 |
ພາບປະກອບ
ກະຊວງແຮງງານ ແລະ ສະຫວັດດີການສັງຄົມ ໄດ້ອອກແຈ້ງການ ສະບັບເລກທີ 0711/ຮສສ ລົງວັນທີ 11 ມີນາ 2020 ໃຫ້ເອົາໃຈໃສ່ດັ່ງນີ້ ໃຫ້ຕິດຕາມຜູ້ອອກແຮງງານລາວທີ່ຖືກຈັດສົ່ງໄປເຮັດວຽກຢູ່ປະເທດໄທ ສ ເກົາຫຼີ ແລະ ຍີ່ປຸ່ນຢ່າງໃກ້ຊິດ ໃນກໍລະນີມີແຮງງານທີ່ຖືກສົງໄສ ແລະ ຕິດເຊື້ອພະຍາດCOVID-19 ຕ້ອງໃຫ້ການຊ່ວຍເຫຼືອ ແລະ ລາຍງານມາຍັງກົມພັດທະນາສີມືແຮງງານ ແລະ ຈັດຫາງານ ຊາບໂດຍໄວ ພິຈາລະນາຂົງເຂດທີ່ສົ່ງແຮງງານລາວໄປເຮັດວຽກ ຖ້າບໍ່ຈໍາເປັນຄວນຍົກເລີກການຈັດສົ່ງແຮງງານລາວໄປເຮັດວຽກຢູ່ຕ່າງປະເທດໃນໄລຍະທີ່ກໍາລັງມີການແຜ່ລະບາດຂອງພະຍາດນີ້ຈົນກວ່າສະພາບຈະເຂົ້າສູ່ພາວະປົກກະຕິ ແລະ ໃນການຈັດສົ່ງແຮງງານລາວໄປເຮັດວຽກຢູ່ຕ່າງປະເທດ ລວມທັງກັບຄືນປະເທດຂອງແຮງງານລາວ ຕ້ອງໄດ້ປະຕິບັດຕາມແຈ້ງການແນະນໍາຂອງຄະນະສະເພາະກິດເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ແຕ່ລະໄລຍະຢ່າງເຂັ້ມງວດ.
ໃນວັນທີ13 ມີນານີ້, ສ.ເກົາຫລີ ກວດພົບຜູ້ຕິດເຊື້ອລາຍໃໝ່ ເພີ່ມອີກ 224 ຄົນ ລວມທັງໝົດເກືອບ 8.000 ຄົນ ແລະ ເສຍຊີວິດເພີ່ມຂຶ້ນອີກ 1 ຄົນ ລວມເປັນ 67 ຄົນ. ສ່ວນຈີນ ພວມເຂົ້າສູ່ ສະພາບປົກກະຕິ ຫລັງຈາກ ກວດພົບຜູ້ຕິດເຊື້ອ ລາຍໃໝ່ພຽງ 8 ຄົນ ລວມທັງໝົດ 80.813 ຄົນ ແລະ ເສຍຊີວິດລາຍໃໝ່ເພີ່ມອີກ 7 ຄົນ ລວມເປັນ 3.176 ຄົນ.
ເມື່ອບໍ່ດົນມານີ້, ລັດຖະມົນຕີກະຊວງເສດຖະກິດ ຂອງບັນດາປະເທດ ອາຊຽນໄດ້ອອກຖະແຫຼງການ ກ່ຽວກັບ ການຮັບມື ກັບສະພາບ ເຊື້ອພະຍາດ ໂຄວິດ-19 ໂດຍ ອາຊຽນ ຈະເພີ່ມທະວີຄວາມສາມັກຄີ, ພະຍາຍາມຮ່ວມກັນ, ຫຼີກເວັ້ນບໍ່ໃຫ້ສະພາບພະຍາດ ສ້າງຜົນຮ້າຍ ຕໍ່ເສດຖະກິດທົ່ວໂລກ ຫຼາຍກວ່າເກົ່າ. ໃນຖະແຫຼງການ, ລັດຖະມົນຕີ ກະຊວງເສດຖະກິດ ບັນດາປະເທດອາຊຽນ ໄດ້ສະແດງຄວາມເປັນຫ່ວງເປັນໃຍ ຢ່າງເລິກເຊິ່ງ ຕໍ່ສະພາບພະຍາດໂຄວິດ-19, ຮັບຮູ້ວ່າສະພາບ ພະຍາດໄດ້ສ້າງຜົນສະທ້ອນ ບໍ່ດີຕໍ່ເສດຖະກິດ, ລວມທັງ ຂະແໜງການທ່ອງທ່ຽວ, ການຜະລິດ, ການຂາຍຍ່ອຍ ແລະ ຂະແໜງການບໍລິການອື່ນໆ ພ້ອມທັງ ໄດ້ໂຈມຕີຕ່ອງໂສ້ ການສະໜອງ ແລະ ຕະຫຼາດການທະນາຄານ. ນອກນີ້: ລັດຖະມົນຕີກະຊວງເສດຖະກິດ ບັນດາປະເທດອາຊຽນ ມີຄວາມເຫັນ ເປັນເອກະສັນກັນ ວ່າ: ຄວນພິຈາລະນາມາດຕະການ ແບບຈຳກັດ ຕໍ່ການເຄື່ອນໄຫວ ຂ້າມຊາດ ຈາກທາງດ້ານສາທາລະນະສຸກ, ບໍ່ຄວນສ້າງອຸປະສັກ ຂັດຂວາງ ທີ່ບໍ່ຈຳເປັນ ຕໍ່ການຄ້າພາຍໃນພາກພື້ນ.
（ໄຊພອນ）
