽດນາມ ປະຈຳ ສາທາລະນະລັດ ໂອຕຣິດ ຫວູເລໄທຮ່ວາງ (VuLeThaiHoang) ໄດ້ມີການເຮັດວຽກຮ່ວມກັບ ທ່ານ Tobias Lang, ຜູ້ອຳນວຍການສູນສັນຕິພາບ ໂອຕຣິດ, ເພື່ອແນໃສ່ເພີ່ມທະວີການຮ່ວມມື ຫວຽດນາມ - ໂອຕຣິດ ໃນຂົງເຂດການຝຶກອົບຮົມ, ຍົກສູງຂີດຄວາມສາມາດໃຫ້ແກ່ກຳລັງທີ່ເຂົ້າຮ່ວມການເຄື່ອນໄຫວຮັກສາສັນຕິພາບຂອງ ສປຊ.

ຫວຽດນາມ - ໂອຕຣິດ ຊຸກຍູ້ການຮ່ວມມືຢ່າງແທດຕົວຈິງໃນຂົງເຂດຄວາມໝັ້ນຄົງທາງໄຊເບີ ຍສໝ - ວັນທີ 5/5 ຢູ່ທີ່ນະຄອນຫຼວງ ວຽນນາ (ໂອຕຣິດ), ສະຖານເອກອັກຄະລັດຖະທູດ ຫວຽດນາມ ປະຈຳ ໂອຕຣິດ ໄດ້ປະສານສົມທົບກັບ ສະພາການຄ້າສະຫະພັນໂອຕຣິດ, ສະຖາບັນເຕັກໂນໂລຊີໂອຕຣິດ ແລະ ບໍລິສັດ FPT ຮ່ວມກັນຈັດເວທີປຶກສາຫາລືຄວາມໝັ້ນຄົງທາງໄຊເບີ ໂອຕຣິດ - ຫວຽດນາມ ໃນຮູບແບບເຊິ່ງໜ້າສົມທົບກັບທາງອອນລາຍ. ກິດຈະກຳນີ້ມຸ່ງໄປສູ່ເປົ້າໝາຍເພີ່ມທະວີການຮ່ວມມືສອງຝ່າຍ, ປັບປຸງຂີດຄວາມສາມາດດ້ານສະຖາບັນ ແລະ ເຕັກໂນໂລຊີ, ທັງເປີດໂອກາດການລົງທຶນ ແລະ ທຸລະກິດໃໝ່ໆໃນຂົງເຂດຄວາມໝັ້ນຄົງທາງໄຊເບີ ແລະ ການຫັນເປັນດີຈີຕອນ.