 |
ເພີ່ມພູນຄູນສ້າງສາຍພົວພັນແບບພິເສດ ຫວຽດນາມ-ລາວ ຢ່າງບໍ່ຢຸດຢັ້ງ.(ພາບ:baohaiduong.vn)
ຫວຽດນາມ - ລາວ ເປັນສອງປະເທດບ້ານໃກ້ເຮືອນຄຽງທີ່ຄວາມຮັກແພງສະໜິດສະໜົມ, ມີແມ່ນໍ້າລໍາເຊ ແລະ ສາຍພູຕິດແປະກັນ ແລະ ມີສາຍນ້ຳຂອງໄຫຼຜ່ານສອງປະເທດ, ເປັນສອງປະເທດທີ່ອີງຫຼັງໃສ່ສາຍພູຫຼວງອັນໃຫຍ່ໂຕມະໂຫຖານອັນດຽວກັນ. ຫວຽດນາມ - ລາວ ມີສາຍພົວພັນມິດຕະພາບທີ່ເປັນມູນເຊື້ອ , ມີຄວາມຈົງຮັກພັກດີ ຊ່ວຍເຫຼືອເຊິ່ງກັນ ແລະ ກັນ ສະເໝີຕົ້ນສະເໝີປາຍ. ສາຍພົວພັນແບບພິເສດ ຫວຽດນາມ - ລາວ ໄດ້ກາຍເປັນແຮງຜັກດັນທີ່ແຂງແຮງໃຫ້ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງສອງປະເທດ.
ສາຍພົວພັນມິດຕະພາບທີ່ເປັນມູນເຊື້ອເລິກເຊິ່ງ ແລະ ແໜ້ນແກ່ນ
ມັນບໍ່ພຽງແຕ່ເປັນພູມີປະເທດທີ່ຕິດຕໍ່ກັນເທົ່ານັ້ນ ສາຍພົວພັນ ຫວຽດນາມ-ລາວ ຍັງໄດ້ເສີມຂະຫຍາຍການແບ່ງປັນ ໃນປະຫວັດສາດການຕໍ່ສູ້ ຕ້ານສັດຕູໂຕດຽວກັນ ແລະ ການຮ່ວມມືໜັກແໜ້ນ, ຊ່ວຍເຫຼືອເຊິ່ງກັນ ແລະ ກັນ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ມື້ວັນທີ 5.9.1962 ຫຼັງຈາກການລົງນາມສົນທິສັນຍາເຈນິວາ ກ່ຽວກັບລາວ, ຫວຽດ-ລາວ ໄດ້ເຫັນດີເປັນເອກະພາບສ້າງຕັ້ງ ສາຍພົວພັນການທູດ, ເປັນການເປີດໃບໜ້າໃໝ່ໃຫ້ແກ່ພາລະກິດ ປັບປຸງ ແລະ ເສີມຂະຫຍາຍ ສາຍພົວພັນລະຫວ່າງສອງປະເທດ ແໜ້ນແຟ້ນຂຶ້ນກວ່າເກົ່າ.
ຜ່ານບັນດາບັ້ນຮົບປະຕິວັດ, ນ້ຳໃຈສາມັກຄີພິເສດ, ສັດຊື່ບໍລິສຸດຂອງສອງຊາດ ຫວຽດນາມ-ລາວ ໄດ້ຖືກ ປະທານ ໂຮ່ຈີມິນ ແລະ ປະທານ ໄກສອນ ພົມວິຫານ ພ້ອມດ້ວຍພັກ-ລັດ ກໍ່ຄືປະຊາຊົນສອງຊາດ ອອກເຫື່ອເທແຮງເພີ່ມພູນຄູນສ້າງ ຢ່າງບໍ່ຢຸດຢັ້ງ ຈົນກາຍເປັນສາຍພົວພັນ ທີ່ເປັນແບບຢ່າງ, ຊື່ສັດບໍລິສຸດ, ຫາຍາກທີ່ສຸດທີ່ຈະປະກົດໃນການພົວພັນສາກົນ ນັ້ນແມ່ນສັບສົມບັດລວມທີ່ລ້ຳຄ່າທີ່ສຸດຂອງສອງຊາດ ຫວຽດນາມ-ລາວ.
ພິເສດ ວັນທີ 18.7.1977 ຫວຽດນາມ-ລາວ ໄດ້ເຊັນສົນທິສັນຍາ ມິດຕະພາບ ແລະ ການຮ່ວມມື, ຢັ້ງຢືນນ້ຳໃຈສາມັກຄີພິເສດເປັນອັນໜຶ່ງອັນດຽວກັນ, ຮ່ວມມືສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນພາລະກິດກໍ່ສ້າງ ແລະ ຮັກສາເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງສອງຊາດ. ນີ້ແມ່ນເອກະສານທີ່ມີຄວາມໝາຍສໍາຄັນທາງດ້ານປະຫວັດສາດ , ເປັນຂີດໝາຍບາດກ້າວພັດທະນາໃໝ່, ຮອບດ້ານຂອງສາຍພົວພັນແບບພິເສດ ຫວຽດນາມ - ລາວ.
ກວ່າ 40 ປີ ທີ່ຜ່ານມາ, ນັບຕັ້ງແຕ່ການຈັດຕັ້ງປະຕິບັດສົນທິສັນຍາ ມິດຕະພາບ ແລະ ການຮ່ວມມືຫວຽດນາມ-ລາວ, ສາຍພົວພັນມິດຕະພາບທີ່ເປັນມູນເຊື້ອ, ສາມັກຄີພິເສດ, ຮ່ວມມືຮອບດ້ານ ຫວຽດນາມ-ລາວ ໄດ້ຮັບການປັບປຸງ ແລະ ເສີມຂະຫຍາຍຢ່າງບໍ່ຢຸດຢັ້ງ. ພິເສດ ມິດຕະພາບທາງດ້ານການເມືອງລະຫວ່າງສອງຊາດນັບມື້ຕິດພັນສະໜິດສະໜົມກັນຍິ່ງຂຶ້ນ. ມີຄວາມເປັນເອກະພາບສູງ ຢູ່ແຕ່ລະເວທີ ບໍ່ວ່າຈະເປັນການຮ່ວມມືລະດັບພາກພື້ນກໍ່ຄືລະດັບສາກົນ, ປະກອບສ່ວນເຂົ້າໃນການພັດທະນາຂອງແຕ່ລະປະເທດ ແລະ ວຽກງານຮັກສາສັນຕິພາບ, ສະຖຽນລະພາບ, ການຮ່ວມມືພັດທະນາໃນຂົງເຂດພາກພື້ນກໍ່ຄືທົ່ວໂລກ.
ທັງສອງຝ່າຍກໍ່ຍັງໄດ້ປະສານສົມທົບກັນຢ່າງແໜ້ນແຟ້ນ ສະໜັບສະໜູນຊ່ວຍເຫຼືອກັນຢູ່ໃນບັນດາເວທີຮ່ວມມືໃນຂົງ ເຂດພາກພື້ນ ແລະ ສາກົນ; ສືບຕໍ່ເພີ່ມທະວີຮ່ວມມືປະສານສົມທົບກັບບັນດາປະເທດສະມາຊິກ ອາຊຽນໃນວຽກງານສ້າງຕັ້ງປະຊາຄົມອາຊ່ຽນ ແລະ ຮັກສາໄວ້ນ້ຳໃຈສາມັກຄີເປັນເອກະພາບຂອງ ອາຊ່ຽນໃນແຕ່ລະບັນຫາຍຸດທະສາດຢູ່ໃນພາກພື້ນ.
ການຮ່ວມມືທີ່ມີປະສິດທິພາບໃນຫຼາຍດ້ານ
ໃນຊ່ວງເວລາຫຼາຍປີທີ່ຜ່ານມາ ສາຍພົວພັນພິເສດ ແລະ ຮ່ວມມືຮອບດ້ານ ຫວຽດນາມ-ລາວ ນັບມື້ໃກ້ສິດສະໜິດແໜ້ນພາຍໃຕ້ພາລະກິດປ່ຽນແປງໃໝ່. ພິເສດການຮ່ວມມືຢ່າງບໍ່ຢຸດຢັ້ງທາງດ້ານເສດຖະກິດລະຫວ່າງ ຫວຽດ ນາມ-ລາວມັນໄດ້ກາຍເປັນພື້ນຖານໄລຍະຍາວໃນສາຍພົວພັນ.
ທັງສອງປະເທດໄດ້ມີບາດກ້າວຮ່ວມມືຊ່ວຍເຫຼືອເຊິ່ງແລະກັນ ບົນພື້ນຖານເສດຖະກິດຂອງສອງຊາດ; ຖືເປັນສຳຄັນກ່ຽວກັບວຽກງານຄົມມະນາຄົມ ແລະ ພະລັງງານ ໂດຍການລົງນາມໃນບົດບັນທຶກຊ່ວຍຈຳ ລະຫວ່າງສອງລັດ ຖະບານກ່ຽວກັກນຮ່ວມມືພັດທະນາແຕ່ລະໂຄງການເຂື່ອນໄຟຟ້າຢູ່ ສປປ ລາວ ແລະ ການຊື້-ຂາຍໄຟຟ້າລະຫວ່າງສອງປະເທດຮອດປີ 2030 (ເດືອນ10/2016). ເຫັນດີເປັນເອກະພາບກັນກ່ຽວກັບການລົງທຶນກໍ່ສ້າງທາງດ່ວນ ຮ່າໂນ້ຍ-ວຽງຈັນ (ເດືອນ11/2016). ແຜນການ 5ປີ (2016-2020). ປະຕິບັດຕາມບົດບັນທຶກຊ່ວຍຈໍາກ່ຽວກັບຍຸດທະສາດວຽກງານຄົມມະນາຄົມ-ຂົນສົ່ງ ຫວຽດນາມ-ລາວ; ໂຄງການກໍ່ສ້າງສາງສິນຄ້າ ແລະ ທໍ່ສົ່ງນ້ຳມັນແຕ່ທ່າກຳປັ່ນຫ່ອນລາ ໄປຫາຄຳມ່ວນ; ຊຸກດັນການກໍ່ສ້າງ ແລະ ຍົກລະດັບບັນດາເສັ້ນທາງເຊື່ມຕໍ່ລະຫວ່າງແລວທາງ ຍຸດທະສາດ ທິດຕາເວັນອອກ - ທິດຕາເວັນຕົກ ແລະ ເຊື່ອມຕໍ່ກັບພາກພື້ນ; ສ້າງເງື່ອນໄຂໃຫ້ ສປປ ລາວ ມີເສັ້ນທາງອອກສູ່ທະເລ ເພື່ອສະດວກແກ່ການນຳເຂົ້າສົ່ງອອກສິນຄ້າ, ໃນນັ້ນລວມເຖິງການຊົມໃຊ້ທ່າກຳປັ່ນ ຫວຸ້ງອ້າງ. ບັນດາການຕົກລົງຮ່ວມມືນີ້ໄດ້ນຳມາເຊິ່ງຜົນປະໂຫຍດທາງດ້ານການເມືອງ, ເສດຖະກິດ, ສັງຄົມ ເສີມຂະຫຍາຍທ່າໄດ້ປຽບສູງສຸດ ກ່ຽວກັບທີ່ຕັ້ງພູມີປະເທດ ແລະ ເງື່ອນໄຂທາງທຳມະຊາດຂອງສອງປະເທດ ພິເສດແມ່ນຄວາມອາດສາມາດບົ່ມຊ້ອນກ່ຽວກັບຈຸດທີ່ຕັ້ງທີ່ເປັນໃຈກາງເຊື່ອມຕໍ່ຂອງລາວ ແລະ ຄວາມອາດສາມາດບົ່ມຊ້ອນທາງດ້ານທະເລຂອງຫວຽດນາມ.
ຕໍ່ກັບຄວາມບຸກບືນດັ່ງກ່າວ, ໃນຊ່ວງເວລາບໍ່ທໍ່ໃດປີໝໍ່ໆນີ້ ວົງເງິນການຄ້າ ຫວຽດນາມ-ລາວ ໄດ້ມີບາດກ້າວຂະຫຍາຍຕົວພໍສົມຄວນ ສະເລ່ຍເພີ່ມຂຶ້ນ 4%/ປີ ໄລຍະ 2011-2016. ວົງເງິນການຄ້າທັງສອງຝ່າຍ ຫວຽດນາມ-ລາວ ປີ 2017 ບັນລຸ 935 ລ້ານ ໂດລາສະຫະລັດ, ເພີ່ມຂຶ້ນເກືອບ 13,6% ທຽບໃສ່ປີ 2016; ຮອດປີ2018 ຕົວເລກນີ້ໄດ້ບັນລຸ 1,03 ຕື້ ໂດລາສະຫະລັດ, ເພີ່ມຂຶ້ນ 13% ທຽບໃສ່ 2017 ແລະ ລື່ນຄາດໝາຍທີ່ວາງໄວ້. ບັນດາສິນຄ້າທີ່ສົ່ງອອກ ແລະ ນຳເຂົ້າລະຫວ່າງສອງປະເທດນັບມື້ມີຄວາມອຸດົມສົມບູນຫຼາກຫຼາຍ. ນັບມາຮອດທ້າຍປີ 2018 ບັນດາວິສາຫະກິດຫວຽດນາມໄດ້ຈົດທະບຽນລົງທຶນເຂົ້າສູ່ລາວ 411 ໂຄງການ, ມູນຄ່າ 3,7 ຕື້ ໂດລາສະຫະລັດ, ທຶນສະສົມທັງໝົດປະຕິບັດໄດ້ 1,6 ຕື້ ໂດລາສະຫະລັດ ທຽບເທົ່າ 43% ມີຫຼາຍໂຄງການໄດ້ມີການເຄື່ອນໄຫວຢ່າງມີປະສິດທິພາບ.
ກ່ຽວກັບວັດທະນະທຳການທ່ອງທ່ຽວ ທັງສອງປະເທດໄດ້ສ້າງສາຍພົວພັນໂດຍກົງ, ຊ່ວຍເຫຼືອເຊິ່ງກັນ ແລະ ກັນຢ່າງມີປະສິດທິພາບ ແລະ ເຕັມໄປດ້ວຍຄວາມຮັບຜິດຊອບ ຫວຽດນາມ-ລາວ ໄດ້ນຳຍຸດທະສາດການທອ່ງທ່ຽວ 2016-2020 ກໍ່ຄືວິໄສທັດ 2020-2025 ເຊິ່ງມັນໄດ້ເປັນຈຸດແຂງຂອງການຮ່ວມມືດ້ານການທ່ອງທ່ຽວລະຫວ່າງສອງປະເທດ. ລາວເປັນໜຶ່ງໃນ 15 ອັນດັບທຳອິດຂອງຕະຫຼາດການທ່ອງທ່ຽວຂອງຫວຽດນາມ. ຫວຽດນາມເປັນຕະຫຼາດນຳສົ່ງນັກທ່ອງທ່ຽວໃຫຍ່ອັນດັບສອງຂອງລາວ.
ຕໍ່ກັບການຮ່ວມືດ້ານການສຶກສາ ໄດ້ກໍ່ສ້າງ ແລະ ຜັນຂະຫຍາຍ “ແຜນຍົກສູງຄຸນນະພາບ ແລະ ປະສິດທິພາບການຮ່ວມມື ຫວຽດນາມ-ລາວ ໃນຂົງເຂດການສຶກສາ ແລະ ພັດທະນາຊັບພະຍາກອນມະນຸດ ໄລຍະ 2011-2020”. ປະສານສົມທົບຊຸກຍູ້ຂະບວນການຮຽນພາສາຫວຽດນາມ ຢູ່ຕາມບັນດາໂຮງຮຽນ, ບັນດາສຳນັກງານອົງການຂອງລາວ. ປະຈຸບັນມີພະນັກງານ, ນັກສຶກສາລາວ ກວ່າ 14.000 ຄົນກຳລັງຄົ້ນຄວ້າສຶກສາຮ່ຳຮຽນຢູ່ທີ່ຫວຽດນາມ ແລະ ມີນັກ ສຶກສາຫວຽດນາມກຳລັງສຶກສາຄົ້ນຄວ້າຢູ່ ສປປ ລາວ ຈຳນວນ 250 ຄົນ.
ດ້ວຍປະຫວັດສາດຄວາມອຸດົມສົມບູນທາງດ້ານມູນເຊື້ອຄວາມສາມັກຄີ, ມິດຕະພາບ, ຄວາມຮ່ວມມືຢ່າງໃກ້ ຊິດຕິດພັນ ສັດຊື່ບໍລິສຸດ ເຊື່ອໝັ້ນວ່າ ໃນຊ່ວງເວລາທີ່ໃກ້ຈະມາເຖິງນີ້ ສາຍພົວພັນມິດຕະພາບທີ່ເປັນມູນເຊື້ອ, ສາມັກ ຄີພິເສດ, ຮ່ວມມືຮອບດ້ານ ຫວຽດນາມ-ລາວນັບມື້ພັດທະນາເຂົ້າສູ່ລວງເລິກ ແລະ ມີປະສິດທິຜົນຫຼາຍກວ່າເກົ່າ.
（ໄຊພອນ）
