 |
ທ່ານນາງ ຫງວ໋ຽນ ຖິກີມເງິນ ປະທານສະພາແຫ່ງຊາດຫວຽດນາມ ຕ້ອນຮັບ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.
ຕອນບ່າຍ ຂອງວັນທີ 6 ເດືອນມັງກອນ, ຢູ່ທີ່ສະພາແຫ່ງຊາດຫວຽດນາມ ທ່ານ ນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ໄດ້ພົບປະກັບ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປລາວ.
ຕາງຫນ້າລັດຖະບານແຫ່ງ ສສ ຫວຽດນາມ, ທ່ານ ນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ໄດ້ໃຫ້ກຽດຕ້ອນຮັບ ທ່ານນາຍົກລັດຖະມົນຕີ ທອງລຸນ ສີສຸລິດ ແລະ ຄະນະຜູ້ແທນຂັ້ນສູງຂອງລັດຖະບານລາວ ທີ່ເຂົ້າຮ່ວມກອງປະຊຸມ ກຳມະການຮ່ວມມື ຫວຽດນາມ-ລາວ ຄັ້ງທີ 41 ຢູ່ ຫວຽດນາມ ປີ 2019.
ທ່ານປະທານສະພາແຫ່ງຊາດຫວຽດນາມ ຕີລາຄາສູງ ກອງປະຊຸມ ກຳມະການຮ່ວມມື ຫວຽດນາມ-ລາວ ຄັ້ງທີ 41 ໂດຍການຮ່ວມເປັນປະທານ ນາຍົກລັດຖະມົນຕີຂອງສອງປະເທດ, ນັ້ນສະແດງໃຫ້ເຫັນຄວາມຕັດສິນໃຈ ຂອງລັດຖະບານທັງສອງຝ່າຍ ໃນການປ່ຽນຈາກເນື້ອສັນຍາທີ່ໄດ້ເຊັນລົງນາມນຳກັນຂອງການນຳຂັ້ນສູງຂອງສອງປະເທດໃຫ້ປະກົດຜົນເປັນຈິງ ; ຢັ້ງຢືນວ່າ ສະພາແຫ່ງຊາດຫວຽດນາມ ຈະສະຫນັບສະຫນູນ ລັດຖະບານ ເພື່ອເສີມຂະຫຍາຍການຮ່ວມມື ກັບ ລັດຖະບານລາວ ສືບຕໍ່ຕິດຕາມກວດກາສົ່ງເສີມການຈັດຕັ້ງປະຕິບັດສັນຍາແລະຂໍ້ຕົກລົງ ລະຫວ່າງ ສອງ ປະເທດ ໃຫ້ບັນລຸຜົນແລະມີປະສິດທິຜົນສູງສຸດ.
ທ່ານປະທານສະພາແຫ່ງຊາດຫວຽດນາມ ໄດ້ສະແດງຄວາມຍິນດີຕໍ່ຄວາມສໍາເລັດທີ່ປະເທດລາວ ບັນລຸໄດ້ໃນໄລຍະຜ່ານມາ; ຄະນະດຽວກັນໄດ້ກໍ່ສະແດງຄວາມເຊື່ອຫມັ້ນວ່າ ພາຍໃຕ້ການນໍາພາຂອງພັກປະຊາທິປະໄຕປະຊາຊົນລາວ, ລັດຖະບານ, ການຕິດຕາມກວດກາ-ກວດສອບຂອງສະພາແຫ່ງຊາດ, ປະເທດລາວ ຈະສືບຕໍ່ເສີມຂະຫຍາຍບັນດາຜົນສໍາເລັດ ແລະ ໄຊຊະນະອັນຍິ່ງໃຫຍ່ໄດ້ເປັນຢ່າງດີ, ປະຕິບັດ ມະຕິ ຂອງກອງປະຊຸມພັກ ຄັ້ງທີ 10 ແລະ ແຜນພັດທະນາເສດຖະກິດ 5 ປີ ຄັ້ງທີ VIII (ໄລຍະ 2016-2020).
ນາຍົກລັດຖະມົນຕີແຫ່ງ ສປປ ລາວ ທ່ານ ທອງລຸນ ສີສຸລິດ ໄດ້ສະແດງຄວາມຂອບໃຈ ທ່ານ ນາງ ຫງວຽນ ຖິກິມເງິນ ປະທານສະພາແຫ່ງຊາດຫວຽດນາມ ທີ່ສະຫຼະເວລາອັນມຄ່າໃຫ້ການຕ້ອນຮັບຢ່າງອົບອຸ່ນ ແລະ ໄມຕີຈິດ ແລະ ລາຍງານຜົນຂອງກອງປະຊຸມ ຄະນະກຳມະການຮ່ວມມື ຫວຽດນາມ-ລາວ ຄັ້ງທີ 41 ສຳເລັດລົງຢ່າງຈົບງາມ.
ໃນນັ້ນ, ທັງສອງຝ່າຍ ຕີລາຄາສູງຜົນສໍາເລັດໃນປີ 2018 ທີ່ຜ່ານມາ, ແລກປ່ຽນຄວາມຫຍຸ້ງຍາກທີ່ຍັງຄ້າງຄາ, ຈາກນັ້ນຖອດຖອນເອົາບົດຮຽນ; ຢືນຢັນວ່າປີ 2019 ຈະສືບຕໍ່ເສີມຂະຫຍາຍບັນດາໝາກຜົນກໍ່ຄືບັນດາຜົນສໍາເລັດທີ່ໄດ້ຮັບ. ທີ່ກອງປະຊຸມ, ທັງສອງຝ່າຍໄດ້ເຊັນບົດບັນທຶກການຮ່ວມມື 6 ສະບັບ, ຢືນຢັນວ່າພວກເຂົາຈະປະສານງານຢ່າງຈິງຈັງໃນການກະກຽມໂຄງການທີ່ສໍາຄັນ ລະຫວ່າງ ສອງປະເທດ.
ໃນກອງປະຊຸມ, ທັງສອງປະເທດໄດ້ສະແດງຄວາມຍິນດີ ຕໍ່ກັບສາຍພົວພັນຮ່ວມມື ລະຫວ່າງ ສອງສະພາແຫ່ງຊາດ ໃນໄລຍະທີ່ຜ່ານມາເຊິ່ງໄດ້ຖືກຈັດຕັ້ງປະຕິບັດຢ່າງກວ້າງຂວາງເລິກເຊິ່ງຂື້ນກວ່າເກົ່າ, ບົນພື້ນຖານຄວາມເປັນຈິງ ແລະ ມີປະສິດທິຜົນ. ໃນນັ້ນມີການຈັດຕັ້ງປະຕິບັດສັນຍາການຮ່ວມມື ລະຫວ່າງສອງສະພາແຫ່ງຊາດໃນປີ 2017.
ສອງຝ່າຍຍັງໄດ້ແບ່ງປັນປະສົບການທີ່ສໍາຄັນໃນການກໍ່ສ້າງກົດຫມາຍ; ແລກປ່ຽນປະສົບການກ່ຽວກັບ ປ່ອນບັດໄວ້ວາງໃຈບັນດາຕຳແໜ່ງຕ່າງໆ ໂດຍ ສະພາແຫ່ງຊາດເປັນ ຈັດ ແລະ ອະນຸມັດ; ປະສານສົມທົບຢ່າງແຫນ້ນແຟ້ນ ໃນການຕິດຕາມກວດກາ ການປະຕິບັດສັນຍາ ການຮ່ວມມືລະຫວ່າງສອງປະເທດ.
ທ່ານປະທານສະພາແຫ່ງຊາດ ຫວຽດນາມໄດ້ກ່າວຕື່ມອີກວ່າ, ສະພາແຫ່ງຊາດຫວຽດນາມ ຈະປະສານສົມທົບຢ່າງໃກ້ຊິດກັບສະພາແຫ່ງຊາດລາວ ເພື່ອສືບຕໍ່ສ້າງເງື່ອນໄຂທີ່ດີ ໃຫ້ສອງລັດຖະບານ ຜັນຂະຫຍາຍບັນດາເນື້ອໃນສັນຍາຂອງສອງລັດຖະບານ ຢ່າງມີປະສິດທິຜົນ; ປັບປຸງ-ສົ່ງເສີມ ກົນໄກ ແລະ ນະໂຍບາຍ ເພື່ອສ້າງຄວາມສະດວກ ໃນການຜັນຂະຫຍາຍ ບັນດາໂຄງການ ລະຫວ່າງ ສອງປະເທດ ແລະ ບັນດາເນື້ອໃນທີ່ ສອງລັດຖະບານ ໄດ້ຕົກລົງເຫັນດີເປັນເອກກະພາບນຳກັນໃນກອງປະຊຸມຄັ້ງທີ 41, ປະກອບສ່ວນເຂົ້າໃນການຈັດຕັ້ງປະຕິບັດ ຢ່າງມີໄຊ ບັນດາແຜນການ ຮ່ວມມືລະຫວ່າງສອງລັດຖະບານໃນປີ 2019.
ສອງຝ່າຍໄດ້ສະແດງຄວາມເຊື່ອຫມັ້ນວ່າການພົວພັນມິດຕະພາບ, ຄວາມສາມັກຄີປອງດອງແລະການຮ່ວມມື ຢ່າງກວ້າງຂວາງ ລະຫວ່າງ ຫວຽດນາມ ແລະ ລາວ ຈະສືບຕໍ່ເລິກເຊິ່ງດ້ວຍບັນດາກະຊວງ, ທະບວງ ແລະ ຂະແໜງການຈັດຕັ້ງປະຕິບັດຢ່າງຮີບດ່ວນ ຢ່າງມີປະສິດທິຜົນບັນດາສັນຍາລະດັບສູງທີ່ໄດ້ເຊັນລົງນາມຮ່ວມກັນ.
ສອງປະເທດສືບຕໍ່ສົ່ງເສີມການຮ່ວມມືໃນຂົງເຂດການເມືອງ, ການຕ່າງປະເທດ, ຄວາມຫມັ້ນຄົງແຫ່ງຊາດ, ວັດທະນະທໍາ, ການສຶກສາ ແລະ ບຳລຸງສ້າງ ຊັບພະຍາກອນມະນຸດ, ສາທາລະນະສຸກ, ການທ່ອງທ່ຽວ ແລະ ການແລກປ່ຽນປະຊາຊົນບົນພື້ນຖານ ຂໍ້ຕົກລົງສະເພາະແລະແຜນການຮ່ວມມື ລະຫວ່າງ ກະຊວງແລະອົງການທີ່ກ່ຽວຂ້ອງຂອງສອງປະເທດ.
ປະທານສະພາແຫ່ງຊາດຫວັງເປັນຢ່າງຍິ່ງວ່າ ຄວາມຫຍຸ້ງຍາກ ແລະ ບັນຫາຕ່າງໆຂອງທຸລະກິດຈະຖືກແກ້ໄຂ. ບັນດາໂຄງການພະລັງງານແລະການຂົນສົ່ງສໍາຄັນ ລະຫວ່າງ ສອງປະເທດຈະໄດ້ຮັບສົ່ງເສີມ.
ໂອກາດນີ້ທ່ານປະທານສະພາແຫ່ງຊາດ ກໍ່ຫວັງເປັນຢ່າງຍິ່ງວ່າ ລັດຖະມົນຕີສອງຝ່າຍຂອງສອງປະເທດຈະສືບຕໍ່ຊີ້ນໍາບັນດາກະຊວງ ແລະ ຂະແໜງການຕ່າງໆຂອງທັງສອງ ປະເທດປະສານສົມທົບໃນການຈັດຕັ້ງປະຕິບັດບັນດາຂໍ້ຕົກລົງກ່ຽວກັບໂຄງການກໍ່ສ້າງສະພາແຫ່ງຊາດຂອງປະເທດລາວ ເພື່ອຮັບປະກັນຄຸນນະພາບແລະຄວາມຄືບຫນ້າຂອງໂຄງການ.
（ຫັດທະບູນ）
