ທ່ານ ໄຊສົມພອນ ພົມວິຫານ ແລະ ທ່ານນາງ ເຈືອງ ທິ ມາຍ.(ພາບ:pasaxon.org.la)

ທີ່ສຳນັກງານສູນກາງແນວລາວສ້າງຊາດ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັັກ ປະທານສູນກາງແນວລາວສ້າງຊາດ (ສນຊ) ໄດ້ໃຫ້ກຽດຕ້ອນຮັບ ທ່ານນາງ ເຈືອງ ທິ ມາຍ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະຂົນຂວາຍປະຊາຊົນສູນກາງພັກກອມມູນິດຫວຽດນາມ ພ້ອມດ້ວຍຄະນະ ແລະ ເປີດກອງປະຊຸມປາຖະກະຖາໃນຫົວຂໍ້ "ວຽກງານຂົນຂວາຍປະຊາຊົນ, ວຽກງານແນວໂຮມ ແລະ ອົງການຈັດຕັ້ງມະຫາຊົນຂອງພັກໃນເງື່ອນໄຂພັດທະນາເສດຖະກິດຕະຫຼາດຕາມທິດສັງຄົມນິຍົມ ແລະ ການເຊື່ອມໂຍງສາກົນ "ເນື່ອງໃນໂອກາດທີ່ຄະນະຜູ້ແທນດັ່ງກ່າວເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 22-24 ພຶດສະພາ 2019 ນີ້.

ໃນກອງປະຊຸມ ທ່ານ ໄຊສົມພອນ ພົມວິຫານ ໄດ້ກ່າວບາງຕອນວ່າ: ເພື່ອເປັນການຮຽນຮູ້ແນວທາງນະໂຍບາຍ, ແລກປ່ຽນບົດຮຽນຈາກ ພຶດຕິກຳຕົວຈິງໃນການຊີ້ນຳ-ນຳພາຂອງພັກກອມມູນິດ ຫວຽດນາມ ຕໍ່ວຽກງານຂົນຂວາຍປະຊາຊົນ, ວຽກງານແນວໂຮມ ແລະ ອົງການຈັດຕັ້ງມະຫາຊົນຂອງພັກໃນເງື່ອນໄຂໃໝ່, ພ້ອມກັນນັ້ນ, ກໍເປັນການປະກອບສ່ວນອັນສຳຄັນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ລັດ ແລະ ປະຊາຊົນສອງປະເທດລາວ-ຫວຽດນາມ ໃຫ້ນັບມື້ນັບມີປະສິດທິຜົນຍິ່ງໆຂຶ້ນເວົ້າລວມ, ເວົ້າສະເພາະກໍແມ່ນການຈັດຕັ້ງຜັນຂະຫຍາຍສັນ ຍາຮ່ວມມືລະຫວ່າງສູນກາງແນວລາວສ້າງຊາດ ແລະ ຄະນະຂົນຂວາຍປະຊາຊົນສູນກາງພັກກອມມູນິດຫວຽດນາມ ຢ່າງເປັນຮູບປະທຳຕົວຈິງ. ພ້ອມນັ້ນ, ໃນກອງປະຊຸມຜູ້ເຂົ້າຮ່ວມໄດ້ຮັບຟັງປາຖະກະຖາກ່ຽວກັບວຽກງານຂົນຂວາຍມະຫາຊົນ, ຍົກສູງບົດບາດນຳພາຂອງພັກກອມມູນິດຫວຽດນາມຕໍ່ບົດບາດແນວໂຮມປະເທດຊາດຫວຽດນາມ ແລະ ອົງການຈັດຕັ້ງມະຫາຊົນຂອງພັກໃນເງື່ອນໄຂແຫ່ງການຫັນໄປສູ່ເສດຖະກິດຕະຫຼາດ ແລະ ການເຊື່ອມໂຍງສາກົນ.

ໃນວັນດຽວກັນກໍໄດ້ມີການປະດັບຫຼຽນໄຊແຮງງານຂອງລັດຖະບານ ສສ ຫວຽດນາມ ໃຫ້ບັນດາຄະນະກຳມະການສູນກາງແນວລາວສ້າງຊາດຄື: ປະດັບຫຼຽນໄຊແຮງງານ ຊັ້ນ I ໃຫ້ທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ; ປະດັບຫຼຽນໄຊແຮງງານຊັ້ນ II ໃຫ້ທ່ານ ຈັນທະວົງ ແສນອາມາດມົນຕີ ຮອງປະທານສູນກາງແນວລາວສ້າງຊາດ ແລະ ປະດັບຫຼຽນໄຊແຮງງານຊັ້ນ III ມີ 5 ທ່ານຄື: ທ່ານ ຄຳຫຼ້າ ລິ້ງນະສອນ ຮອງປະທານສູນກາງແນວລາວສ້າງຊາດ; ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ; ທ່ານ ສົມອົກ ກິ່ງສະດາ ຮອງປະທານສູນກາງແນວລາວສ້າງຊາດ; ທ່ານ ເຢ່ຍເກີຢາ ໜໍ່ຈໍ່ຈົງຕົວ ຮອງປະທານສູນກາງແນວລາວສ້າງຊາດ ແລະ ທ່ານນາງ ຍອດແກ້ວມະນີ ສຸພານຸວົງ ຮອງປະທານສູນກາງແນວລາວສ້າງຊາດ. ໃຫ້ກຽດປະດັບຫຼຽນໄຊແຮງງານໃນຄັ້ງນີ້ ໂດຍທ່ານນາງ ເຈືອງ ທິ ມາຍ ກຳມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະຂົນຂວາຍປະຊາຊົນສູນກາງພັກກອມມູນິດຫວຽດນາມ.

（ແຫຼ່ງ​ຂໍ້​ມູນ​： pasaxon.org.la）