 |
ສູນກາງສະມາຄົມມິດຕະພາບຫວຽດນາມ-ລາວ ໄດ້ວາງອອກບັນດາການເຄື່ອນໄຫວທີ່ອຸດົມສົມບູນ, ມີເນື້ອແທ້ໃນປີ 2019. (ພາບ: ເທ໊ບິ່ງ)
ທີ່ກອງປະຊຸມ, ທ່ານ ເຈີ່ນວັນຕຸ໊ຍ ປະທານສູນກາງສະມາຄົມມິດຕະພາບຫວຽດນາມ-ລາວ ໃຫ້ຮູ້ວ່າ, ເພື່ອປະຕິບັດແຜນນະໂຍບາຍຂອງພັກ, ລັດ, ໃນໄລຍະຜ່ານມາການເຄື່ອນໄຫວພົວພັນຕ່າງປະເທດປະຊາຊົນຫວຽດນາມ-ລາວ ໄດ້ດໍາເນີນໄປຢ່າງເປັນປະຈໍາດ້ວຍຮູບການ, ເນື້ອໃນຕ່າງໆທີ່ອຸດົມສົມບູນ, ຫຼາຍຮູບຫຼາຍແບບ, ມີຄວາມໝາຍແທດຈິງ, ປະກອບສ່ວນເພີ່ມທະວີຄວາມຮັບຮູ້ຂອງມະຫາຊົນ, ພິເສດແມ່ນຄົນລຸ້ນໜຸ່ມ.
ປີ 2019 ແມ່ນປີສະເຫຼີມສະຫຼອງວັນມູນເຊື້ອທະຫານອາສາສະໝັກຫວຽດນາມ ຊ່ວຍເຫຼືອ ລາວ ຄົບຮອບ 70 ປີ (30-10-1949 / 30-10-2019). ດັ່ງນັ້ນ, ສະມາຄົມມິດຕະພາບຫວຽດນາມ-ລາວ ທຸກຂັ້ນໄດ້ເອົາໃຈໃສ່ເປັນພິເສດເຖິງວຽກງານຕອບບຸນແທນຄຸນບັນດາຊ່ຽວຊານ ແລະທະຫານອາສາສະໝັກຫວຽດນາມ ຢູ່ ລາວ; ຢ້ຽມຢາມ ແລະໄວ້ອາໄລຢູ່ບັນດາສຸສານນັກຮົບ ແລະທະຫານອາສາສະໝັກຫວຽດນາມທີ່ເສຍສະຫຼະຊີວິດຢູ່ ລາວ...
ໃນປີ 2019, ສະມາຄົມມິດຕະພາບຫວຽດນາມ-ລາວ ທຸກຂັ້ນໃນທ່ົວປະເທດໄດ້ຜັນຂະຫຍາຍບັນດາການເຄື່ອນໄຫວດ້ວຍຫຼາຍຮູບຫຼາຍແບບ, ອຸດົມສົມບູນ, ມີຄວາມໝາຍ ຄື: ຢ້ຽມຢາມຖາມຂ່າວ, ມອບຂອງຂວັນເນື່ອງໃນໂອກາດບຸນປີໃໝ່ປະຈໍາຊາດຂອງປະຊາຊົນສອງປະເທດຫວຽດນາມ-ລາວ. ສູນກາງສະມາຄົມໄດ້ປຸກລະດົມ ແລະຮຽກຮ້ອງໃຫ້ສະມາຄົມທຸກຂັ້ນ, ບັນດາອົງການ, ວິສາຫະກິດບໍລິຈາກສະໜັບສະໜູນປະຊາຊົນເຂດປະສົບເຄາະຮ້າຍຈາກເຫດເຂື່ອນໄຟຟ້າແຕກຢູ່ແຂວງອັດຕະປື ດ້ວຍເງິນຈຳນວນ 500 ລ້ານດົງ ແລະເຄື່ອງອຸປະກອນ, ເຄື່ອງໃຊ້ທີ່ມີມູນຄ່າອື່ນໆ.
ພິເສດ, ບັນດາການເຄື່ອນໄຫວແລກປ່ຽນຄະນະລະຫວ່າງສອງຝ່າຍດ້ວຍການມີໜ້າຂອງການນໍາຂັ້ນສູງສອງລັດ, ບັນດາການເຄື່ອນໄຫວຕອບບຸນແທນຄຸນ, ກໍ່ສ້າງ ແລະພັດທະນາສະມາຄົມ, ໂຄສະນາສຶກສາໃຫ້ແກ່ນັກຮຽນ, ນັກສຶກສາສອງປະເທດ ຍາມໃດກໍໄດ້ຮັບການຍູ້ແຮງ.
（ແຫຼ່ງຂໍ້ມູນ： ເກື່ອງດັ້ງ/ກປ.ອອນໄລ）
