ການພົບປະດັ່ງກ່າວ ແມ່ນເປັນໂອກາດອັນດີ ທີ່ສອງຫ້ອງວ່າການລັດຖະບານ ລາວ-ຫວຽດນາມ ຈະໄດ້ທົບທວນ ແລະ ຊຸກຍູ້ການຈັດຕັ້ງປະຕິບັດ ທິດທາງແຜນການຮ່ວມມື ຕາມທີ່ສອງຫ້ອງວ່າການ ໄດ້ລົງນາມຮ່ວມກັນ ຢູ່ນະຄອນຍາຈາງ, ແຂ້ງຮວ່າ ສສ ຫວຽດນາມ ໃນເດືອນ ຕຸລາ 2018 ແລະ ແລກປ່ຽນກ່ຽວກັບ ສະພາບການ ປະຕິບັດໜ້າທີ່ ຂອງສອງຫ້ອງວ່າການ ໃນການເປັນເສນາທິການໃຫ້ລັດຖະບານ ຂອງປະເທດຕົນ.
 |
ບັນຍາກາດກອງປະຊຸມ. (ພາບ ອ່າຍຄຳ)
ໃນໂອກາດດັ່ງກ່າວ, ທ່ານ ເພັດ ພົມພິພັກ ໄດ້ກ່າວວ່າ: ຜ່ານການປັບປຸງ ໂດຍລວມກໍເຫັນວ່າສາ ມາດປັບປຸງການປະຕິບັດໜ້າວຽກງານ ຂອງຫ້ອງວ່າການ ສຳນັກງານ ນາຍົກລັດຖະມົນຕີ ໄດ້ດີຂຶ້ນກວ່າເກົ່າ. ເຖິງຢ່າງໃດກໍຕາມ, ຖ້າທຽບໃສ່ ຄວາມຮຽກຮ້ອງ ຕ້ອງການ ຂອງໜ້າທີ່ວຽກງານໃນຕໍ່ໜ້າ ກໍຍັງເຫັນວ່າ ບາງວຽກຈຳນວນໜຶຶ່ງຕ້ອງໄດ້ສືບຕໍ່ປັບປຸງ ແລະ ຖອດຖອນບົດຮຽນ ກັບຫ້ອງວ່າການລັດຖະບານ ຫວຽດນາມ ເປັນຕົ້ນ ກົນໄກການຊຸກຍູ້ທ້ອງຖິ່ນ ໃຫ້ຈັດຕັ້ງປະຕິບັດວຽກງານຈຸດສຸມ ກໍຄື ການຕົກລົງຂອງລັດຖະບານ ເຖິງວ່າໄດ້ມີການຖອດຖອນບົດຮຽນຈາກຫວຽດນາມ ແລະ ໄດ້ຈັດຕັ້ງປະຕິບັດແລ້ວ ກໍເຫັນວ່າມີທ່າອ່ຽງດີຂຶ້ນ ແຕ່ກໍຍັງບໍ່ທັນສາມາດ ຕອບສະໜອງ ຕາມຄວາມຮຽກຮ້ອງ ຕ້ອງການຂອງຂັ້ນເທິງ ເທົ່າທີ່ຄວນ; ການພັດທະນາບຸກຄະລາກອນພາຍໃນ ຫສນຍ ເຖິງວ່າໄດ້ມີການກໍ່ສ້າງ, ບໍາລຸງ ແລະ ແລກປ່ຽນບົດຮຽນກັບ ຫລບ ຫວຽດນາມ ແຕ່ເຫັນວ່າພະນັກງານ ທີ່ມີຄວາມຊ່ຽວຊານ ແມ່ນຍັງມີຈຳກັດ; ການເປັນເສນາທິການ ແລະ ການປະສານງານ ບາງຄັ້ງກໍຍັງບໍ່ທັນກັບສະພາບການ ໂດຍສະເພາະແມ່ນການສະໜອງ ຂໍ້ມູນໃຫ້ຂັ້ນເທິງ; ເຄື່ອງມືທີ່ນໍາໃຊ້ເຂົ້າໃນ ກົງຈັກການບໍລິຫານລັດ ຍັງບໍ່ທັນສະໄໝ ແລະ ບໍ່ທັນພຽງ ພໍກັບຄວາມຕ້ອງການຕົວຈິງ, ຍັງບໍ່ທັນໄດ້ຮັບການປັບປຸງ ແລະ ນໍາໃຊ້ຢ່າງມີປະສິດທິພາບ, ຂາດບຸກຄະລາກອນ ທີ່ມີຄວາມສາມາດຄຸ້ມຄອງ-ນຳໃຊ້ລະບົບລັດຖະບານເອເລັກໂທຣນິກ.
ພ້ອມນີ້, ທ່ານ ມາຍ ຕ້ຽນ ຢຸ້ງ ກໍໄດ້ແຈ້ງໃຫ້ຊາບ ກ່ຽວກັບສະພາບການພັດທະນາດສດຖະກິດ-ສັງ ຄົມ ໂດຍຫຍໍ້ ຂອງ ສສ ຫວຽດນາມ ໃນໄລຍະ 6 ເດືອນຕົ້ນປີ 2019 ຊຶ່ງເຫັນວ່າເສດຖະກິດ-ສັງຄົມ ມີການຂະຫຍາຍຕົວໃນຈັງຫວະທີ່ດີ ແລະ ໜັກແໜ້ນ. ທ່ານ ມາຍ ຕ້ຽນ ຢຸ້ງ ກໍໄດ້ທົບທວນຄືນກ່ຽວກັບ ການຊຸກຍູ້ການຈັດຕັ້ງປະຕິບັດແຜນການຮ່ວມມື ລະຫວ່າງ ສອງຫ້ອງວ່າການ ຫວຽດນາມ-ລາວ, ທີ່ເປັນການປະກອບສ່ວນອັນສຳຄັນ ໃຫ້ແກ່ການເພີ່ມພຸນຄູນສ້າງ ແລະ ປະດັບຄວາມງົດງາມໃຫ້ແກ່ສາຍພົວພັນອັນເປັນມູນເຊື້ອ, ຄວາມສະມັກຄີແບບຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ສາຍພົວພັນ ລະຫວ່າງສອງຫ້ອງວ່າການ ໃຫ້ນັບມື້ແໜ້ນແຟ້ນ ແລະ ກ້າວໄປສູ່ລວງເລິກ.
ໃນການພົບປະຄັ້ງນີ້, ສອງຝ່າຍ ເຫັນດີເປັນເອກະກັນ ກ່ຽວກັບການຊຸກຍູ້ ການຈັດຕັ້ງປະຕິບັດ ແຜນການຮ່ວມມື ລະຫວ່າງ ລາວ-ຫວຽດນາມ ໃນຕໍ່ໜ້າ ແລະ ເຫັນດີວ່າ ສອງຫ້ອງວ່າການ ຈະປະສານສົມທົບ ກັນຢ່າງແໜ້ນແຟ້ນ ໃນການຕິດຕາມ ແລະ ຊຸກຍູ້ ບັນດາຂະແໜງການກ່ຽວຂ້ອງ ຂອງສອງປະເທດ ຈັດຕັ້ງປະຕິບັດ ທິດຊີ້ນໍາຂອງສອງກົມການເມືອງ, ສອງລັດຖະບານ ແລະ ແຜນການຮ່ວມມືລາວ-ຫວຽດ ນາມ ໃນປີ 2019 ໃຫ້ມີຜົນສໍາເລັດເປັນຢ່າງດີ. ພ້ອມນີ້, ສອງຝ່າຍມີຄວາມເຊື່ອໝັ້ນວ່າສອງຫ້ອງວ່າການ ຈະພ້ອມກັນສືບຕໍ່ຈັດຕັ້ງປະຕິບັດ ບົດບັນທຶກການຮ່ວມມືໃນໄລຍະປີ 2018-2020 ຢ່າງມີຜົນສຳເລັດ ແລະ ສະເໜີນໍາສະຫາຍລັດຖະມົນຕີ, ຫົວໜ້າຫ້ອງວ່າການລັດຖະບານຫວຽດນາມວ່າ ແຜນຮ່ວມມືໃນຕໍ່ໜ້າ ກໍຍັງຈະແມ່ນຫ້ອງວ່າການ ລັດຖະບານ ຫວຽດນາມ ເປັນຜູ້ຊ່ວຍເຫລືອ ແລະຖອດຖອນບົດຮຽນໃຫ້ຫ້ອງວ່າການ ສນຍ ລາວ ເປັນສ່ວນຫລາຍ.
（ແຫຼ່ງຂໍ້ມູນ： ສົມຫວັງ/ຂປລ）
