 |
ປີທ່ອງທ່ຽວລາວມີນັກທ່ອງທ່ຽວເຂົ້າຊົມພິພິທະພັນບູຮານ 8 ແສນກວ່າຄົນ
ທ່ານ ພູວຽງ ໂພທິສານ ອຳນວຍການສະຖານຫໍພິພິທະພັນບູຮານສະຖານ ນະຄອນຫຼວງວຽງຈັນ (ນວ) ໃຫ້ສຳພາດເມື່ອບໍ່ດົນຜ່ານມາວ່າ: ພິພິທະພັນບູຮານສະຖານ ປະກອບມີພິພິທະພັນຫໍພະແກ້ວ ວັດສີສະເກດ ແລະ ພິພິທະພັນພະທາດຫຼວງວຽງຈັນ ເປັນສະຖານທີ່ຢູ່ພາຍໃຕ້ການຊີ້ນຳ ແລະ ຄຸ້ມຄອງໂດຍກົງຂອງພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນວ ໃນປີ 2018 ເພື່ອຕ້ອນຮັບປີທ່ອງທ່ຽວລາວທັງເປັນການອຳນວຍຄວາມສະດວກໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມາທ່ຽວຊົມພິພິທະພັນຈຶ່ງໄດ້ປັບປຸງແບບແຜນວິທີເຮັດວຽກ ໂດຍສະເພາະການປ່ຽນແປງເວລາເປີດບໍລິການທ່ອງທ່ຽວຈາກປົກກະຕິພາກເຊົ້າເປີດແຕ່ເວລາ 8-12:00 ໂມງ ພາກບ່າຍເວລາ 13-16:00 ໂມງ ມາເປັນເວລາ 8-17:00 ໂມງຂອງທຸກວັນບໍ່ພັກຕອນທ່ຽງ ເພື່ອເຮັດໃຫ້ການບໍລິການທ່ອງທ່ຽວມີໃບໜ້າໃໝ່ ສະດວກວ່ອງໄວ ແລະ ເປັນລະບຽບຮຽບຮ້ອຍຂຶ້ນຕື່ມ ກໍໄດ້ສົມທົບກັບພະແນກການເງິນ ແລະ ພະແນກສ່ວຍສາອາກອນ ນວ ໃນການນຳໃຊ້ເຄື່ອງມືທັນສະໄໝໃນການຂາຍປີ້ເຂົ້າຊົມ ຄົນລາວລາຄາ 3.000 ກີບ ແລະ ຄົນຕ່າງປະເທດ 10.000 ກີບ ຜ່ານການຈັດຕັ້ງປະຕິບັດສາມາດສະຫຼຸບຈຳນວນນັກທ່ອງທ່ຽວເຂົ້າມາທ່ຽວສະຖານທີ່ດັ່ງກ່າວທັງໝົດ 830.322 ຄົນ ທຽບໃສ່ປີຜ່ານມາເພີ່ມຂຶ້ນ ໃນນັ້ນ ຄົນລາວ 101.675 ຄົນ ແລະ ຄົນຕ່າງປະເທດ 728.647 ຄົນ ອັນໄດ້ເຮັດໃຫ້ການຈັດເກັບລາຍຮັບເຂົ້າງົບປະມານມີຈຳນວນເພີ່ມຂຶ້ນ ນອກນີ້ມີພະນັກງານບໍລິການນຳທ່ຽວປະຈຳພິພິທະພັນຍັງສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງແຂກທາງການຂັ້ນສູງຈາກພາຍໃນ ແລະ ຕ່າງປະເທດ ໂດຍສະເພາະການອະທິບາຍນຳທ່ຽວເປັນພາສາອັງກິດພ້ອມນັ້ນກໍໄດ້ເອົາໃຈໃສ່ອະນາໄມສະຖານທີ່ບູຮານໃຫ້ມີຄວາມສະອາດເປັນຕົ້ນ ແມ່ນຫ້ອງນ້ຳ ໃນນີ້ ພິເສດແມ່ນຫ້ອງນ້ຳສາທາລະນະພິພິທະພັນພະທາດຫຼວງວຽງຈັນໄດ້ຮັບລາງວັນມາດຕະຖານຫ້ອງນ້ຳສະອາດອາຊຽນ ປີ 2019-2021 ທີ່ ສສ ຫວຽດນາມ ໃນເດືອນມັງກອນນີ້ເຊິ່ງເປັນແຫ່ງທຳອິດຢູ່ນະຄອນຫຼວງວຽງຈັນ.
ສຳລັບທິດທາງປີ 2019 ຈະໄດ້ສືບຕໍ່ເປີດບໍລິການທ່ອງທ່ຽວໃຫ້ມີຄວາມສະດວກວ່ອງໄວຕອບສະໜອງໄດ້ກັບຄວາມຕ້ອງການຂອງແຂກທັງພາຍໃນ ແລະ ຕ່າງປະເທດທີ່ມາໃຊ້ບໍລິການ ສືບຕໍ່ປັບປຸງຫ້ອງນ້ຳສາທາລະນະກໍຄືຫ້ອງນ້ຳປະຈຳຫໍພະແກ້ວ ວັດສີສະເກດ ໃຫ້ໄດ້ຫ້ອງນ້ຳສາທາລະນະມາດຕະຖານອາຊຽນພ້ອມທັງເອົາໃຈໃສ່ສຳຫຼວດວັດຖຸພັນຄືວັດຖຸບູຮານທີ່ຢູ່ພິພິທະພັນວັດສີສະເກດເພື່ອໃຫ້ໄດ້ຂໍ້ມູນຊັດເຈນ ແລະ ກຽມແຕ້ມຮູບພາບໃສ່ຂອບເປັນສີນ້ຳມັນ ກ່ຽວກັບປະຫວັດຄວາມເປັນມາຂອງພະທາດຫຼວງວຽງຈັນແຕ່ອະດີດຮອດປັດຈຸບັນເພື່ອວາງສະແດງໄວ້ໃນກົມມະລຽນພະທາດຫຼວງວຽງຈັນ ນອກນັ້ນ ຍັງສືບຕໍ່ເຮັດແທ່ນພະພຸດທະຮູບຕັ້ງໄວ້ ຢູ່ໃນກົມມະລຽນດ້ານໃນພະທາດຫຼວງວຽງຈັນ ແລະ ສ່ວນຫໍຫຼັກເມືອງໂດຍໄດ້ຮັບການມອບໝາຍຈາກກົມມໍລະດົກຈະໄດ້ມີການວາງສະແດງວັດຖຸພັນປັດຈຸບັນໄດ້ນຳມາວາງສະແດງແຕ່ຍັງບໍ່ເປັນລະບຽບຮຽບຮ້ອຍເປັນຕົ້ນການປ້ອນຂໍ້ມູນວັດຖຸພັນໃຫ້ຊັດເຈນເຊິ່ງບັນດາກິດຈະກຳທັງໝົດນີ້ແມ່ນເພື່ອຕ້ອນຮັບໃຫ້ແກ່ປີທ່ອງທ່ຽວ ລາວ-ຈີນ 2019.
（ແຫຼ່ງຂໍ້ມູນ： vientianemai.net）
