ສະຖານທູດຫວຽດນາມປະຈຳຕັງຊານີ: ໝັ້ນຄົງຢູ່ແນວໜ້າການຕ່າງປະເທດ

ທ່ານນາງ ຫວູແທັງຮວຽນ, ເອກອັກຄະລາຊະທູດ ສສ ຫວຽດນາມ ປະຈຳສາທາລະນະລັດຕັງຊານີ, ຄວບຕຳແໜ່ງປະຈຳສາທາລະນະລັດເຄນຢາ, ສາທາລະນະລັດປະຊາທິປະໄຕສະຫະພັນເອທິໂອເປຍ, ສາທາລະນະລັດຣວັນດາ, ສາທາລະນະລັດອູການດາ, ສາທາລະນະລັດບູຣຸນດີ, ສາທາລະນະລັດສະຫະພັນໂຊມາເລຍ ແລະ ເປັນຜູ້ຕາງໜ້າຂອງ ສສ ຫວຽດນາມ ປະຈຳສະຫະພັນອາຟຣິກາ ໄດ້ໃຫ້ສຳພາດກັບສື່ມວນຊົນ ກ່ອນການຈັດຂຶ້ນຂອງກອງປະຊຸມການທູດ ຄັ້ງທີ 33.

ສົ່ງເສີມບົດບາດຂອງ “ສະຖານີເສົາອາກາດ” ທີ່ວ່ອງໄວທີ່ສຸດ

ທ່ານ ຫວູແທັງຮວຽນ, ເອກອັກຄະລາຊະທູດຫວຽດນາມ.

ພັກ ແລະ ລັດ ໄດ້ກຳນົດໃຫ້ວຽກງານການຕ່າງປະເທດສືບຕໍ່ຮັກສາບົດບາດນຳໜ້າໃນການສ້າງ ແລະ ຮັກສາສະພາບແວດລ້ອມແຫ່ງສັນຕິພາບ ພ້ອມທັງລະດົມແຫຼ່ງກຳລັງຈາກພາຍນອກເພື່ອຮັບໃຊ້ການພັດທະນາປະເທດ. ຕາມທັດສະນະຂອງທ່ານເອກອັກຄະລາຊະທູດ, ບັນດາອົງການຜູ້ແທນຂອງຫວຽດນາມປະຈຳຕ່າງປະເທດ ຄວນຍົກສູງບົດບາດແນວໃດ ເພື່ອປະຕິບັດໜ້າທີ່ສຳຄັນ ແລະ ຖາວອນຂອງວຽກງານການຕ່າງປະເທດຫວຽດນາມໃນຍຸກໃໝ່ໃຫ້ບັນລຸຜົນ? ສຳລັບສະຖານທູດຫວຽດນາມປະຈຳຕັງຊານີ, ໄດ້ ແລະ ກຳລັງດຳເນີນທິດທາງໃດແດ່ ເພື່ອຫັນເປົ້າໝາຍດັ່ງກ່າວໃຫ້ເປັນຈິງ?

ເມື່ອກ້າວເຂົ້າສູ່ຍຸກໃໝ່ - ຍຸກແຫ່ງການກ້າວຂຶ້ນຂອງຊາດ, ບັນດາອົງການຜູ້ແທນຂອງຫວຽດນາມປະຈຳຕ່າງປະເທດ ແມ່ນ “ສະຖານີເສົາອາກາດ” ທີ່ມີຄວາມອ່ອນໄຫວທີ່ສຸດ ແລະ ເປັນກຳລັງແນວໜ້າໃນສະໜາມຮົບດ້ານການທູດ. ເພື່ອປະຕິບັດບົດບາດນຳໜ້າໃຫ້ມີປະສິດທິຜົນ, ບັນດາອົງການຜູ້ແທນຕ້ອງກຳນົດເປົ້າໝາຍຢ່າງຊັດເຈນ ແລະ ສຸມໃສ່ການຍົກສູງ 3 ບົດບາດຫຼັກດັ່ງນີ້:

ປະການທຳອິດ, ບົດບາດ “ເຊັນເຊີຍຸດທະສາດ” ໃນການທູດການເມືອງ ຜ່ານການຕິດຕາມ, ຄົ້ນຄວ້າ ແລະ ຄາດຄະເນແນວໂນ້ມການປ່ຽນແປງທາງພູມລັດສາດການເມືອງ ແລະ ພູມສາດເສດຖະກິດໃນເຂດປະຈຳການຢ່າງທັນການ. ຈາກນັ້ນ ສະເໜີຄຳແນະນຳຢ່າງເລິກເຊິ່ງ ແລະ ແມ່ນຍຳຕໍ່ການນຳພັກ ແລະ ລັດ ໃນການວາງນະໂຍບາຍທີ່ຍືດຫຍຸ່ນ, ປົກປ້ອງຜົນປະໂຫຍດແຫ່ງຊາດ ແລະ ປະຊາຊົນ ຕັ້ງແຕ່ຕົ້ນ ແລະ ຈາກທາງໄກ ພ້ອມທັງຮັກສາສະພາບແວດລ້ອມແຫ່ງສັນຕິພາບ ແລະ ສະຖຽນລະພາບ.

ປະການທີສອງ, ບົດບາດ “ຂົວເຊື່ອມ ແລະ ຕົວເລັ່ງ” ໃນການທູດເສດຖະກິດ. ໂດຍກຳນົດໃຫ້ການທູດເສດຖະກິດເປັນແຮງຂັບເຄື່ອນສຳຄັນຂອງການພັດທະນາ, ທຸກອົງການຜູ້ແທນຕ້ອງສະແຫວງຫາ, ເຊື່ອມໂຍງ ແລະ ດຶງດູດແຫຼ່ງທຶນ, ເຕັກໂນໂລຊີ, ປະສົບການການບໍລິຫານ, ຕະຫຼາດ ແລະ ແຫຼ່ງກຳລັງທີ່ມີຄຸນນະພາບຈາກພາຍນອກ ເພື່ອຮັບໃຊ້ໂດຍກົງຕໍ່ເປົ້າໝາຍການພັດທະນາເສດຖະກິດ-ສັງຄົມຂອງປະເທດ ແລະ ສະໜັບສະໜູນວິສາຫະກິດຫວຽດນາມໃຫ້ກ້າວສູ່ຕະຫຼາດໂລກ.

ປະການທີສາມ, ບົດບາດ “ທູດວັດທະນະທຳ ແລະ ຜູ້ປົກປ້ອງພົນລະເມືອງ” ໃນການທູດວັດທະນະທຳ ແລະ ວຽກງານຊຸມຊົນຊາວຫວຽດນາມໃນຕ່າງປະເທດ. ພວກຂ້າພະເຈົ້າພະຍາຍາມສະເໝີມາ ເພື່ອເຜີຍແຜ່ຢ່າງກວ້າງຂວາງຄຸນຄ່າ ແລະ ພາບພົດຂອງປະເທດຫວຽດນາມທີ່ກຳລັງພັດທະນາ, ມີຄວາມເອກະລາດ ແລະ ອຸດົມດ້ວຍອັດຕະລັກ.

ພ້ອມກັນນັ້ນ ຍັງຕ້ອງປະຕິບັດວຽກງານຄຸ້ມຄອງ ແລະ ປົກປ້ອງພົນລະເມືອງ ແລະ ນິຕິບຸກຄົນຫວຽດນາມໃນຕ່າງປະເທດໃຫ້ດີ ເພື່ອຮ່ວມກັນສ້າງຄວາມສາມັກຄີອັນຍິ່ງໃຫຍ່ຂອງປວງຊົນ ແລະ ສະໜັບສະໜູນໃຫ້ຊຸມຊົນຊາວຫວຽດນາມໃນຕ່າງປະເທດ ກາຍເປັນກຳລັງສຳຄັນທີ່ມີສ່ວນຮ່ວມຕໍ່ການພັດທະນາປະເທດຊາດ.

ສຳລັບພາກພື້ນອາຟຣິກາຕາເວັນອອກໂດຍລວມ ແລະ ຕັງຊານີໂດຍສະເພາະ ຖືເປັນຕະຫຼາດທີ່ມີທ່າແຮງສູງ ແລະ ເປັນມິດສະຫາຍດັ້ງເດີມຂອງຫວຽດນາມມາແຕ່ດົນນານ.

ເພື່ອຫັນເປົ້າໝາຍຍຸດທະສາດຂອງພັກໃຫ້ເປັນຈິງ, ສະຖານທູດຫວຽດນາມປະຈຳຕັງຊານີ ກຳລັງສຸມໃສ່ດຳເນີນບັນດາທິດທາງສຳຄັນ ເພື່ອເສີມສ້າງຄວາມໄວ້ເນື້ອເຊື່ອໃຈທາງການເມືອງ ເປັນພື້ນຖານໃຫ້ແກ່ການຮ່ວມມືຮອບດ້ານ ຜ່ານການຊຸກຍູ້ການແລກປ່ຽນຄະນະທຸກລະດັບ ໂດຍສະເພາະການສ້າງບາດກ້າວໃໝ່ໃນການພົວພັນຂັ້ນສູງ.

ປັດຈຸບັນ ສະຖານທູດກຳລັງປະສານງານຢ່າງໃກ້ຊິດກັບອົງການທີ່ກ່ຽວຂ້ອງຂອງທັງສອງປະເທດ ເພື່ອຊຸກຍູ້ການຢ້ຽມຢາມຫວຽດນາມຢ່າງເປັນທາງການຂອງປະທານາທິບໍດີ Samia Suluhu Hassan ຕາມຄຳເຊີນຂອງເລຂາທິການໃຫຍ່ພັກ ແລະ ປະທານປະເທດ ໂຕເລິມ ໃນໄລຍະເວລາຈະມາເຖິງ.

ປະທານາທິບໍດີ Samia Suluhu Hassan ມີຄວາມນັບຖື ແລະ ຊື່ນຊົມເປັນພິເສດຕໍ່ປະຫວັດການຕໍ່ສູ້ອັນກ້າຫານ ແລະ ຜົນສຳເລັດໃນການພັດທະນາເສດຖະກິດ-ສັງຄົມຂອງຫວຽດນາມ. ທ່ານນາງໄດ້ສະແດງຄວາມປາຖະໜາມາເປັນເວລາດົນນານທີ່ຈະມາຢ້ຽມຢາມດິນແດນຮູບຕົວ S ເພື່ອເຫັນດ້ວຍຕາຕົນເອງການພັດທະນາຂອງຫວຽດນາມ ແລະ ສຶກສາຮຽນຮູ້ຮູບແບບການພັດທະນາຂອງຫວຽດນາມ.

ສະຖານທູດກຳລັງພະຍາຍາມຢ່າງສຸດຄວາມສາມາດ ເພື່ອໃຫ້ການຢ້ຽມຢາມຄັ້ງປະຫວັດສາດນີ້ເກີດຂຶ້ນໂດຍໄວ ແລະ ສ້າງແຮງຜັກດັນໃໝ່ໃຫ້ແກ່ການພົວພັນສອງຝ່າຍ.

ຄຽງຄູ່ກັນນັ້ນ, ສະຖານທູດຍັງໃຊ້ປະໂຫຍດສູງສຸດຈາກບັນດາກົນໄກຮ່ວມມືສອງຝ່າຍ ເພື່ອກະກຽມສຳລັບກອງປະຊຸມຄະນະກຳມະການຮ່ວມລັດຖະບານ ຄັ້ງທີ 2, ເສີມສ້າງຮາກຖານມິດຕະພາບດັ້ງເດີມ ແລະ ສ້າງຂອບກົດໝາຍທີ່ເອື້ອອຳນວຍໃຫ້ແກ່ການຮ່ວມມືດ້ານເສດຖະກິດ.

ນອກຈາກນັ້ນ ສະຖານທູດຍັງມີບົດບາດສຳຄັນໃນວຽກງານການທູດເສດຖະກິດ ໂດຍສະໜັບສະໜູນ ແລະ ຕິດຕາມບໍລິສັດຮ່ວມທຶນດ້ານໂທລະຄົມ Halotel (Viettel) ຢ່າງໃກ້ຊິດ, ພ້ອມທັງເຊື່ອມໂຍງໃຫ້ Halotel ມີຄວາມໃກ້ຊິດກັບບັນດາກະຊວງ ແລະ ອົງການຂອງລັດຖະບານຕັງຊານີຫຼາຍຂຶ້ນ. Halotel ຖືເປັນວິສາຫະກິດສັນຍາລັກ ແລະ ເປັນຜູ້ນຳໜ້າຂອງວິສາຫະກິດຫວຽດນາມໃນອາຟຣິກາ.

ມາຮອດປັດຈຸບັນ Halotel ມີຜູ້ໃຊ້ບໍລິການ 16,5 ລ້ານເລກໝາຍ, ລົງທຶນສະສົມຫຼາຍກວ່າ 1 ຕື້ໂດລາສະຫະລັດໃນໂຄງສ້າງພື້ນຖານ ແລະ ໄດ້ນຳໃຊ້ເຄືອຂ່າຍ 5G ຄອບຄຸມທັງໝົດ 26 ເຂດຂອງຕັງຊານີ. ນີ້ເປັນຫຼັກຖານອັນຊັດເຈນທີ່ສະທ້ອນເຖິງຊື່ສຽງ, ຄວາມສາມາດດ້ານເຕັກໂນໂລຊີ ແລະ ຄວາມຮັບຜິດຊອບຕໍ່ສັງຄົມຂອງວິສາຫະກິດຫວຽດນາມໃນທະວີບອາຟຣິກາ.

ທ່ານນາງ ຫວູແທັງຮວຽນ, ເອກອັກຄະລາຊະທູດຫວຽດນາມ ເຂົ້າພົບທ່ານນາງ Samia Suluhu Hassan ປະທານປະເທດຕັງຊານີ.

ມູນຄ່າການນຳເຂົ້າ-ສົ່ງອອກລະຫວ່າງສອງປະເທດໃນໄລຍະຜ່ານມາ ສືບຕໍ່ເຕີບໂຕຢ່າງຕໍ່ເນື່ອງ ໂດຍອັດຕາເຕີບໂຕສະເລ່ຍປະມານ 25-38% ຕະຫຼອດ 5 ປີຜ່ານມາ ເຖິງວ່າເສດຖະກິດໂລກຈະຜັນຜວນກໍຕາມ. ສິ່ງທີ່ໜ້າຍິນດີບໍ່ແມ່ນພຽງການເຕີບໂຕຂອງຕົວເລກ ແຕ່ແມ່ນການເກື້ອກູນເຊິ່ງກັນ ແລະ ກັນ ຂອງສອງລະບົບເສດຖະກິດ.

ປັດຈຸບັນ ຕັງຊານີ ໄດ້ກາຍເປັນໜຶ່ງໃນປະເທດຜູ້ສະໜອງເມັດໝາກມ່ວງຫິມະພານດິບລາຍໃຫຍ່ໃຫ້ແກ່ໂຮງງານແປຮູບຂອງຫວຽດນາມ. ໃນທາງກົງກັນຂ້າມ, ຕະຫຼາດອາຟຣິກາຕາເວັນອອກ ກໍກຳລັງນິຍົມບັນດາຜະລິດຕະພັນເຕັກໂນໂລຊີຊັ້ນສູງ, ຊິ້ນສ່ວນອິເລັກໂຕຣນິກ ແລະ ສິນຄ້າບໍລິໂພກຄຸນນະພາບສູງທີ່ຜະລິດໂດຍຫວຽດນາມ. ທ່າແຮງການຮ່ວມມືນີ້ ຈະຍິ່ງຂະຫຍາຍຕົວຫຼັງຈາກການຢ້ຽມຢາມຫວຽດນາມຢ່າງເປັນທາງການຂອງປະທານາທິບໍດີ Samia Suluhu Hassan ໃນໄລຍະຈະມາເຖິງ.

ດ້ວຍລັກສະນະ ແລະ ທ່າແຮງຂອງພື້ນທີ່ປະຈຳການ, ສະຖານທູດກຳລັງພະຍາຍາມຊຸກຍູ້ຮູບແບບການຮ່ວມມືດ້ານກະສິກຳແບບໃຕ້-ໃຕ້ (South-South Cooperation). ຕັງຊານີ ມີທີ່ດິນອຸດົມສົມບູນກວ້າງໃຫຍ່ ແຕ່ຍັງຂາດເຕັກໂນໂລຊີ, ໃນຂະນະທີ່ຫວຽດນາມ ມີປະສົບການ ແລະ ເຕັກນິກການກະສິກຳຊັ້ນນຳ. ສະຖານທູດຈະສືບຕໍ່ຊຸກຍູ້ໂຄງການຮ່ວມມືສາມຝ່າຍ, ການຖ່າຍທອດເຕັກໂນໂລຊີການປູກຝັງ ແລະ ການລ້ຽງສັດນ້ຳ ເພື່ອຊ່ວຍໃຫ້ຕັງຊານີຮັບປະກັນຄວາມໝັ້ນຄົງດ້ານອາຫານ ພ້ອມທັງເປີດກວ້າງໂອກາດໃໝ່ໃຫ້ແກ່ຊ່ຽວຊານ ແລະ ວິສາຫະກິດກະສິກຳຂອງຫວຽດນາມ.

ເຖິງວ່າຈະຢູ່ຫ່າງໄກທາງພູມສາດ ແລະ ປະເຊີນກັບຫຼາຍຄວາມຫຍຸ້ງຍາກສະເພາະຂອງພື້ນທີ່, ແຕ່ຄະນະພະນັກງານ ແລະ ລູກຈ້າງຂອງສະຖານທູດຫວຽດນາມປະຈຳຕັງຊານີ ຍັງຄົງຮັກສາຈິດໃຈແຫ່ງຄວາມລິເລີ່ມ ແລະ ຝ່າຝືນອຸປະສັກຢ່າງບໍ່ຫຍໍ້ທໍ້. ຂ້າພະເຈົ້າມີຄວາມມຸ່ງໝັ້ນທີ່ຈະປະຕິບັດໜ້າທີ່ໃຫ້ສຳເລັດຢ່າງດີເລີດ, ນຳພາການພົວພັນຫວຽດນາມ-ຕັງຊານີ ແລະ ກັບພາກພື້ນອາຟຣິກາຕາເວັນອອກ ໃຫ້ກ້າວໄປສູ່ຄວາມເລິກເຊິ່ງ, ມີເນື້ອໃນ ແລະ ມີປະສິດທິຜົນ ເພື່ອປະກອບສ່ວນເຂົ້າໃນການພັດທະນາປະເທດໃນຍຸກໃໝ່.

ການທູດເສດຖະກິດບໍ່ສາມາດເດີນຕາມແນວທາງເກົ່າ

ທ່ານເອກອັກຄະລາຊະທູດເຫັນວ່າ ໃນສະພາບການແຂ່ງຂັນທາງພູມລັດສາດການເມືອງ ແລະ ຄວາມຜັນຜວນຂອງເສດຖະກິດໂລກທີ່ນັບມື້ນັບສັບສົນ, ບັນດາອົງການຜູ້ແທນຄວນປັບປຸງຮູບແບບການດຳເນີນງານແນວໃດ ເພື່ອຍົກສູງປະສິດທິຜົນຂອງການທູດເສດຖະກິດ, ຊອກຫາຄູ່ຮ່ວມມືໃໝ່ ແລະ ຂະຫຍາຍພື້ນທີ່ການຮ່ວມມືໃຫ້ແກ່ວິສາຫະກິດຫວຽດນາມ?

ສະພາບການໂລກໃນປັດຈຸບັນ ໄດ້ກໍ່ໃຫ້ເກີດສິ່ງທ້າທາຍໃໝ່ທີ່ບໍ່ເຄີຍມີມາກ່ອນ. ການແຂ່ງຂັນທາງພູມລັດສາດການເມືອງທີ່ຮຸນແຮງ ໄດ້ນຳໄປສູ່ການເຄື່ອນຍ້າຍ ແລະ ການສະດຸດຂອງຕ່ອງໂສ້ການສະໜອງທົ່ວໂລກ, ພ້ອມກັບການຂະຫຍາຍຕົວຂອງລັດທິການປົກປ້ອງທາງການຄ້າ ແລະ ມາດຕະການກີດຂວາງທາງດ້ານເຕັກນິກ.

ທ່າມກາງສະພາບການອັນສັບສົນເຫຼົ່ານັ້ນ, ການທູດເສດຖະກິດບໍ່ສາມາດດຳເນີນຕາມຮູບແບບເກົ່າໄດ້ອີກ. ບັນດາອົງການຜູ້ແທນຂອງຫວຽດນາມປະຈຳຕ່າງປະເທດ ຈຳເປັນຕ້ອງປ່ຽນແປງແນວຄິດ ແລະ ວິທີການເຮັດວຽກຂອງຕົນ ຈາກການ “ສະໜັບສະໜູນ ແລະ ເຊື່ອມໂຍງແບບຕັ້ງຮັບ” ມາສູ່ການ “ລິເລີ່ມສ້າງສັນ ແລະ ຮ່ວມເດີນຄຽງຂ້າງ” ວິສາຫະກິດ.

ສຳລັບຕັງຊານີ ແລະ ພາກພື້ນອາຟຣິກາຕາເວັນອອກ, ສະຖານທູດໄດ້ ແລະ ກຳລັງປັບປຸງວິທີການດຳເນີນງານໃນ 4 ດ້ານຫຼັກ.

ປະການທຳອິດ ແມ່ນການປ່ຽນແປງແນວຄິດຈາກ “ການທູດຕາມພື້ນທີ່” ມາສູ່ “ການທູດເຄືອຂ່າຍລະຫວ່າງພາກພື້ນ”. ໃນຄວາມເປັນຈິງ ຄວາມຜັນຜວນທາງເສດຖະກິດໃນປັດຈຸບັນ ບໍ່ໄດ້ຈຳກັດຢູ່ພາຍໃນຂອບເຂດຂອງປະເທດໃດປະເທດໜຶ່ງ. ອາຟຣິກາຕາເວັນອອກເປັນກຸ່ມເສດຖະກິດທີ່ມີການເຊື່ອມໂຍງຢ່າງເລິກເຊິ່ງ (EAC) ແລະ ກຳລັງບູລະນາການເຂົ້າສູ່ຕະຫຼາດການຄ້າເສລີທົ່ວທະວີບອາຟຣິກາ (AfCFTA).

ທ່ານນາງ ຫວູແທັງຮວຽນ, ເອກອັກຄະລາຊະທູດຫວຽດນາມ ພົບປະ ແລະ ສົນທະນາຢ່າງເປັນກັນເອງກັບທ່ານ Khamis Mussa Omar ລັດຖະມົນຕີການເງິນຂອງຕັງຊານີ ໃນງານມະຫະກຳກິລາປະເພນີຂອງລັດຖະສະພາຕັງຊານີ.

ສະຖານທູດບໍ່ໄດ້ເບິ່ງຕັງຊານີເປັນພຽງຕະຫຼາດແຫ່ງໜຶ່ງ, ແຕ່ໄດ້ກຳນົດບົດບາດຂອງປະເທດນີ້ເປັນ “ປະຕູສູ່ຕະຫຼາດ ແລະ ຖານສົ່ງເສີມ” ໃຫ້ວິສາຫະກິດຫວຽດນາມເຂົ້າເຖິງຕະຫຼາດອາຟຣິກາຕາເວັນອອກ ທີ່ມີປະຊາກອນຫຼາຍກວ່າ 300 ລ້ານຄົນ. ຂ້າພະເຈົ້າໄດ້ລິເລີ່ມສ້າງເຄືອຂ່າຍຂໍ້ມູນ, ເຊື່ອມຕໍ່ກັບບັນດາອົງການຄຸ້ມຄອງການຄ້າລະຫວ່າງພາກພື້ນ ແລະ ສະມາຄົມວິສາຫະກິດອາຟຣິກາຕາເວັນອອກ ເພື່ອກຳແນ່ນແນວໂນ້ມນະໂຍບາຍ, ຈາກນັ້ນ ໃຫ້ຄຳເຕືອນລ່ວງໜ້າ ແລະ ໃຫ້ຄຳປຶກສາກ່ຽວກັບແຜນການເຂົ້າສູ່ຕະຫຼາດຢ່າງຮອບດ້ານແກ່ວິສາຫະກິດພາຍໃນປະເທດ.

ປະການທີສອງ, ປ່ຽນຮູບແບບການເຂົ້າຫາໄປສູ່ການລິເລີ່ມ “ສະແຫວງຫາ” ຄູ່ຮ່ວມມື ແລະ ໂອກາດ ແທນທີ່ຈະລໍຖ້າວິສາຫະກິດພາຍໃນປະເທດສະເໜີຄວາມຕ້ອງການ ຫຼື ລໍຖ້າຄູ່ຮ່ວມມືໃນທ້ອງຖິ່ນເຂົ້າມາຫາ. ສະຖານທູດໄດ້ລິເລີ່ມຊອກຫາຄູ່ຮ່ວມມື, ສ້າງສາຍສຳພັນ ແລະ ເຂົ້າເຮັດວຽກໂດຍກົງກັບບັນດາກະຊວງຂະແໜງການເສດຖະກິດ, ອົງການທ້ອງຖິ່ນ, ສະພາການຄ້າ ແລະ ອຸດສາຫະກຳຂອງຕັງຊານີ ເພື່ອກວດກາບັນຊີໂຄງການບູລິມະສິດທີ່ຕັງຊານີຕ້ອງການດຶງດູດການລົງທຶນ ເຊັ່ນ: ການພັດທະນາໂຄງລ່າງ, ການແປຮູບຜະລິດຕະພັນກະສິກຳ, ສາທາລະນະສຸກ ແລະ ການຫັນເປັນດິຈິຕອນ.

ຫຼັງຈາກກັ່ນຕອງຄູ່ຮ່ວມມືທີ່ມີຄວາມໜ້າເຊື່ອຖື ແລະ ໂອກາດທີ່ມີຄວາມເປັນໄປໄດ້ແລ້ວ, ສະຖານທູດໄດ້ລິເລີ່ມ “ຈັດຊຸດ” ຂໍ້ມູນ ແລະ ເຊື່ອມຕໍ່ໂດຍກົງກັບສະມາຄົມຂະແໜງສິນຄ້າ ແລະ ວິສາຫະກິດຫວຽດນາມທີ່ມີຄວາມສາມາດເໝາະສົມ ເພື່ອສະເໜີແນວຄິດ, ຊອກຫາວິທີເປີດກວ້າງກະແສການລົງທຶນ ແລະ ການຄ້າ.

ປະການທີສາມ, ປ່ຽນແປງຮູບແບບການສະໜັບສະໜູນ ໃຫ້ກາຍເປັນຈຸດອີງດ້ານກົດໝາຍ ແລະ ກົນໄກແກ້ໄຂຄວາມສ່ຽງຢູ່ກັບທີ່. ຕະຫຼາດອາຟຣິກາໂດຍລວມ ແລະ ອາຟຣິກາຕາເວັນອອກໂດຍສະເພາະ ມີທ່າແຮງອຸດົມສົມບູນ ແຕ່ກໍແຝງໄວ້ດ້ວຍຄວາມສ່ຽງຫຼາຍດ້ານ ເຊັ່ນ: ກົດໝາຍ, ຂັ້ນຕອນບໍລິຫານທີ່ສັບສົນ, ຄວາມຂັດແຍ່ງທາງຊົນເຜົ່າ ຫຼື ຄວາມສ່ຽງດ້ານການຊຳລະເງິນສາກົນ.

ສະຖານທູດໄດ້ປ່ຽນແປງດ້ວຍການຍົກສູງຄວາມສາມາດໃນການປະເມີນຄູ່ຮ່ວມມືຢູ່ກັບທີ່, ພ້ອມເປັນຊ່ອງທາງກວດກາ, ຢັ້ງຢືນສະຖານະທາງກົດໝາຍ ແລະ ຊື່ສຽງຄວາມໜ້າເຊື່ອຖືຂອງວິສາຫະກິດທ້ອງຖິ່ນ ກ່ອນທີ່ວິສາຫະກິດຫວຽດນາມຈະລົງນາມໃນສັນຍາການຄ້າ. ພ້ອມກັນນັ້ນ, ສະຖານທູດຍັງເຮັດໜ້າທີ່ເປັນຂົວເຊື່ອມໃນການສະໜັບສະໜູນແກ້ໄຂຂໍ້ຂັດແຍ່ງທາງການຄ້າທີ່ເກີດຂຶ້ນ, ປົກປ້ອງສິດ ແລະ ຜົນປະໂຫຍດອັນຊອບທຳຂອງວິສາຫະກິດຫວຽດນາມຕັ້ງແຕ່ຕົ້ນ, ຫຼີກລ່ຽງຄວາມເສຍຫາຍທາງເສດຖະກິດທີ່ບໍ່ຄວນເກີດຂຶ້ນ.

ປະການທີສີ່, ປ່ຽນແປງເຄື່ອງມືໂດຍການນຳໃຊ້ການຫັນເປັນດິຈິຕອນໃນວຽກງານການທູດເສດຖະກິດ. ໂດຍນຳໃຊ້ສູງສຸດຈຸດແຂງດ້ານໂຄງລ່າງໂທລະຄົມ ແລະ ເຕັກໂນໂລຊີດິຈິຕອນໃນພື້ນທີ່ຂອງເຄືອຂ່າຍ 5G Halotel, ສະຖານທູດຈະສືບຕໍ່ປ່ຽນແປງຮູບແບບການສົ່ງເສີມການຄ້າ ຈາກການຈັດແບບເຊິ່ງໜ້າ ໄປສູ່ຮູບແບບປະສົມປະສານລະຫວ່າງເຊິ່ງໜ້າ ແລະ ອອນລາຍ (hybrid), ພ້ອມທັງປະສານງານຄົ້ນຄວ້າ ແລະ ສ້າງຖານຂໍ້ມູນດິຈິຕອນກ່ຽວກັບຕະຫຼາດອາຟຣິກາຕາເວັນອອກ ເພື່ອໃຫ້ວິສາຫະກິດພາຍໃນປະເທດສາມາດເຂົ້າເຖິງ ແລະ ຄົ້ນຄວ້າຈາກທາງໄກ, ຊ່ວຍຫຍໍ້ໄລຍະຫ່າງທາງພູມສາດລະຫວ່າງຫວຽດນາມ ແລະ ອາຟຣິກາຕາເວັນອອກ, ພ້ອມທັງປະຢັດເວລາ ແລະ ຄ່າໃຊ້ຈ່າຍໃນການສົ່ງເສີມການຄ້າໃຫ້ແກ່ວິສາຫະກິດ.

ໃນແງ່ມຸມທີ່ເປັນບວກ, ການແຂ່ງຂັນທາງພູມລັດສາດການເມືອງອາດຈະສ້າງອຸປະສັກ, ແຕ່ຄວາມຜັນຜວນກໍສາມາດສ້າງໂອກາດ ແລະ ພື້ນທີ່ພັດທະນາໃໝ່ໄດ້ເຊັ່ນກັນ. ດ້ວຍຄວາມພະຍາຍາມ ແລະ ຄວາມມຸ່ງໝັ້ນໃນການປ່ຽນແປງຮູບແບບການດຳເນີນງານ, ຄະນະພະນັກງານສະຖານທູດຫວຽດນາມປະຈຳຕັງຊານີ ໃຫ້ຄຳໝັ້ນວ່າ ຈະເປັນມິດຮ່ວມທາງທີ່ໝັ້ນຄົງ, ເປັນດັ່ງປະພາຄານນຳທາງ ແລະ ຊ່ວຍເຫຼືອວິສາຫະກິດຫວຽດນາມໃຫ້ມີຄວາມໝັ້ນໃຈຫຼາຍຂຶ້ນໃນການບຸກເບີກ ແລະ ພິຊິດຕະຫຼາດອາຟຣິກາຕາເວັນອອກທີ່ມີທ່າແຮງອຸດົມສົມບູນ, ປະກອບສ່ວນຢ່າງແທ້ຈິງເຂົ້າໃນການເສີມສ້າງກຳລັງເສດຖະກິດຂອງປະເທດໃນຍຸກໃໝ່.

ນຳການພົວພັນຫວຽດນາມ-ຕັງຊານີໃຫ້ສົມຄູ່ກັບລະດັບ ແລະ ທ່າແຮງ

ເມື່ອຫວນເບິ່ງໄລຍະທາງຕໍ່ໜ້າ, ທ່ານເອກອັກຄະລາຊະທູດຄາດຫວັງຫຍັງຕໍ່ການພັດທະນາການພົວພັນຫວຽດນາມ-ຕັງຊານີ? ຕາມທັດສະນະຂອງທ່ານ, ຮ່ອງຮອຍສຳຄັນໃດແດ່ທີ່ສະຖານທູດຈະມຸ່ງໄປສູ່ ເພື່ອປະກອບສ່ວນຍົກສູງຖານະ, ຊື່ສຽງ ແລະ ຜົນປະໂຫຍດແຫ່ງຊາດໃນຍຸກພັດທະນາໃໝ່?

ເມື່ອເບິ່ງໄປຫາໄລຍະທາງຂ້າງໜ້າ, ຂ້າພະເຈົ້າມີຄວາມເຊື່ອໝັ້ນ ແລະ ຄວາມຄາດຫວັງຢ່າງສູງ ຕໍ່ການພັດທະນາແບບກ້າວກະໂດດຂອງການພົວພັນຫວຽດນາມ-ຕັງຊານີ. ສອງປະເທດມີພື້ນຖານອັນໝັ້ນຄົງຮ່ວມກັນ ຄື ມິດຕະພາບດັ້ງເດີມ, ຄວາມໄວ້ເນື້ອເຊື່ອໃຈທາງການເມືອງໃນລະດັບສູງ ແລະ ໂດຍສະເພາະ ສອງລະບົບເສດຖະກິດມີລັກສະນະເກື້ອກູນກັນຢ່າງຫຼວງຫຼາຍ.

ໃນເວລາທີ່ຫວຽດນາມກ້າວເຂົ້າສູ່ຍຸກໃໝ່ - ຍຸກແຫ່ງການກ້າວຂຶ້ນຂອງຊາດ ແລະ ຕັງຊານີກຳລັງກ້າວຂຶ້ນຢ່າງແຂງແຮງໃນຖານະສູນກາງເສດຖະກິດຂອງອາຟຣິກາຕາເວັນອອກ, ການເຊື່ອມໂຍງນີ້ບໍ່ພຽງແຕ່ນຳມາຊຶ່ງຜົນປະໂຫຍດອັນແທ້ຈິງໃຫ້ແກ່ປະຊາຊົນສອງປະເທດ, ແຕ່ຍັງເປີດກວ້າງພື້ນທີ່ພັດທະນາໃໝ່ໃຫ້ແກ່ທັງສອງພາກພື້ນ ຄື ອາຊຽນ ແລະ ອາຟຣິກາຕາເວັນອອກ.

ເພື່ອຫັນຄວາມຄາດຫວັງດັ່ງກ່າວໃຫ້ເປັນຈິງ, ພ້ອມທັງປະກອບສ່ວນຢ່າງແທ້ຈິງເຂົ້າໃນເປົ້າໝາຍຍົກສູງຖານະ, ຊື່ສຽງ ແລະ ຜົນປະໂຫຍດແຫ່ງຊາດ, ສະຖານທູດຫວຽດນາມປະຈຳຕັງຊານີ ມຸ່ງໄປສູ່ການສ້າງ 3 ຮ່ອງຮອຍສຳຄັນດັ່ງນີ້:

ຮ່ອງຮອຍທຳອິດ, ສ້າງບາດກ້າວກະໂດດທາງປະຫວັດສາດໃນການພົວພັນຂັ້ນສູງ ແລະ ຮັດແໜ້ນມິດຕະພາບ. ສິ່ງທີ່ສະຖານທູດກຳລັງພະຍາຍາມຊຸກຍູ້ໃນວາລະການດຳລົງຕຳແໜ່ງນີ້ ແມ່ນປະສານງານຈັດຕັ້ງການຢ້ຽມຢາມຫວຽດນາມຢ່າງເປັນທາງການຂອງປະທານາທິບໍດີຕັງຊານີ Samia Suluhu Hassan ຕາມຄຳເຊີນຂອງເລຂາທິການໃຫຍ່ພັກ, ປະທານປະເທດ ໂຕເລິມ ໃຫ້ປະສົບຜົນສຳເລັດ. ນີ້ຈະເປັນການຢ້ຽມຢາມຂັ້ນປະມຸກລັດຄັ້ງທີສອງລະຫວ່າງສອງປະເທດ ຫຼັງຈາກຜ່ານມາຫຼາຍກວ່າໜຶ່ງທົດສະວັດ ນັບແຕ່ການຢ້ຽມຢາມຂອງອະດີດປະທານາທິບໍດີ Jakaya Mrisho Kikwete, ປະທານາທິບໍດີຄົນທີ 4 ຂອງຕັງຊານີ ໃນເດືອນຕຸລາ 2014.

ນີ້ບໍ່ແມ່ນພຽງການຢ້ຽມຢາມທາງການທູດທຳມະດາ, ແຕ່ເປັນການຢ້ຽມຢາມທີ່ມີຄວາມໝາຍເຊິ່ງສັນຍາລັກຢ່າງເລິກເຊິ່ງຕໍ່ມິດຕະພາບ ແລະ ນ້ຳໃຈສະຫາຍອັນໜັກແໜ້ນລະຫວ່າງສອງຊາດ. ການຢ້ຽມຢາມນີ້ຈະຊ່ວຍຫັນຄວາມປາຖະໜາ ແລະ ຄວາມຮັກແພງ, ຄວາມຊື່ນຊົມເປັນພິເສດທີ່ປະທານາທິບໍດີຕັງຊານີມີຕໍ່ຫວຽດນາມມາເປັນເວລາດົນນານ ໃຫ້ກາຍເປັນຈິງ.

ໂດຍສະເພາະ, ໃນສະພາບການທີ່ປະທານາທິບໍດີ Samia Suluhu Hassan ຫາກໍໄດ້ຮັບເລືອກຕັ້ງຄືນໃໝ່ຢ່າງໜັກແໜ້ນສຳລັບວາລະໃໝ່ທີ່ມີຄວາມໝາຍທາງຍຸດທະສາດ, ການຢ້ຽມຢາມຄັ້ງນີ້ຖືກຄາດຫວັງວ່າຈະສ້າງຂອບການພົວພັນໃໝ່, ເປີດທາງໃຫ້ກະແສຄວາມຮ່ວມມືຮອບດ້ານ, ກວ້າງຂວາງ, ເລິກເຊິ່ງ ແລະ ມີເນື້ອໃນຈິງ ໃນທຸກຂົງເຂດຕະຫຼອດໄລຍະການພັດທະນາຕໍ່ໄປຂອງສອງປະເທດ.

ທ່ານນາງ ຫວູແທັງຮວຽນ, ເອກອັກຄະລາຊະທູດຫວຽດນາມ; ທ່ານນາງ ເຈິ່ນທິ ທຸຍຢຸງ, ຮອງຜູ້ອຳນວຍການໃຫຍ່ ແລະ ຜູ້ຕາງໜ້າຄະນະນຳຂອງ Halotel, ພ້ອມດ້ວຍຄະນະພະນັກງານ ແລະ ລູກຈ້າງຂອງສະຖານທູດຫວຽດນາມປະຈຳຕັງຊານີ ໃນການເຮັດວຽກກັບຄະນະການເມືອງ ແລະ ພົວພັນສາກົນ ຂອງພັກປະຕິວັດຕັງຊານີ (CCM).

ຮ່ອງຮອຍທີສອງ, ຢືນຢັນຍີ່ຫໍ້, ຖານະດ້ານເຕັກໂນໂລຊີ ແລະ ຕ່ອງໂສ້ມູນຄ່າຂອງຫວຽດນາມ. ສະຖານທູດມີຄວາມມຸ່ງໝັ້ນ ແລະ ພະຍາຍາມຮ່ວມເດີນຄຽງຂ້າງ ເພື່ອນຳໃຫ້ບໍລິສັດຮ່ວມທຶນໂທລະຄົມ Halotel ຈາກສັນຍາລັກດ້ານເຕັກໂນໂລຊີ ຄ່ອຍໆກາຍເປັນແກນກາງນຳພາລະບົບນິເວດເສດຖະກິດດິຈິຕອນ ແລະ ຂະຫຍາຍອິດທິພົນໄປຍັງບັນດາປະເທດໃກ້ຄຽງໃນພາກພື້ນອາຟຣິກາຕາເວັນອອກ.

ສະຖານທູດຍັງມຸ່ງໄປສູ່ເປົ້າໝາຍປ່ຽນແປງໂຄງສ້າງການຄ້າສອງຝ່າຍຢ່າງຮາກຖານ ຈາກການຊື້ຂາຍວັດຖຸດິບ ໄປສູ່ການຮ່ວມມືແປຮູບເຊິ່ງເລິກຢູ່ກັບທີ່, ພ້ອມທັງຊຸກຍູ້ການສ້າງສູນໂລຈິສຕິກຂອງວິສາຫະກິດຫວຽດນາມຢູ່ທ່າເຮືອປະຕູເຂົ້າ Dar es Salaam. ການສ້າງຕ່ອງໂສ້ມູນຄ່າທີ່ໝັ້ນຄົງເຫຼົ່ານີ້ ຈະຊ່ວຍຢືນຢັນຄວາມສາມາດດ້ານການລົງທຶນ ແລະ ຄຸນຄ່າດ້ານການບໍລິຫານຂອງຫວຽດນາມ, ພ້ອມທັງນຳພາໃຫ້ຫວຽດນາມກາຍເປັນຄູ່ຮ່ວມມືເສດຖະກິດຍຸດທະສາດທີ່ສຳຄັນຂອງຕັງຊານີ.

ຮ່ອງຮອຍທີສາມ, ເຜີຍແຜ່ພາບພົດຢ່າງແຂງແຮງ ແລະ “ເສີມສ້າງພະລັງອ່ອນ” ໃຫ້ແກ່ຊື່ສຽງຂອງຊາດ ໃນການບັນລຸເປົ້າໝາຍວຽກງານການຕ່າງປະເທດປະຊາຊົນ. ສະຖານທູດຈະສ້າງຮ່ອງຮອຍອັນເລິກເຊິ່ງ ຜ່ານການດຳເນີນບັນດາໂຄງການຮ່ວມມືກະສິກຳສາມຝ່າຍ ຕາມຮູບແບບຮ່ວມມືໃຕ້-ໃຕ້ ເພື່ອຊ່ວຍຕັງຊານີຮັບປະກັນຄວາມໝັ້ນຄົງດ້ານອາຫານ. ພາບຂອງບັນດາຊ່ຽວຊານຫວຽດນາມທີ່ເປັນມິດ, ໃກ້ຊິດ ແລະ ຊ່ວຍເຫຼືອປະຊາຊົນຂອງບັນດາປະເທດ ໄດ້ເປັນຫຼັກຖານອັນມີຊີວິດຊີວາທີ່ສຸດ ສຳລັບພາບພົດຂອງປະເທດທີ່ມີຄວາມຮັບຜິດຊອບ, ຈິງໃຈ ແລະ ຮັກສັນຕິພາບ.

ສຳລັບການທູດວັດທະນະທຳ-ການສຶກສາ, ຈະເປັນການປະສານກັນຢ່າງກົມກຽວລະຫວ່າງການປ່ຽນໃໝ່ຮູບແບບການທູດວັດທະນະທຳ ຜ່ານໂຄງລ່າງດິຈິຕອນ ກັບການຊຸກຍູ້ຮ່ວມມືດ້ານການສຶກສາ ແລະ ການສ້າງຊັບພະຍາກອນມະນຸດ. ສະຖານທູດມຸ່ງໝາຍເຊື່ອມຕໍ່ບັນດາມະຫາວິທະຍາໄລ ແລະ ສະຖາບັນຄົ້ນຄວ້າຂອງສອງປະເທດ, ເພີ່ມທະວີການແລກປ່ຽນທຶນການສຶກສາ, ຝຶກອົບຮົມນັກສຶກສາ ແລະ ນັກຄົ້ນຄວ້າຂັ້ນສູງຈາກຕັງຊານີໃຫ້ໄປສຶກສາຢູ່ຫວຽດນາມ ໃນບັນດາຂະແໜງການທີ່ຫວຽດນາມມີຈຸດແຂງ ເຊັ່ນ: ກະສິກຳເຕັກໂນໂລຊີສູງ, ເຕັກໂນໂລຊີຂໍ້ມູນຂ່າວສານ ແລະ ສາທາລະນະສຸກ.

ການຖ່າຍທອດອົງຄວາມຮູ້ ແລະ ການລົງທຶນໃສ່ຄົນໃນຮູບແບບນີ້ ຈະນຳອັດຕະລັກ ແລະ ຄວາມຮັກແພງຂອງຫວຽດນາມ ໄປສູ່ຄົນຮຸ່ນໜຸ່ມຂອງທ້ອງຖິ່ນ. ຈາກນັ້ນ ຈະສ້າງເປັນເຄືອຂ່າຍຄົນຮຸ່ນໃໝ່ທີ່ສືບຕໍ່ມີຄວາມຮັກແພງ, ເຂົ້າໃຈ ແລະ ຜູກພັນຢ່າງຍາວນານກັບຫວຽດນາມ ຢູ່ອາຟຣິກາຕາເວັນອອກ ແລະ ທະວີບອາຟຣິກາໂດຍລວມ.

ສຸດທ້າຍນີ້, ຂ້າພະເຈົ້າຂໍຢືນຢັນວ່າ ເຖິງແມ່ນພື້ນທີ່ອາຟຣິກາຕາເວັນອອກຈະຢູ່ຫ່າງໄກ ແລະ ຍັງມີຄວາມຫຍຸ້ງຍາກຫຼາຍດ້ານ ທັງເງື່ອນໄຂການດຳລົງຊີວິດ ແລະ ສາທາລະນະສຸກ, ແຕ່ຄະນະພະນັກງານ ແລະ ລູກຈ້າງຂອງສະຖານທູດຫວຽດນາມປະຈຳຕັງຊານີ ຍາມໃດກໍພາກພູມໃຈທີ່ໄດ້ເປັນນັກຮົບຢູ່ແນວໜ້າຂອງວຽກງານການຕ່າງປະເທດ. ຂ້າພະເຈົ້າຂໍອຸທິດທັງໝົດກຳລັງກາຍ, ກຳລັງໃຈ, ສະຕິປັນຍາ ແລະ ຈິດໃຈແຫ່ງຄວາມລິເລີ່ມ ເພື່ອສ້າງຮ່ອງຮອຍອັນໂດດເດັ່ນເຫຼົ່ານີ້.

ສະຖານທູດມີຄວາມປາຖະໜາ ແລະ ຄວາມມຸ່ງໝັ້ນ ທີ່ຈະນຳການພົວພັນສອງຝ່າຍຫວຽດນາມ-ຕັງຊານີ ພ້ອມທັງການຮ່ວມມືທີ່ຫຼາກຫຼາຍ ແລະ ຫຼາຍລະດັບລະຫວ່າງຫວຽດນາມກັບພາກພື້ນອາຟຣິກາຕາເວັນອອກ ໃຫ້ພັດທະນາແຂງແຮງຍິ່ງຂຶ້ນ, ໃຫ້ສົມຄູ່ກັບລະດັບ ແລະ ທ່າແຮງຂອງແຕ່ລະຝ່າຍ, ພ້ອມທັງປະກອບສ່ວນຢ່າງສົມກຽດເຂົ້າໃນໂອກາດໃໝ່ ແລະ ຍຸກແຫ່ງການກ້າວຂຶ້ນຂອງປະເທດ.

ຂໍຂອບໃຈທ່ານ!

ຄວາມພະຍາຍາມຜັກດັນຊຸດເສື້ອຍາວຫວຽດນາມ ໃຫ້ໄດ້ຮັບການຂຶ້ນທະບຽນເປັນມໍລະດົກຂອງ UNESCO ຍສໝ - ທ່ານນາງ ຮອງນາຍົກລັດຖະມົນຕີ ຟ້າມທິແທັງຈ່າ ໄດ້ສະເໜີໃຫ້ສະມາຄົມວັດທະນະທຳຊຸດເສື້ອຍາວຫວຽດນາມ ປະສານງານກັບກະຊວງວັດທະນະທຳ, ກິລາ ແລະ ທ່ອງທ່ຽວ ເລັ່ງສ້າງເອກະສານສະເໜີໃຫ້ UNESCO ຂຶ້ນທະບຽນຊຸດເສື້ອຍາວຫວຽດນາມ ເປັນມໍລະດົກວັດທະນະທຳທີ່ບໍ່ເປັນວັດຖຸຂອງມະນຸດ.

ການນຳພາຂອງພັກ ແລະ ລັດ ຖະຫວາຍທູບທຽນອາໄລຫາທ່ານປະທານ ໂຮ່ຈີມິນ ຍສໝ - ເນື່ອງໃນໂອກາດຄົບຮອບ 79 ປີ ວັນທະຫານຜູ້ບາດເຈັບ-ນັກຮົບຜູ້ເສຍສະລະຊີວິດເພື່ອຊາດ (27/7/1947-27/7/2026), ໃນຕອນເຊົ້າຂອງວັນທີ 26 ກໍລະກົດ, ຄະນະຜູ້ແທນຄະນະກຳມະການບໍລິຫານສູນກາງພັກ, ປະທານປະເທດ, ສະພາແຫ່ງຊາດ ແລະ ລັດຖະບານ ໄດ້ ຖະຫວາຍທູບທຽນ, ລະນຶກຄຸນບັນດານັກຮົບຜູ້ເສຍສະລະຊີວິດເພື່ອຊາດຢູ່ອະນຸສາວະລີລະນຶກບັນດາວີລະຊົນພົນສະຫຼະ ຖະໜົນ ບັກເຊີນ (ນະຄອນຮ່າໂນ້ຍ), ວາງພວງມາລາ ແລະ ເຂົ້າຄາລະວະສຸສານປະທານ ໂຮ່ຈີມິນ.