ຫວຽດນາມ ໄດ້ຈັດກອງປະຊຸມ ເພື່ອແນະນຳວິທີປິ່ນປົວ ແລະ ປ້ອງກັນ ຄວບຄຸມໂລກລະບາດໄວຣັດ ໂຄໂຣນາ ສາຍພັນໃຫມ່

ທ່ານ ສາດສະດາຈານ ປອ ຫງວຽນແທງລອງ, ຮອງລັດຖະມົນຕີ ກະຊວງສາທາລະນະສຸກ ຫວຽດນາມ ກ່າວຄຳເຫັນທີ່ກອງປະຊຸມ.ພາບ:moh.gov.vn

ກ່າວຄຳເຫັນນະທີ່ນີ້ ທ່ານ ສາດສະດາຈານ ປອ ຫງວຽນແທງລອງ, ຮອງລັດຖະມົນຕີ ກະຊວງສາທາລະນະສຸກ ເນັ້ນຫນັກວ່າ:ການປ້ອງກັນ ຄວບຄຸມໂລກລະບາດຢູ່ຫວຽດນາມພວມໄດ້ຮັບການປະຕິບັດຢ່າງຂ້ຽວຂາດ ດ້ວຍຫລາຍມາດຕະການ ແລະ ເລືອກເຟັ້ນບັນດາວິທີການປິ່ນປົວໃຫ້ເໝາະສົມ. ໃນສະພາບການໂລກລະບາດແຜ່ລາມອອກຢ່າງວ່ອງໄວຄືປະຈຸບັນ, ມາດຕະການແຍກຕົວແມ່ນມີປະສິດທິຜົນ ເພື່ອສະກັດກັ້ນ, ຄວບຄຸມໂລກລະບາດ. ຫວຽດນາມໄດ້ສ້າງຕັ້ງລະບົບແຍກຕົວເປັນ 3 ຂອດ: ທີຫນຶ່ງ ແມ່ນແຍກຕົວບັນດາຜູ້ຖືກສົງໃສ່ວ່າຕິດເຊື້ອ ໄວຣັດ ໂຄໂຣນາສາຍພັນໃຫມ່ ຕ້ອງເຝົ້າຕິດຕາມອາການຢູ່ຮາກຖານສາທາລະນະສຸກ. ທີສອງ ແມ່ນບັນດາພົນລະເມືອງຫວຽດນາມ,ຊາວຕ່າງປະເທດໄປຜ່ານ ຫລື ມາຈາກ ແຂວງ ຮູ່ເປີຍ ກັບຄືນມາຫວຽດນາມຕ້ອງເຝົ້າຕິດຕາມອາການຢູ່ສະຖານທີ່ເຕົ້າໂຮມໂດຍຄະນະກຳມະການປະຊາຊົນ, ນະຄອນ ໄດ້ກຳນົດ. ທີສາມ ຜູ້ທີ່ຢູ່ບັນດາເຂດອື່ນໃນຈີນ ກັບມາຫວຽດນາມ ຕ້ອງແຍກຕົວເຝົ້າຕິດຕາມອາການຢູ່ຄອບຄົວ.

ຫນ່ວຍບັນດານັກວິທະຍາສາດ ສັງກັດສະຖາບັນເຕັກໂນໂລຊີຊີວະສາດ ແລະ ເຕັກໂນໂລຊີ ອາຫານ (ມະຫາວິທະຍາໄລ ຊັບພະວິຊາຮ່າໂນ້ຍ) ຫາກໍ່ໃຫ້ຮູ້ວ່າ:ໄດ້ຄົ້ນຄ້ວາສຳເລັດ Kit ກວດພົບເຊື້ອໄວຣັດໂຄໂຣນາວ່ອງໄວໃນເວລາ 70 ນາທີ ເປີດຄວາມຫວັງໃຫມ່ໃຫ້ວຽກງານປ້ອງກັນຄວບຄຸມໂລກລະບາດໄວຣັດ ໂຄໂຣນາສາຍພັນໃຫມ່. ຫນ່ວຍຄົ້ນຄ້ວາດັ່ງກ່າວປາດຖະຫນາຢາກ ກະຊວງສາທາລະນະສຸກ ແລະກະຊວງວິທະຍາສາດ ແລະ ເຕັກໂນໂລຊີ ຫນູນຊ່ວຍ ເພື່ອນຳເອົາໝາກຜົນແຫ່ງການຄົ້ນຄ້ວານີ້ເຂົ້ານຳໃຊ້ທົດລອງໃນການກວດກາຄົນເຈັບ.

（ໄຊພອນ）