 |
ກອງປະຊຸມສາມັນຄົບຄະນະບໍລິຫານງານສະມາຄົມມິດຕະພາບ ລາວ-ຫວຽດນາມ ທົ່ວປະເທດ. (ພາບ:ຂປລ)
ຈຸດປະສົງຂອງກອງປະຊຸມ ແມ່ນເພື່ອຕີລາຄາຄືນ ຮອບດ້ານ ການຈັດຕັ້ງປະຕິບັດວຽກງານ ຂອງສະມາຄົມມິດຕະພາບ ລາວ-ຫວຽດນາມ ໃນໄລຍະ 2 ປີຜ່ານມາ (2016-2018) ແລະ ກຳນົດທິດທາງ, ແຜນການ ໃນຊຸມປີຕໍ່ໜ້າ (2019-2021). ໃນໄລຍະຜ່ານມາ ສະມາຄົມມິດຕະພາບ ລາວ-ຫວຽດນາມ ໄດ້ເອົາໃຈໃສ່ ເຄຶີື່ອນໄຫວ ຕາມພາລະບົດບາດ, ສິດ ແລະ ໜ້າທີ່ ໃນການເຮັດວຽກງານການທູດປະຊາຊົນ ໂດຍສະເພາະ ເຮັດໜ້າທີ່ເປັນຂົວຕໍ່ທີ່ດີ ໃນການຊຸກຍູ້ ການພົວພັນດ້ານລັດ ໃຫ້ມີປະສິດທິພາບ ແລະ ປະສິດທິຜົນຍິ່ງຂຶ້ນ, ເອົາໃຈໃສ່ສຶກສາ ອົບຮົມໃຫ້ຊາວໜຸ່ມ, ເຍົາວະຊົນ ກໍ່ຄື ຄົນລຸ່ນໜຸ່ມ ຂອງສອງປະເທດ ລາວ ແລະ ຫວຽດນາມ ໃຫ້ຮັບຮູ້ ແລະ ເຂົ້າໃຈຢ່າງເລິກ ຕໍ່ສາຍພົວພັນອັນພິເສດ ທີ່ຫາຍາກ ໃນການພົວພັນສາກົນ ຂອງ ສອງຊາດລາວ-ຫວຽດນາມ, ໂດຍສະເພາະ ໃຫ້ເຫັນໄດ້ການເ ສຍສະຫລະ ອັນໃຫຍ່ຫລວງ ຂອງການນຳລຸ່ນກ່ອນ ຕໍ່ການເສີມຂະຫຍາຍ ສາຍພົວພັນ ແບບພິເສດ, ບໍລິສຸດຜຸດຜ່ອງ ລະຫວ່າງ ສອງປະເທດ ເພື່ອພ້ອມກັນ ປົກປັກຮັກສາ ແລະ ເສີມຂະຫຍາຍ ໃຫ້ແຕກດອກ ອອກຜົນເລື້ອຍໆໄປ.
ສະມາຄົມມິດຕະພາບ ໄດ້ເຄື່ອນໄຫວ ຢ່າງມີຜົນສຳເລັດ ໃນຫລາຍດ້ານ ອັນພົ້ນເດັ່ນ ແມ່ນການຈັດກິດຈະກຳ ທີ່ເປັນປະຫວັດສາດ ເຊັ່ນ: ກິດຈະກຳ ເດີນຕາມຮອຍ ປະທານໂຮ່ຈິມິງ ແລະ ປະທານ ໄກສອນ ພົມວິຫານ, ງານບຸນມະໂຫລານ ລາວ-ຫວຽດນາມ, ງານແຂ່ງຂັນກິລາມິດຕະພາບ, ສ້າງເຮືອນມິດຕະພາບ ລາວ-ຫວຽດນາມ, ບັນດາກິດຈະກຳເຫລົ່ານັ້ນ ເປັນການປະກອບສ່ວນ ໃນການປົກປັກຮັກສາ ແລະ ເພີ່ມພູນຄູນສ້າງ ສາຍພົວພັນ ມິດຕະພາບ ທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ໄດ້ຮັບ ການເສີມຂະຫຍາຍ ທັງລວງກ້ວາງ ແລະ ລວງເລິກ.
ກອງປະຊຸມສາມັນຄົບຄະນະ ບໍລິຫານງານ ສະມາຄົມ ມິດຕະພາບ ລາວ-ຫວຽດນາມ ທົ່ວປະເທດ ໄດ້ດຳເນີນ ໄປດ້ວຍບັນດາຍາກາດ ຟົດຟື້ນ, ບັນດາຜູ້ແທນກອງປະຊຸມ ໄດ້ຜັດປ່ຽນກັນ ປະກອບຄຳເຫັນ ໃສ່ຮ່າງບົດ ລາຍງານ ຢ່າງກົງໄປກົງມາ ແລະ ມີຄວາມ ຮັບຜິດຊອບສູງ ເປັນຕົ້ນແມ່ນ ປະກອບຄຳເຫັນ ໃສ່ບັນດາກິດຈະກຳ, ທິດທາງແຜນການ ເພື່ອກະກຽມ ສະເຫລີມສະຫລອງ ວັນສຳຄັນຕ່າງໆ ຂອງສອງຊາດ ທີ່ຈະມາເຖິງນີ້.
（ແຫຼ່ງຂໍ້ມູນ： ຂປລ）
