 |
ພາບປະກອບ
ສຳລັບບັນຫາພົ້ນເດັ່ນໃນປີ2019 ແມ່ນການຮ່ວມມືດ້ານການຄຸ້ມຄອງແຫລ່ງຊັບພະຍາ ກອນນໍ້າ ໄດ້ຖືກຍົກລະດັບຈາກ ກອງປະຊຸມໜ່ວຍງານວິຊາການ (ຂັ້ນຫົວໜ້າກົມ)ມາເປັນກອງປະຊຸມລະດັບລັດຖະມົນຕີ,ຊຶ່ງກອງປະຊຸມລັດຖະມົນຕີ ດ້ານການຄຸ້ມຄອງແຫລ່ງຊັບ ພະຍາກອນນໍ້າ ຄັ້ງທີ1ໄດ້ຖືກຈັດຂຶ້ນໃນລະຫວ່າງວັນທີ15-19 ທັນວາ2019, ທີ່ ສປຈີນ. ກອງປະຊຸມໄດ້ຮັບຮອງເອົາ ຮ່າງຖະແຫລງການ ວ່າດ້ວຍການຮ່ວມມືດ້ານ ການຄຸ້ມຄອງແຫລ່ງ ຊັບພະຍາກອນນ້ຳແມ່ນ້ຳຂອງ-ແມ່ນ້ຳລ້ານຊ້າງ. ນອກຈາກນັ້ນ, ສູນປະຕິບັດກົດໝາຍ ແລະ ຮັກສາຄວາມປອດໄພຕາມລຳ ແມ່ນ້ຳຂອງ-ແມ່ນ້ຳລ້ານຊ້າງ ໄດ້ສ້າງຕັ້ງຂຶ້ນທີ່ ແຂວງຢູນໜານ, ສປ. ຈີນ ແລະ ບັນດາປະເທດສະມາຊິກ ກໍໄດ້ສົ່ງພະນັກງານຈຳນວນໜຶ່ງ ໄປປະຈຳຢູ່ສູນດັ່ງກ່າວ. ປັດຈຸບັນ, ໄດ້ສຳເລັດການສ້າງລະບົບອິນເຕີເນັດ ທີ່ມີຄວາມປອດໄພສູງເພື່ອເກັບກຳແລະ ແລກປ່ຽນຂໍ້ມູນດ້ານຄວາມໝັ້ນຄົງໃນຂົງເຂດ ແມ່ນ້ຳຂອງ-ແມ່ນ້ຳລ້ານຊ້າງ, ໄດ້ສຳເລັດການຈັດກອງປະຊຸມ ພົບປະແລກປ່ຽນບັນຫາສະພາບທີພົ້ນເດັ່ນ ແລະ ວຽກງານລາດຕະເວນລຳແມ່ນ້ຳຂອງ4 ຝ່າຍ(ລາວ-ຈີນ-ມຽນມາ-ໄທ) ແລະ ໄດ້ມີຂໍ້ລິເລີ່ມການຮ່ວມມື ໃນການຕໍ່ຕ້ານສານເຄມີຕັ້ງຕົ້ນ ທີ່ໃຊ້ຜະລິດຢາເສບຕິດ. ເພື່ອຈັດຕັ້ງຜັນຂະຫຍາຍ ຖະແຫລງຂ່າວຮ່ວມ ກອງປະຊຸມລັດຖະມົນຕີ ແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ4, ສປປ ລາວ ໄດ້ຮ່ວມປືກສາຫາລື ແລະສຶກສາຄົ້ນຄວ້າ ກ່ຽວກັບການສ້າງແລວ ເສດຖະກິດແມ່ນ້ຳຂອງ-ແມ່ນ້ຳລ້ານຊ້າງ(Mekong-Lancang Economic Development Belt).ຈຸດປະສົງ ເພື່ອສົ່ງເສີມການຄ້າ-ການລົງທຶນ ແລະ ຂະແໜງອຸດສາຫະກໍາ ໃນຂົງເຂດແມ່ນ້ຳຂອງ-ແມ່ນ້ຳລ້ານຊ້າງ ໃຫ້ທັນກັບຍຸກປະຕິວັດ ອຸດສາຫະກຳ 4.0.
ຂອບການຮ່ວມມື ແມ່ນ້ຳຂອງ-ແມ່ນ້ຳລ້ານຊ້າງ ແມ່ນມີຄວາມຄືບໜ້າຢ່າງຕໍ່ເນື່ອງ ແລະ ມີທ່າອ່ຽງ ຈະຂະຫຍາຍການຮ່ວມມື ໄປສູ່ລວງກວ້າງ ແລະ ລວງເລິກ ເປັນຕົ້ນແມ່ນ ການເພີ່ມທະວີການຮ່ວມມື ແບບລົງເລິກ ໃນຂະແໜງການຕ່າງໆ ລວມທັງ ການຂະຫຍາຍ ຂົງເຂດບູລິມະສິດ ຈາກ 5 ຂົງເຂດທີ່ມີຢູ່ໃນປັດຈຸບັນ ແລະ ໃນອານາຄົດມໍ່ໆນີ້ ຄາດວ່າຈະມີ ການຂະຫຍາຍ ຂົງເຂດການຮ່ວມມື ໃນຂະແໜງສາທາລະນະສຸກ, ສຶກສາ, ວິທະຍາສາດ ແລະ ເຕັກໂນໂລຊີ ແລະ ອື່ນໆ. ສຳລັບທິດທາງໃນຕໍ່ໜ້ານອກຈາກການກະກຽມ ເປັນເຈົ້າພາບຈັດກອງປະຊຸມ ລັດຖະມົນຕີ ຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 ຊຶ່ງຈະຈັດຂຶ້ນໃນວັນທີ 19-20 ກຸມພາ 2020, ທີ່ນະຄອນ ຫລວງວຽງຈັນ, ສປປ ລາວແລ້ວ ຍັງກະກຽມຄວາມພ້ອມ ໃນການເປັນເຈົ້າພາບ ຮ່ວມກັບ ສປ ຈີນ ຈັດກອງປະຊຸມ ຜູ້ນຳແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 3, ໃນວັນທີ 25-27 ມີນາ 2020 ທີ່ ນະຄອນຫລວງວຽງຈັນ, ກອງປະຊຸມສຸດຍອດ ACMECS ຄັ້ງທີ 9, CLMV ຄັ້ງທີ 10 ແລະ CLV ຄັ້ງທີ 11 ຕື່ມອີກ.
ກອງປະຊຸມລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 5 (the 5th Mekong-Lancang Cooperation Foreign Ministers’ Meeting) ຈະຈັດຂຶ້ນໃນລະຫວ່າງ ວັນທີ 19-20 ກຸມພາ 2020 ຢູ່ທີ່ໂຮງແຮມ ດອນຈັນພາເລສ ນະຄອນຫລວງວຽງຈັນ. ຈຸດປະສົງຂອງກອງປະຊຸມໃນຄັ້ງນີ້, ແມ່ນເພື່ອທົບທວນຄືນ ການຈັດ ຕັ້ງຜັນຂະຫຍາຍ ຜົນກອງປະຊຸມຜູ້ນຳ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 2; ກອງປະຊຸມ ລັດຖະມົນຕີຕ່າງປະເທດ ແມ່ນໍ້າຂອງ-ແມ່ນໍ້າລ້ານຊ້າງ ຄັ້ງທີ 4 ແລະ ແຜນປະຕິບັດງານ 5 ປີ ແມ່ນໍ້າຂອງແມ່ ນໍ້າລ້ານຊ້າງ (2018-2022) ແລະ ຈະຮ່ວມກັນ ປຶກສາຫາລື ໃນການວາງທິດທາງການຮ່ວມມືໃນຕໍ່ໜ້າ ໂດຍແນໃສ່ການຮ່ວມກັນພັດທະນາ ເສດຖະກິດ-ສັງຄົມ ໃນຂົງເຂດພາກພື້ນ ແມ່ນໍ້າຂອງບົນພື້ນ ຖານ 3 ເສົາຄໍ້າ ແລະ 5 ຂົງເຂດບຸລິມະສິດ.
（ໄຊພອນ）
