 |
ກອງປະຊຸມສະຫລຸບສົກຮຽນ 2017-2018 ແລະ ແຜນການປີ 2018-2019 ຂອງນັກສຶກສາລາວ ທີ່ ສສ ຫວຽດນາມ
ໃຫ້ກຽດເຂົ້າຮ່ວມຂອງ ທ່ານ ວຽງໄຊ ດາລາແສນ ອັກຄະລັດຖະທູດທີ່ປຶກສາ ແຫ່ງ ສປປ ລາວ ປະຈຳ ສສ ຫວຽດນາມ, ທ່ານ ກອງສີ ແສງມະນີ ຮອງລັດຖະມົນຕີ ກະຊວງສຶກສາ ແລະ ກິລາລາວ, ທ່ານ ຫງວຽນ ຮາຍແທ໋ງ ຮອງກົມພົວພັນຮ່ວມມືສາກົນ ກະຊວງສຶກສາ ແລະ ບຳລຸງສ້າງ ຫວຽດນາມ, ພ້ອມການນຳ ຈາກບັນດາມະຫາວິທະຍາໄລ, ສະຖາບັນ ແລະ ນັກສຶກສາລາວ ເຂົ້າຮ່ວມ.
ກອງປະຊຸມຄັ້ງນີ້, ເພື່ອແນໃສ່ຕີລາຄາການຮໍ່າຮຽນຂອງນັກສຶກສາລາວ ຢູ່ຫວຽດນາມ ໃນສົກຮຽນ 2017-2018 ເຊິ່ງປະຕິບັດຕາມແຜນຮ່າງ “ຍົກສູງຄຸນນະພາບ ແລະ ປະສິດທິຜົນການຮ່ວມມືລະຫວ່າງ ຫວຽດນາມ-ລາວ ໃນຂົງເຂດສຶກສາ ແລະ ພັດທະນາແຫລ່ງຊັບພະຍາກອນມະນຸດ” ທີ່ສອງ ລັດຖະບານ ໄດ້ລົງນາມ ແລະ ປະຕິບັດ ໃນໄລຍະ 2011–2020.
ໃນໄລຍະຜ່ານມາ, ນັກສຶກສາລາວ 16.400 ກວ່າຄົນ ທີ່ພວມຮໍ່າຮຽນຢູ່ບັນດາໂຮງຮຽນໃນທົ່ວປະເທດຫວຽດນາມໄດ້ເອົາໃຈໃສ່ໃນການສຶກສາຄົ້ນຄວ້າຮ່ຳຮຽນ ແລະ ດ້ວຍຄວາມເອົາໃຈໃສ່, ການຊ່ວຍເຫລືອຂອງພັກ, ລັດ ແລະ ບັນດາກະຊວງ, ຂະແໜງການຂອງຫວຽດນາມໄດ້ສ້າງເງື່ອນໄຂສະດວກໃນວຽກງານຄົ້ນຄວ້າ, ຮໍ່າຮຽນຂອງນັກສຶກສາລາວ. ກອງປະຊຸມສະຫລຸບສົກຮຽນຄັ້ງນີ້, ສະຖານທູດລາວ ປະຈຳຫວຽດນາມ ໄດ້ມອບໃບຍ້ອງຍໍໃຫ້ນັກຮຽນ, ນັກສຶກສາລາວ ທີ່ດີເດັ່ນດ້ານການຮຽນ, ຫ້າວຫັນປະກອບສ່ວນເຂົ້າໃນການເຄື່ອນໄຫວນອກຫລັກສູດປະຈຳສົກຮຽນ 2017-2018 ມີທັງໝົດ 1.300 ກວ່າຄົນ, ໃນນີ້ຢູ່ແຂວງ ເຫງະອານ ມີ 85 ຄົນ.
（ແຫຼ່ງຂໍ້ມູນ： ຂປລ）
