 |
ທ່ານສຈ.ປອ. ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ຕ້ອນຮັບຄະນະຜູ້ແທນສະມາພັນນັກຂ່າວອາຊຽນນຳໂດຍທ່ານ ເທບໄຊ ຢ໋ອງ, ປະທານສະມາພັນນັກຂ່າວອາຊຽນ ,
ໃນໂອກາດນີ້, ທ່ານ ສຈ.ປອ. ບໍ່ແສງຄຳ ວົງດາລາ ໄດ້ສະແດງຄວາມຊົມເຊີຍ ແລະ ໃຫ້ການຕ້ອນຮັບອັນອົບອຸ່ນຕໍ່ຄະນະຜູ້ແທນສະມາພັນນັກຂ່າວອາຊຽນທີ່ໄດ້ເດີນທາງມາເຮັດວຽກຢູ່ລາວໃນຄັ້ງນີ້ ເພື່ອສືບຕໍ່ເສີມຂະຫຍາຍການພົວພັນຮ່ວມມືລະຫວ່າງສະມາຄົມນັກຂ່າວປະເທດສະມາຊິກອາຊຽນໃຫ້ແໜ້ນແຟ້ນ ແລະ ມີປະສິດທິຜົນສູງສຸດໃນຕໍ່ໜ້າ.
ພ້ອມດຽວກັນນີ້, ທ່ານລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ຍັງໄດ້ແຈ້ງໃຫ້ຄະນະຜູ້ແທນສະມາພັນນັກຂ່າວອາຊຽນຮັບຊາບກ່ຽວກັບການເຕີບໃຫຍ່ຂະຫຍາຍຕົວຂອງຂະແໜງສື່ມວນຊົນ ກໍ່ຄືສະມາຄົມນັກຂ່າວແຫ່ງປະເທດລາວໃນໄລຍະຜ່ານມາ ລວມເຖິງການພົວພັນຮ່ວມມືລະຫວ່າງສື່ມວນຊົນລາວ ແລະ ສາກົນ ໂດຍສະເພາະ ບັນດາປະເທດສະມາຊິກອາຊຽນ ຊຶ່ງປະກອບສ່ວນສຳຄັນຊຸກຍູ້ຂົງເຂດສື່ມວນຊົນລາວໃຫ້ໄດ້ຮັບການພັດທະນາຢ່າງຕໍ່ເນື່ອງ.
 |
ບັນຍາກາດການຕ້ອນຮັບ.
ທ່ານ ເທບໄຊ ຢ໋ອງ,ປະທານສະມາພັນນັກຂ່າວອາຊຽນ ໄດ້ສະແດງຄວາມຊົມເຊີຍຕໍ່ການເປັນເຈົ້າພາບຈັດກອງປະຊຸມຄະນະບໍລິຫານງານສະມາພັນນັກຂ່າວອາຊຽນຄັ້ງທຳອິດຂອງລາວທີ່ໄດ້ຮັບຜົນສຳເລັດຕາມລະດັບຄາດໝາຍ ແລະ ຢັ້ງຢືນວ່າສະມາພັນນັກຂ່າວອາຊຽນຈະສືບຕໍ່ໃຫ້ການຮ່ວມມື, ສະໜັບ ສະຫນູນ ແລະ ປະສານສົມທົບກັບ ສະມາຄົມນັກຂ່າວແຫ່ງປະເທດລາວກໍ່ຄື ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃຫ້ເປັນປົກກະຕິ ເພື່ອສ້າງຄວາມເຂັ້ມແຂງໃຫ້ຂົງເຂດສື່ມວນຊົນລາວ ລວມເຖິງການໂຄສະນາເຜີຍແຜ່ສະຖານທີ່ທ່ອງທ່ຽວ, ວັດທະນະທຳ ແລະ ຮີດຄອງປະເພນີລາວໃຫ້ບັນດາປະເທດໃນພາກພື້ນຮູ້ຈັກປະເທດລາວ ຫລາຍຂື້ນ.
（ແຫຼ່ງຂໍ້ມູນ： ວສລ）
