 |
ທ່ານນາຍົກລັດຖະມົນຕີ ທອງລຸນ ສີສຸລິດ ແລະ ທ່ານນາຍົກລັດຖະມົນຕີ ຫງວຽ໋ນ ຊົນ ຟຸກ.(ພາບ : VGP / ກວາງຫ໋ຽວ)
ທີ່ບັນດາການພົບປະ, ການນຳຂັ້ນສູງ 2 ປະເທດຢືນຢັນວ່າ ຈະສືບຕໍ່ໜູນຊ່ວຍເຊິ່ງກັນ ແລະ ກັນບົນເສັ້ນທາງປົກປັກຮັກສາ ແລະ ພັດທະນາປະເທດຊາດຂອງແຕ່ລະປະເທດ, ນັບທັງໃນຂອບເຂດ 2 ຝ່າຍ ກໍຄືຢູ່ບັນດາເວທີປາໄສພາກພື້ນ ແລະ ສາກົນ. ອີກຄັ້ງໜຶ່ງ 2 ຝ່າຍໄດ້ເນັ້ນໜັກເຖິງຄວາມສຳຄັນຂອງການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບຢ່າງແໜ້ນແຟ້ນ, ສູ້ຊົນຍາມໃດກໍ່ແມ່ນບ່ອນອີງຢ່າງໝັ້ນຄົງໜັກແໜ້ນໃຫ້ແກ່ກັນ ເພື່ອແນໃສ່ຮັບມືກັບບັນດາສິ່ງທ້າທາຍດ້ານຄວາມໝັ້ນຄົງ, ການປ້ອງກັນຊາດທີ່ນັບມື້ນັບມີຫຼາຍຮູບຫຼາຍແບບ, ສັບສົນ; ເຫັນດີເປັນເອກະພາບສົມທົບກັນຜັນຂະຫຍາຍບັນດາສົນທິສັນຍາ ແລະ ຂໍ້ຕົກລົງ 2 ຝ່າຍກ່ຽວກັບຊາຍແດນ, ຜືນແຜ່ນດິນໃຫ້ເປັນຢ່າງດີ. 2 ຝ່າຍເຫັນດີສືບຕໍ່ຊຸກຍູ້ ແລະ ຍົກສູງປະສິດທິຜົນການຮ່ວມມືທາງດ້ານເສດຖະກິດ, ວັດທະນະທຳ, ວິທະຍາສາດ - ເຕັກໂນໂລຊີ; ເອົາໃຈໃສ່ເຖິງການຈັດຕັ້ງປະຕິບັດ ແລະ ມີມາດຕະການຮັບປະກັນຄວາມຄືບໜ້າ ແລະ ມີຄຸນນະພາບຂອງບັນດາໂຄງການລົງທຶນຂອງຫວຽດນາມ ຢູ່ລາວ, ກໍຄືຂອງລາວ ຢູ່ຫວຽດນາມ.
ສອງຝ່າຍໄດ້ເນັ້ນໜັກຄວາມສຳຄັນ ທີ່ມີຄວາມໝາຍເປັນຕາຍຂອງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ເຊິ່ງຖືວ່າເປັນກົດເກນທີ່ບໍ່ປ່ຽນແປງ, ເປັນກຳລັງແຮງແຫ່ງການຄົງຕົວ ແລະ ຂະຫຍາຍຕົວຂອງພາລະກິດປະຕິວັດຂອງແຕ່ລະປະເທດ; ໃນນັ້ນ ບັນດາຄົນຮຸ້ນສືບທອດຕ້ອງມີຄວາມຮັບຜິດຊອບໃນການປົກປັກຮັກສາ, ເພີ່ມພູນຄູນສ້າງ ເພື່ອເຮັດໃຫ້ສາຍພົວພັນພິເສດອັນບໍລິສຸດພຸດຜ່ອງ, ຫາໄດ້ຍາກນີ້ ກ້າວຂຶ້ນຈຸດສຸດຍອດອັນໃໝ່ ແລະ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ.
ຫວຽດນາມ ແລະ ລາວ ໄດ້ຢືນຢັນເຖິງຄວາມສຳຄັນຂອງເລື່ອງຜັນຂະຫຍາຍການເຊື່ອມຕໍ່ 2 ພື້ນຖານເສດຖະກິດ, ໂດຍສະເພາະແມ່ນການເຊື່ອມຕໍ່ກ່ຽວກັບລະບອບລະບຽບການ, ພື້ນຖານໂຄງລ່າງຄົມມະນາຄົມ, ພະລັງງານ... ແລະ ຜັນຂະຫຍາຍບັນດາໂຄງການຮ່ວມມືສຳຄັນຢ່າງມີປະສິດທິຜົນ, ເຊືຶ່ອມຕໍ່ສາຍລົດເມ ຫວຽດນາມ - ລາວ - ໄທ. 2 ຝ່າຍໄດ້ເຫັນດີສົມທົບກັນຊຸກຍູ້ການຮ່ວມມືໃນເຂດ 3 ຫຼ່ຽມພັດທະນາກຳປູເຈຍ - ລາວ - ຫວຽດນາມ ແລະ ຜັນຂະຫຍາຍແຜນການດຳເນີນງານເຊື່ອມຕໍ່ 3 ພື້ນຖານເສດຖະກິດກຳປູເຈຍ - ລາວ - ຫວຽດນາມ ຮອດປີ 2030 ຢ່າງມີປະສິດທິຜົນ.
ສອງຝ່າຍໄດ້ເຫັນດີນຳກັນສືບຕໍ່ສົມທົບກັນຜັນຂະຫຍາຍບັນດາຂໍ້ຕົກລົງກ່ຽວກັບການຮ່ວມມືດ້ານການສຶກສາ, ບຳລຸງສ້າງ; ພັດທະນາແຫຼ່ງຊັບພະຍາກອນມະນຸດ; ເພີ່ມທະວີການເຊື່ອມຕໍ່ບັນດາຜະລິດຕະພັນທ່ອງທ່ຽວ; ແບ່ງປັນຂໍ້ມູນຂ່າວສານຢ່າງທັນການ ແລະ ສົມທົບກັນຢ່າງແໜ້ນແຟ້ນ ແລະ ກັບບັນດາປະເທດ, ບັນດາອົງການຈັດຕັ້ງສາກົນທີ່ມີສ່ວນກ່ຽວຂ້ອງ ເພື່ອຮັບປະກັນການຄຸ້ມຄອງ ແລະ ນຳໃຊ້ແຫຼ່ງນ້ຳໃນແມ່ນ້ຳຂອງແບບຍືນຍົງ; ດຳເນີນການເຈລະຈາ ສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RCEP) ໃຫ້ສຳເລັດໃນປີ 2019.
ສອງຝ່າຍໄດ້ຢືນຢັນຄືນອີກເທື່ອໜຶ່ງກ່ຽວກັບ ຄວາມສໍາຄັນຂອງການຮ່ວມມືດ້ານການປ້ອງກັນຊາດ, ປ້ອງກັນຄວາມສະຫງົບ, ພະຍາຍາມເປັນບ່ອນອີງທີ່ແໜ້ນແກ່ນຂອງກັນ ແລະ ກັນ ເພື່ອປະເຊີນໜ້າກັບສິ່ງທ້າທາຍດ້ານຄວາມໝັ້ນຄົງ, ດ້ານປ້ອງກັນຊາດເຊິ່ງນັບມື້ນັບມີຫລາກຫລາຍຮູບແບບ ແລະ ສັບສົນ, ເປັນເອກະພາບປະສານສົມທົບໃນການຈັດຕັ້ງປະຕິບັດບັນດາສັນຍາ ແລະ ຂໍ້ຕົກລົງສອງຝ່າຍ ກ່ຽວກັບເສັ້ນຊາຍແດນ.
ສອງຝ່າຍຮີບຮ້ອນຈັດຕັ້ງກອງປະຊຸມສະຫລຸບ ເພື່ອຕີລາຄາໝາກຜົນຂອງການຈັດຕັ້ງປະຕິບັດທົດລອງຮູບແບບການກວດກາ “ຈຸດດຽວ, ຄັ້ງດຽວ” ຢູ່ດ່ານສາກົນແດນສະຫວັນ (ລາວ) - ລາວບາວ (ຫວຽດນາມ). ພ້ອມທັງ ຈັດຕັ້ງກອງປະຊຸມສະຫລຸບຕີລາຄາການປະຕິບັດຂໍ້ຕົກລົງຂອງສອງລັດຖະບານ ວ່າດ້ວຍການແກ້ໄຂຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະ ສ້າງຄອບຄົວບໍ່ຖືກລະບຽບຢູ່ບໍລິເວນຊາຍແດນ (ລົງນາມ ວັນທີ 08 ກໍ
ກໍລະກົດ 2013) ພາຍໃນໄຕມາດ 4 ປີ 2019. ສອງຝ່າຍໄດ້ເປັນເອກະພາບນຳກັນ ໃນການສ້າງເງື່ອນໄຂສະດວກໃຫ້ຄົນຫວຽດນາມຢູ່ລາວ ແລະ ຄົນລາວຢູ່ຫວຽດນາມ ໄດ້ດຳລົງຊີວິດ, ທໍາມາຫາກິນ, ສຶກສາຮໍ່າຮຽນ ຖືກຕ້ອງຕາມລະບຽບການ ແລະ ກົດໝາຍ ຂອງແຕ່ລະປະເທດ ແລະ ຕາມປະເພນີປະຕິບັດຂອງສາກົນ.
ສອງຝ່າຍເປັນເອກະພາບ ປະສານສົມທົບຈັດຕັ້ງບັນດາກິດຈະກຳ ເພື່ອສະເຫລີມສະຫລອງວັນມູນເຊື້ອທະຫານອາສະໝັກ ຫວຽດນາມ ແລະ ຊ່ຽວຊານ ຫວຽດນາມ ຊ່ວຍເຫລືອລາວ ຄົບຮອບ 70 ປີ (30 ຕຸລາ 1949 - 30 ຕຸລາ 2019) ໃຫ້ປະສົບຜົນສໍາເລັດ ເພື່ອເປັນການຈົດຈໍາຄຸນງາມຄວາມດີ ແລະ ການເສຍສະຫລະເລືອດເນື້ອຂອງຄົນຮຸ່ນກ່ອນ ແລະ ປະກອບສ່ວນສຶກສາຄົນຮຸ່ນໃໝ່ ກ່ຽວກັບຄວາມສາມັກຄີພິເສດທີ່ສະໜິດຕິດພັນລະຫວ່າງສອງຊາດ.
ສອງຝ່າຍໄດ້ຢືນຢັນເຖິງຄວາມສຳຄັນຂອງເລື່ອງຮັກສາສັນຕິພາບ, ສະຖຽນລະພາບ, ເຄົາລົບກົດໝາຍ, ຄວາມໝັ້ນຄົງ, ຮັບປະກັນຄວາມປອດໄພ, ຄວາມເສລີໃນການເດີນເຮືອ ແລະ ການບິນຢູ່ທະເລຕາເວັນອອກ, ແກ້ໄຂບັນດາການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ, ບົນພື້ນຖານກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982 (UNCLOS 1982). 2 ຝ່າຍໄດ້ຢືນຢັນຄືນໃໝ່ບັນດາຫຼັກໝັ້ນ ແລະ ຫຼັກການຂອງອາຊຽນ ກ່ຽວກັບບັນຫາທະເລຕາເວັນອອກ ເຊິ່ງໄດ້ຍົກອອກໃນບັນດາຖະແຫຼງການຮ່ວມຫວ່າງມໍ່ໆມານີ້ຂອງອາຊຽນ, ໂດຍສະເພາະແມ່ນຖະແຫຼງການຂອງກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 52 (AMM 52) ຢູ່ບາງກອກ ໃນເດືອນ ກໍລະກົດ 2019.
（ໄຊພອນ）
