ຕອນເຊົ້າວັນທີ 24 ກຸມພາ, ຢູ່ນະຄອນຫຼວງວຽງຈັນ, ພາຍຫຼັງພິທີຕ້ອນຮັບຢ່າງເປັນທາງການ, ໄດ້ດໍາເນີນການເຈລະຈາລະຫວ່າງ ທ່ານເລຂາທິການໃຫຍ່, ປະທານປະເທດ ຫງວຽນຝູຈ້ອງ ແລະ ທ່ານເລຂາທິການໃຫຍ່, ປະທານປະເທດລາວ ບຸນຍັງ ວໍລະຈິດ ບົນພື້ນຖານ ເສີມຂະຫຍາຍຈິດໃຈເປັນເອກະລາດ, ເປັນເຈົ້າຕົນເອງ ແລະ ເຈດຈໍານົງເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງ, ເສີມຂະຫຍາຍທ່າແຮງ ແລະ ກໍາລັງຄວາມສາມາດຂອງແຕ່ລະປະເທດ ບົນຫຼັກການສະເໝີພາບ, ຕ່າງຝ່າຍຕ່າງມີຜົນປະໂຫຍດ, ພ້ອມທັງສະຫງວນບູລິມະສິດ, ເອື້ອອໍານວຍຄວາມສະດວກໃຫ້ແກ່ກັນ ດ້ວຍລັກສະນະແຫ່ງການພົວພັນແບບພິເສດ ຫວຽດນາມ - ລາວ. ບົນເນື້ອໃນຈິດໃຈນັ້ນ, ສອງຝ່າຍເຫັນດີ ສືບຕໍ່ເພີ່ມທະວີການຮ່ວມມືໃນທຸກຂົງເຂດ, ຮັກສາການພົວພັນແລກປ່ຽນຄະນະຜູ້ແທນຂັ້ນສູງເປັນປະຈໍາ, ແບ່ງປັນບົດຮຽນໃນການພັດທະນາເສດຖະກິດ-ສັງຄົມ, ໂດຍສະເພາະແມ່ນສ້າງເສດຖະກິດມະຫາພາກເປັນປົກກະຕິ ແລະ ເປີດກວ້າງການພົວພັນ, ເຊື່ອມໂຍງເຂົ້າກັບສາກົນ. ສອງຝ່າຍເຫັນດີເພີ່ມທະວີການຮ່ວມມືທາງດ້ານປ້ອງກັນຊາດ, ປ້ອງກັນຄວາມສະຫງົບ, ຮັກສາສະຖຽນລະພາບດ້ານການເມືອງ, ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມ ຢູ່ແຕ່ລະປະເທດ; ສ້າງເສັ້ນຊາຍແດນລະຫວ່າງສອງປະເທດໃຫ້ມີສະຖຽນລະພາບ ແລະ ໝັ້ນຄົງ.

ການນໍາສອງທ່ານ ຢັ້ງຢືນວ່າ ໃນສະພາບການຜັນແປຢ່າງສັບສົນ ແລະ ໄວວາຄືໃນປັດຈຸບັນ, ສອງຝ່າຍສືບຕໍ່ສົມທົບກັນຢ່າງແໜ້ນແຟ້ນ, ແບ່ງປັນຂໍ້ມູນຂ່າວສານຢ່າງທັນການ, ມີປະສິດທິຜົນ ແລະ ສະໜັບສະໜູນເຊິ່ງກັນ ແລະກັນ, ໂດຍສະເພາະແມ່ນໃນຂອບເຂດການຮ່ວມມື ອາຊຽນ, ສະຫະປະຊາຊາດ, ບັນດາກົນໄກຮ່ວມມືອະນຸພາກພື້ນແມ່ນໍ້າຂອງ.... ພ້ອມທັງເນັ້ນໜັກເຖິງຄວາມສໍາຄັນຂອງເລື່ອງຮັກສາສັນຕິພາບ, ສະຖຽນລະພາບ,ຄວາມສະຫງົບປອດໄພ ຢູ່ທະເລຕາເວັນອອກ; ສະໜັບສະໜູນບົດບາດ ແລະ ຫຼັກການຕ່າງໆຂອງ ອາຊຽນ; ເຫັນດີຊຸກຍູ້ການແກ້ໄຂບັນດາການຂັດແຍ້ງກັນຢູ່ທະເລຕາເວັນອອກ ໂດຍສັນຕິວິທີບົນພື້ນຖານເຄົາລົບກົດໝາຍສາກົນ, ປະກອບສ່ວນຮັກສາສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາຢູ່ພາກພື້ນ ແລະ ໃນໂລກ.

ພາຍຫຼັງສິ້ນສຸດການເຈລະຈາ, ທ່ານເລຂາທິການໃຫຍ່, ປະທານປະເທດ ຫວຽດນາມ ຫງວຽນຝູຈ້ອງ ແລະ ທ່ານເລຂາທິການໃຫຍ່,ປະທານປະເທດ ລາວ ບຸນຍັງ ວໍລະຈິດ ໄດ້ເປັນສັກຂີພິຍານພິທີລົງນາມໃນເອກະສານ ຮ່ວມມື 9 ສະບັບ ລະຫວ່າງ ບາງກະຊວງດຂະແໜງການຂອງສອງປະເທດ.

（ແຫຼ່ງ​ຂໍ້​ມູນ​： ຂ​ປ​ລ）