 |
ທ່ານລັດຖະມົນຕີ ໂງຊວນລິກ ແລະທ່ານລັດຖະມົນຕີ ຈັນສະໝອນ ຈັນຍາລາດ ເຊັນແຜນການຮ່ວມມືປະຈໍາປີ 2019. (ພາບ: ທູຈາງ)
ເຊິ່ງການພົບປະກັນຄັ້ງນີ້ຂອງການນຳຂັ້ນສູງ ຂອງສອງກະຊວງປ້ອງກັນປະເທດ ໄດ້ພ້ອມກັນຕີລາຄາສູງ ຕໍ່ສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມື ຮອບດ້ານ ລະຫວ່າງ ສອງຊາດ, ສອງກອງທັບລາວ-ຫວຽດນາມ, ຫວຽດນາມ-ລາວ ທີ່ມີມູນເຊື້ອມາ ແຕ່ດົນນານແລ້ວນັ້ນ, ນັບມື້ໄດ້ ຮັບການເສີມຂະຫຍາຍໃຫ້ແໜ້ນແຟ້ນຈະເລີນງອກງາມ ແລະ ກ້າວສູ່ລວງເລິກ.
ໂອກາດດັ່ງກ່າວ ສະຫາຍ ພົນ ເອກ ຈັນສະໝອນ ຈັນຍາລາດ ໄດ້ຕາງໜ້າໃຫ້ການນຳພັກ-ລັດ ຕະຫຼອດນາຍ ແລະ ພົນທະຫານທົ່ວກອງທັບປະຊາຊົນລາວ ສະແດງຄວາມຂອບອົກຂອບໃຈ ຢ່າງລົ້ນເຫຼືອ ໂດຍຜ່ານສະຫາຍ ພົນເອກ ໂງຊວນລິກ ໄປຍັງການ ນຳພັກ-ລັດ ກອງທັບ ແລະ ປະຊາຊົນຫວຽດນາມທີ່ຍາມໃດກໍຈິງໃຈຊ່ວຍເຫຼືອ ພັກ-ລັດ, ກອງທັບ ແລະ ປະຊາຊົນລາວ ໃນພາລະກິດຕໍ່ສູ້ປົດປ່ອຍຊາດ ກໍຄືປົກປັກຮັກສາ ແລະ ສ້າງສາພັດທະນາ ປະເທດຊາດ, ພ້ອມກັນນັ້ນກໍສະເໜີຫຼາຍບັນຫາ ທີ່ສຳຄັນໃນການພົວພັນຮ່ວມມືໃນຕໍ່ໜ້າ: ເປັນຕົ້ນແມ່ນ ສະເໜີໃຫ້ກອງທັບປະຊາຊົນ ຫວຽດນາມ ຊ່ວຍເຫຼືອໃນການກໍ່ສ້າງໂຮງຮຽນຊົນເຜົ່າກອງທັບ, ຊ່ວຍກໍ່ສ້າງບຳລຸງພະນັກງານຂັ້ນນຳຂອງກອງທັບປະຊາຊົນລາວ ແລະ ຂະແໜງການອື່ນໆ ທີ່ທັງສອງຝ່າຍເຫັນດີຮ່ວມກັນ.
ໂອກາດດັ່ງກ່າວ ສະຫາຍພົນ ເອກ ໂງຊວນລິກ ກໍສະແດງຄວາມ ຂອບອົກຂອບໃຈອັນຈິງໃຈຕໍ່ ສະຫາຍ ພົນເອກ ຈັນສະໝອນ ຈັນຍາລາດ ລັດຖະມົນຕີກະຊວງ ປ້ອງກັນປະເທດ ແຫ່ງ ສປປ ລາວ, ເຊິ່ງຍາມໃດກໍໄດ້ປະກອບສ່ວນອັນສຳຄັນໃນການສ້າງສາຍພົວພັນຮ່ວມມືຮອບດ້ານ ລະຫວ່າງ ສອງຊາດ, ສອງກອງທັບ ຫວຽດນາມ-ລາວ, ລາວ-ຫວຽດນາມ ແລະ ອີກເທື່ອໜຶ່ງກໍສະແດງ ຄວາມຊົມເຊີຍທີ່ສະຫາຍໄດ້ຮັບການເລື່ອນຊັ້ນໃໝ່ນີ້ເປັນຂີດໝາຍບາດກ້າວແຫ່ງການເຕີບໃຫຍ່ຂະຫຍາຍຕົວ ຂອງກອງທັບປະຊາຊົນລາວ ຕໍ່ການສະເໜີຂອງ ສະຫາຍນັ້ນແມ່ນພວກເຮົາມີຄວາມເຫັນດີໃນການຮ່ວມມືຊ່ວຍເຫຼືອເຊິ່ງກັນ ແລະ ກັນເພື່ອເຮັດໃຫ້ການຮ່ວມມື ທາງດ້ານຍຸດທະສາດຮອບດ້ານ ຂອງສອງກອງທັບລາວ-ຫວຽດນາມ ໝັ້ນຄົງຖະນົງແກ່ນຕະຫຼອດ ກາລະນານ ພ້ອມນັ້ນກໍຍັງໄດ້ເຊັນ ບົດບັນທຶກຊ່ວຍຈຳເຊິ່ງຝ່າຍລາວ ແມ່ນ ສະຫາຍ ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດ ສປປ ລາວ, ຝ່າຍຫວຽດນາມແມ່ນ ສະຫາຍ ພົນເອກ ໂງຊວນລິກ ລັດຖະມົນຕີກະຊວງປ້ອງກັນ ປະເທດ ສສ ຫວຽດນາມ, ມີບັນດາຄະນະນຳທັງສອງກະ ຊວງເຂົ້າຮ່ວມ.
（ແຫຼ່ງຂໍ້ມູນ： ພິດສະໄໝ ສອນວິໄລ/kongthap.gov.la）
