 |
ຊາວນະຄອນຫຼວງ ຮ່ວມສືບສານປະເພນີວຽນທຽນ ໂອກາດບຸນພະທາດຫຼວງ ຢ່າງຄຶກຄື້ນ
ວຽນທຽນໃນງານບຸນນະມັດສະການພະທາດຫຼວງ ແມ່ນການສືບທອດຮີດຄອງປະເພນີອັນດີງາມຂອງຊາດ ເຊິ່ງໄດ້ປະຕິບັດມາແຕ່ບູຮານນະການ ເຊິ່ງການວຽນທຽນແມ່ນເພື່ອເຄົາລົບບູຊາຕໍ່ພະຣັດຕະນະໄຕ ຄື: ພະພຸດ ພະທຳ ແລະ ພະສົງ ເປັນການສະແດງຄວາມເຄົາລົບບູຊາຕໍ່ອົງພະທາດຫຼວງວຽງຈັນ ທີ່ເປັນມິ່ງຂວັນຂອງຊາດ ເປັນປູຊະນີຍະສະຖານທີ່ສຳຄັນສູງສຸດຂອງປະເທດລາວ.
ນອກນີ້ ພິທີວຽນທຽນ ຍັງມີຄວາມໝາຍສຳຄັນ ເຊິ່ງຕ້ອງວຽນໃຫ້ຄົບ 3 ຮອບ ຄື: ຮອບທີ 1 ເປັນການບູຊາຄຸນພະຣັດຕະນະໄຕ ຄື: ຄຸນພະພຸດ ຄຸນພະທຳ ແລະ ຄຸນພະສົງ ຮອບທີ 2 ເປັນການບູຊາບັນພະບຸລຸດຂອງຊາດ ຜູ້ທີ່ມີຄຸນງາມຄວາມດີຕໍ່ປະເທດຊາດ ຕໍ່ພະພຸດທະສາສະໜາ ຮອບທີ 3 ເປັນການບູຊາບຸນຄຸນຂອງບິດາມານດາ ຫຼື ເປັນການບູຊາໃນສິ່ງສັກສິດໃນຮອບບໍລິເວນສະຖານທີ່ ເມື່ອວຽນຄົບ 3 ຮອບແລ້ວ ເພື່ອເຮັດໃຫ້ພຸດທະສາສະນິກະຊົນທັງຫຼາຍມີຈິດສຳນຶກ ຮູ້ບູຊາບຸນ ບູຊາຄຸນຂອງຄຸນພະຣັດຕະນະໄຕຂອງຄູບາອາຈານ ຄຸນບິດາ ມານດາ ແລະ ຂອງຄຸນບັນພະບຸລຸດ ນອກຈາກເປັນພິທີທາງສາສະໜາແລ້ວ ຍັງເປັນການສະແດງເຖິງພະລັງຄວາມສາມັກຄີ ມັນກາຍເປັນອະລິຍະທຳຂອງຊາດລາວ.
ພິທີວຽນທຽນ ໂອກາດບຸນທາດຫຼວງປີນີ້ ຈັດຂຶ້ນຕອນຄ່ຳວັນທີ 11 ພະຈິກ 2019 ກົງກັບມື້ຂຶ້ນ 15 ຄ່ຳ ເດືອນ 12 ປີກຸນ ພສ 2562 ຢູ່ກົມມະລຽນດ້ານໃນພະທາດຫຼວງວຽງຈັນ ໂດຍມີທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍການນຳນະຄອນຫຼວງ ແລະ ຊາວນະຄອນຫຼວງວຽງຈັນເຂົ້າຮ່ວມຢ່າງ ໜາແໜ້ນ ໃນນີ້ ຂະບວນທຳອິດ ແມ່ນນຳໂດຍພະສົງ ສຳມະເນນ ຕໍ່ມາແມ່ນຂະບວນການນຳຂອງນະຄອນຫຼວງ ແລະ ຊາວນະຄອນຫຼວງວຽງຈັນ ນອກນີ້ ຍັງໄດ້ມີການຈູດພຸ ບັ້ງໄຟ ເພື່ອບູຊາພະທາດຫຼວງ ສູນລວມຈິດໃຈຂອງຄົນລາວທັງຊາດ ອີກດ້ວຍ.
（ແຫຼ່ງຂໍ້ມູນ： vientianemai.net）
