 |
ມູມໜຶ່ງທີ່ນະຄອນຫລວງພະບາງ
ຢ່າງໃດກໍຕາມ, ທ່ານ ນາງ ສຸດາພອນ ຄົມທະວົງ ຮອງຫົວໜ້າພະແນກຖະແຫລງຂ່າວ, ວັດທະ ນະທຳ ແລະ ທ່ອງທ່ຽວ ໄດ້ຊີ້ແຈງຕໍ່ບັນຫາດັ່ງກ່າວວ່າ: ຄວາມເປັນຈິງແລ້ວເປັນພຽງຂ່າວລື ນະຄອນ ຫລວງພະບາງ ມີຄວາມພ້ອມໃນການຕ້ອນຮັບນັກທ່ອງທ່ຽວໃນແຕ່ລະປີ ມີໂຮງແຮມ ແລະ ຣີສອດ 90 ແຫ່ງ, ໃນນັ້ນ ກໍມີຫລາຍໂຮງແຮມ ທີ່ດຳເນີນທຸລະກິດໂດຍສອດຄ່ອງກັບ 7 ມາດຕະຖານອາຊຽນ ກໍຄືເປັນໂຮງແຮມສີຂຽວມາດຕະຖານ,ທີ່ພັກກໍມາດຕະຖານ, ໂດຍປະຊາຊົນມີສ່ວນຮ່ວມ, ພ້ອມນີ້ຍັງມີເຮືອນພັກປະມານ 350 ກ່ວາແຫ່ງ, ຮ້ານອາຫານ ທີ່ໄດ້ມາດຕະຖານ 50 ກ່ວາແຫ່ງ ແລະ ຮ້ານອາຫານທົ່ວໄປ 200 ກ່ວາແຫ່ງ. ສະນັ້ນ, ເຫັນວ່າພຽງພໍສໍາລັບການຮອງຮັບນັກທ່ອງທ່ຽວທັງພາຍໃນ ແລະ ຕ່າງປະເທດ ທີ່ມີຈຸດປະສົງເຂົ້າມາທ່ຽວ ຢູ່ນະຄອນຫລວງພະບາງ ກໍຄື ແຂວງຫລວງພະບາງ ໂດຍສະເພາະໄລຍະບຸນປີໃໝ່ລາວ.
ສ່ວນໃນໄລຍະຜ່ານມາ ມີຫາງສຽງຈົ່ມວ່າ ໄປທ່ຽວຫລວງພະບາງຍາມບຸນປີໃໝ່ລາວ ຍາກໃນເລື່ອງທີ່ພັກນັ້ນເປັນພຽງຂ່າວລື ຂໍໃຫ້ມາສຳຜັດດ້ວຍຕົວເອງ, ແຕ່ອາດຈະເປັນໄປໄດ້ ທີ່ເຮືອນພັກຫລາຍແຫ່ງຈະເຕັມໃນໄລຍະເວລາດັ່ງກ່າວ ເພາະບາງເທື່ອນັກທ່ອງທ່ຽວ ຈະບໍ່ສາມາດເຂົ້າເຖິງການບໍລິ ການ ເຮືອນອ້ອມຂ້າງເທດສະບານໄດ້ ແລະ ສິ່ງສຳຄັນ ນັກທ່ອງທ່ຽວສ່ວນຫລາຍຈະນຳໃຊ້ບໍລິການແຕ່ ເຮືອນພັກເພາະມີລາຄາທີ່ເໝາະສົມ ຈຶ່ງເຮັດໃຫ້ເຮືອນພັກຕ່າງໆບໍ່ພຽງພໍ, ຢືນຢັນວ່າໂຮງແຮມ-ຣີສອດ ທີ່ມີລາ ຄາຂ້ອນຂ້າງສູງ ແມ່ນຍັງມີຢ່າງຫລວງຫລາຍ ຢູ່ນະຄອນຫລວງພະບາງ ທີ່ສາມາດຮອງຮັບນັກທ່ອງທ່ຽວໃນແຕ່ລະປີ. ສ່ວນເລື່ອງອາຫານ ແລະ ເຄື່ອງດື່ມ ທາງເຈົ້ານະຄອນຫລວງພະບາງ ກໍໄດ້ອອກມາດຕະ ການຄວບຄຸມຢ່າງເຂັ້ມງວດສົມຄວນ, ຫາກມີການສວຍໂອກາດ ແລະ ເອົາລັດເອົາປຽບ ຈະໄດ້ຮັບການແກ້ໄຂຢ່າງທັນການ.
 |
ທ່ານ ນາງ ສຸດາພອນ ຄົມທະວົງ
ທ່ານ ນາງ ສຸດາພອນ ຄົມທະວົງ ໃຫ້ຮູ້ຕື່ມວ່າ: ປີ 2018 ຜ່ານມາ ມີນັກທ່ອງທ່ຽວເຂົ້າມາທ່ຽວຢູ່ແຂວງຫລວງພະບາງ ເກີນຄາດໝາຍທີ່ວາງໄວ້, ໂດຍມີເຖິງ 655.000 ກ່ວາຄົນ, ມີນັກທ່ອງທ່ຽວຕ່າງ ປະເທດເພີ່ມຂຶ້ນ22% ທຽບໃສ່ປີ 2017 ໂດຍສະເພາະແມ່ນນັກທ່ອງທ່ຽວຈີນ; ນອກນັ້ນ, ກໍ່ຍັງມີນັກລົງທຶນຈີນ ໄດ້ເຂົ້າມາລົງທຶນດ້ານອຸດສາຫະກຳການທ່ອງທ່ຽວ ເປັນຈຳນວນຫລາຍເຊັ່ນ: ສ້າງໂຮງແຮມ, ເຮືອນພັກ ແລະ ຮ້ານອາຫານຕ່າງໆ ເພື່ອຮອງຮັບນັກທ່ອງທ່ຽວໃນປີທ່ອງທ່ຽວລາວ-ຈີນ ປີ 2019 ນີ້.
（ແຫຼ່ງຂໍ້ມູນ： ຂປລ）
