ທ່ານ ຫງວຽນແມ້ງຮຸ່ງ ລັດຖະມົນຕີກະຊວງຖະແຫຼງຂ່າວ ແລະສື່ສານຫວຽດນາມ ແລະທ່ານທັນສະໄໝ ກົມມະສິດ ລັດຖະມົນຕີກະຊວງໄປສະນີ, ໂທລະຄົມມະນາຄົມ ແລະສື່ສານລາວ ເຊັນບົດບັນທຶກການຮ່ວມມື. (ພາບ: ສຳນັກຂ່າວສານຫວຽດນາມ)

ກ່າວຄຳເຫັນທີ່ການພົບປະເຈລະຈາ, ທ່ານ ທັນສະໄໝ ກົມມະສິດ ຖືວ່າສຳລັບປະເທດລາວ, ເລື່ອງພັດທະນາຂະແໜງໄປສະນີ - ໂທລະຄົມມະນາຄົມ ແລະເຕັກໂນໂລຢີ - ຂໍ້ມູນຂ່າວສານຍັງປະສົບກັບສິ່ງທ້າທາຍຫຼາຍຢ່າງ, ລາວ ປາດຖະໜາຢາກໄດ້ແລກປ່ຽນ, ຮ່ວມມືກັບບັນດາປະເທດໃນພາກພື້ນ ແລະສາກົນ ເພື່ອພັດທະນາຂະແໜງໄປສະນີ - ໂທລະຄົມມະນາຄົມ ແລະເຕັກໂນໂລຢີ - ຂໍ້ມູນຂ່າວສານ, ປະກອບສ່ວນພັດທະນາເສດຖະກິດ - ສັງຄົມ, ສ້າງເງື່ອນໄຂສະດວກ ເພື່ອໃຫ້ປະເທດລາວ ເຊ່ືອມໂຍງເຂົ້າກັບພາກພື້ນ ແລະສາກົນ.

ທ່ານ ທັນສະໄໝ ກົມມະສິດ ກໍປາດຖະໜາວ່າ ລັດຖະບານຫວຽດນາມ ແລະກະຊວງຖະແຫຼງຂ່າວ ແລະສື່ສານຫວຽດນາມ ສືບຕໍ່ຊ່ວຍເຫຼືອ ລາວ ໃນການກໍ່ສ້າງແຫຼ່ງຊັບພະຍາກອນມະນຸດໃນຂົງເຂດໄປສະນີ - ໂທລະຄົມມະນາຄົມ ແລະເຕັກໂນໂລຢີ - ຂໍ້ມູນຂ່າວສານ.

ກ່າວຄຳເຫັນທີ່ການພົບປະເຈລະຈາ, ທ່ານ ຫງວຽນແມ້ງຮຸ່ງ ໃຫ້ຮູ້ວ່າກະຊວງຖະແຫຼງຂ່າວ ແລະສື່ສານຫວຽດນາມ ຈະສືບຕໍ່ຮ່ວມມືກັບກະຊວງໄປສະນີ, ໂທລະຄົມມະນາຄົມ ແລະສື່ສານລາວ ໃນທຸກຂົງເຂດຢ່າງແໜ້ນແຟ້ນ, ໃນນັ້ນບຸລິທະສິດການກໍ່ສ້າງແຫຼ່ງຊັບພະຍາກອນມະນຸດທີ່ມີລະດັບສູງໃຫ້ແກ່ ລາວ, ພ້ອມທັງເນັ້ນໜັກວ່າກະຊວງຖະແຫຼງຂ່າວ ແລະສື່ສານຫວຽດນາມ ພ້ອມແລ້ວທີ່ຈະແບ່ງປັນກັບກະຊວງໄປສະນີ, ໂທລະຄົມມະນາຄົມ ແລະສື່ສານລາວ ກ່ຽວກັບບົດຮຽນໃນການພັດທະນາຂະແໜງໄປສະນີ - ໂທລະຄົມມະນາຄົມ ແລະເຕັກໂນໂລຢີ - ຂໍ້ມູນຂ່າວສານໃນຍຸກສະໄໝເຕັກໂນໂລຢີດີຈີຕອນ.

（ແຫຼ່ງ​ຂໍ້​ມູນ​： ແສງເດືອນ/ກປ.ອອນໄລ）